1 Palisokiti lishaka lya kumi na tatu lya mwezi gwa kumi na mbili, mwezi yagushemwa Adari, lishaka lya libweru lya mfalumi melibwerwi, nawankondu wa Wayahudi watumbiriti kuwakanka Wayahudi, kumbiti lishaka ali Wayahudi wawakankiti wankondu wawu. 2 Wayahudi walijojoniriti mumiji yawu yayiwera mumikowa yoseri ya mfalumi Ahasuero kuwakomanga woseri walii yawaweriti wafira kuwalaga. Kwahera muntu yoseri yakaweziti kulikomanga na womberi, toziya wantu wa isi zimonga wawatiriti. 3 Na wakulu woseri wa mikowa na wakolamlima na wakulu wa mashonta na wantumintumi wa mfalumi viraa wawatangiti Wayahudi, toziya woseri wamtiriti Modekai. 4 Modekai kaweriti muntu yakamanika nentu munumba ya shifalumi na visoweru vyakuyi vyeneyiti mumiji yoseri, ata ukulu wakuyi wongerekiti nentu. 5 Su, Wayahudi wawakomangiti wankondu wawu kwa ligumba, wawalikitula na wawagamiziya na wawatendera ntambu yawafira walii yawawakalaliriti.

6 Aku kumji gwa Susa, Wayahudi wawalaga wapalu miya mhanu. 7 Viraa wawalagiti Parishandata na Dalifoni na Asipata, 8 Porata na Adalia na Aridata, 9 Parimashita na Arisai na Aridai na Waizata, 10 Awa waweriti wana lilongu wa Hamani yakaweriti mnkondu gwa wayahudi na Hamani ayu kaweriti mwana gwa wa Hamedata. Ata hangu wawapokandiri vintu vyawu.

11 Lishaka liraali, mfalumi kagambirwa walanga ya wantu yawalagitwi mumji mkulu gwa Susa. 12 Shakapanu mfalumi kamgambira malikiya Esta, "Mumji mkulu gweka yakuyi Wayahudi wawalaga wapalu miya mhanu, pamuhera na wana lilongu wa Hamani. Watenda hashi kumiji yimonga aku? Gufira shishi vinu? Gung'ambili shagufira na gwenga hagupananwi. Gung'ambili shintu shimonga na neni hanikutenderi."

13 Esta kamwankula, "Gwee mfalumi, paguwona iherepa, shirawu guwajimiri Wayahudi yawawera Susa watendi ntambu yawatenditi leru. Kayi, gulagaliri wana lilongu wa Hamani wakongerwi mumtera gwa kulagira." 14 Mfalumi kalagaliriti aga gatendeki na libweru lilaviwa kumji gwa Susa. Wana lilongu wa Hamani wakongerwa agawu wantu pawawawona. 15 Lishaka lya kumi na msheshi lya mwezi gwa Adari, Wayahudi wajojonikiti kayi, wawalagiti wantu nentu ya miya tatu kumji gwa Susa. Kumbiti walopolandiri vintu vyawu.

16 Wayahudi yawaweriti mumikowa womberi viraa walijojoniriti kugalolera makaliru gawu. Walopuluwa kulawa kwa wankondu wawu, wawalagiti wantu elufu sabini na mhanu, kumbiti watolitindiri vintu vyawu. 17 Lishaka ali liweriti lya lilongu na tatu lya mwezi gwa Adari. Lishaka lyalifatiti lya lilongu na msheshi, woyiriti, walitenditi lishaka ali kuwera lya msambu na sheleku. 18 Wayahudi wa mji mkulu gwa Susa wajojonikiti pamuhera mulishaka lya kumi na tatu na lishaka lya kumi na msheshi, kumbiti lishaka lya kumi na mhanu woyiriti na kunemelera. 19 Toziya ayi, Wayahudi yawalikala muvijiji na mumiji mididini watenda msambu lishaka lya kumi na msheshi lya mwezi gwa Adari kuwera msambu gwa nemeleru na kulijegerana mafupu.

20 Modekai kalembiti mirandu yoseri ayi, shakapanu kawapelekeriti baluwa Wayahudi woseri yawalikaliti mumikowa ya mfalumi Ahasuero yawalikala pakwegera na kutali. 21 Kawagambiriti kila shinja watendi msambu, lishaka lya kumi na msheshi na lishaka lya kumi na mhanu lya mwezi gwa Adari, 22 toziya mumashaka aga mawili, Wayahudi wawakankiti wankondu wawu. Na hinginika yawu igalambulitwi kuwera nemeleru, viwembu vyawu vigalambulwa kuwera msambu. Walagaliritwi wagaholi mashaka aga kwa kutenda msambu, walipanani mafupu ga shiboga na kuwapanana vintu wahushu. 23 Hangu, Wayahudi walijimirana kutenda ntambu yawanjiti na handa Modekai ntambu yakawalembiriti.

24 Hamani mnkondu gwa Wayahudi na viraa kaweriti mwana gwa Hamedata gwa lukolu lwa Agagi, kaweriti katenda mpangu kawalagi Wayahudi, viraa kagalambula simbi yazishemwa Puri, su kawoni lishaka lya kuwaposholanga na kuwalaga Wayahudi. 25 Kumbiti Esta pakamgendiriti mfalumi na yomberi mfalumi kalagaliriti kulemba makontola galii gakatenditi Hamani kwa Wayahudi, gampati mweni, na wana wakuyi wakongerwi kumtera gwa kulagira. 26 Hangu, wagashemiti mashaka aga Purimu, kulawirana na shisoweru Puri kwa litawu limonga lishemwa kugalambula simbi. Toziya ya baluwa ya Modekai na mirandu yawawoniti weni na galii gagawapatiti, 27 Wayahudi watenditi msambu kuwera jadi yawu, kwa wiwuka wawu na kwa muntu yoseri yakawera pamuhera na womberi, kuwera mumashaka yagasyagulitwi, kila shinja mashaka aga mawili ganemelerwi ntambu yakalagalira Modekai. 28 Viravirii wajimilaniti kuwera kila kaya ya Shiyahudi, kulawa shiyiwuku shimu mpaka shimonga, mukila mikowa na kila mji, liholuwi lishaka lya kugalambula simbi na kutenda msambu mashaka goseri.

29 Shakapanu malikiya Esta, muhinga gwa Abihaili, pamuhera na Modekai Myahudi, kalembiti baluwa muukulu wakuyi, handa wavimani kuwera baluwa ayi ya pili iweriti toziya ya msambu gwa kugalambula simbi. 30 Baluwa azi walemberitwi Wayahudi woseri yawalikala kumiji yoseri miya yimu ishilini na saba ya ukolamlima wa Ahasuero. Baluwa azi ziwafililiti Wayahudi ponga na matumbiru. 31 Baluwa azi viraa ziwafiliti kugangamaziya mashaka aga ga kugalambula simbi muvipindi vyakuyi vyavitulitwi, handa Modekai myahudi na malikiya Esta ntambu yakalagaliriti na ntambu yawaligangamaziyiti weni na wiwuka wawu mushaka sha koya kuliya na kudaya. 32 Baluwa azi za Esta zilanguziya mirandu ayi ya Purimu na yeni ilembwa mushitabu sha maholu.