1 Lishaka liraali, mfalumi Ahasuero kampanana malikiya Esta lunda yoseri ya Hamani, mweni kaweriti mnkondu gwa Wayahudi. Esta kamgambira mfalumi kuwera Modekai ndo mlongu gwangu. Su, kwanjira shaka ashi, Modekai kajimiluwa kumlola mfalumi. 2 Mfalumi kayivula peti yakuyi ya shimaniziwu yakaweriti kampoka Hamani, kampanana Modekai. Esta kamsyagula Modekai kaweri mkulu gwa lunda ya Hamani.

3 Shakapanu Esta kayowera kayi na mfalumi, kaliyasa pasi pamagulu ga mfalumi, agawu pakalira, kamluwa mfalumi kagaleweleri makontola galii Hamani mwana gwa Agagi, kafiliti kuwatendera Wayahudi. 4 Mfalumi kamtalipisiya Esta luhonga lwakuyi lwa zahabu na yomberi Esta kagoloka na kulonga, 5 "Gwee mfalumi paguwona handa ikufiriziya na pagunjimilira nikuluwa gubweri kulewelera shakalagaliriti Hamani. Mipangu ayi ndo ilii ya mwana gwa Amedata, mzukulu gwa Agagi shakapangiti kuwalaga Wayahudi woseri mumiji yoseri ya mfalumi. 6 Toziya, mbeza hashi kuhepelera kuwona wantu wa neni wankwagamiziwa na walongu wa neni wankulaguwa?"

7 Mfalumi Ahasuero kamgambira malikiya Esta na Modekai yakaweriti Myahudi, "Guloli! Nimpanana Esta lunda ya Hamani na yomberi wamkongera kumtera gwa kulagira 8 Su mlembi lagaliru limonga kwa litawu lya mfalumi kwa wayahudi ntambu yamfira. Shakapanu guyituli shimaniziwu sha peti ya mfalumi, toziya libwera palilaviwa kwa litawu lya mfalumi na kutula shimaniziwu sha mfalumi, hapeni ligalambulwi."

9 Su, mulishaka lya ishilini na tatu lya mwezi gwa tatu yagushemuwa Siwani, Modekai kawashemiti walemba woseri wa mfalumi, kawalagalira walembi baluwa kwa Wayahudi, wakulu, wakolamlima na wakulu wa mikowa yoseri miya ishilini na saba, kwanjira India mpaka Isiopia. Baluwa azi zilembitwi kwa kila mji kwa luga yawu na ntambu yawalemba, ntambu iraa kwa Wayahudi kwa luga yawu na ntambu yawalemba. 10 Modekai kaweriti kalemba baluwa azi kwa litawu lya mfalumi Ahasuero, kazimatika shimaniziwu kwa peti ya mfalumi. Na wantu yawazipelekiti waweriti wantumintumi wakwena farasi wana likakala yawatuga nentu.

11 Kupitira baluwa azi mfalumi kawajimiriti Wayahudi mukila miji kujojonika pamuhera su kugalolera makaliru gawu. Wajimiritwi kuhalibisiya, kulaga pota lusungu na kwagamiziya shipinga shoseri sha wantu ama mji, gwagwiziti kuwakomanga womberi, wadala wawu na wana wawu na kulopola lunda zawu. 12 Mlandu agu megutendeki mumiji yoseri ya mfalumi Ahasuero, mlishaka lya kumi na tatu lya mwezi gwa kumi na mbili, yagushemwa mwezi gwa Adari. 13 Nakala ya libweru iweriti ilaviwi handa lagiru mukila mkowa na iwezi kumanikana kwa wantu wa kila isi, su wayahudi waweri kala mulishaka ali kuwawuzilira wankondu wawu. 14 Kwa lagiru ya mfalumi, wantumintumi yawakweniti farasi wana likakala yawatuga nentu, wawukiti mbiru. Libweru ali viraa lilaviwitwi mumji mkulu gwa Susa.

15 Modekai kawukiti kulongolu kwa mfalumi, pakawera kavalira nguwu ya shifalumi ya rangi ya buluwu na nfufu, lihabiti lifufu liherepa lya langi ya zambalawu na lijenjeri likulu lya zahabu, wantu wa mji gwa Susa wafyapiliriti kwa nemeleru. 16 Kwa Wayahudi kuweriti na nemeru na wantu wamonga wawapananiti ligoya. 17 Mukila mkowa na kila pahala libwera ali palisomitwi, Wayahudi wanemeleliti na kufyapilira, watenda sheleku na woyera na wantu wamonga wavuwa walitenditi kuwera Wayahudi, toziya wawatiriti nentu Wayahudi.