Milagres de Jesus

Yesu kankuwaponiziya wanalwisi wawili

27 Yesu kawukiti pahala paliya na pakaweriti kankugendagenda, wanalwisi wawili wanjiti kumfata. Womberi wabotanga, "Gutuwoneri lusungu Mwana gwa Dawudi!"

28 Yesu pakingiriti mnumba, wanalwisi wawili wamgendera, nayomberi kawakosiya, "Hashi, mjimira handa neni nana uwezu wa kuwaponiziya?"

Womberi wamwankula, "Yina mtuwa!"

29 Shakapanu Yesu kagashinkula masu gawu, kalonga, "Na iweri kwa mwenga ntambu yamjimira!" 30 Na masu gawu gawera makomu. Su Yesu kawalagalira, "Namumgambira muntu yoseri shitwatila ashi!"

31 Kumbiti womberi wawuka na wabwera visoweru vya Yesu pa isi ilii yoseri.

Yesu kankuwaponiziya wanalwisi wawili

29 Yesu pamuhera na wantumintumi wakuwi pawaweriti wankuwuka lushi lwa Yeriku, lipinga likulu lya wantu limfatiti. 30 Su kuweriti na wanalwisi wawili walivaga pampeku pa njira, wapikaniriti kuwera Yesu kankupita peni paliya, su wanjiti kubotanga, "Mtuwa, Mwana gwa Dawudi! Gutuwoneri lusungu!"

31 Lipinga lya wantu liwakalipira na kuwagambira wanyamali. Kumbiti womberi wongera kubotanga, "Mtuwa, Mwana gwa Dawudi! Gutuwoneri lusungu!"

32 Yesu kagoloka kawashema womberi. Su kawakosiya, "Mfira nuwatenderi shishi?"

33 Womberi wamwankula, "Mtuwa, tuluwa kuwona!"

34 Su Yesu kawawonera lusungu, kawashinkula masu gawu, na palaa paliya waweziti kuwona na wamfatiti.

Yesu kamuponiziya kanalwisi ku Betisayida

22 Yesu kasokiti Betisayida pamuhera na wantumintumi wakuwi. Aku wantu wamjega kanalwisi yumu, wamluwa Yesu kamkoli. 23 Yesu kamkola liwoku kanalwisi uliya, kamjega kunja kushijiji. Kamtemera mata mumasu kamtulila mawoku, kamkosiya, "Guweza kuwona shintu shoseri?"

24 Kanalwisi uliya kalola, katakula, "Nuwawona wantu wawoneka gambira mitera yankugendagenda."

25 Su Yesu kamtulila kayi mawoku mmasu, yomberi katumula masu. Uwezu wakuwi wa kulola umwuyira, kalola kila shintu weri. 26 Yesu kamgambira gugendi zaku ukaya na kumuhimiziya, naguwuya kushijiji shilii.

Yesu kankumponiziya muntu kana majogu na bebi

31 Shakapanu Yesu kawuka mulushi lwa Tiru, kapitira Sidoni, kasoka litanda lya Galilaya kwa kupitira mukowa lushi lilongu. 32 Su wamjegera muntu kana majogu viraa bebi, wamluwa kamtulili mawoku. 33 Yesu kamtura kutali na wantu. Katula vyala vyakuwi mumakutu mwa muntu uliya. Katema mata na kumshinkula lulimi. 34 Shakapanu kalola kumpindi kwa Mlungu, kapumula na kumgambira, "Efata," mana yakuwi, "Guvuguki!"

35 Palaa makutu gakuwi gavuguka na lulimi lwakuwi luyoposoka, kanja kutakula weri. 36 Yesu kawabeliziya nawamgambiziya muntu yoseri vitwatira avi. Kumbiti ntambu yakawabeleriti, ndo ntambu yawendereyiti kubwera shisoweru ashi. 37 Wantu walikangasha nentu. Watakula, "Katenda vyoseri viheri, kawatenda wanamajogu kupikanira na bebi kutakula!"

Yesu kankumponiziya lwisi Baritulumayu

46 Su wasoka Yeriku, Yesu na wafundwa wakuwi pamuhera na lipinga likulu lya wantu, pakaweriti kankulawa mulushi alu, kweniti kana lwisi mluwa yawamshema Baritulumayu mwana gwa Timayu, kaweriti kalivaga mbwega mwa njira. 47 Baritulumayu pakapikaniriti handa Yesu gwa Nazareti kankupita pahala palii, kabotanga, "Yesu, Mwana gwa Dawudi gumoneli lusungu!"

48 Wantu wavua wamkalapira, "Gunyamali." Kumbiti yomberi kongera kushema, "Mwana gwa Dawudi gumoneri lusungu!"

49 Yesu kagolokiti, katakula, "Mumshemi."

Su wamshema kana lwisi ulii, wamgambira, "Gulikakamaziyi! Gugoloki, yomberi kakushema."

50 Yomberi kasa lihabiti lyakuwi, kakopoka, kamgendera Yesu.

51 Yesu kamkosiya, "Gufira nukutenderi shishi?"

Kanalwisi ulii kamgambira, "Mfunda nduwa mpati kuwona."

52 Yesu kamgambira, "Gugendi, njimiru yaku ikuponiziya."

Pala palii kana lwisi ulii kaweza kuwona na kamfata Yesu munjira.

Yesu kamuponiziya Muntu kana lwisi

35 Yesu pakaweriti kapakwegera na Yeriku, kuweriti na muntu yakana lwisi yakalivagiti panjira pakaluwa. 36 Pakapikaniriti lipinga lya wantu lyankupita kakosiya, "Kwana shishi?"

37 Womberi wamgambira, "Yesu gwa Nazareti kankupita."

38 Nayomberi kalila kwa liziwu likulu, "Yesu! Mwana gwa Dawudi! Gumoneri lusungu!"

39 Wantu yawalongoleriti wamkalipira pawamgambira kanyamalili. Kumbiti yomberi kendereyiti kubotanga, "Mwana gwa Dawudi! Gumoneri lusungu!"

40 Yesu kagolokiti, na kawagambira wamjegeri muntu kana lwisi ulii. Muntu kana lwisi pakasokiti pakwegela, Yesu kamkosiya, 41 "Gufira nukutenderi shishi?"

Nayomberi kawankula, "Mtuwa nduwa mpati kuwona kayi."

42 Yesu kamgambira, "Guwoni! Kwakunjimira kwaku, ndo gupona."

43 Pala palii, kaweza kuwona, na kamgendera Yesu, kalonga mayagashii kwa Mlungu. Lipinga lya wantu pawawoniti hangu, wamkwisiti Mlungu.

Yesu kankumponiziya muntu yakwiwukiti lwisi

1 Yesu pakaweriti kankupita, kamwoniti muntu yumu kana lwisi kwanjira kwiwuka. 2 Wafundwa wakuwi wamkosiya, "Mfunda! Hashi, gaa ndo yakatenda vidoda vyavimtenda muntu ayu kayiwuki pakawera lwisi? Hashi, vidoda vyakuwi mweni ama vidoda vya walera wakuwi?"

