1 Mwo mwaka wa nk'hongo wa kulongoza kwake seuta Dalio Mmedi, nakimalaga kumwambiza na kumgela ludole. 2 Haluse nohugambile kindedi cha mbuli izi."

"Maseuta watuhu watatu nawalaile mwe Uwajemi akajika naalaile seuta ywa kane, uyo naande mgoli kujink'ha watuhu wose. Umwo anapata ludole kwajili ya ugoli wakwe, naakonge kuutowa useuta wa Uyunani.

3 "Akajika naalaile seuta mta ludole, uyo naalongoze kwa udahi mkulu na kudamanya ivo akuunga. 4 Hata ivo umwo ananda na ludole useuta wakwe noubanike na kukepanga mwe nt'hendelo nne za kwe mbingu. Welekwa wakwe hawawalongoze hegu useuta wakwe hounde mwo udahi wa ukipe akuilongoza kwaviya useuta wakwe nouguhigwe ni watuhu.

5 "Seuta ywa Misili naande na ludole mna yumwenga ywa wakulu wa watoni wakwe naande na ludole kujimnk'ha yehe, naho ulongozi wakwe nounde utoga. 6 Akajika myaka migeke nawalungane hamwenga, mwana kike ywa kiseuta ywa Misili naalombigwe kwa seuta ywa Silia vileke wande hamwenga, mna hawagendeele kunda na ludole naho, seuta na welekwa wakwe hawafinyilize, naho uyo mwana kike na mwanawe na watumwa wa kivele awo akuita nawo wose nawakomwe. 7 Akajika yumwenga mwa wana wo lukolo lwa uyo mwanakike naande seuta, uyo naawakump'hukile watowani wa seuta ywa Silia na kwingila mwa magomela yawe kwa uhumi. 8 Naatahe milungu yawe na mahili yawe na vyombo vawe va yombe va masawa na zahabu naho naaite navo kwe isi ya Misili. Kwa lupisi lwa miyaka migeke, seuta ywa Misili haamkup'hukile seuta ywa Silia. 9 Mna mwo lupisi lukwiza seuta ywa Silia naamkup'hukile seuta ywa Misili, mna naaungwe kuuya mpaka kwe isi yakwe.

10 "Hamwenga na ayo, wana wa seuta ywa Silia naaduganye fyo kulu dya watowani na kukeika lumwe kwa nk'hondo. Fyo idyo dya watowani nedihagile isi enga malawo heyekukindilwa, na kugendeela na nk'hondo mpaka mwe digomela dya seuta ywa Misili. 11 Akajika seuta ywa kwa Misili naakump'huke akanda na maya akatowane na seuta ywa Silia. Seuta ywa Silia naye naaduganye fyo kulu dya watowani mna nedihumwe. 12 Umwo seuta ywa Misili akeza kudihuma vihile fyo dya watowani wa Silia na kukoma maalufu, aho niho nawakeduvye, mna haagendeele kunda mhumi.

13 "Kwaviya seuta ywa Silia naaduganye fyo kulu dya watowani kujink'ha diya dya nk'hongo, akajika mwe miyaka heikumanyika naauye na na fyo kulu dya watowani na vitowanilo vingi. 14 Mwo lupisi ulo want'hu wengi nawasaguke kwa seuta ywa Misili. Want'hu waihi wa si yako weye Danieli nawasaguke vileke wakint'hize maona aya, mna hawapate uhumi. 15 Niho seuta ywa Silia neeze na kuuzunguluka mzi uwo una gomela ditogile niyo autaha. Watowani wa Misili nawaswese ludole lwa kuwakindila naho hata watowani wawe wadahi wata umanyi wa nk'hondo hawadahe kutowana. 16 Uyo seuta ywa Silia naadamanye ivo vikumwelela, haheina yoyose akudaha kumhiga. Naaikaile isi Iyedi naho naande na udahi wa kuibananga pele.

17 "Uyo seuta ywa Silia akuunga akump'hukile naaike mzungu wa kwiza na fyo dya watowani wakwe wose, naho naaike mwiivano na utondowazi na seuta ywa Misili. Naye neenk'hize mwanawe ywe kike alombigwe naye vileke unde mzungu wa kuukinya useuta uwo, mna mizungu iyo heidahike naho hamwambize dyodyose. 18 Akajika naazihitukile na kuzikump'hukila isi nyingi zi mnk'handa ye bahali nakuzitaha, mna mkulu ywa watowani mtakwiza naamhume weduvi wakwe, na kumtenda uyo seuta ywa Silia aleke kukeduvya. 19 Akajika naauye kwa magomela ye isi yakwe mwenye mna naahumwe na kukomwa.

20 "Akajika aho neeze seuta mtuhu naalongoze, uyo naasigile mtoza kodi awatigize want'hu walihe kodi vileke agenyeze ugoli wo useuta wakwe. Hata ivo mwa mazuwa mageke seuta uyo naakomwe. Mna haakomwe kwa maya hegu kwa nk'hondo."

