1 Pagaperiti aga, mfalumi Ahasuero kampananiti Hamani mwana gwa Hamedata gwa wiwuka wa Agagi, yakaweriti mkulu nentu kuliku wakulu woseri. 2 Wakulu woseri wa ufalumi wakuyi wampikiniri Hamani kwa kumng'ong'onalira na kumsuntamalira. Kumbiti Modekai, kamng'ong'onalira ndiri pota kumlamsiya. 3 "Wamu wa walongoziya wa mfalumi yawaweriti paligomi likulu lya mfalumi, wamkosiya Modekai, hashi gwenga gulibeziya lilagaliru lya mfalumi?" 4 Kila lishaka waweriti wamgambiziya kaleki kutenda hangu, kumbiti Modekai kawapikanirandiri. Modekai kalemiti kutenda hangu toziya yomberi ndo Myahudi na kawezandiri kumsuntamalira Hamani. Su, wamgambira Hamani kawoni handa kaweza kumhepelera Modekai. 5 Hamani kaweriti na maya pakavimaniti handa Modekai kamng'ong'onalira ndiri na pota kumsuntamalira. 6 Pakayambuliti handa Modekai kaweriti Myahudi, kawoniti iherepandiri kamlagi gweka yakuyi. Su katenda mpangu kuwalaga Wayahudi woseri, yawaweriti muukolamlima wa mfalumi Ahasuero.

7 Mushinja sha kumi na mbili sha ukolamlima wa mfalumi Ahasuero, mumwezi gwa kwanja yagushemwa Nisani, Hamani kalagalira wantu wagalambuli simbi wamuwi lishaka na mwezi gweni gutendeki mpangu gwakuyi. Su, simbi itulukira lishaka lya kumi na msheshi lya mwezi gwa kumi na mbili yagushemitwi Adari.

8 Shakapanu, Hamani kamgambira Mfalumi Ahasuero. "Kwana wantu wa isi tunga yawawera kila pahala muukolamlima waku. Wantu awa wanalagiru yazilifanandiri na lagiru za isi yetu. Viravirii womberi wazijimirandiri lagiru zyaku, hangu mona mfalumi naguwahepelera. 9 Pagufira, gwee mfalumi, gulagaliri wantu awa walaguwi. Naneni ntakula, handa pagulagalira hangu, handaviyi kilu selasini na saba elufu na miya mhanu za mpiya zitulwi mluhanja lwa mfalumi guwalipi wantu yawafira kutenda hangu."

10 Mfalumi kayivula peti yakuyi, yayitenderitwi kutulira shimaniziwu na kampanana mnkondu gwa Wayahudi Hamani mwana gwa Hamedata yakalawa muwiwuka wa Agagi. 11 Shakapanu mfalumi kamgambira "Hamani, gusigali na senti zaku na guwatenderi wantu awa ntambu yagufira,"

12 Su, lishaka lya kumi na tatu lya mwezi gwa kwanja, Hamani kawashemiti walemba woseri wa mfalumi, kawapanana libweru lyalifiritwi litafsiliwi kwa kila luga na kila ntambu ya malembu ga wantu wa ufalumi awu, shakapanu libweru ali lijegwi kwa wakolamlima woseri wa mfalumi, wakulu wa mikowa yoseri na wakulu wa makabila goseri na kila isi kwa luga yawu. Libweru ali lilembwitwi kwa litawu lya mfalumi Ahasuero na kutulwa shimaniziwu kwa peti yakuyi. 13 Walagilagi wajegiti baluwa azi kwa kila mkowa muukolamlima awu. Libweru ali lilonga handa kwa lishaka limu hera, ndo lishaka lya kumi na tatu lya mwezi gwa kumi na mbili yagushemwa Adari, Wayahudi woseri wantemba kwa wazewi, wadala kwa wana, woseri wafiruwa kulagwa na lunda zawu zoseri zitolwi. 14 Nakala ya baluwa ayi ya lagiru ifiritwi kulaviwa gambira lagaliru mukila mji na kumaniziwa muisi su wawezi kuwera kala kwa lishaka ali.

15 Libweru ali lilaviwitwi mumji mkulu gwa Susa handa mfalumi ntambu yakalagaliriti. Na walagilagi wabweriti mumikowa yoseri. Mfalumi na Hamani walikala pasi pawalanda agawu wantu wa Susa pawawera wankuhinginika.