3 Yesu kawankula, "Shitwatira ashi shilawira ndiri toziya ya vidoda vyakuwi yomberi, ama vidoda vya walelwa wakuwi, ira kiwuka lwisi su makakala ga Mlungu gawonikani gatenda lihengu mwakuwi. 4 Kuweri kwankali paliwala tufiruwa kwendeleya kutenda lihengu lya ulii yakantumiti, mana pashiru peni pankwiza muntu hapeni kawezi kutenda lihengu. 5 Shaka nankali pasipanu, neni ndo gulangala gwa pasipanu."

6 Pakatakuliti kala aga, katema mata pasi, kalitenda linkandiga, kamswagaziya mumasu ulii yakawera na lwisi, 7 kamgambira, "Gugendi na gwakalifyankuli palitanda lya Silowamu." Mana ya litawu ali ndo "Yawamtumiti". Muntu kana lwisi ulii kagenda na kulifyankula kulitanda lya Siloamu, shakapanu kawuya pakawera kankuwona.

2 Su, kiziti muntu yumu kana ungumbula, kamsuntamira Yesu na kutakula, "Mtuwa, pagufira, guweza kumpunga neni!"

3 Yesu kanyosha liwoku lyakuwi na kamshinkula na kumgambira, "Nfira! Gupungwi." Palaa palii muntu ulii kawera mkomu. 4 Shakapanu Yesu kamgambira yomberi, "Gupikaniri! Nagumgambira muntu yoseri, kumbiti gugendi gwakalilanguziyi kwa mtambika gwa numba ya Mlungu, gulaviyi tambiku ntambu yakalagiliriti Musa su kila muntu kavimani handa gupona."

2 Wantu wamu wamjegiti muntu yakalewelekiti nshimba, wamgonjeka mulisaga. Yesu pakawoniti njimiru yawu, kamgambira muntu yakalewelekiti, "Naguwera na lyoga mwana gwangu! Gulegiziwa vidoda vyagutenditi."

3 Wafunda wamu wa Malagaliru wanja kulitakulira weni, "Muntu ayu kankumwigilanga Mlungu!"

4 Yesu kagamaniti maholu gawu, su kawagambira, "Iwera hashi mwankulihola vitwatira vidoda? 5 Hashi, shizotopa ng’anji shii, ‘Kutakula vidoda vyagutenditi vilekiziwa,’ ama kutakula, ‘Gugoloki na gugendigendi’? 6 Hanuwalanguziyi kuwera Mwana gwa Muntu kana uwezu pasipanu wa kuwalekeziya wantu vidoda vyawatenda." Su kamgambira muntu yakalewelekiti, "Gugoloki, gutoli lisaga lyaku na gugendi ukaya kwaku."

7 Muntu yakalewelekiti kagoloka na kagenda ukaya kwakuwi.

10 Kuweriti na muntu yakaweriti na liwoku lyalilewelekiti. Su wantu wamkosiyiti Yesu, "Hashi, iherepa kumponiziya muntu mulishaka lya Kwoyera?" Womberi wamkosiyiti hangu su wapati kumsitaki.

11 Yesu kawankula, "Handa kwana yumu gwenu kana kondolu na kaguwiriti mulirindi mulishaka lya Kwoyera? Hashi, hakamkoli ndiri na kumlaviya?" 12 Na muntu kana mana nentu kuliku kondolu! Su Lilagaliru lyetu litulekeziya kutenda gaherepa mulishaka lya kwoyera. 13 Shakapanu Yesu kamgambira muntu ulii yakalewelekiti liwoku, "Gutalipisiyi liwoku lyaku."

Yomberi katalipisiya liwoku na liwera likomu gambira liwoku limonga.

30 Pawasokiti palii, womberi wamgambiriti Yesu kuwera nahonga gwa Simoni kapyupa kagonja mushitanda. 31 Su Yesu kamgendera mlweri, kamkola liwoku na kumgolosiya, mawu ulii kawera mkomu na kanja kuwatelekera.

Yesu kankumponiziya muntu yakawera na ungumbula

40 Mungumbula yumu kamgenderiti Yesu kasuntumala na kamluwa, "Pagufira gumweni gumpungi neni."

41 Yesu kamwonera lusungu nentu, kamkola liwoku kalonga, "Neni nfira, gupungwi." 42 Palaa palii Muntu ungumbula umlekeziya.

3 Su wantu wamu wiziti pawamjega muntu yakalewelekiti, yomberi kapapitwi na wantu wamsheshi. 4 Toziya wantu waweriti wavuwa, wasinditi kumjega pakwegera na Yesu. Su wabomoliti pashitwiku pahala pakaweriti Yesu. Shapakanu wamsulusiya muntu ulii yakalewelekiti pakawera mulisaga. 5 Yesu pakawoniti njimiru yawu, kamgambiriti muntu ulii yakalewelekiti, "Mwana gwangu, vidoda vyakuwi vilekiziwa."

6 Wafunda wamu wa Malagaliru ga Musa waweriti walivaga kweni aku, walihola mumyoyu mwawu, 7 "Iwera ashi muntu ayu kankutakula ntambu ayi? Ayu kankumwigilanga Mlungu! Gani kawezi kulekiziya vidoda? Mlungu gweka yakuwi ndiri?"

8 Pala palii Yesu kashimana shilii shawaliholiti mumyoyu mwawu. Yomberi kawakosiya, "Ashashi mwankulihola hangu mumyoyu mwenu? 9 Shizotopa ng’anji shii, kumgambira muntu yakalewelekiti, ‘Vidoda vyaku vilekiziwa’ ama kumgambira, ‘Gwimuki, gutoli lisaga lyaku gugendi?’ 10 Su nfira muvimani kuwera Mwana gwa Muntu kana uwezu gwa kulekiziya vidoda pasipanu." Shapakanu kamgambira muntu ulii yakalewelekiti, 11 "Nukugambira, gugoloki, gutoli lisaga lyaku, gugendi ukaya kwaku!"

12 Yomberi kagoloka, palaa palii kanyasula lisaga lyakuwi kagendagenda pakalolwa na wantu woseri. Woseri walikangasha, wamkwisa Mlungu pawalonga, "Hatweniwoni shintu gambira ashi nakamu!"

Yesu kankumponiziya muntu yakawera na liwoku lyalilewelekiti

1 Shapakanu Yesu kingira kayi munumba ya Mlungu. Mlii paweriti na muntu yakawera na liwoku lyalilewelekiti. 2 Wantu wamu waweriti wankumlola su wawoni handa hakamponiziyi muntu ulii mulishaka lya kwoyera su wapati toziya ya kumsitaki. 3 Yesu kamgambira muntu ulii yakaweriti na liwoku lyalilewelekiti, "Gwizi panu." 4 Shapakanu Yesu kawakosiya wantu, "Hashi, lyoshi lyaliherepa mulishaka lya kwoyera, kutenda gaherepa ama gadoda? Kumponiziya muntu ama kulaga?"

