1 Seuta Nebukadineza awagambaga want'hu wakwe wadamanye hili dya zahabu, dyandaga na utali wa mita milongo miidi na mnane na uzangalamu wakwe mita nt'hatu. Aikimalisaga hant'hu hekale nt'hindiga hakwitangwa Dula mwe dijimbo dya Babeli. 2 Seuta uyo awetangaga wakulu na wakimalizi na vilongozi na walangilizi na wadima we kindolo na walamuzi na wakulu wose we dijimbo, vileke weze ko wila wa kukonga kudivika dihili idyo adamanye. 3 Ivo wakulu na wakimalizi na vilongozi na walangilizi na wagwila kodi na wakulu wose we dijimbo wakeduganyaga vileke weze ko wila wa kukonga kudivika dihili idyo adamanye. 4 Niho mtowa lugong'ondo alongaga kwa izwi kulu akagamba, "Nyuwe want'hu we makabila yose na si zose na milosi yose, mwasigilwa kugamba, 5 umwo mkeza kwiva maizwi ya gunda na mluli na kinubi na zeze na mluli mkulu na maizwi yoyose ya vint'hu vo ukemi, vaungwa mfuname hasi na kudivika dihili dye zahabu idyo akimalise seuta Nebukadineza. 6 Naho yeyose uyo heefuname na kudivika, naadulwe lupisi uulo mwe nunda yo moto ukwakisa." 7 Kwa ivo want'hu wose weze weve izwi dya gunda na mluli na kinubi na mazeze na vigoma na zumali na maizwi matuhu yehengi yo ukemi, want'hu wa makabila yose na si na want'hu wa milosi wagwaga hasi na kudivika dihili idyo dya seuta Nebukadineza.

8 Mwo lupisi ulo, wamwenga mwa Wakalidayo wezaga wakawalongeleza Wayahudi. 9 Wamgambaga seuta Nebukadineza, "Weye seuta wikale mazuwa yose! 10 Seuta, nokugamba, kila mnt'hu aneva izwi dya gunda na mluli na kinubi na zeze na kinanda na miluli mikulu na maizwi matuhu ye hengi yo ukemi, vaungwa afuname hasi na kudivika diya dihili dye zahabu, 11 Naho kugamba mnt'hu yeyose heefuname hasi na kudivika milungu iyo, naadulwe mwe nunda yo moto ukwakisa. 12 Weye seuta, weyuko mwa awo Wayahudi uwenk'hile ukulu we zimbuli ze dijimbo dya Babeli awo Shedilaki na Meshaki na Abedinego, want'hu awa hawaitimile sigilizi yako. Walemelaga kudivika dihili ukimalise."

13 Aho Seuta Nebukadineza akanda na maya asigilaga Shedilaki na Meshaki na Abedinego wegalwe kwakwe. Ivo wegalagwa kwa seuta. 14 Seuta Nebukadineza awauzaga, "Togoleni ni kindedi kugamba weye Shedilaki na Meshaki na Abedinego mlemela kuidamanyila ndima milungu yangu naho hamkudivika dihili dye zahabu iyo niikimalise? 15 Haluse mneva naho izwi dya gunda na mluli na king'weng'we na zeze na kinubi na maizwi ya vint'hu vituhu va ukemi, nomfuname hasi na kudivika dihili idyo nidamanye. Mna uneva mnalemela mwo lupisi uulo nomdulwe mwe nunda ikwakisa moto. Hangi ni mnungu yuhi naadahe kuwayokolani mwo udahi wangu?"

16 Niho Shedilaki na Meshaki na Abedinego wamhitula seuta, "Weye Nebukadineza suwe hakikukegombela wenye mwe mbuli ino. 17 Uneva ni ivo Mnungu ywetu uyo kikumvika naakiyokole mwe nunda yo moto uwo, naho naakiyokole kulawa mwo udahi wako weye seuta. 18 Mna hata uneva haakiyokole, zumbe ywangu seuta, chaunga umanye kugamba, hekidivike dihili dyako ne milungu yako ye zahabu iyo udamanye."

19 Niho seuta Nebukadineza andilisaga na maya mwa Shadilaki na Meshaki na Abedinego, niyo futa yakwe yahituka kwa kuihizwa. Ivo asigilaga nunda yo moto ikwezelwe nk'hanana mfungate kujink'ha ivo ikundaga. 20 Naho niyo asigiila mwa awo watowani wakwe wata ludole kujink'ha watuhu wose mwa watowani wakwe wawakake Shedilaki na Meshaki na Abedinego na kuwaduula mwe nunda yo moto ukwakisa. 21 Ivo wabwanga awo wakakagwa wakanda wavala suluali zawe na nk'hazu zawe na vilemba vawe niyo wadulwa mgati mwe nunda yo moto ukwakisa. 22 Sigilizi ya seuta yandaga ya luhahila, udya moto wagimbagwa mwe nunda wandilisaga una luhahila, hata ndilija zo moto zawakomaga wadya want'hu wawegale Shadilaki na Meshaki na Abedinego. 23 Niho Shedilaki na Meshaki na Abedinego wakanda wakakigwa kindedindedi, wadulagwa mwe nunda idya yo moto wandaga ukwakisa. 24 Aho seuta Nebukadineza niyo ehelwagwa, niyo asunguza kwinuka niyo awauza walangilizi wakwe, "Togoleni hakikakile want'hu watatu na kuwadula mwo moto?"

Nawo niyo wamhitula seuta, "Heiye seuta, nivo chatendile!"

25 Niyo auza,"Mna haluse nii naona want'hu wane wakugendagenda mndani yo moto haheina kunyinywa hegu kusha naho mnt'hu wa kane aoneka enga mwana ywa milungu?"

26 Ivo seuta Nebukadineza aitaga hagihi no mnango we nunda yo moto niyo agamba, "Shadilaki na Meshaki na Abedinego, wandima wa Mnungu mkulu ekulanga, foseni kuse mwize uku!" Niyo Shedilaki na Meshaki na Abedinego wafosa mwo moto. 27 Vilongozi wakulu na wakimalizi na vilongozi na walangilizi wa seuta, wose wakeduganyaga na kuwazunguluka, waonaga kugamba udya umoto noudunduga kuwoka want'hu awo watatu. Fili zawe hazashaga naho mavalo yawe hayashele naho hawandaga na p'hofa yeyose yo moto mwe mili yawe.

28 Seuta Nebukadineza niyo agamba, "Atogolwe Mnungu ywa Shedilaki na Meshaki na Abedinego, kwaviya amtumaga mtumigwa ywa kwe mbingu na kuwayokola wandima wakwe awo wamhuwilaga. Awa walemelaga kutimila sigilizi ya seuta naho wazumilaga hata kubanika kujink'ha kuidamanyila ndima hegu kuvika milungu mituhu ila Mnungu ywawe ekedu.

29 "Kwaivo nasigiila kugamba want'hu we dikabila dyodyose na si yoyose na milosi yoyose awo wakuunga walonge kint'hu chochose kiihile mwa Mnungu ywa Shedilaki na Meshaki na Abedinego, nawatulwe vibesu besu. Nyumba zawe nazo nezimoligwe kwaviya hahana mnungu mtuhu akudaha kuyokola enga ivi."

30 Ivo seuta Nebukadineza awaongezela ukulu Shedilaki na Meshaki na Abedinego wande wakulu mwe dijimbo dya Babeli.