1 Neni mfalumi Nebukadineza, niwalembera wantu wa makabila goseri, maisi goseri na luga zoseri pasipanu poseri.

Muweri na ponga nentu! 2 Nananemeru kuwagambiziya kuusu langaliru ya mawuzawuza na makangashu geni Mlungu Yakawera Kumpindi Nentu kantendera.

3 Guloli ntambu yaziwera nkulu langaliru zakuyi!

Makangashu gakuyi ndo makulu nentu!

Ufalumi wakuyi ndo ufalumi wa mashaka goseri, ukulu waku ulikala wiwuka mpaka wiwuka.

4 Neni, Nebukadineza, weriti nilikala ponga ukaya kwangu na kuwera na mpatiru muliboma lyangu. 5 Paweriti ng'onja pashitanda shangu, sawiti ndotu yayintiliziya na maholu na malola gangu ga kumtuyi gantiliziya. 6 Su, ndagalira wanaluhala woseri wa Babeli wajegwi kulongolu kwa neni su wang'ambiri mana ya kulota aku. 7 Shakapanu waganga na wahawi Wakalidayu na walola ntondu wajegwa. Niwatambira kulota kwangu, kumbiti wawezandiri kung'ambira mana yakuyi. 8 Shakapanu, kiza Daniyeli, yakashemwa viraa Betelishaza, litawu lyakuyi mlungu gwangu, mweni rohu ya wamlungu wananagala wawera mngati mwakuyi. Na neni nimtambira kulota kwangu panonga. 9 Gwee Betishaza, yaguwera mkulu gwa waganga, nivimana kuwera rohu ya wamlungu wananagala wawera mngati mwaku na kwahera bada yayiwera ikamala kwaku. Aku ndo kulota kwa neni gung'ambili mana yakuyi.

10 Paweriti ng'onja, moniti malola aga. Moniti kwana mtera mtali nentu pakatikati pa isi. 11 Mtera guweriti mkulu na gukamala na upeleru wakuyi usoka kumpindi. Guweziti kuwoneka kulawa kila pahala pasipanu. 12 Mihambi yakuyi yiweriti iherepa. Guweriti gumema mabwajubwaju, ntambu ya kupatosiya pasipanu poseri. Wankanyama woseri wa kuntundu wapatiti shivuniru pasi pakuyi na wampongu wa kulyera walikala muntambi zakuyi. Viwumbi vyoseri vipatiti shiboga kulawa mtera agu.

13 Paweriti nankugonja pashitanda shangu, moniti malola aga. Moniti malaika mnanagala kasuluka kulawa kumpindi. 14 Kashema pakabota, Mgukati mtera agu na kuzidumula ntambi zakuyi. Mpatuli mihamba yakuyi na kugapalasiya mabwajubwaju gakuyi. Wankanyama wawuki pasipakuyi na wampongu kulawa muntambi zakuyi waguluki. 15 Kumbiti mleki shisiki shakuyi na mishigila yakuyi mlitapaka, kumihambi miwisi ya kululalanda payiwera itawalirwa panu kwa minyololu ya shuma na shaba.

Mmuleki muntu ayu kaloviwi kwa mangami ga kumpindi, mmuleki kalikali pamuhera na wankanyama wa kuntundu na kuliya mihambi kushiwala. 16 Mahala gakuyi ga umuntu gagalambulwi, kaweri na mahala ga wankanyama kwa vinja saba. 17 Toza ayi ndo yayibweritwi na malaika, ndo gawajimiraniti na yawawera wananagala, su wantu woseri kila pahala wapati kuvimana kuwera Mlungu Mkulu kana ukulu kwa falumi zoseri za wantu, yomberi kampanana ufalumi muntu yoseri yakamfira, kamtenda kaweri mfalumi ata muntu gwa pasi gwa upeleru.

18 Kulota aku ndo ndotiti neni Nebukadineza, Vinu gwenga Belitishaza, gung'ambili mana yakuyi, mana wana luhala woseri muufalumi wangu wawezandiri kung'ambira mana yakuyi, toziya gwenga haguwezi mana rohu ya wamlungu wananagala wamngati mwaku.

19 Shakapanu Daniyeli, yawamshemiti viraa Betelishaza, kalikangasha katepu na maholu gakuyi gamhinginiziya. Mfalumi kamgambira, "Betelishaza kulota aku, ama mana yakuyi navikuhinginiziya.

Betelishaza, kamwankula, Mtuwa gwangu, kulota aku na mana yakuyi meyiweri mbaka kwa wankondu waku!" 20 Mtera yaguguwoniti guwera mkulu na yagwana likakala, gweni ntambi zakuyi ntali zisoka kumpindi na gweni guwoneka kulawa kila pahala pasipanu. 21 Mihamba yakuyi iwera iherepa na mabwajubwaju gakuyi gavuwa gakuliyiziya viwumbi vyoseri, wankanyama wa kuntundu wapata shivuni pasi pakuyi na wampongu wa kulyera pawalikala muntambi zakuyi.