Kumbiti womberi wanyamalira jii. 5 Yesu kawalola wantu woseri walii kwa maya, kahinginikiti nentu toziya ya ukamala wa myoyu mwawu. Shapakanu kamgambira muntu ulii, "Gunyoshi liwoku lyaku." Yomberi kanyosha, pala palii liwoku lyakuwi lipona nakamu!

Yesu kamuponiziya muntu kana ugumbula

12 Su Yesu pakaweriti mulushi, kuweriti na muntu yakana ugumbula. Pakamwoniti Yesu, kasuntama makukama kulongolu kwa Yesu kamluwa pakalonga, "Mtuwa pagufira gumweni, guweza gumpungi neni."

13 Yesu kalitalapisiya liwoku lyakuwi na kumshinkula pakalonga, "Neni nfira hangu, gupungwi!" Pala palii ugumbula umlekeziya.

18 Wantu wamu wiziti pawampapa mulisaga muntu yakalewelekiti, wajeriti kumwingiziya mnumba su wamtuli palongolu pa Yesu. 19 Toziya ya lipinga lya wantu, wasinditi kwingira nayomberi mnumba. Su wamkweniziya mlweri ulii pashitwiku, wadonola pampindi palitala, shakapanu wamseleziya mlweri ulii mulisaga lyakuwi mpaka pakati kulongolu kwa Yesu. Wantu wamsheshi wankumsulusiya mlweri kupitira palitala. 20 Yesu pakawoniti njimiru yawu nkulu, kamgambiriti mlweri ulii, "Ganja gwangu, vidoda vyaku vilekiziwa."

21 Wafunda wa Malagaliru na Mafalisayu su wanja kulikosiya pawalonga, "Ayu muntu gaa, kamwigilanga Mlungu! Mlungu gweka yakuwi ndo kaweza kulekiziya vidoda."

22 Yesu kavimaniti kala vyawaliholiti su kawakosiya, "Hashi, mulihola hangu mumyoyu mwenu? 23 Shoshi shikamala, ‘Kulonga vidoda vyaku vilekiziwa,’ ama kutakula, ‘Gugoloki na gugendigendi?’ 24 Nfira muvimani, Mwana gwa Muntu kana uwezu pasipanu wa kulekiziya vidoda." Su kamgambiriti muntu yakalewelekiti, "Nankugambira, gugoloki na gutoli mkeka gwaku na gugendi ukaya kwaku!"

25 Pala palii muntu ulii yakalewelekiti kagoloka kulongolu kwawu woseri, katola mkeka gwakuwi na kugendagenda na kagenditi ukaya pakamkwisa Mlungu.

Muntu kana liwoku lilewelekiti

6 Lishaka lyamonga lya kwoyera Yesu kingiriti mnumba ya Mlungu kufunda. Kuweriti na muntu mlaa yakaweriti na liwoku lya kumliwu lyalilewelekiti. 7 Wafunda wamu wa Malagaliru na Mafalisayu wamu wasakuliti shisoweru sha kumsitaki Yesu, su waweriti wankumuhepelera waloli handa hakamponiziyi muntu mulishaka lya kwoyera. 8 Kumbiti Yesu kavimaniti kala shawaliholiti, su kamgambiriti muntu yakeniti na liwoku lyalilewelekiti, "Gugoloki, gwizi panu palongolu." Muntu ulii kimuka na kugoloka palii. 9 Su Yesu kawagambira, "Nukukosiyani, Lilagaliru litujimira twenga kutenda shishi mulishaka lya kwoyera? Kuponiziya ama kulaga? Kugalopoziya makaliru ga muntu ama kugalaga?" 10 Kawaloliti wega zoseri, shakapanu Kamgambira muntu yakeniti na liwoku lyalilewelekiti, "Gulitalipisiyi liwoku lyaku." Yomberi kalitalipisiya liwoku lyakuwi na liwera kayi likomu.

Yesu kamuponiziya mtumini gwa Mkulu gwa Warumi

1 Yesu pakamaliriti kutakula vyoseri kwa wantu, kagenditi Kafarinaumu. 2 Mkulu gwa wanjagila miya yimu kaweriti na ntumini yakamfiriti nentu. Ntumintumi kaweriti kalwala tashitashi. 3 Mkulu ulii pakapikaniriti visoweru vya Yesu, kawatumiti wazewi wa Shiyawudi kumluwa kizi kamuponiziyi ntumintumi gwakuwi. 4 Wagenditi kwa Yesu na kumuhiga nentu pawalonga, "Muntu ayu kafiruwa gumtenderi shitwatila ashi. 5 Kawafira wantu wetu na mweni katunyawira numba ya Mlungu."

6 Su Yesu kagenda pamuhera na womberi. Pakaweriti pakwegera na ukaya kwa mkulu ulii, mkulu ulii kawatumiti waganja wakuwi wamgambiri Yesu, "Mtuwa naguligaziya hera. Gwenga gufiruwa ndiri kwingira mnumba mwangu, 7 na neni mona nfaa ndiri ata kwiza kwa gwenga. Kumbiti gutakuli hera, ntumintumi gwangu hakaweri mkomu. 8 Mana neni viraa namuntu gwa pasi pa ukulu, nanawa wamanjagila yanuwalongoziyiti. Panumgambira yumu, ‘Gugendi!’ Yomberi kagenda na panumgambira yumonga, ‘Gwizi!’ Yomberi kiza na panumgambira ntumintumi gwangu, ‘Gutendi shintu ashi!’ Nayomberi katenda."

9 Yesu pakapikaniriti hangu kalikangasha, su kaligalambukiriti lipinga lya wantu lyalimfatiti pakalonga, "Nankuwagambirani, mpata ndiri kuwona muntu kana njimiru gambira ayu Muisraeli!"

10 Wantu walii pawasokiti ukaya kwa Mkulu wamwoniti ntumintumi ulii kawera mkomu nakamu.

11 Palii peniti na mdala yakeniti na shamshera yakamtenda kalwali mivinja lilongu na nane, kaweriti na shibyongu ata kasinditi kugoloka. 12 Yesu pakamwoniti kamshema, "Mawu, su guponiziwa ulweli waku!"

13 Kamtulila mawoku gakuwi, na palaa palii shibyongu shihuka na kawera safi, su kamkwisiti Mlungu.

Yesu kamuponiziyiti muntu yakalwala

1 Lishaka limu lya kwoyera, Yesu kagenditi kuliya shiboga kwa yumu gwa walongoziya wa Mafalisayu, na wantu yawaweriti palii waweriti wankumlola handa hakatendi shishi. 2 Muntu kana magulu na mawoku gakuwi gatutuma, kamwiziliti Yesu, 3 na Yesu kawakosiyiti wafunda wa Malagaliru na Mafalisayu, "Hashi, Lilagaliru lya twenga litulekeziya kuponiziya mulishaka lya kwoyera?"

