1 Maya ga mfalumi Ahasuero pagapeliti, mfalumi kamholiti Vashiti na kaweriti kankulihola galii gakagatenditi na galii gakalagaliriti katenderwi Vashiti. 2 Su, wantumintumi wakuyi yawaweriti wankumtendera yomberi gweka yakuyi, "Wamgambiziya, wana wali yawamanandiri mpalu wavuwa waherepa, ntambu gaa tukusakulili yumu kaweri mdala gwaku? 3 Guweza kuwasyagula wakulu mukila mkowa gwagukolamlima, guwalagaliri wawajegi wali yawamanandiri wapalu, woseri waherepa kunumba yawalikala wadala yayiwera kumji gwa Susa. Shakapanu walolerwi na Hegai, ntumintumi gwa mfalumi na mlolera gwa wadala waku na kawapanani vintu vyoseri vyakuliheripiziya. 4 Ulii yakakufiriziya nentu na katendwi malikiya pahala pa Vashiti.

Mfalumi kawoniti magambiziya aga ndo gahelepa, katenda hangu."

5 Kumji gwa Susa, kuweriti na muntu yumu Myahudi, litawu lyakuyi Modekai, Modekai kaweriti mwana gwa Yairi, Yairi kaweriti mwana gwa Shimei na Shimei kaweriti mwana gwa Kishi gwa likabila lya Benjamini. 6 Modekai kaweriti yumu gwa wantu yawatolitwi kulawa muisi ya umanda shaka mfalumi Yekoniya gwa Yuda pakabatitwi na Nebukadineza mfalumi gwa Babeli. 7 Modekai kaweriti na mwipa yawamshemiti Esta kwa shiebrania kashemitwi Hadasa. Esta kaweriti na nshimba iherepa na sheni shiherepa, Modekai kamleriti mhinga ayu gambira mwana gwakuyi mweni pa walera wakuyi kuhowa.

8 Lagaliru lya mfalumi palibweritwi wahinga wavuwa wajegitwi kumji gwa Susa, watulitwi su walerwi na Hegai. Esta nayomberi, kajegitwi kuliboma lya mfalumi na kalerwi na Hegai, mlera ayu gwa wadala. 9 Hegai kafiliziwitwi na Esta ata kamtendera maheri. Hegai katenditi kalongola kumpanana Esta lipaki na shiboga shiherepa. Shakapanu kamtulira pahala paherepa munumba ayi ya wadala, kamsyagulira wantumintumi wa shidala saba kulawa munumba ya mfalumi wamntenderi.

10 Esta kaweriti kenilimaniziyi lukolu lyakuyi pota likabila lyakuyi, toziya Modekai kaweriti kamberiziya nakatenda hangu. 11 Kila lishaka Modekai kapitapita kulongolu kwa ligeleri lya numba ayi ya wadala su kavimana ntambu yakendeleya Esta na mirandu yayimlawira.

12 Shaka sha kulihelepeziya shiweriti shinja shimu. Kwa miyezi sita waweriti wankuliswaga lipaki lya manimani na miezi sita ya kuliswaga lipaki na utuli. 13 Pawaweriti wankugenda kwa mfalumi, kila mhinga kapananitwi kila shintu shakafiriti mumahelipiziya gakuyi kulawa numba ya wadala kugenda nashi kuliboma. 14 Mhinga kagenda pashimihi na mandawira kawuya kunumba imonga ya wadala yayigolokerwa na Shaashigazi. Shaashigazi kaweriti ntumintumi mgolokera gwa wadala wamonga wa mfalumi. Mhinga kawezandiri kuwuya kayi kwa mfalumi, mpaka mfalumi kamfili na kulagalira kashemwi kwa litawu lyakuyi.

15 Shisokiti shaka sha Esta kugenda kwa mfalumi. Ayu Esta kaweriti mhinga gwa Abihaili na mwipa gwa Modekai viraa kalelitwi na Modekai, kaluwitindiri shoseri nentu ya shilii shakalongiti Hegai, ntumintumi mlolera gwa wadala wa mfalumi kashivali. Kila muntu yakamwoniti Esta, kafiliziwa na yomberi. 16 Su, Esta kajegwa kuliboma lya mfalumi mushinja sha saba sha ukolamlima wa Mfalumi Ahasuero, mwezi gwa lilongu yagushemitwi Tebeti. 17 Mfalumi kafiliziwa nentu na Esta kuliku ntambu yakawafiriti wadala wamonga woseri. Kamfiliti nentu kuliku wali wamonga walii. Su, mfalumi kamvalasiya lijenjeri lya shimalikiya kumtuyi, kamtenda kaweri malikiya pa Vashiti. 18 Shakapanu mfalumi kamtendiriti Esta msambu mkulu, kawashemera walonguziya na wantumintumi woseri wa ufalumi wakuyi. Viravirii, kawafupiti wantu vintu vivuwa vyavilinganira na manemu ga shifalumi.

19 Wahinga pawajojonikiti kayi, Mushaka ashi Modekai kaweriti kasyagulwa kuwela mkulu muufalumi. 20 Esta kaweriti hakenilimaniziyi handa kalawa likabila gaa na lukolu gaa. Katenditi handa Modekai ntambu yakamlagaliriti toziya Esta kaweriti kamjimira Modekai ntambu yakamjimiriti pakaweriti kankumlera.

21 Modekai pakaweriti kalikala paligomi likulu lya mfalumi, Bigitana na Tereshi, wakulu wawili wa mfalumi yawaweriti walolera wa migomi ya vyumba vya mfalumi, wakalaziwa mpaka wafiriti kumlaga mfalumi Ahasuero. 22 Modekai kavimaniti mlandu agu, kamgambira malikiya Esta na Esta kamgambira mfalumi. 23 Pawaweriti wankugulola mlandu agu, imanikiti handa nakaka. Su, wantu wawili awa wapingikwa kumtera gwa kulagira na mlandu agu gulembitwi mushitabu sha maholu kulongolu kwa mfalumi.