1 "Mwa mazuwa yo uheelo, Mikaeli mtumigwa ywa kwe mbingu, uyo mwamizi ywa want'hu wako naalaile. Nokunde na lupisi lwa makunt'ho kujink'ha lupisi lutuhu lwose, kukongela aho si zakongaga kunda aaho. Mna mwo lupisi ulo kila yumwenga mwa want'hu wako uyo zina dyakwe dyawandikagwa mwe kitabu cho ugima naa yokolwe. 2 Wengi mwa wadya wabanike nawauyuke, watuhu nawapate ugima wa mazuwa yose, watuhu nawo nawapate kubelwa mazuwa yose. 3 Wadya wata mzungu nawang'ale enga ung'azi ivo ukulangaza mwo ulanga na wadya wakuwalongoza watuhu kudamanya ayedi nawang'ale enga nt'hondo mazuwa yose."

4 "Mna weye Danieli mbuli izi ziike mwe kinyele zigubike mwe kitabu na kugela kiwalo mpaka mwo lupisi lwo uheelo. Wengi nawagulukile uko na uko naho umanyi nowongezekele."

5 Niho miye Danieli nakaulaga na kuona want'hu waidi wakimale, yumwenga kakimala mnk'handa yo mto, mtuhu naye nt'hendelo ya kaidi yo mto. 6 Uyu yumwenga ywawe amuuzaga yudya availe suke zing'aile uyo akimalaga mnanga mwa mazi yo mto, "Togola mbuli izi zikutisa neziguhe lupisi lwani mpaka zize zisile?"

7 Namwivaga yudya mnt'hu avaligwe suke zing'aile, uyo andaga mnanga mwa mazi yo mto, aho enulaga mikono yakwe yose miidi kuhinga kwe mbingu, akakelisa kwa zina dya yudya akwikala mazuwa yose, akagamba, "Neinde misimo mitatu na nusu. Mbuli izi zose nezisile aho want'hu wa Mnungu wakeza kuleka kutowana na awo wandaga chotoko cha masulumizo yawe."

8 Naivaga mna himanyize. Niyo namuuza, Zumbe ywangu, "Uheelo wa mbuli izi nezinde ini?"

9 Niyo anigamba, "Danieli weye keitile kwaviya mbuli izi ni kinyele mpaka mwo lupisi lwo uheelo. 10 Want'hu wengi nawakekukize na kuhauswa usavu na kusunt'higwa mna want'hu wavu nawagendeele kudamanya wavu. Hahana hata yumwenga mwa awo waihi akuunga amanye mna wadya wata mzungu nawo wakuunga wamanye.

11 "Kukongela mwo lupisi ludya lwa kuhauswa kwa malavo yo kokwa kila zuwa, kulawa aho mnk'hondo akeza kuika kint'hu cha kuihiza kikuunga kigale makunt'ho mwe Nyumba ya Mnungu, neinde kwa lupisi lwa mazuwa alufu imwenga magana maidi na milongo kenda. 12 Kavikilwa mnt'hu yudya akufinyiliza mpaka mwo uheelo ya mazuwa alufu imwenga magana matatu na milongo matatu na shano!

13 "Mna weye Danieli, ita kakehumuile. Lupisi ulo lukeza kubula nouuyulwe vileke uhokele nt'hunyo yako."