4 Kumbiti womberi watakula ndiri shintu. Yesu kamshinkula muntu ulii na kumponiziya na kamleka kagendi zyakuwi.

Yesu kankuwaponiziya wangumbula lilongu

11 Yesu pakaweriti mumwanja kugenda Yerusalemu, kapitiliti mumipaka mwa Samariya na Galilaya. 12 Pakaweriti kankwingira pashijiji, kaliwoniti na wantu lilongu yawaweriti na ungumbula. Wagolokiti kwa kutali 13 na wabotanga pawalonga, "Yesu! Mtuwa! Gutuwoneri lusungu!"

14 Yesu kawawoniti na kawagambira, "Mgendi mwakaliwonisiyi kwa mkulu gwa ludewa."

Pawaweriti munjira wankugenda su wapungikiti. 15 Yumu pakati pawu pakawoniti handa kapona, kawuyiti pakamkwisa Mlungu kwa liziwu likulu. 16 Kasuntama makukama pa magulu ga Yesu nakulonga mayagashii kwa Yesu. Muntu ulii kaweriti Msamariya. 17 Yesu kalonga, "Kuweriti na wantu lilongu yawapungitwi, wakoshi walii wamonga tisa? 18 Iwera ashi muhenga ayu gweka yakuwi ndo kiza kumkwisa Mlungu?" 19 Na Yesu kamgambira, "Gugoloki na gugendi, njimiru yaku ikuponiziya."

Yesu kankumponiziya muntu

1 Shakapanu, Yesu kagenditi Yerusalemu kumsambu gwa Wayawudi. 2 Kulaa Yerusalemu, pakwegera na ligomi gwawagushemiti Ligomi lwa kondolu, kweniti na litanda lyawalishemiti kwa Shiebraniya Betizata, liweriti na seemu midamu muhanu. 3 Lipinga likulu lya walweli walivagiti seemu azi, wanalwisi na wavibyeketu na yawalewelekiti. Su waweriti wankuhepera mashi gatimbuki, 4 toziya ntumintumi gwa kumpindi kulawa kwa Mtuwa kila mala pakiza na kugatimbula mashi. Mlweri gwa kwanja kwingira mumashi pagatimbuka kaponiziwa. 5 Paliya paweriti na muntu yumu yakalwaliti kwa shaka sha mivinja malongu mitatu na nane. 6 Yesu pakamwoniti muntu uliya kagonja paliya na kavimaniti kuwera kalwariti kwa shaka shivuwa, su kamkosiyiti, "Hashi, gufira guponi?"

7 Muntu yakalwala kankula, "Mtuwa, kwahera muntu panu gwankuntula mumashi shaka mashi pagatimbuka. Panjeriti kwingira kumbiti kila mala, muntu yumonga kanongulera."

8 Yesu kamgambira, "Gugoloki, gutoli lisaga lyaku gugendigendi." 9 Palaa paliya muntu uliya kapona. Kagutoliti lisaga lyakuwi na kanja kugendagenda.

Shitwatila ashi shitendikiti Mulishaka lya kwoyera.

46 Su Yesu kawuyiti kayi Kana mumkowa gwa Galilaya, pahala pakagalambuziti mashi kuwera divayi.Ofisa gwa sirikali kaweriti paliya mwana gwakuwi kaweriti kalwala ku Kafarinaumu. 47 Pakapikaniriti handa Yesu kankwiza Galilaya pakalawila Yudeya, kamgendiriti yomberi na kumgambira kagendi Kaferinawumu na kamuponiziyi mwana gwakuwi, yakaweriti sambira kahowa. 48 Yesu kamgambira, "Pamwona ndiri malangaliru na mauzauza, hapeni mjimiri!"

49 Afisa ulii kamwankula, "Mtuwa, tugendi pamuhera vinu, mwana hakeni howi."

50 Yesu kamgambira, "Gugendi, mwana gwaku hakaweri mkomu!"

Muntu uliya kavimaniti visoweru vya Yesu, su kagenda zakuwi. 51 Pakaweriti kankali munjira kuwuya ukaya kaliwoniti na wantumintumi wakuwi pawamjegera visoweru, "Muntemba gwakuwi kawera mkomu!"

52 Kawakosiya shaka gaa mwana gwakuwi pakaweriti mkomu na womberi wamwankula, "Iweriti saa saba paliwala lishu nshimba kupyupa paimlekeziyiti." 53 Tati uliya kaliholiti kuwera shaka shiliya ndo Yesu pakamgambiriti, "Mwana gwaku hakaweri mkomu." Su mweni pamuhera na kaya yakuwi yoseri wamjimira Yesu.

54 Liuzauza ali ndo lya pili lyakatenditi Yesu pakaweriti kankulawa Yudeya na kugenda Galilaya.

20 Mdala yakaweriti mlweri gwa kusuma mwazi kwa mivinja lilongu na mbili, kamwiziriti Yesu kumbeli na kuyishinkula nguwu yakuwi. 21 Kalihola mumoyu mwakuwi, "Handa panshinkula nguwu, haweri mkomu."

22 Su, Yesu kagalambuka kamwona, kamgambira, "Mhinga gwangu, nagwana lyoga! Njimiru yaku ikuponiziya." Pala palii mdala ulii kapona kusuma mwazi.

25 Panu paweriti na mdala yumu kawera na ulweri wa kusuma mwazi kwa mivinja lilongu na mbili. 26 Mdala ulii katabikiti nentu kwa kuwagendera waganga wavuwa na kamaliriti kila shintu shakaweriti nashi, yomberi kapona ndiri, kumbiti kendereyiti kulwala. 27 Yomberi pakapikaniriti visoweru kuusu Yesu, kiza kumberi kulibabanika mulipinga lya wantu, kayishinkula nguwu ya Yesu, 28 toziya kaligambiriti mweni, "Panuishinkula hera nguwu ya Yesu, hamponi."

29 Pakayishinkuriti nguwu ya Yesu, palaa palii kusuma mwazi kwoya na yomberi kalipikanira munshimba mwakuwi kuwera ulweli wakuwi upona.

43 mngati mwawu kuweriti na mdala yakalwaliti kusuma mwazi mivinja lilongu na mbili, tembera katumiyiti ulunda wakuwi woseri kwa waganga kumbiti wamponiziya ndiri. 44 Mdala ayu kamfwatiti Yesu kumbeli mulipinga lilii na kashinkuriti lusepi lwa nguwu ya Yesu, su palaa palii kusuma mwazi kwoya. 45 Yesu kakosiya, "Gaa kanshinkuliti?"

Kila muntu kalemiti na Peteru katakuliti, "Mtuwa, lipinga lya wantu likutindiriti na kukubabanika."

