1 Mwo mwaka wa nk'hongo wa kulongoza kwakwe Dalio, mwana Ahusuelo mwelekwa ywa Wamedi uyo atendagwa kilongozi mwo useuta wa Babeli, 2 miye Danieli nandaga nehasoma kwa wengele vitabu viwandikwe Mbuli ya Mnungu iyo amgambilaga mlotezi Yelemia. Mwe mbuli iyo Yelemia awandikaga kugamba, Yelusalemu neikeza kumoligwa pele niyo yasigala mank'halank'hala kwa lupisi lwa miyaka milongo mfungate. 3 Ivo elo namlombezaga Zumbe Mnungu kwa moyo wangu wose, hamwenga na kufunga, navalaga valo dya gunia na kukebulugiza maivu kulagisa kinyulu changu. 4 Namlombezaga Zumbe Mnungu, Mnungu ywangu na kweiila kwajili yo wavu hagamba,

"Zumbe Mnungu ywangu, Mnungu mkulu ywa kutunywa. Weye ywi mhuwilwa mwa malagano na mbazi kwa wadya wakukuunga, na wakudamanya yadya ukuwagamba wadamanye.

5 "Kidamanya wavu na kudamanya yaihile. Kinda waihi na kusaguka, kileka malagizo ne zisigilizi zako. 6 Hakiwategeleze wandima wako walotezi awo walongaga na maseuta wetu na wakulu wetu na wakale wetu na want'hu wose we isi. 7 Zumbe, weye umuwagilwa mna suwe kingila soni mazuwa yose. Mbuli ino ni kindedi kwetu suwe wose kikwikala mwo mzi wa Yuda na mzi wa Yelusalemu na Izilaeli yose na mwe isi za hale uko uwasambazile kwaviya hakindile wahuwilwa kwako. 8 Zumbe ywangu, suwe na maseuta wetu na wakulu wetu na wakale wetu kingila soni kwaviya kikudamanyila wavu. 9 Zumbe Mnungu ywetu ni mta mbazi naho wawausila want'hu wavu wawe hata uneva wadamanya wiihi, 10 naho nekilemela kukutegeleza weye Zumbe Mnungu ywetu, hakitimile sigilizi zako izo ukink'hile kwombokela kwa wandima wako walotezi. 11 Waizilaeli wose waileka sigilizi yako, niyo walemela kuzumila ayo ukulonga. Kwaviya wakudamanyila wavu, ivo waligitwa na vilapi viwandikwe mwe sigilizi ya Musa mndima ywako. 12 Kwaivo kukint'hiza yadya ulongile kwetu na vilongozi wetu kwa kukigaila ubanangi mkulu mwo mzi wetu. Naho, mwe si hakunati kulaile kint'hu enga icho kilaile Yelusalemu, 13 enga ivo iwandikwe mwe sigilizi ya Musa, ubanangi uno wose wizile kwetu, mpaka ivi haluse hakinati kikweiile kwako kwa kuleka wavu wetu na kuufanyanya uhuwilwa wako. 14 Kwaivo weye Zumbe Mnungu, Mnungu ywetu, kukeika lumwe kukisulumiza, naho niyo watenda ivo kwaviya mazuwa yose weye ayo ukudamanya ni uwagilwa, mna suwe hakikutegeleze.

15 "Haluse weye Zumbe Mnungu ywetu mta ludole uwalavile want'hu wako Misili na kuditenda zina dyako ditunywe mpaka ivi haluse, chagamba kidamanya wavu na uwihi. 16 Zumbe ywangu, viligane na ivo ukudamanya kwa uwagilwa, usekunda na maya no mzi wako Yelusalemu mnima wako ukukile. Wavu wetu no wiihi wa wakale wetu kiutenda Yelusalemu na want'hu wako vinde vint'hu va kubelwa ni wadya wose wakizunguluke. 17 Haluse, weye Mnungu ywetu, tegeleza kulombeza kwangu miye mndima ywako. Kwa mbazi zako uizenge uhya Nyumba yako iyo imoligwe. 18 Tegeleza weye Zumbe Mnungu ywangu, kaula uone makunt'ho kinanayo na ivo wili mzi uwo ukwitangwa kwa zina dyako. Hakikukulombeza kwaviya kidamanya yakukuwagila, mna ni kwajili ye zimbazi zako zinyingi. 19 Zumbe ywangu, utegeleze, ukiusile wavu, weye Zumbe, utegeleze naho usekwikalisa, kwajili ye nt'hogola yako. Weye Zumbe Mnungu ywangu kwajili yo mzi uno na weli want'hu wako mwenye."

20 Ivo umwo nandaga hagendeela kulombeza na kukeseleza kuhausilwa wavu wa want'hu wangu wa Izilaeli na kudamanya malombezo yangu kwa Zumbe Mnungu kwajili yo mnima wakwe ukukile, 21 umwo handaga nikei mwe kulombeza yudya Gabilieli uyo nimuone mwe maona aho nk'hongo, anizilaga kwa nguzu hant'hu aho nindile. Yandaga mwo lupisi lwa kulava malavo ya kisingi. 22 Ivo anigambaga, "Danieli haluse hiza kukwink'ha mzungu na udahi wa kumanya ayo maona. 23 Umwo nakongaga kulombeza, Mnungu alavaga uhituzi, name hiza kukugambila uhituzi uwo kwaviya weye kuungiswa ni Mnungu. Kwaivo utegeleze kwa wengele uhituzi uwo na kumanya maona aya.

24 "Lupisi lwa majuma mfungate, uwikwa kwajili ya want'hu wako na mwo mzi wako ukukile vileke masa yasile na kuuheleza wavu na wiihi na kwigala uwagilwa wa mazuwa yose, na kugela kiwalo maona na ulotezi na kumhaka mavuta uyo eli akukile. 25 Ivo umanye na kukombaganya mbuli ino. Kukongela umwo ilavigwe sigilizi ya kuuzenga uh'ya mzi wa Yelusalemu mpaka kwiza kuhakigwa mavuta, yudya asagulwe, ni lupisi lwa majuma mfungate. Majuma milongo mtandatu na maidi, mzi wa Yelusalemu nouzengwe uh'ya, una sila nk'hulu na mabome makulu, mna mwo lupisi ulo nolunde lwa makunt'ho. 26 Umwo yakeza komboka majuma ayo milongo mtandatu na maidi, yudya kilongozi asagulwe ni Mnungu naakomwe naho haasigale na kint'hu. Mzi ne Nyumba ya Mnungu nevibanangwe ne difyo dya watowani dya uyo mkulu akuunga eze. Uheelo wakwe nowize ubule enga lawo ivo dikubananga kila kint'hu, kukanda na nk'hondo na ubanangi enga ivo viikigwe ni Mnungu. 27 Kilongozi uyo naaike mwivano na want'hu wengi kwa juma dimwenga. Hagati ye dijuma idyo naaheleze nt'hambiko na malavo. Hant'hu ha kulanga he Nyumba ya Mnungu naadikimalise ihizo dyo ubanangi nadyo nedisigale aho mpaka yudya adikimalise akeza kukomwa enga ivo aikile Mnungu mwenye."