1 Pashiru palii, mfalumi kagonjandiri mpota. Su, kalagalira shitabu sha maholu ga malawiru ga kila lishaka muukolamlima wakuyi shijegwi, shakapanu shibetulwa kulongolu kwakuyi. 2 Mukusoma aku iwoneka pahala papalembitwi kuwera Modekai ntambu yakavimaniti mpangu gwa Bigitana na Tereshi, wantumintumi wawili wa mfalumi yawaweriti wankulolera ligomi likulu lya mfalumi wapangiti kumlaga mfalumi Ahasuero. 3 Mfalumi kakosiya, "Hashi, tumpanani Modekai ligoya gaa ama tumfupi shintu gaa kwa shitwatira ashi?"

Wantumintumi wakuyi wamwankula, "Hagweni mtenderi shintu shoseri toziya yakuyi."

4 Mfalumi kakosiya, "Kwana mkulu yoseri paukumbi?"

Shaka ashi Hamani kaweriti kingira muligeleri lya kunja lya liboma. Kiziti kwa mfalumi kuluwa Modekai kalaguwi kumtera agu gwakanyawiti kala. 5 Su, wantumintumi wamwankula mfalumi, "Hamani ndo yakawera paukumbi."

Mfalumi kawagambira, "Mmugambiri kingiri mngati."

6 Hamani pakingiriti mngati, mfalumi kamkosiya, "Hashi, nimtenderi shishi muntu mweni menfiri nentu kumpanana ligoya?"

Hamani kalihola mumoyu mwakuyi. Ndo gaa ayu mweni mfalumi mekafiri kumpanana ligoya nentu kuliku neni.

7 Su, "Hamani kamwankula mfalumi, muntu ayu mfalumi mekafiri kumpanana ligoya, 8 ndo iherepa wantumintumi waku wajegi nguwu zazinyawitwi kwa shitambala shifufu shiherepa shakavaliti mfalumi na farasi gwakuyi yakamkweniti mfalumi na kavalasiwi lijenjeri lya shifalumi pamtuyi pakuyi, 9 shakapanu lihabiti na farasi wampanani yumu gwa wantumintumi wakulu wa mfalumi yakagoyika nentu, nawomberi wamvalasiyi muntu uli mweni mfalumi kafira kumpanana ligoya na kalonguziwi pakawera pampindi pa farasi kupita njira zya mji, pawambwera kulongolu kwakuyi, hangu ndo ntambu yakatenderwa muntu mweni mfalumi kafira kumpanana ligoya."

10 Shakapanu mfalumi kamlagalira Hamani, gutendi kalongola! "Gutoli nguwu azi na farasi, gwakampanani ligoya ali Modekai, Myahudi yakalikala paligomi likulu lya mfalumi. Naguleka kutenda ata shintu shimu muaga gagung'ambiriti."

11 Su, Hamani katola nguwu azi na kumvalasiya Modekai, kamtyangaziya kunjira zya mji pakawera pampindi pa farasi gwa mfalumi, agawu pakabwera. "Hangu ndo ntambu yakatenderwa muntu ulii mfalumi kafira kumpanana ligoya."

12 Shakapanu Modekai kawuya kuligomi likulu lya mfalumi. Kumbiti Hamani katugira ukaya kwakuyi, agawu pakahinginika na kugibikira sheni shakuyi kwa soni. 13 Su kawagambira Zereshi mdala gwakuyi na waganja wakuyi woseri mirandu yoseri yayimpatiti. "Zereshi na waganja wakuyi wamgambira, payiwera Modekai ayu, mweni gwenga gwanja kwagamiziya ukulu waku kwakuyi na mweni ndo Myahudi, gwenga hapeni gumwezi na hakakukanki nakamu."

14 Pawaweriti wankali wankuyowera nayu, wantumintumi wa mfalumi wasoka kumtola Hamani kalongola kugenda kumsambu gwakatanditi Esta.