1 Zuwa dimwenga seuta Belishaza awalalika want'hu wabindile wingi wata ukulu na vilongozi weze wadye nk'hande na kunywa divai hamwenga nawo. 2 Umwo Belishaza andaga akanywa divai asigilaga vigalwe vyombo va zahabu na masawa ivo seuta Nebukadineza ise andaga kavitaha kulawa mwe Nyumba ya Mnungu uko Yelusalemu vigalwe vileke seuta na wakulu na wambizi wakwe na wawele wakwe wavinyweele. 3 Kwaivo wavigalaga viya vyombo va zahabu ivo vatahagwa kulawa mwe Nyumba ya Mnungu uko Yelusalemu, seuta na wakulu na wambizi wakwe na wakaziwe na wawele wakwe niyo wavinyweela. 4 Wanywaga uku wakaitogola milungu idamanywe kwa zahabu na masawa na shaba na kilama na maziti na maiwe.

5 Kwalailaga vidole va mkono wa mnt'hu niyo vawandika mwo lukandula hagihi ne kinala cho lumuli mndani mwe dizumba dya seuta. Seuta auonaga mkono uwo ukawandika. 6 Futa ya seuta yahitukaga, na kogohesa, vimtendile mavindi yakwe yahamizane. 7 Seuta Belishaza abongeelaga kwa izwi kugamba, wasai na Wakalidayo wata mizungu na wagangana wa Babeli. Weze wabule ha seuta, yehe niyo awagamba, "Yeyose naadahe kusoma mawandiko aya na kunigambila ivo yakulonga, naavalwe mavalo ya zambalau na mkufu wa zahabu mwe singo yakwe, naye naande kilongozi wa katatu mwo useuta." 8 Ivo wata mizungu wose wa seuta niyo weza, mna wadundugaga kuyasoma mawandiko ayo na kudunduga kumgambila seuta kugamba nivo yagaaze. 9 Ivo seuta Belishaza engilwagwa ni wogohi naho futa yakwe yahitukaga, wakulu na wambizi wakwe wengilwagwa ni kiyangayanga.

10 Nine dya Betishaza eze eve izwi dya seuta na wakulu na wambizi wakwe, ezaga niyo engila mwo ukumbi we fugo. Niyo agamba, "Weye seuta wikale mazuwa yose. Usekuhituka ifuta yako! 11 Mwo useuta wako eyuko mnt'hu ana muye ywa milungu ikukile mndani mwakwe. Mwo ulongozi wa iso mnt'hu uyo aonekaga kunda na umanyi na ubala na mzungu enga idya ye milungu. Seuta Nebukadineza uyo iso amtendaga kunda mkulu ywa wagangana na wasai na Wakalidayo wata mizungu na walotezi, 12 Uyu Danieli, uyo enk'hagagwa ni iso zina dya Belishaza, mnt'hu uyo aonekaga kunda na umanyi naho mbala naho adaha kutapita sozi, na kugubula mbuli zikefisile. Elo, mwitange Danieli naakutapitile ayo yawandikwe yagaaze."

13 Ivo Danieli egalagwa ho undiilo wa seuta, seuta naye amuuzaga, "Togola weye niwe Danieli, yumwenga mwa wadya watahigwe wegalwe ni tate seuta kulawa isi ya Yuda? 14 Hiva kugamba muye ywa milungu imndani mwako naho kugamba ikwink'ha umanyi na ubala na mizungu. 15 Wata mizungu na wasai weze wegalwe aha vileke wasome na kunitapitila kikulongwa mwa mawandiko aya, mna woho wadundugaga kunitapitila. 16 Mna higambilwa kugamba wadaha kunitapitila mawandiko ayo no kuvumbula mbuli zikefisile. Uneva wadaha kusoma mawandiko aya na kunitapitila, nouvaligwe mavalo ya zambalau na mkufu wa zahabu mwe isingo yako, nounde ukulu ywa katatu mwo useuta."

17 Niho Danieli amhitulaga seuta Belishaza, "Ikala na mageleko yako hegu mwink'ha mnt'hu mtuhu. Hata ivo nenisome mawandiko kwajili ya seuta na kukwink'ha utapita wakwe.

18 "Weye seuta, Mnungu ywa kwe mbingu amwink'haga Nebukadineza uyo iso, useuta na ukulu na nt'hunyo na nt'hogola. 19 Kwajili yo luneka eink'higwe iso, makabila yose ya want'hu na si na want'hu wa kila milosi wazingizaga na kumwogoha. Awakomaga want'hu awo aungaga kuwakoma, naho wadya nakaunga kuwaleka wagima, awalekaga wagima na wadya nakaunga awakweze mwo ukulu, awakwezaga wadya nawo akaunga awaseleze, awaselezaga. 20 Mna eze akonge kunda na wefenyi na kunda mdala na weduvi, ahausagwa kulawa mwe difumbi dyakwe dye kiseuta na kuhokwa ukulu wakwe. 21 Agulusagwa hale na want'hu na kunk'higwa ubala enga wa makala mbago niyo ekala na mp'hunda na kudya mani enga ng'ombe, mwili wakwe wajabazagwa kwa mnyuzu wa kwe mbingu mpaka aho amanyaga kugamba Mnungu Ekulanga niye mkulu mwo useuta wa want'hu naye amwiika kunda seuta mnt'hu yoyose akumuunga.

22 "Mna weye Belishaza, hamwenga na kugamba kuyamanya aya yose hukeseleze, 23 vituhu vakwe kukekweza mwenye mwa Zumbe ywa kwe mbingu. Kwigailwa vint'hu vakwe va mwe nyumba yakwe Mnungu. Weye hamwenga na wakulu na wambizi wako na wakaziyo na wawele wako mwavinyweelaga divai, niyo mwaitogola milungu ya masawa na ya zahabu na ya shaba na ya kilama na ya maiwe matuhu, milungu iyo heikudaha kuona hegu kwiva hegu kumanya. Mna humwogohe Mnungu uyo akuutoza ugima wako na sila zako hezikefisile kwakwe. 24 Ivi nivo vilekele kasigiila mkono uwandike mawandiko aya.

25 "Aya nayo mawandiko yawandikwe, MENEMENE TEKELI NA PELESI 26 utapita wakwe ni uno, MENE, Mnungu kawaza mazuwa yo useuta wako na kuuheleza. 27 TEKELI nuko kugamba, weye kuhimigwa mwe kihimo, mna kuoneka kuhuhisa. 28 PELESI, nuko kugamba, useuta wako upangwa niyo wenk'higwa Wamedi na Wajemi."

29 Aaho seuta Belishaza niyo awagamba wandima akwe wamvale Danieli valo dya zambalau na mkufu wa zahabu mwe singo. Niyo watowa lugong'ondo lwe zimbuli za Danieli kugamba yehe ni kilongozi ywa katatu mwo useuta. 30 Kilo iicho, Belishaza seuta ywa Babeli akomwagwa, 31 niyo Dalio Mmedi enk'higwa useuta akanda na miyaka milongo mtandatu na miidi.