1 Miye seuta Nebukadineza, nawawandikila nyuwe want'hu wa makabila yose na si zose na wa milosi yose mwe isi.

Utondowazi unde kwenyu. 2 Hiona vedi kuwagambila kilagiso na mbuli zo kwehela ayo Mnungu ywa kulanga anilagise.

3 kaula ivo vili vilagiso va Mnungu!

Mbuli zakwe zo kwehela ni nk'hulu!

Useuta wakwe ni wa mazuwa yose, kulawa cheleko mpaka cheleko.

4 "Miye Nebukadineza nandaga kaya kwe dizumba dyangu dye kiseuta handa naonela kinyemi wikazi wangu, naho kugamba kila kint'hu changu chanigendela vedi. 5 Nalotaga sozi yanigelaga wogohi. Umwo nandaga higona mwo lusazi lwangu, sozi na maona izo zanombokelaga zanitendaga nogohese. 6 Ivo nasiigilaga kugamba nigailwe want'hu wose wata mizungu wa Babeli vileke wanigambile sozi iyo. 7 Mna weze weze wagangana na watowa milamulo na walaguzi na Wakalidayo, nawagambilaga isozi yangu mna hawadahaga kunigambila kiya kikulongwa mwe sozi. 8 Uko uuko, Danieli uyo zina dyakwe etangagwa Beliteshaza, ezaga kwangu. danieli uyo akwitangwa Beliteshaza, kwa kutimila dizina dya dya mnungu ywangu, uyo muye ywe milungu ikwikala mwakwe. miye namgambilaga sozi yangu, hamgamba, 9 Beliteshaza weye mkulu ywa wagangana, himanya kugamba muye ywe milungu yeekala mwako, naho hahana mbuli ye kinyele ukuidunduga. haluse unigambile isozi yangu naho unigambile kugambile yagaaze.

10 "Umwo nandaga higona mwo lusazi lwangu, mwa maona yangu naonaga mti utendese ukulu hagatigati ye isi. 11 Mti udya wandaga mkulu utendese naho utoga, utali wakwe wabulaga mpaka kwe mbingu, wandaga wauona kila hant'hu mwe isi. 12 Mani yakwe yandaga yedi. Wandaga umema matunda mengi, mndani mwake kwandaga na nk'hande kwajili ya want'hu wose. Makala mbago yose wekelaga hasi he mp'heho yo mti uwo. Madege ulanga nayo yekalaga mwa matambi yakwe. Viumbwa vose vapataga nk'hande kulawa mwo mti uwo.

13 "Umwo nandaga nikei higona mwo lusazi lwangu naonaga mwamizi akukile andile akaseela kulawa kwe mbingu. 14 Andaga akabilikiza kwa izwi kulu niyo agamba, ‘Kant'heni mti uno naho yakant'heni matambi yakwe, yahauseni mani naho myamwaganise matunda yakwe. Na makala ye hasi yakwe yanyilike na madege yapuluke kulawa mwe matambi. 15 Mna lekeni disiki dyakwe na maizi yakwe mwo ulongo, dikanda dikakigwa kwa kilama na shaba, isigale mwo ulongo mwa mani ya mwe nyika.

"‘Mlekeni ajabazwe nu mnyuzu wa kwe mbingu, naho mlekeni ekale hamwenga na makala mbago, mgatigati mwa maziti. 16 Umanyi wakwe uhitulwe kulawa udya wa mnt'hu enk'higwe umanyi wa kala, mpaka lwomboke lupisi lwa miyaka mfungate. 17 Ulamuzi uno wiza kwa lagizo dya wamizi, usengelo uno ni lugong'ondo lwa wakukile vileke want'hu wose mwe isi kila hant'hu, wamanye kugamba Mnungu Mkulu ana udahi mwo useuta wose wa wat'hu, yehe amwink'ha mnt'hu akumuunga naho amtenda mkulu hata mwa wadya wabeligwe mwa want'hu.’

18 "Seuta niyo agamba." "Ino niyo sozi nilotile." "Haluse weye Beliteshaza unigambile kilongingwe mwe sozi ino, kwaviya wata mzungu wose mwo useuta wangu wadunduga kunitapitila, mna weye wadaha kwaviya muye ywe milungu ikukile imndani mwako."

19 Niho Danieli uyo etangwe zina dya Beliteshaza, ehelwagwa kwa lupisi, fanyanyi zakwe nazo zamgelaga kinyulu. Seuta amgambaga, "Beliteshaza, sozi iyo hegu utapita wakwe vise kukwitusa."

Beliteshaza niyo amhitula, "Zumbe ywangu, sozi ino nevinda vedi inde ya awo wakukuihiya, utapita wakwe nawo unde kwa wank'hondo wako." 20 Mti uuone ukanda mkulu naho mtali, uwo matambi yakwe matali yakubula kwe mbingu, nawo noukaonekela kila hant'hu mwe isi. 21 Mani yakwe yakanda yedi na matunda yakwe mengi kwajili ya kuwenk'ha nk'hande viumbwa vose, makala mbago nayo yekala mwe mp'heho yakwe, naho madege ulanga nayo yazenga vyaila mwa matambi yakwe.

