1 Lishaka lya tatu Esta kavaliti nguwu yakuyi ya shimalikiya, kagenda kagoloka muligeleri lya mngati mwa numba ya mfalumi, kulongolu muukumbi wa mfalumi. Mfalumi kaweriti mngati, kalivaga mushiti shakuyi sha ukolamlima, pakalola ligomi lya kwingilira. 2 Mfalumi pakamwoniti malikiya Esta kagoloka kuligeleri, kafiliziwa nayomberi, kamtalipisiya luhonga lwa zahabu lwaluweriti kalukola mumawoku mwakuyi. Esta kasegelera, kashinkula upeleru wa luhonga alu. 3 Shakapanu mfalumi kamkosiya, "Gufira shishi Esta? Gung'ambili shagufira na gwenga hagupati ata nusu ya ufalumi wa neni."

4 Esta kamwankula, "Payikufiriziya mfalumi, gwenga na Hamani mwizi leru mumsambu yanigutanditi toziya yaku."

5 Mfalumi kalagalira Hamani kashemwi kalongola gambira Esta ntambu yakaluwiti. "Su, mfalumi na Hamani wagenda kumsambu gwakatanditi Esta." 6 Pawaweriti wankulanda divayi, mfalumi kamkosiya kayi Esta, "Vinu gung'ambiri gufira shishi Esta? Na gwenga hagupati ata nusu ya ufalumi wa neni."

7 Esta kamwankula, "Luwa yaneni ndo ayi, 8 handa pagufiriziwa, gwee mfalumi, kujimiri luwa ya neni, su, nduwa gwenga na Hamani mwizi shirawu kumsambu gumonga, panu hanikugambiri shanfira."

9 Hamani kalawa kumsambu agawu pakanemelera. Kumbiti pakamwoniti Modekai paligomi lya mfalumi kuwera kagolokandiri pota kulendemera, Hamani kaniti maya. 10 Ata hangu, kalileweleriti, kagenda ukaya. Shakapanu kawashemera ukaya kwakuyi waganja wakuyi na kumluwa Zereshi mdala gwakuyi. 11 Hangu Hamani kalitumbira ulunda wakuyi uvuwa, wana wapalu wavuwa yakaweriti nawa na mfalumi ntambu yakamkweniziyiti muukulu kuliku wamonga. 12 Hamani kandereya kulitumba, kalongiti hangu, " Nentu ya aga malikiya Esta kamshemerandiri muntu gwingi yoseri ira neni nililonguziyi na mfalumi. Viraa shirawu katushemera neni na mfalumi tugendi kumsambu. 13 Kumbiti goseri aga ganyamaziyandiri handa panendereya kumwona Myahudi Modekai paligomi likulu lya mfalumi."

14 Hangu, Zereshi mdala gwakuyi na waganja wakuyi, wamgambiziya, "Kanyawirwi mtera gwa kulagira yaguwera na utali wa mita ishilini na mbili, shirawu mandawira, guyoweri na mfalumi su Modekai kalaguwi pampindi pa mtera agu, shakapanu gugendi kumsambu na mfalumi agawu paguwera na manemu."

Liholu ali limnemeziyiti Hamani na yomberi kagugolosiya mtera gwa kulagira.