21 Mtumigwa ywa kwe mbingu agendeelaga kulonga kugamba, Seuta akutimila kulawa Silia naande ni mnt'hu aihile, heekuungwa kunda seuta, mna neeze kwa kwitukiza, naho naauguhe useuta uwo kwa nyambi. 22 Yeyose akuunga amhige hata ananda mlavant'hambiko mkulu ywa Mnungu naakomigwe. 23 Naho naadamanye mwivano na vilongozi wa si nt'huhu kwa nyambi mna nawazidant'hilize, yehe naagendeele kupata ludole hamwenga na kugamba naalongoze si ndodo. 24 Fyo dyakwe dya watowani nediyakump'hukile na kuyatowa majimbo yana ugoli, na kudamanya vint'hu heviinati vidamanywe hata na wakale wakwe. Akajika naawapangile want'hu wakwe ivint'hu atahile kwe nk'hondo. Naho naaike mizungu ya kuukump'hukila mizi una magomela, mna mbuli izo zose heziikalise kwa lupisi lutali.

25 Mna kwa kukeduvya kwakwe naaduganye fyo kulu dya watowani vileke amkump'hukile seuta ywa Misili uyo naakeike lumwe atowane na fyo kulu dina udahi. Mna seuta uyu ywa Misili naatendelwe nyambi vikuunga vimtende ahumwe. 26 Walangilizi wakwe wa hagihi nawo wakuunga wamkome pele. Watowani wakwe wengi nawakomwe, naho fyo dyakwe dya watowani nedihagiilwe hale. 27 Mna maseuta awo waidi umwo wakanda hamwenga ho ludyo nawadant'hilizane kwaviya myoyo yawe neitaile kudamanya wiihi, mbuli iyo heikint'he kwaviya uheelo nounde mwo lupisi lwiikigwe. 28 Seuta ywa Silia nediuye mwe isi yakwe akanda na ugoli mwingi atahile. Mna umwo akauya umoyo wakwe noutaile kuwakoma want'hu we ndagano ya Mnungu. Naadamanye vikumwelela akajika naauye mwe isi yakwe.

29 Mwo lupisi lwiikigwe ni Mnungu naaikump'hukile naho isi ya Misili, mna mwo lupisi ulu mbuli hezikale vedi kwakwe enga ivo andile ligane. 30 Want'hu wa Loma naho ikwitangwa Kitimu naweze ne zimeli vileke wamhige, yehe naye engila wogohi.

Ivo nandilise na maya, naho naauye kunyuma akataila kuibananga dini ya want'hu wa Mnungu. Yehe naatimile ulangilizi wa wadya walekile indagano ya Mnungu. 31 Watowani wakwe wat nayite na kugela usavu digomela dye Nyuma ya Mnungu, naho naahause malavo ya kokwa ya kila zuwa na kukimalisa ihizo dya ubanangi uko mwe Nyumba ya Mnungu. 32 Naawaluvye kwa nyambi zakwe wadya wasaguke mwe ndagano, mna wahuwilwa wa Mnungu nawakimale watogile na kugendeela. 33 Vilongozi wa Izilaeli wata mzungu nawawahinize want'hu wengi, hata ivo kwa mazuwa mageke nawakomwe kwa sime na kwa moto, na kuhokwa ugoli wawe. 34 Umwo wakakomwa want'hu wa Mnungu nawapate wambizi ludodo, mna wengi nawatimilane nawo kwa milosi ya utondwe. 35 Wamwenga mwa awo vilongozi wata mzungu nawakomwe vileke wahauswe usavu na kusunt'hwa, mpaka mwo lupisi lwo uheelo lwiikigwe ulwo holwinati lubule kwa ivi haluse.

36 Seuta ywa Silia naadamanye enga ivo akuunga. naaketunye na kukeduvya kugamba yehe ni mkulu kujink'ha milungu yose na kumhomola Mnungu. Naagendeele kudamanya ivo mpaka aho Mnungu naamsengele, kwaviya kiya kitailwe ni Mnungu kikint'he. 37 Seuta uyo haitunye milungu ya wakale wakwe, ikanda niyudya mnungu akuungiswa ni wavele na milungu mituhu yoyose, kwaviya naakeike kunda mkulu kujink'ha milungu yose, 38 vituhu vakwe naamtunye mnungu akwamila magomela. kwaviya naamtunye uyo mnungu kwa kumlavila zahabu na masawa na maiwe ya yombe kulu na mageleko matuhu ya ugoli. 39 Naayamile magomela yakwe yatogile kwa wambizi wa milungu ya wata kwiza. Naawenk'he nt'hunyo nk'hulu wakumzumila kugamba yehe niye seuta. Naawakweze kunda wakulu mwo undima wawe na kuwapangila viwasa na nk'honde.

40 "Mwo lupisi lwo uheelo wa seuta ywa Silia naatowane nk'hondo na seuta ywa Misili. Seuta ywa Silia naye naamkup'hukile kwa magali ya nk'hondo, na watowani wakugendeza falasi na meli wabindile wingi. Naazikup'hukile isi nyingi na komboka mwe isi izo enga malao. 41 Naaikup'hukile hata isi idya ya Izilaeli na kukoma maalufu ya want'hu. Mna isi ya Edomu na Moabu na hant'hu hakulu ha Amoni neziyokolwe kulawa mwo udahi wakwe. 42 Umwo anazikup'hukila isi izo, hata isi ya Misili heihone. 43 Naaguhe kindolo cha zahabu na masawa na vint'hu vose va yombe va mwe isi ya Misili. Want'hu wa Libia na want'hu wa Esiopia nawande want'hu wakwe.

44 "Mna ulosi kulawa ulailo wa zuwa na kwa mwenye mzi nezimtise, naye naahalawe kwa kundilisa na maya na kuwakoma want'hu wengi. 45 Akajika naakimalise mahema yakwe ya kiseuta mnk'handa ye bahali no mnima wa Mnungu. Hata ivo naabanike naho hahana yoyose naamwambize."