46 Kumbiti Yesu kalonga, "Nuvimana kwana muntu kanshinkula, mana nuvimana makakala ga kuponiziya gantawa." 47 Mdala ulii pakawoniti kaweza ndiri kulififa, su kiza kwa kutetema na kusuntama palongolu pa magulu ga Yesu. Kaweriti kulongolu kwa kila muntu, kamgambiriti ntambu yakamshikuliti na ntambu yakaponiti kamkam hera. 48 Yesu kamgambira mdala ulii, "Nafunda gwangu, njimiru yaku ikuponiziya. Gugendi kwa ponga."

Muhinga gwa afisa na mdala yakashinkuliti nguwu ya Yesu

18 Yesu pakaweriti kankutakula aga, ofisa gwa Shiyawudi kamwiziriti, kamsuntamalira na kamgambira, "Muhinga gwangu kahowa vinuvinu, kumbiti shondi shondi, gwizi gumtuliri liwoku lyaku nayomberi hakaweri mkomu."

19 Yesu kawuka pamuhera na wafundwa wakuwi, wamfatiti ofisa.

23 Shakapanu Yesu kingira mnumba mwa ofisa ulii. Pakawawoniti wagomba luperembi lwa kudaya na wantu wavua wankudaya, 24 kalonga, "Kila muntu kalawi kunja! Muhinga ayu kahowa ndiri, kumbiti kagonja hera!" Womberi wamseka Yesu. 25 Su, pawawawusiyiti wantu kulawa kunja, Yesu kingiriti mnumba kwa muhinga yakahowiti na kamkola liwoku lyakuwi na yomberi kagoloka.

22 Shapakanu kiza yumu gwa walongoziya wa numba ya Mlungu, litawu lyakuwi Yairu. Pakamwoniti Yesu, kamsuntamilira pa magulu gakuwi, 23 kamuhiga pakalonga, "Nafunda gwangu kalwala tashitashi. Shondi, shondi, gwizi gumtuliri liwoku lyaku su kaweri mkomu na kalikali."

24 Su Yesu kagenda pamuhera na yomberi. Wantu wavuwa wamfatiti na kumbabanika babanika.

38 Pawafikiti ukaya kwa Yairu, Yesu kawona wankushowangana na kawapikanira wantu wankulira na kudaya. 39 Su Yesu kingira mnumba kawagambira, "Ashashi mwankushowangana na kulila? Mwana hakenihowi, kagonja hera!"

40 Kumbiti womberi wamseka. Su kawalaviya woseri kunja, kawatola tati na mawu gwa mwana ulii pamuhera na wantumintumi wakuwi watatu yakaweriti nawu na wingira mpaka pakaweriti mwana ulii. 41 Yesu kamkola liwoku mwana ulii, kamgambira, "Talita kumu!" Mana yakuwi, "Nafunda, nukugambira gwimuki!"

42 Pala palii nafunda ulii kimuka na kanja kugendagenda. Nafunda ayu kaweriti na mivinja lilongu na mbili. Pagalawiriti aga, wantu walikangashiti nentu.

31 Yesu kongera kulonga, "Vinu wantu wa mashaka aga walifana na shintu gaa? 32 Walifana gambira wana yawalivaga pahala pasoku. Shipinga shimu shishigambizisiya shamonga, ‘Tuviniti msambu gwa ndowa kumbiti mwenga mvina ndiri! Twimba lwimbu lwa kudaya kumbiti mlila ndiri!’ 33 Yohani Mbatiza pakiziti, koyiti kuliya na kalanda ndiri divayi, kumbiti mwenga mlongiti, ‘Kana washamshera!’ 34 Kiziti Mwana gwa Muntu, kaliyiti shiboga na kulanda, kumbiti mwenga mtakula, ‘Mumloli muntu ayu, Kana lwaliya na mkologeru, ganja gwa watola kodi na wanavidoda!’ 35 Kumbiti luhala lwa Mlungu luwoneka kuwera lwa nakaka kwa wantu woseri yawalijimira."

Yesu kamuukaya mwa Simoni Mfarisayu

36 Mfalisayu yumu kamshemera Yesu walii shiboga sha pamihi pamuhera nayomberi na Yesu kingiriti mnumba mwa Mfarisayu na kulivaga pasi kuliya shiboga. 37 Su palushi palii peniti na mdala yakaweriti na makaliru ga vidoda. Kapikaniriti handa Yesu kankuliya shiboga mnumba ya Falisayu, katoliti supa ya alabasta yayiweriti na utuli.

41 Palaa kiza muntu yawamshema Yairu, kaweriti mkulu gwa numba ya Mlungu. Kasuntama palongolu pa magulu ga Yesu na kumhiga pakamgambira wagendi ukaya kwakuwi, 42 toziya kaweriti na nafunda yumu hera, yakaweriti na mivinja lilongu na miwili su kaweriti kankulwala tashitashi.

Yesu pakaweriti kankugendagenda, wantu wambabanika wega zoseri,

49 Yesu pakaweriti kankali kankuyowera hangu, mjumbi kiza kulawa kunumba ya Yairu. Kamgambiriti Yairu, "Nafunda gwaku kahowa, nagumgaziya hera Mfunda."

50 Kumbiti Yesu pakapikaniriti aga, kamgambira Yairu, "Nagwana lyoga, gujimiri hera hakaponi."

51 Pakasokiti pakaya, kabera muntu yoseri kwingira mnumba, ira Peteru na Yohani na Yakobu na tati na mawu gwa mwana yakahowiti. 52 Kila muntu kaweriti kankulira na kudaya toziya ya nafunda ulii. Yesu kawagambira, "Namlira! Mwana kahowa ndiri ira kagonja hera."

53 Wantu woseri wamseka, toziya wavimaniti mwana kahowiti. 54 Kumbiti Yesu kambata liwoku na kumshema, "Mwana gwangu gwimuki!" 55 Ukomu wakuwi umuwuyira, palaa palii kimuka, su Yesu kawagambiriti mawu na tati gwakuwi wamupi shintu shakuliya. 56 Mawu na tati gwakuwi walikangashiti, kumbiti Yesu kawagambira nawamgambira muntu galii gagatendikiti.

Kuhowa kwa Lazaru

1 Muntu yumu yawamshema Lazaru, kalikaliti Betaniya, kaweriti mlweri. Betaniya lushi lwawalikaliti Mariya na Marita muhasha gwakuwi. 2 Mariya ndo uliya yakamswagiti uturi Mtuwa na kumpukuta kwa viri zyakuwi. Ayu ndo Lazaru kaka gwakuwi yakaweriti mlweri. 3 Wahasha watuma ujumbi kwa Yesu, "Mtuwa, ganja gwaku yagumfira, mlweri!"

4 Yesu pakapikaniriti aga, katakula, "Ulweri awu hapeni hujegi kuhowa kwa Lazaru, ira ndo kwajili ya kumkwisa Mlungu na kwa mana ayi Mwana gwa Mlungu kakwiswi."

