1 Mwo mwaka wa nk'hongo wo kulongoza kwakwe seuta Belishaza ywa Babeli, Danieli alotaga sozi na kuona maona akanda kagona mwo lusazi lwakwe. Awandikaga isozi iyo na kutambalisa ayo aonaga. 2 Danieli niyo agamba, mwa maona yangu aho nekilo, naonaga mp'heho kulawa nt'hendelo nne kwe si zikavumila mwe bahali nk'hulu. 3 Makala makulu mane, yafosaga mwe bahali iyo kila dimwenga divituhu na weyawe. 4 Kala dya nk'hongo dyandaga enga simba naho dyandaga na mawawa enga ya ngwilizi. Handa nikei nakaula mawawa yakwe yahausagwa, nadyo niyo dyenuka na kukimala enga mnt'hu. Niyo dyenk'higwa umanyi wa mnt'hu.

5 Kala dya kaidi dyandaga enga kala dikwitangwa dubu idyo nt'hendelo yakwe imwenga yandaga inukila. Mwo mnomo wakwe dyafundaga mbavu nt'hatu dizitozeleze na meno yakwe. Nevaga izwi dikadigamba, "Haya dya nyama zibindile wingi!"

6 Akajika aho naonaga kala tuhu, idyo dyandaga enga sui ina mawawa mane ya dege mwo mgongo wakwe, naho dyandaga na mitwi mine. Kala idyo dyenk'higwagwa udahi wa kulongoza.

7 Naho mwa maona yangu ya nekilo, naonaga kala dya kane dya kwehela na kutisa, dina ludole vitendese. Idi dyandaga na meno makulu ya kilama. Kala idyo dyadyaga na kutulatula vibesu besu na kujatangiza ayo yasigale. Kala idi hiyo enga yadya makala matuhu matatu kwaviya dyandaga na mahembe mlongo. 8 Umwo nandaga nakaula mahembe ayo naonaga luhembe lutuhu ludodo lwahotaga mgati mwa yadya mlongo. Mahembe matatu ya ya nk'hongo yang'olwagwa. Naho mwe luhembe ulo lundodo mwandaga na meso enga meso ya mnt'hu na mnomo wandaga ukalonga mbuli za kukeduvya.

9 Umwo nandaga nikei nakaula, fumbi dye kiseuta dyaikwagwa aho, Mdala ywa kale ezaga niyo ekala, yehe avalaga suke ing'aile mbee na fili zakwe zang'alaga mbee. Fumbi dyakwe dye kiseuta dyandaga na ndilija za moto na vitozelezo ve difumbi dyakwe vandaga moto ukukweela. 10 Kazuto ka moto kandaga kaseela kulawa ho undiilo wakwe, maalufu kwa maalufu niyo ya mvika, mamilioni ya want'hu wakimalaga ho undiilo wakwe. Kitala chakongaga niyo vitabu vagubulwa.

11 Nagendeelaga kukaula kwajili ya idya mbuli ya kukeduvya ilongigwe ne mp'hembe idya. Nakaulaga mpaka dikala diya dikachinjigwa, mwili wakwe nawo waduulwagwa mwo moto niyo washa taka. 12 Makala yadya amatuhu yahambulwagwa udahi wawe mna woho wenye walekagwa wagendeele kwikala kwa lupisi lugihi.

13 Mwa maona ya nekilo, naonaga yumwenga enga mwana mnt'hu akeza mwe mavunde, amwitilaga yudya Mdala ywa Kale niyo wanigala ho undiilo wakwe. 14 Niyo enk'higwa udahi na ukulu na useuta vileke want'hu wa makabila yose na si yose na milosi yose wamvike. Ulongozi wakwe hounde na uheelo na useuta wakwe houbanangwe.

15 Miye Danieli naonaga maona nogohaga na kunda na kiyangayanga mwo moyo wangu. 16 Nasogelaga hagihi ha yumwenga mwa wadya wakimale hadya niyo namlombeza anigambile mwa aya yose. Ivo anigambilaga utapita wa maona ayo yose. 17 "Makala ayo amane ni maseuta wane wakulu wakuunga walaile mwe isi. 18 Mna wakukile wa Mnungu ywa kulanga nawenk'higwe useuta naho nounde wawe mazuwa yose."

19 Nehaunga nimanye mbuli ya diya dikala dya kane idyo dyandaga divituhu mwa weyewe wose. Dikala dya kwehela naho dyatisisa, idyo dyandaga na meno ya kilama na nk'hombe za shaba. Meno yakwe yandaga ni kwajili ya kubwant'ha na kutulatula, zinyayo zakwe nazo ni kujatangiza ayo yasigale. 20 Naho naungaga nimanye ziya zimp'hembe mlongo izo dyandaga nazo mwo mtwi wakwe hamwenga ne mp'hembe nt'huhu imwenga ikelavile mwe ziya zint'hatu za nk'hongo zing'okile, idya mp'hembe yandaga na meso na mnomo ivo yalongaga mbuli za kukeduvya iyo yaonekaga kunda na udahi kujink'ha zimp'hembe zint'huhu.

21 Umwo nandaga hakaula mp'hembe iyo yandaga ikatowana nk'hondo na wakukile niyo yawahuma, 22 mna yudya Mdala ywa kale enukaga niyo awenk'ha uwagilwa wakukile wa Mnungu naho lupisi lwize lubule awo wakukile niyo wenk'higwa useuta.

23 Niyo anigamba, "Kala idyo dya kane ni useuta wa kane uwo ukuunga ulaile mwe isi. Useuta uwo nounde haukiligana na useuta mtuhu, nawo nouibanange si yose, noiijate na kuitula vibesubesu. 24 Ziya zimp'hembe mlongo ni maseuta mlongo awo wakuunga walaile mwo useuta uwo. Akajink'ha seuta mtuhu naalaile. Useuta uwo nounde uvituhu kwa wadya walongole, naye naawagwese maseuta watatu. 25 Uyo naalonge mbuli za kukeduvya ho undiilo wa Mnungu Mkulu na kuwasulumiza wakukile wa Mnungu. naageze kuhitula mazuwa yawe ye kinyemi ne zisigilizi. Want'hu wa Mnungu nawagelwe mwo udahi wakwe kwa lupisi lwa miyaka mitatu na nusu. 26 Mna kitala cha kwe mbingu nekikale na kusengela, naho udahi wakwe nouhauswe na kubanangwa pele mazuwa yose. 27 Useuta na udahi na ukulu wo useuta wose mwe isi nawenk'higwe want'hu wakukile wa Mnungu mkulu. Useuta wawe nounde wa mazuwa yose, na wakulu wose nawaweve na kukeseleza kwawe."

28 Uno nuwo uheelo wa mbuli ino. Fanyanyi zangu miye Danieli zanitendaga nogohe valekaga langi ye ifuta yangu ihituke, mna hyaijalaga mbuli iyo.