22 "Zumbe ywangu Seuta, weye niwe umti uwo. Kunda mkulu na mta ludole. Ukulu wako ubula mpaka kwe mbingu, naho useuta wako wenela mpaka kwo uheelo we isi. 23 Zumbe ywangu seuta wamuonaga mwamizi uyo akukile akaseela kulawa kwe mbingu niyo agamba, ‘Ukant'heni mti uno mkaubanange, mna lekeni disiki na maizi yakwe ikanda yakakigwa kwa kilama na kwa shaba, kwa mani ya mwe nyika umwo maizi yakwe yakanda yasigala mwo ulongo.Mlekeni mnt'hu uyo ajabazwe ni mnyuzu wa kwe mbingu ekale hamwenga na makala mbago kwa miyaka mfungate.’

24 "Zumbe ywangu seuta, uno nuwo utapita wakwe, naho ino niyo sigilizi ya ekulanga vitendese ailavile mwa zumbe ywangu seuta. 25 Weye nouguluswe hale na want'hu noukale hamwenga na makala ya kwe mbago noudye mani enga ng'ombe, noujabale kwa mnyuzu wa kwe mbingu. Noukale kwa lupisi lwa miyaka mfungate aho noumanye kugamba Mnungu niye mta udahi mwo useuta wa want'hu, naho amwink'ha mnt'hu yeyose naaunge. 26 Sigilizi ya kudileka disiki na maizi yo mti uwo mwo ulongo, nuko kugamba nowize uvuzilwe naho useuta wako aho ukeza kukombaganya kugamba Mnungu ywa kwe mbingu niye akulongoza. 27 Kwaivo, weye seuta ywangu tegeleza ulangilizi wangu. Leka uwavu wako no uwihi wako, udamanye uwagilwa na kuwaonela mbazi wakiwa, vadahika mbuli zako nezigendeele vedi mwa mazuwa yakwiza."

28 Ayo yose yamlailaga seuta Nebukadineza. 29 Ize ibule miezi mlongo na mbili, seuta Nebukadineza andaga akagenda mnanga mwe dizumba dye kiseuta dizengigwe enga tembe mwo mzi wa Babeli. 30 Asinyaga kuse niyo agamba, "Uno ni mzi mkulu wa Babeli niuzengile kwa udahi wangu, hiuzenga mzi uno wedi unde ukalo wa kiseuta kwajili yo ukulu wangu"

31 Umwo eze alonge ayo, izwi kulawa kwe mbingu niyo dyagamba, "Weye seuta Nebukadineza, ulosi uno ni kwajili yako. Weye kuhokigwa useuta uno. 32 Nouguluswe hale na want'hu, ukekale hamwenga na makala mbago kwe nyika, noudye mani enga ng'ombe, nowikale ivo kwa lupisi lwa miyaka mfungate mpaka umanye kugamba Mnungu niye mta udahi mwo useuta wa want'hu naho amwink'ha useuta mnt'hu yeyose akumuunga."

33 Aaho mbuli iyo ilongigwe yakint'haga mwa seuta Nebukadineza. Agulusagwa hale na want'hu, akanda adya mani enga ng'ombe na mwili wakwe wajabalaga mnyuzu wa kwe mbingu fili zakwe nazo zandaga nt'hali enga mazoya ya kinga, makombe yakwe yandaga enga makombe ya ngwilizi.

34 Wize ubule uheelo wa idya miyaka mfungate, miye Nebukadineza nakaulaga kwe mbingu, umanyi wangu waniuiyaga. Niho namtogola Mnungu ywa kwe mbingu na kumtunya yehe ywa mazuwa yose.

Yehe alongoza mazuwa yose,

useuta wakwe hauna uheelo.

35 Want'hu wose mwe isi awaona hiyo kint'hu.

Watumigwa wa kwe mbingu na want'hu wa mwe isi

we mwo udahi wakwe.

Hahali yeyose akudaha kumkindila asekutenda yakumwelela,

hegu kumuuza dyodyose mwa yadya akudamanya?

36 "Mwo lupisi ulwo umanyi wangu umwo wize uniuiye, nt'hogola yangu na ukulu wangu navuzilagwa kwajili ya ukulu wo useuta wangu. Walangilizi wangu na vilongozi wambizi wangu wezaga kunizungula, name navuzagwa mwe difumbi dyangu dyo useuta niyo nanda mkulu kujink'ha aho nk'hongo.

37 "Haluse, miye Nebukadineza, namtogola na kumtunya Seuta ywa kwe mbingu. Kwaviya udamanyi wakwe wose ni wa uwagilwa naye uwaseleza wata kukeduvya."