5 Yesu kamfiriti Marita na muhasha gwakuwi pamuhera na Lazaru. 6 Pakapatiti shisoweru handa Lazaru mlweri, kulikala pahala panu kwa mashaka mawili nentu. 7 Shakapanu kawagambira wafundwa wakuwi, "Tuwuyi kayi Yudeya!"

8 Wafundwa wamgambira, "Mfunda! Shaka shifupi hera shipita Wayawudi wafira kukuguma mabuwi, na gwenga gufira kugenda kayi aku?"

9 Yesu kankula, "Lishaka lyana saa lilongu na mbili ndiri, ndo hangu? Pakagendagenda paliwala hapeni kawezi kulikwala, kawona kulangala kwa pasipanu. 10 Kumbiti muntu pakagendagenda pashiru katalikwala, Toziya kulangala kwahera." 11 Yesu katakuliti hangu na pakamaliriti, kawagambira, "Ganja gwetu Lazaru kagonja, kumbiti neni nankugenda na kumyumusiya."

12 Wafundwa wakuwi wamgambira, "Mtuwa, handa yomberi kagonja su hakaponiziwi."

13 Kumbiti Yesu kaweriti kankutakula kuusu kuhowa kwakuwi, womberi waliholiti kuwera kankutakula kuusu kugonja mbota. 14 Yesu kawagambira pota kufifa, "Lazaru kahowa,

Yesu kankulikalipira lyega

23 Yesu kakweniti muuwatu na wafundwa wakuwi wagenditi pamuhera nayomberi. 24 Pala palii lihega lyana likakala lilawira mulitanda na mankapala ganja kugubikira uwatu. Yesu mweni kaweriti kankugonja mpota. 25 Wafundwa wamgendera na wamwimusiya pawatakula, "Mtuwa, gutulopoziyi twankuhowa!"

26 Yesu kawagambira, "Iwera hashi mwana lyoga? Hee mwawantu mwenga mwana njimiru ndidini!" Su, kagoloka na kalikalapira lyega na mankapala ga litanda ganyamala na kuweriti na kunyamalira kukulu.

27 Kila muntu kalikangasha. Womberi walonga "Ata lyega na mankapala ga mashi gamjimira!"

15 Pamihi, wafundwa wakuwi wamgendereti Yesu na walonga, "Saa zigenda kala na pahala panu pagweka. Guwalekeziyi wantu wagendi zawu na guwaleki wagendi muvijiji wakahemeri viboga."

16 Yesu kawagambira, "Hapeni wawuki, mwenga muwapanani vintu vya kuliya!"

17 Womberi wamwankula, "Twana mabumunda muhanu na wasomba wawili hera."

18 Yesu kalonga, "Su munjegeli panu." 19 Kawagambira wantu walivagi pasi mumihamba, shakapanu katola mabumunda muhanu na wasomba wawili, kalola kumpindi kwa Mlungu, kalonga mayagashii Mlungu. Kagamega mabumunda na kawapanana wafundwa wakuwi na wafundwa wawapanana wantu. 20 Kila muntu kaliya na kwikuta. Shakapanu wafundwa wajojinira majamanda lilongu na mbili ga vyavisigaliti. 21 Kwa wantu woseri yawaliyiti, wapalu hera waweriti elufu muhanu pota kuwawalanga wadala na wana.

25 Payiweriti luhunjuhunju Yesu kawagendiriti wafundwa wakuwi, pakagendagenda pampindi pamashi.

Yesu kankuwapanana shiboga lipinga likulu lyamonga lya wantu

32 Yesu kawashema wafundwa wakuwi na kalonga, "Nuwawonera lusungu wantu awa, toziya wawera na neni mashaka matatu na vinu wahera shintu shakuliya. Nfira ndiri kuwaleka wagendi zawu pota na kuliya shiboga, nawalembuka munjira."

33 Wafundwa wakuwi wamkosiya, "Hashi, hatupati koshi shiboga shitosha sha kulikutuziya lipinga lya wantu awa kushiwala aganu?"

34 Yesu kawakosiya, "Hashi, mwanaga mabumunda maninga?" Womberi wamwankula, "Mabumunda saba na wasomba wadidini wadikawadika."

35 Yesu kalagalira lipinga lya wantu lilivagi pasi muvipinga vipinga. 36 Shakapanu katola mabumunda saba galii na wasomba walii, kalonga mayagashii Mlungu, kamega mabumunda na kawapananiti wafundwa wakuwi na wafundwa wakuwi wawapanani wantu. 37 Wantu woseri waliyiti na kwikuta. Shakapanu wafundwa wajojinira vyavisigaliti wamemeziya majamanda saba. 38 Wantu woseri yawaliyiti, wapalu gweka yawu waweriti elufu msheshi pota kuwawalanga wadala na wana.

Kulipa zaka ya Numba nkulu ya Mlungu

24 Yesu pamuhera na wafundwa wakuwi pawasokiti Kafarinaumu, watola mpiya za zaka za Numba nkulu ya Mlungu wamgenderiti Peteru na wamkosiya, "Hashi mfunda gwenu kalipa mpiya za zaka za Numba nkulu ya Mlungu?"

25 Peteru kawankula, "Yina!" Su Peteru pakayingiriti mnumba, pamberi kanetakuli shisoweru shoseri, Yesu kamkosiya, "Simoni gwengapa guwona ashi, wafalumi wa pasipanu watola ushuru ama kodi kwa ashina gaa? Kulawa kwa wenikaya ama kwa wahenga?"

26 Peteru kawankula, "Kulawa kwa wahenga."

Yesu kamgambira, "Iherepa!, Su wenikaya wawusika ndiri kulipa. 27 Kumbiti wantu awa nawatuwona twenga twawadoda. Su mgendi kulitanda mwakalopoli somba. Somba gwa kwanja kumlopola, gugubuturi mlomu gwakuwi na haguwoni mpiya zazitosha kulipira zaka yangu na mwenga. Guzitoli na gulipi kodi zyetu."

Yesu kankugupangira mtera gwa Kuyu

18 Yesu pakaweriti kankuwuya mlushi mandawira putiputi, kaweriti na njala. 19 Kaguwona mkuyu pampeku pa njira na kagugendera, kumbiti guweriti gwahera bwajubwaju loseri ira gwana mihamba hera. Su kagugambira mtera, "Hapeni guleri kayi mabwajubwaju!" Palaa palii mkuyu gulii guyuma.

20 Wafundwa pawaguwoniti na walikangasha, pawalonga, "Iwera hashi mkuyu agu guyuma kanongola?" 21 Yesu kawankula, "Nakaka nuwagambirani, handa pamuwera na njimiru pota na lyoga, hamuwezi kutenda ntambu yantenditi kwa mkuyu agu na kwa hangu ndiri hera kumbiti ata hamuwezi kulugambira lugongu, ‘Gutupuki gukalidibiziyi gumweni mulitanda,’ na hayitendeki. 22 Handa pamjimira, hampananwi shoseri shamluwa kwa Mlungu."

