1 Mwo mwaka wa katatu wa kulongoza kwakwe seuta Belishaza, miye Danieli naonaga maona matuhu ukaleka yadya maona ya nk'hongo naonaga. 2 Mwe maona aya miye nakeonaga ni mwo mzi ukwitangwa Shushani mwe dijimbo dya Elamu, mzi uzungulusilwe gomela. Mwa maona ayo nakeonaga hikimala hank'handa ho mto Ulai. 3 Nize nikaule naonaga dolome dikimala hank'handa yo mto uwo, dolome idyo dyandaga na mahembe maidi matali mna hembe dimwenga dyandilisaga tali naho dyaijink'haga diya tuhu. 4 Nadionaga didolome diya dikatowana kuhinga usweelo wa zuwa na kwa mkoma mahanya na kwa mwenye mzi. Hahana kala dyodyose dyadahile kuhigana ne didolome idyo hegu yoyose adahaga kukeyokola kulawa mwo udahi wakwe. Dyatendaga vovose ivo dyaungaga naho niyo dyakulisa.

5 Umwo nandaga hafanyanya mwe imbuli ino, naonaga vulata dimwenga dina hembe dimwenga dikulise kulawa hagatigati ya meso yakwe. Dyandaga dikapilika kwa kugulukisa mwe si yose haheina kukwafa hasi mwe si. 6 Vulata idyo dyezaga na kudibasa diya didolome dina mahembe maidi nidione dikimala hank'handa ho mto. Vulata idyo dyakonga kuditowa didolome dya mahembe maidi kwa maya yakwe yose. 7 Nadionaga divulata dye dihembe dimwenga dikadisogeela diya didolome dya mahembe maidi. Vulata diya dyandaga na maya vitendese. Dyaditowaga diya didolome dya mahembe maidi. Didolome diya hadyandaga na ludole lwa kuhigana ne divulata. Ivo vulata dyadikinyaga hasi diya didolome na kudisint'hila hasi. Hakwandaga na yeyose adahaga kudiyokola didolome diya kulawa mwo udahi we divulata.

8 Vulata diya dyakulisaga, mna kwo uheelo wo ludole lwakwe, luhembe lwakwe lutali lwavunikaga niyo hant'hu hakwe hahota mp'hembe nt'huhu nk'hulu nne zihingile nt'hendelo nne za si. 9 Mwe imwenga ye mp'hembe izo izine kwahotaga mp'hembe nt'huhu ndodo, iyo nayo yakulisaga niyo yenela kuhinga nt'hendelo ya kwa mwenye mzi na ulailo wa zuwa na kuhinga kwe isi itendese uwedi. 10 Luhembe ulo lwakulisaga niyo lwabula mpaka kwe viumbwa va kulanga izo zint'hondo, niyo lwazikinya hasi nt'hondo zimwenga na kuzijatangiza. 11 Luhembe ulo lwakefanyanyaga kunda lukulu kumjink'ha mkulu ywe viumbwa va kwe mbingu. Niyo lwahausa zint'hambiko zo kokwa ziya naakatambikilwa Mkulu ywe viumbwa va kwe mbingu. Na kuhalonga vihile ho ukalo wakwe. 12 Want'hu wa Mnungu wauzumilaga ulongozi wo luhembe, ivo wasagukaga kwa Mnungu naho walulavilaga nt'hambiko uluhembe na kuleka kumlavila Mnungu, luhembe ulwo lwawatendaga want'hu waleke kuhuwila ikindedi naho lwandaga lwadaha kudamanya kila icho nolukaunga kudamanya.

13 Naho namwivaga akukile yumwenga akalonga na akukile miyawe akamgamba, "Togola, mbuli zilongigwe mwa maona aya nezigendeele mpaka ini? Malavo ya kokwa za kila zuwa nayasigale mwo kuzaganywa kwa lupisi lwani? Naho ni kwa lupisi lwani kuzaganya na kubananga kila kint'hu nevigendeele na Nyumba ya Mnungu hamwenga nedifyo dya kwe mbingu vigendeele kujatangizwa?"

14 Yudya akukile ywa nk'hongo amhitulaga miyawe, akamgamba, "Ni kwa lupisi lwa mtondo na visingi alufu mbili na magana matatu, niho Nyumba ya Mnungu neikukizwe naho."

15 Miye Danieli nize niyaone maona aya naho nize nigeze kuyakombaganya, aaho yumwenga enga mnt'hu akimalaga aho nandile, 16 niyo neva izwi dya mnt'hu diketanga kulawa mwo mto Ulai, "Gabilieli, mgambile mnt'hu uyo maona ayo uyaone." 17 Gabilieli ezaga hagihi na hadya hant'hu nikimale, nogohesaga valekaga hafika madi hasi. Mna yehe niyo anigamba,

"Weye mnt'hu, umanye kugamba maona ayo uyaone yalagisa mazuwa yo uheelo." 18 Umwo andaga akalonga na miye, natozagwa na nt'hongo uku handa higona kifulifuli, mna yehe anitozaga na kunikimalisa, 19 niyo anigamba, "Tegeleza hugambile, yadya yakuunga yeze yalaile mwo lupisi lwa maya ya Mnungu, kwaviya maona aya yalagisa mazuwa yo uheelo wiikigwe.

20 "Indolome idya ye zimp'hembe zimbili uzione zakimala hant'hu ha useuta wa Umedi na Uwajemi. 21 Divulata dina mazoya mengi dyakimala hant'hu ha seuta ywa Uyunani, diya dihembe dikulu mgati mwa meso yakwe ni seuta ywa nk'hongo. 22 Diya dihembe divunike niyo hant'hu hadya halaila mahembe mane, nuko kugamba useuta uwo noukepange kunda seuta nne, mna useuta uwo hounde no ludole enga udya useuta wa nk'hongo.

23 "Umwo useuta wawe ukeza mpaka kwo uheelo, na wiihi wawe nawo mpaka kwo uheelo, niho neenuke seuta mta luhahila naho mta umanyi wa nyambi. 24 Naande na ludole mna hiyo kwa udahi wakwe mwenye, naadamanye ubanangi wa kutisa naho naadahe kudamanya chochose akuunga. Naawabanange want'hu wakulu na want'hu wa Mnungu. 25 Kwa upapala wakwe naande mpati mwe mizungu yakwe ya nyambi naye naakeone mwenye kunda ni ywedi kujink'ha yeyose. Want'hu wengi wakakeone kunda hawana uwo, mna kumbe yehe naande kawabananga pele haheina wenye kukemanya. Naho naaunge atowane no Mkulu ywa wakulu, mna naabanangwe pele ikanda hiyo kwa udahi wa mnt'hu. 26 Maona ayo mwe malavo ya kisingi na ya mtondo ayo ni ya kindedi, mna uyafise kwaviya ni kinyele naho nolwomboke lupisi lutali mpaka aho yakeza kukint'hizwa."

27 Umwo nayaonaga maona ayo, miye Danieli nasokelesaga niyo nanda mnyonge mwo lusazi kwa mazuwa yabindile wingi. Mna nenukilaga na kudamanya zindima za seuta. Mna maona yadya yaneheelaga, naho hyadahile kuyakombaganya.