1 Mushinja sha tatu sha ukolamlima wa mfalumi Koreshi gwa uajemi, Daniyeli, yakashemitwi viraa Beliteshaza, kapananitwi ugubutulu. Ugubutulu awu uweriti wanakaka na weni utakulira ntabiku ikalipa, hangu Umani wa ulagilagi awu umwiziliti mmalola.

2 Shaka ashi, neni Daniyeli, weriti nankudaya kwa majuma matatu. 3 Ndiyitindiri shiboga shiherepa ama shinofu pota kulanda divayi ama niliswagandiri lipaki kwa shaka sha majuma goseri matatu aga.

4 Lishaka lya ishilini na nne lya mwezi gwa kwanja, nweriti ng'oloka kumbwega na lushemba Tigili. 5 Noliti kumpindi, nimwona muntu kavala nguwu nfufu na kalitawa lufunga lwa zahabu kulawa Ufazi mushunu. 6 Nshimba yakuyi iweliti gambira mabuwi ga zabarajadi iherepa. Sheni shakuyi shilifaniti na lumeta lya lupanda na masu gakuyi gayaka gambira mwaku gwa motu. Magulu na mawoku gakuyi gang'elengeta gambira shaba yayikukumulitwi nentu. Liziwu lyakuyi livumiti gambira liziwu lya umatu mkulu wa wantu.

7 Neni Daniyeli gweka yangu moniti malola aga. Walii wantu yawaweriti pamuhera na neni wagawonandiri, kumbiti waweliti na lyoga nentu, 8 Hangu, ndekitwi gweka yangu panoliti malola aga ga kulikangasha. Makakala gampelera na sheni shangu shigalambuka, na kwahera muntu yakaweza kumana. 9 Pampikiniriti liziwu lyakuyi, nguwiti pasi makukama na mpota zinkoliti nentu. 10 Su, liwoku lishinkulu na ling'olosiya na kugangamaziya magulu na mawoku gangu.

11 "Ntumintumi gwa kumpindi kang'ambira hangu, Daniyeli, Mtuwa Mlungu kakufira nentu, gugoloki na gupikinili weri visoweru vyanfira kutakula, toziya ndagalirwa kwa gwenga. Pakaweriti kang'ambira visoweru avi, neni Daniyeli ng'olokiti agawu panendemela.

12 Ntumintumi gwa kumpindi ayu kang'ambira Daniyeli, nagutira. Mlungu kapikiniriti kuluwa kwaku kwanjira lishaka lilii lya kwanja pagwamuwiti kulinanagaziyiti kulongolu kwa Mlungu gwaku, su gupati umani. Neni niza toziya ya luwa yaku ayi. 13 Kumbiti mkulu gwa ufalumi wa uajemi kandiwiriti kwa shaka sha mashaka ishilini na moja. Kumbiti Mikaeli, yumu gwa wakulu wa wantumintumi wa kumpindi, kiza kuntanga, hangu nimleka aku pamuhera na mkulu gwa ufalumi wa Uajemi, 14 Na neni niza kukutanga guyimani mirandu hayiwapati wantu waku shaka shashiza, toziya malola yaguwera naga gawusu shaka shashiza."

15 Pakaweriti kang'ambira visoweru avi, ndoliti pasi wezandiri kuyowera toziya ya lyoga. 16 "Shakapanu, ntumintumi gwa kumpindi yakawonekaniti handa muntu, kayishinkuliti milomu ya neni na neni mamuliti milomu yangu na kumgambira yakagolokiti ulii pakwegera na neni, gwee mtuwa, malola aga ganjegera kutama nentu mpaka mpeluwa makakala. 17 Gwee mtuwa gwangu neni na ntumintumi gwaku. Weza hashi kuyowera na gwenga? Makakala gangu gampelera ata nsinda kupumula!"

18 Ntumintumi gwa kumpindi yakawonekaniti kayi gambira muntu kashingula kwa mala imonga, kantula makakala. 19 Kang'ambira, "Nagutira gwee muntu yagufiruwa nentu na Mlungu. Ponga iweri kwa gwenga! Guweri mgamala na gutira."

Pakayoweliti na neni, mpatiti makakala, ntakula hangu, gutakuli shilii shagufira kungambira toziya gumpanana makakala.

20 "Na yomberi kang'ambira, hashi, guvimana ntambu gaa nikwizira? Vinu hambuyi kulikomanga na wamahoka walolera wa uajemi. Shakapanu, pawera nimkanka, lihoka mlolera gwa Ugiliki hakalawiri." 21 Kumbiti hanikugambiri galii yagalembitwi mushitabu sha nakaka. Nahera gwingi gwa kuntanga kuwakanka awa ila Mikaeli, ntumintumi gwa kumpindi mlolera gwenu.