1 Mshinja sha kwanja sha ukolamlima gwa mfalumi Belishaza gwa Babeli, Daniyeli kalotiti na kuwona malola pakawera kagonja pashitanda pakuyi. Kalembiti kulota kwakuyi hangu. 2 "Neni Daniyeli moniti mumawonu pashiru, lyega kulawa wega zoseri za msheshi za pasipanu pazizidodisiya bahali nkulu. 3 Wanyawa wakalipa kayi wakulu wamsheshi, wagoloka kulawa mubahali amu, kila yumu kagweka na myaguyi. 4 Kanyama gwa kwanja kaweriti gambira simba na kaweriti na mbapatiru zakuyi gambira kapungu, Noliti mpaka mpapatiru zakuyi ziwusiwa na yomberi kanyasulitwi na kugoloka kwa magulu mawili gambira muntu. Shakapanu kapananwa mahala gambira muntu."

5 Kanyama gwa pili kaweriti nkanyama yawamshema dubu magulu gakuyi ga kumberi gaweriti ganyasuka. Mumlomu gwakuyi kaweriti na mihonju mitatu yakayikola mumenu mwakuyi. Naliziwu lipikanika, "Vinu guliyi vinofu vivuwa ntambu yaguweza."

6 "Pa aga, nimwoniti kanyama yumonga. Ayu kaweriti handa duma yakaweriti na mbapatiru za msheshi gambira za mpongu mumgongu mwakuyi. Kaweriti na mituwi msheshi na kapananwiti ukulu wa kukolamlima.

7 Mumalola gangu aga ga pashiru nimwoniti kanyama gwa msheshi gwa kulikangasha na gwa kutiriziya, yakana makakala nentu. Ayu kaweriti na menu makulu ga shuma geni kagatendela kuliya na kumegangameganga mihonju na kugatimbangatimbanga masigala kwa nzayu zakuyi na kaweriti gweka na wankanyama wamonga yawaweriti kumberi kwakuyi, mweni kaweriti na magoli lilongu. 8 Paweriti nankugalola magoli aga, moniti ligoli limonga lididini lyankumera muwamu mwa magoli gamonga kumi galii, magoli matatu ga kwanja gatupulwa su kulipanana lupenu lididini ali. Ligoli ali liweriti na masu handa ga muntu na mlomu yagutakula visoweru vya kulitumba.

9 Paweriti nankali nankulola, viti vya ufalumi vitulitwi panu, shakapanu mzewi gwa makashu na makashu kiza kalivaga. Kaweriti kavala nguwu nelu mbuu, mvili zakuyi ziweriti nsheri nentu. Shiti shakuyi sha ukulu shiweriti sha milipulipu ya motu na maguludumu ga shiti shakuyi gaweriti ga motu yagwaka. 10 Shishemba sha motu shiweriti shankunyililika palupita kulongolu kwakuyi. Maelufu elufu ga malayika wankumtendera, kumi elufu mala kumi elufu wagoloka kulongolu kwakuyi. Mahakama gawera kala kutoza na vitabu vivugulwa.

11 Pandeleyiti kulola toziya ya visoweru vilii vya kulitumba yavitakulitwi na ligoli lilii. Endereyiti kulola mpaka kanyama ulii pakalikitulitwi na nshimba yakuyi ihalibiwa na kwaswa mumotu gulii yagwaka. 12 Wakanyama wamonga walii wapokitwi ukulu wawu wa kukolamlima, kumbiti weni walekwa wendereyi kulikala kwa mashaka mashididini.

13 Mumalola gangu ga pashiru noliti, kulongolu kwa neni nimwoniti yakalifana na muntu, pakiza pamuhera na mawundi ga kumpindi. Kamsegelera Mzewi ayu gwa Makashu, na kalonguziwa kulongolu kwakuyi. 14 Kapananwa ukulu, uweru na ufalumi, su wantu wa makabila goseri, maisi goseri na luga zoseri wamtenderi. Ukolamlima wakuyi wa mashaka goseri na ufalumi wakuyi wahera upeleru.

15 Malola yanigawoniti neni Daniyeli gantiliziyiti na gahinginiziya nentu mumoyu. 16 Nimsegeleliti yumu gwawu gwa malayika walii yawagolokiti palii na kumkosiya mana yeni ya mirandu yoseri ayi. Nayomberi kantambira na kung'ambiziya mana yakuyi." 17 "Wakanyama wamsheshi awa wakulu ndo wafalumi wamsheshi hawalawiri pasipanu. 18 Kumbiti wantu wa Mlungu Mkulu hawapananwi ufalumi, na weni hawuwukolimlima ufalumi awu mashaka goseri pota upeleru."

19 "Shakapanu nfiriti kuvimana mana ya kanyama ayu gwa msheshi, mweni kaweriti kalifanandiri na wamonga woseri walii kayi gwa kutiriziya, na kwaweriti na menu ga shuma na mikonji ya shaba, nkanyama mweni kaponditiponditi na kwangamiza wankondu wakuyi na kutimbanga shoseri yashisigaliti. 20 Viraa neni nfiriti kuvimana kuusu magoli kumi galii pampindi pa mtuwi gwakuyi na viraa kumana kuusu ligoli limonga yalilawiriti, pamberi magoli matatu aga ageni tomoli, ligoli lilii liwoneka lyana makakala nentu kuliku gamonga galii, ligoli ali laliweriti lyana masu na mlomu lyalitakuliti visoweru vya kulitumba liwonekaniti lyana makakala kuliku gamonga.

21 Panweriti nankali kulola, ligoli ali likomangiti nkondu na wananagala na kuwakanka. 22 Shakapanu mzewi gwa makashu na makashu kagoloka na kuwapanana ukanka wantu wakuyi awa ufalumi toziya lishaka lyawu lakupananwa ukolamlima lisoka.

23 Malayika kang'ambira hangu. Kanyama yulii gwa msheshi ndo ufalumi wa msheshi hawuweri pasipanu. Ufalumi awu hawuweri wa gweka na falumi zimonga, weni hawuwagamiziyi pasipanu poseri. Hawuwugusiyi pasi na kuyipandanga vipandivipandi. 24 Magoli galii lilongu ndo wafalumi lilongu yawalawirana na ufalumi awu. Shakapanu hawafatwi na mfalumi yumonga mweni hakaweri gweka na walii yawamlongoleriti na hakawagusiyi wafalumi watatu. 25 Hakatakuli visoweru vya upaya kwa gwakumpindi nentu na kuwawonera wantu wa Mlungu, pakajera kugalambula misambu yawu minanagala pamuhera na lagiru. Wananagala hawatulwi pasi pa ukulu wakuyi kwa shaka na vyaka viwili na nusu shaka. 26 Kumbiti Shotelamotu sha kumpindi hashilikali, hawampoki ukolamlima wakuyi na womberi hawuwusiwi na kwagamiziwa nakamu." 27 "Ufalumi na ukolamlima na ukulu wa falumi zoseri pasipanu hawapananwi wantu wa Mlungu Mkulu. Ufalumi wawu hawuweri wa kulikala mashaka goseri na kolamlima zoseri haziwatenderi na kuwajimira.

28 Awu ndo upeleru wamlandu agu. Maholu gangu ganilimuziyiti nentu neni Daniyeli, ata sheni shangu shigalambuka. Visoweru vilii kandeleyiti kuvihola."