1 Modekai pakavimaniti goseri yagalawiriti, kazipapuliti nguwu zakuyi, kavala nguwu za malobota na pakalityeremeka malivu. Shakapanu, kapita pakati pamji pakalira kwa hinginika na kwa kubotanga. 2 Kagenditi na kugoloka kunja kuligomi lya mfalumi, toziya kwahera muntu yakajimilitwi kwingira kuliboma pakawera kavala lilobota. 3 Mukila mkowa lagiru lya mfalumi payibweritwi, kuweriti na shiwembu shikulu muwamu mwa Wayahudi. Waliyitindiri shoseri, walira na kudaya na wantu wavuwa muwamu wagonjiti mumalivu agawu pawavala malobota.

4 Malikiya Esta pakagambiritwi na wantumintumi wakuyi visoweru vya Modekai, kinginikiti nentu. Kamjegera Modekai nguwu za kuvala pa nguwu za mafafa, kumbiti Modekai kazilema. 5 Shakapanu, kamshema Hataki, yumu gwa wasaulwa wa mfalumi yakasyagulitwi na mfalumi kamtenderi Esta, kamlagalira kwa Modekai kamkosiyi kwanashishi shashilawiliti. 6 Shakapanu Hataki kamgendera Modekai kuluwaga, kulongolu kuligomi likulu lya mfalumi. 7 Modekai kamgambira Hataki goseri yagaweriti gampata na shiyasi sha mpiya sheni Hamani kaweriti katakuliti kulaviya muluhanja lwa mfalumi handa Wayahudi woseri mewalaguwi. 8 Kampanana viraa nakala ya baluwa yimu ya libweru yayilaviwitwi kumji gwa Susa toziya ya kwagamiziwa kwa Wayahudi, kamluwa Hataki kamjegeri Esta baluwa ayi na kamgambili goseri, shakapanu kamgambira kagendi kamluwi mfalumi na kamluwi kawawoneri lusungu Wayahudi, wantu wakuyi Esta. 9 Hangu Hataki kagenda kumgambira Esta goseri gakalongiti Modekai. 10 Shakapanu Esta kamgambira Hataki kawuyi kumgambira Modekai hangu, 11 "Wantumintumi woseri wa mfalumi na wantu wa miji yoseri wavimana nakamu kuwera mpalu ama mdala yoseri ulii yakingira muligeleri lya mngati na kumwona mfalumi pota kushemwa, ayu kalaguwi. Yakaweza kuponeka ndo ulii mweni mfalumi hakamnyosheri luhonga lwakuyi lwa shifalumi lwa zahabu su kumponiziya. Naneni nshemwandiri na mfalumi, mwezi goseri agu."

12 Modekai pakapatiti ulagilagi ulii wa Esta, 13 Modekai kawuziyiti lyakulu ali, "Nagulihola toziya gwamnumba ya mfalumi gwenga gamweni haguponeki kuliku Wayahudi woseri. 14 Pagulikala jii mushaka ashi, Wayahudi hawatangwi kulawa kwa wantu wamonga, nawomberi hawalopolwi na gwenga haguhowi na walongu wa tati gwaku hawalaguwi. Ndo gaa yakavimana kuwera gutendwa malikiya toziya ya shaka handa ashi!"

15 Shakapanu Esta kamjegeriti Modekai lyankulu ali, 16 "Gugendi gwakawajojoniri pamuhera Wayahudi woseri yawawera kumji gwa Susa. Moyi kuliya toziya ya neni, namliya ama kulanda kwa mashaka matatu, pashiru na paluwala. Neni na wantumintumi wangu wadala hatutendi ntambu iraayi. Shakapanu hanimgenderi mfalumi, tembera lagiru libera kutenda hangu. Handa kulaguwa ndaguwi."

17 Su, Modekai kagenda na kutenda handa Esta ntambu yakamgambiriti.