37 Pala palii, liziti liyega na mashi giza kwa likakala ganja kuwukoma uwatu, mpaka mashi ganja kumema muuwatu ulii. 38 Yesu kaweriti kuzyetu muuwatu, kagonja muuwatu. Wafundwa wamwimusiya, wamgambira, "Mfunda, gulishera ndiri ntambu yatusokera?"

39 Yesu kimuka, kalikalipira liyega lilii, na kugagambira mashi galii, "Gunyamali jii!" Liyega linyamala, na kuwera kuzizimira jii. 40 Shapakanu Yesu kawagambira, "Mtira shishi mwenga? Mwakali mwahera njimiru?"

41 Nawomberi watira nentu na walikosiya weni kwa weni, "Ayu muntu gwa ntambu gaa? Ata liyega na mashi gana makakala vyoseri vimjimilira!"

35 Pamihi payifikiti, wafundwa wa Yesu wamgendera na kumgambira, "Pahala panu pashiwala na mshenji guzyeta. 36 Guwalekeziyi wantu wagendi mumalambu na muvijiji vya pakwegera wahemeri shiboga."

37 Kumbiti Yesu kawankula, "Mwenga muwapanani shiboga waliyi."

Wamkosiya, "Hashi tugendi twakahemeri mabumunda ya mpiya zyaziweziti kumpanana mtenda lihengu kwa myezi minani tuwapanani waliyi?"

38 Kawakosiya, "Mnaga mabumunda maninga? Mgendi mkaloli."

Pawaloliti kala, wamgambira, "Kwana mabumunda muhanu na wasomba wawili."

39 Shapakanu Yesu kawagambira wantumintumi wakuwi wawagambiri wantu woseri waligawi muvipinga vipinga, walivagi pasi mumihamba. 40 Su wantu walivaga mushipinga sha wantu miya na sha wantu malongu muhanu muhanu. 41 Shapakanu Yesu kagatola mabumunda muhanu galii na wasomba wawili. Kalola kumpindi, kalonga mayagashii Mlungu na kagamega mabumunda galii. Shapakanu kawapanana wafundwa wakuwi wawapanani wantu. Viraa virii kawagawira wantu woseri wasomba wawili walii. 42 Wantu woseri waliya na kwikuta. 43 Wafundwa wa Yesu wasola vyavisigaliti mumabumunda na wasomba na kumemeziya mumajamanda lilongu na mbili. 44 Wapalu waliyiti waweriti elufu muhanu.

48 Kawawona wafundwa wakuwi wankuyerayera na kushima uwatu kwa ngafu, toziya lipuga liweriti lyankuwapingira. Payiweriti pakwegera na kushiya, Yesu kawagendera pakagendagenda panani pamashi. Pakwegera kawapiti, 49 kumbiti pawamuwoniti kankutyanga panani pamashi, walihola kaweriti lihoka. Wanjiti kushowangana, 50 toziya woseri pawamuwoniti watiriti nentu.

Palaa palii Yesu kawagambira, "Namtira, ndo neni!" 51 Shapakanu kingira muuwatu pamuhera nawomberi na liyega linyamalira. Wantumintumi wakuwi walikangasha nentu,

Yesu kankuwapanani shiboga wantu mnu ya elufu msheshi

1 Lishaka limu, lipinga limonga lya wantu waliwona kayi, waweriti wahera shiboga. Su Yesu kawashema wafundwa wakuwi, kawagambira, 2 "Nuwawonera lusungu wantu awa toziya wapamuhera na neni kwa mashaka matatu na vinu wahera shiboga. 3 Handa panawalekiziya wagendi ukaya kwawu na njala hawalembuki munjira, toziya wamonga walawa kutali."

4 Wafundwa wakuwi wamkosiya, "Peni panu pantundu hagapatikani koshi mabumunda ga kuwawikutiziya wantu woseri awa?"

5 Yesu kawakosiya, "Muwera na mabumunda maninga?"

Nawomberi wamwankula, "Twana mabumunda saba."

6 Yesu kawagambira wantu walivagi pasi. Katola mabumunda saba, kamgambira Mlungu mayagashii. Shakapanu kagamega mabumunda galiya, kawapanana wafundwa wakuwi wawapanani wantu, nawomberi wawagawira. 7 Kayi waweriti na wasomba vidika vididini. Yesu kavitekelera, kawahimiziya wawapanani wantu ntambu iraa. 8 Wantu waliya wikuta, wafundwa wakuwi wasola visigariti wamemeziya majamanda saba. 9 Wantu waliyiti waweriti elufu msheshi. Su Yesu kawagambira ne mbuka.

Yesu kagupangira mtera gwa mkuyu

12 Shirawu yakuwi, pawaweriti wankulawa Betaniya, Yesu keniti njala. 13 Su kwa kutali kaguwona mtera gwa mkuyu gwana mihamba ivuwa. Kagugendera kawoni handa guweriti na libwajubwaju loseri. Pakasokiti, kaguwoniti gwahera libwajubwaju lyoseri ira mihamba hera, toziya iweriti ndiri shaka sha mabwajubwaju. 14 Panu Yesu kagugambira mtera gwa mkuyu, "Kwanjira leru ata mashaka goseri muntu yoseri nakaliya mabwajubwaju kwaku!"

Na wafundwa wakuwi wapikaniriti visoweru avi.

Lifundu kulawa kwa mkuyu yagunyaliti

20 Shirawu yakuwi mandawira pee, pawaweriti wankupita, waguwoniti mkuyu guliya gunyala goseri, kwanjira kumishigira mpaka kumihamba 21 Peteru kalihola visoweru vyakatakuliti Yesu, kamgambira, "Mfunda gulori! Mkuyu gulii gwagugupangiriti, gunyala!"

22 Yesu kawagambira, "Mumjimiri Mlungu." 23 "Nukugambirani nakaka, muntu pakalugambira lugongu alu, ‘Gutupuki gukalyasi mulitanda,’ pota na lyoga mumoyu mwakuwi, kumbiti kajimira kuwera vitwatira vyoseri vyakatakula vinyawiki, havimnyawikili. 24 Hangu nukugambirani, pamumluwa Mlungu shintu shoseri, mjimiri handa mshiyanka kala, namwenga hamshiyanki shintu shoseri shamuluwiti. 25 Pamgoloka kumluwa Mlungu, gumlekiziyi kila muntu yakakutenderani vidoda, su Tati gwenu kakumpindi hakawalekiziyi mwenga vidoda vyenu."

Yesu kankuwashema wantumini wa kwanja

1 Lishaka limu Yesu kagolokiti pampenku pa litanda lya Genezareti, aku wantu waweriti wankulibabanika wapikiniri visoweru vya Mlungu. 2 Kawoniti miuwatu miwili mumpenku mwa litanda, walowa wa wasomba waweriti wawuka, wagenditi kuzigulula wavu zawu. 3 Yesu kagenda kwingira muuwatu mwa Simoni na kamgambiriti kausegeziyi uwatu ulii palongolu padidini mulitanda. Yesu kalivagiti muuwatu na kanjiti kulifunda lipinga lya wantu.