22 Gwee mfalumi ndo gwenga yaguwera mkulu na yagwana likakala. Ukulu waku usoka mpaka kumpindi na ufalumi waku weneya mpaka upeleru wa pasipanu. 23 Gwee mfalumi gwenga guwoniti kayi, Mlolera mnanagala kasuluka kulawa kumpindi, kalagalira, Mgudumuli mtera agu mwakagwagamiziyi. Kumbiti mshileki shipiki shakuyi na mishigira yakuyi pasi pamihambi miwisi ya kululalanda, payiwera shitawalirwa mnyololu gwa shuma na shaba. Mmuleki muntu ayu kaloviwi kwa mangami ga kumpindi, mleki kalikali pamuhera na wankanyama wa kundundu kwa vinja saba.

24 Gwee mfalumi, ayi ndo mana ya kulota kwaku, ndo lagiru yakawera kumpindi nentu yakayilaviyiti kwa mtuwa gwangu mfalumi. 25 Gwee mfalumi, haguwigwi gugendi kutali na wantu! Hagulikali na wankanyama wa kuntundu, haguliyi mihambi gambira ng'ombi, hagulowi kwa mangami ga kumpindi. Hagulikali ntambu iraayi kwa vinja saba na upeleru hagumani kuwera Mlungu Mkulu ndo yakana uwezu kwa falumi za wantu na kampanana ufalumi muntu yoseri yakamfira. 26 Kayi lagiru ilii ya kushileka shipiki na mishigira ya mtera agu mulitapaka ina mana ayi. Gwenga haguwuzililwi kayi ufalumi waku paguvimana kuwera Mlungu gwa kumpindi ndo mkolamlima. 27 Gwee mfalumi, shondi gupikinili shanikugambiziya, guleki vidoda vyaku na makondola gaku, gutendi shashifiruwa na kuwawonera lusungu yawapunjitwi pamonga hagulikali kwa ponga na kunemelara.

28 Goseri aga gampatiti mfalumi Nebukadineza. 29 Miyezi kumi na miwili shakapanu, mfalumi Nebukadineza kaweriti kankutyanga pashintwiku handa litala. 30 Su mfalumi katakula kwa kubota, "Guloli Babeli, mji mkulu yanigunyawiti kwa makakala gangu guweri pahala pangu pa kulikala pa shifalumi na kwajili ya uweru wangu."

31 Pakalongiti visoweru avi, liziwu kulawa kumpindi lilonga, "Gwee mfalumi Nebukadineza, gupikiniri ulagilagi awu kwajili ya gwenga! Upokwa ufalumi waku. 32 Haguwigwi kutali na wantu! Hagulikali pamuhera na wankanyama wa kuntundu na haguliyi mihambi gambira ng'ombi! Hagulikali muntambu ayi kwa vinja saba na upeleru haguvimani kuwera Mlungu Mkulu ndo yakana uwezu kwa falumi za wantu na kampanana muntu yoseri yakamfira."

33 Palapalii mlandu agu kwa mfalumi Nebukadineza guwera. Kawingitwi kaweri kutali na wantu, kawera kankuliya mihambi gambira ng'ombi. Kalowa kwa mangami ga kumpindi na mviri zakuyi ziwera ntali na vuluvulu gambira mibahira ya mpongu kapungu. Na mikonji yakuyi iwera gambira ya mpongu.

34 Mushinja sha saba kupera, neni Nebukadineza nyasuliti masu gangu kulola kumpindi na mahala gangu gambuyira. Nongiti mayagashi Mlungu Mkulu na kumpanana ligoya yomberi yakalikala mashaka goseri.

Toziya ukulu wakuyi ndo ukulu wa mashaka goseri,

ufalumi wakuyi ulikala wiwuka mpaka wiwuka.

35 Wenikaya woseri wa pasipanu ndo shintundiri,

katenda vyakafira na viwumbi vya kumpindi,

na wenikaya wa pasipanu,

kwahera yakaweza kumlewelera ama kulonga gutenda shishi.

36 Shaka shiraashi mahala gangu gambuyira, mbuziliritwi ligoya lyangu, ukulu wangu na uweru wa ufalumi waneni. Watakuziya na maafisa wangu wiziti kunsakula, mpuziyitwi muufalumi wangu na kupananwa ligoya gambira pakwanja.

37 Su vinu, neni Nebukadineza nivimana kumkwisa na kumpanana ligoya mfalumi gwa kumpindi. Mana matendu gakuyi goseri ndo gamfiriziya, yomberi kawasulusiya wanamtiti.