1 Mwo mwaka wa katatu wo kulongoza kwakwe Yoakimu uyo andaga seuta ywa Yuda, Nebukadineza uyo andaga seuta ywa Babeli aukump'hukilaga na kuutowa mzi wa Yelusalemu. 2 Zumbe Mnungu amtendaga seuta Nebukadineza amgwile seuta Yoakimu na kuvitaha vint'hu vimwenga va mwe Nyuma ya Mnungu. Wavugailwa wamwenga awegalaga kwe nyumba ye milungu yakwe uko Babeli, no kuviika vint'hu ivo kwe vyumba ye milungu yakwe.

3 Ivo Seuta amgambaga mkulu ywa wandima wakwe uyo Ashepenazi amsaguile wamwenga mwa Waizilaeli kulawa mwe zimp'huga ze kiseuta hamwenga na ziya zina nt'hunyo. 4 Awo wande wabwanga watana naho wamanyi, wahinizwe vedi naho wahufu kukehiniza, heweina lema dyodyose, wakuunga wazumilwe kunda mwe nyumba ye kiseuta. Ashepenazi nakaungwa kuwahiniza kusoma na kuwandika ulosi we Kibabeli. 5 Naho seuta Nebukadineza kasigiila kugamba want'hu awo kila zuwa wenk'higwe nk'hande yedi enga iidya akudya seuta kwa miyaka mitatu vileke weze wakimale ho undiilo wa seuta. 6 Mwa awo wabwanga wasagulwe wandaga uumwo ni Danieli na Hanania na Mishaeli na Azalia. Woseni awa wandaga ni we dikabila dya Yuda. 7 Mkulu ywa wambizi wa seuta awenk'haga mazina mah'ya. Danieli etangagwa niye Belishaza, Hanania etangagwa niye Shedilaki, Mishaeli etangagwa niye Meshaki, Azalia naye etangagwa Abenego.

8 Mna Danieli afanyanyaga mwo moyo wakwe kugamba asekulemelwa ni Mnungu kwa kudya nk'hande hegu kunywa divai ya kiseuta, ivo amlombezaga yudya mkulu ywa wambizi ywa seuta amzumile kugamba asekulemelwa ni Mnungu kwa kudya hegu kwa kunywa divai ya kiseuta. 9 Ivo Mnungu atendaga Danieli aonelwe mbazi ni uyo mkulu ywa wandima wa Nebukadineza akwitangwa Ashepenazi. 10 Mna yudya mkulu ywa wandima wa Nebukadineza amgambaga Danieli, "Namogoha zumbe ywangu seuta, uyo asigiile uludyo lwenyu. Nii awaoneni kunda hamdamane zifuta zenyu viligane na weenyu we dilika dyenyu? Nomleke hakomwa ni seuta kwajili yenyu."

11 Ivo Danieli amgambaga yudya mwamizi uyo aikigwe ni Ashepenazi kunda mkimalizi ywa Danieli na Hanania na Mishaeli na Azalia, 12 "Chakulombeza ukigeze kwa mazuwa mlongo," "Ukink'he mboga za mani kidye na mazi yo kunywa du, 13 akajika ukiliganyize na awo want'hu wadile uludyo lwa kiseuta, naho ukatende viligane na ivo nouone."

14 Ivo mkimalizi yudya awazumilaga niyo awageza mwa idyo kwa mazuwa mlongo. 15 Mazuwa mlongo yeze yabule, yaonekaga kugamba woho wandaga wadamana naho wandaga na ludole lukint'hile kujink'ha wadya wadyaga uludyo lwa seuta. 16 Kukongela aho, yudya mkimalizi hawenk'haga nk'hande ya kiseuta, mna agendeelaga kuwenk'ha mboga za mani na mazi yo kunywa du.

17 Mnungu awenk'haga umanyi na ubala awo wabwanga awane, na kukombaganya mwe vint'hu vingi na kukehiniza. Naho Danieli andaga na umanyi wa kutapita maona na sozi.

18 Lupisi lwiikigwe ni seuta lwo kuwegala kwakwe lwize lubule, Ashapenezi awegalaga awo want'hu wose kwa Nebukadineza seuta. 19 Seuta alongaga nawo wose, mna hakwandaga na want'hu waonekanaga kunda enga ivo wandaga Danieli na Hanania na Mishaeli na Azalia, ivo awo wazumilagwa kukimaila ndima ha seuta. 20 Mbuli yoyose yauzagwa ni seuta, wabwanga awa awane waonekaga kunda na mizungu na umanyi kujink'ha walaguzi na wasai mwo useuta wose. 21 Danieli agendeelaga kunda mndima mwe nyumba ye kiseuta mpaka mwo mwaka wa nk'hongo wa seuta Koleshi.