4 Pakamaliriti kala kutakula, kamgambira Simoni, "Gushimi uwatu kugenda kumashi gagenda, gwenga na wayagu mwakazidibisiyi zinavu zyeni mlowi wasomba."

5 Simoni kamwankula, "Mtuwa, twenga pashiru poseri tutenditi lihengu liraa ali kumbiti tupata ndiri wasomba. Toziya gwenga gutakula hangu, neni hanuzidibisiyi zinavu." 6 Pawadibisiyiti kala zinavu wamemiti wasomba wavuwa mpaka zinyavu zyanja kudegeka. 7 Wawashemiti wayawu yawaweriti muuwatu umonga wizi wawatangi. Womberi wiza na wamemisiya wasomba miuwatu yoseri miwili mpaka yanja kulidiba. 8 Simoni Peteru pakawoniti yagalawiriti, kasuntamalira palongolu pa Yesu pakalonga, "Guwuki palongolu pangu, Mtuwa! Toziya neni muntu yanwera na vidoda!"

9 Simoni na wayaguwi woseri walikangashiti pawawoniti ntambu yawapatiti wasomba wavuwa. 10 Wayaguwi na Simon, ashina Yakobu na Yohani, wana wa Zebedayu nawomberi walikangasha. Yesu kamgambira Simoni, "Nagutila, kwanjira vinu haguweri mlowa wantu."

11 Wasegeziyiti miuwatu yawu pampenku palitanda, waleka kila shintu, wamfata Yesu.

Yesu kankulikalipira lyega

22 Lishaka limu Yesu pamuhera na wafundwa wakuwi wakweniti muuwatu na kawagambira, "Tuloki litanda, tugendi kumwambu." Su wanja mwanja. 23 Pawaweriti wankuloka, Yesu kaweriti na mpota su kagonja. Lyega likulu lyanja kuvuma, mashi ganja kwingira muuwatu, su wawera mukutenduwa, kubidukira mumashi. 24 Wantumintumi wamgendera Yesu na kumwimusiya, walonga, "Mtuwa, Mtuwa! Twankusokera!"

Yesu kimuka, kalikalipira lyega pamuhera na mankapala ga mashi, su vyoseri vyoya na kuweriti kuzindawala jiii. 25 Kawagambira wantumini wakuwi, "Yakoshi njimiru yenu?"

Kumbiti womberi walikangasha na kuwera na lyoga, waligambiziyana weni, "Ayu muntu gwa ntambu gaa? Kalikalipiriti lyega na mawimbi ga mashi na vyoseri vimjimira!"

Yesu kankulikalipira lyega

22 Lishaka limu Yesu pamuhera na wafundwa wakuwi wakweniti muuwatu na kawagambira, "Tuloki litanda, tugendi kumwambu." Su wanja mwanja. 23 Pawaweriti wankuloka, Yesu kaweriti na mpota su kagonja. Lyega likulu lyanja kuvuma, mashi ganja kwingira muuwatu, su wawera mukutenduwa, kubidukira mumashi. 24 Wantumintumi wamgendera Yesu na kumwimusiya, walonga, "Mtuwa, Mtuwa! Twankusokera!"

Yesu kimuka, kalikalipira lyega pamuhera na mankapala ga mashi, su vyoseri vyoya na kuweriti kuzindawala jiii. 25 Kawagambira wantumini wakuwi, "Yakoshi njimiru yenu?"

Kumbiti womberi walikangasha na kuwera na lyoga, waligambiziyana weni, "Ayu muntu gwa ntambu gaa? Kalikalipiriti lyega na mawimbi ga mashi na vyoseri vimjimira!"

Yesu kamuponiziya muntu keniti washamshera

26 Yesu na wantumintumi wakuwi wendereyiti na mwanja, wasoka kumpwani kwa isi ya Gerasi yapakwegera na Galilaya, kumwambu kulitanda.

12 Mshenji paguweriti gwankuzyeta, wantumini lilongu na awili wamgenderiti na kulonga, "Guwagambiri wantu wagendi, kuvijiji na mumalambu ga pakwegera wakasakuli shiboga pamuhera na pahala pakugonja, toziya pahala panu patuwera pantundu."

13 Kumbiti Yesu kawagambira, "Mwenga muwapanani shintu sha kuliya."

Womberi walonga, "Twana mabumunda muhanu na wasomba wawili hera. Gufira twenga tugendi twakawahemeleri shiboga lipinga lya wantu woseri awa?" 14 Wapalu hera yawaweriti palii, waweriti gambira elufu muhanu hangu.

Yesu kawagambira wafundwa wakuwi, "Muwagambiri walivagi vipinga vipinga vya malongu muhanu."

15 Su wafundwa pawatenditi kala ntambu yakawagambiriti, 16 Yesu katola mabumunda muhanu galii na wasomba wawili, kaloliti kumpindi na kalonga mayagashii Mlungu, kagamega kawapanana wafundwa wakuwi wawagawili wantu. 17 Wantu waliya mpaka wikuta na wantumintumi wasola majamanda lilongu na mbili ga vilii vyavisigaliti.

Ndowa mulushi lwa Kana

1 Lishaka lya tatu kuweriti ndowa mulushi lwa Kana, kumkowa Galilaya. Mawu gwakuwi Yesu kaweriti palaa, 2 Yesu pamuhera na wafundwa wakuwi nawomberi wawashemiriti ku ndowa. 3 Divayi payiperiti, mawu gwa Yesu kamgambira, "Kwahera divayi."

4 Yesu kamwankula, "Mawu, nagung’ambira shakutenda. Saa yaneni yankali."

5 Mawu gwa Yesu kawagambira wantumintumi, "Mtendi shoseri shakawagambireni."

6 Palii paweriti na vulu sita zya mabuwi na kila lumu luweziti kutulwa mashi shyasi sha madebi mawili ama matatu. Iweriti wayitula paliii toziya ya shitiba sha Shiyawudi sha kunawira. 7 Yesu kawagambira wantumintumi, "Mumemiziyi viwiga avi mashi." Nawomberi wavimemiziya mashi nduu, 8 shakapanu kawagambira, "Vinu mteki mashi aga mwakamjegeri mkulu gwa msambu." Womberi watola mashi na kumjegera yomberi, 9 su vinu mashi gagalambusiwa gawera divayi na kagalawalira. Mkulu gwa msambu kavimana ndiri kwayilawiriti divayi, su wantumintumi pawatekiti mashi wavimaniti, mkulu gwa msambu kamshemiti mpalu gwa ndowa 10 kamgambira, "Kila muntu kaitandaga divayi iherepa huti ata pawikuta kala, kaitandaga ilii ifaa ndiri. Kumbiti gwenga guitula divayi iherepa mpaka vinu!"