1 Mfalumi Dario kalagalira kusyagula wakulu miya ishilini wamtangi muukolamlima wakuyi. 2 Kawasyaguliti wagolokera watatu na yumu gwawu kaweriti Daniyeli. Walaviyiti walanga kwa wagolokera su mahengu ga mfalumi gagendi teratera. 3 Su, Daniyeli katenditi lihengu weli kuliku muwamu mwa wagolokera na wakulu, kaweriti weli mulihengu lyakuyi, ata mfalumi kaliholiti kumtula muugolokela mkulu gwa ufalumi woseri. 4 Wakulu walii pamuhera na wagolokera waweriti na weya, ata wasakula madoda su wamgambiri Mfalumi, kumbiti wawezandiri kupata ntambu ya kumlawumu, pota likosa, toziya Daniyeli kaweriti mwaminika. Kaweritindiri na madoda pota makontola goseri. 5 Su wantu walii watakuliti weni kwa weni hangu. "Hapeni tupati shoseri sha kumsitaki Daniyeli pamonga tusakuli shintu shakashitenda shashilawilana na lagiru lya Mlungu gwakuyi."

6 "Su, wagolokera na wakulu wingira kwa mfalumi kwa pamuhera na kulonga, Gwee Mfalumi Dario, gulikali mashaka goseri! 7 Wagolokera wa shifalumi, watanga, wakulu, watakuziya na wakolamlima woseri wajimilirana mfalumi kalaviyi lagiru na kutenda wantu wankuyitenda mumashaka selasini yoseri yakamluwa mlungu ama muntu ila gwenga hera mfalumi, hakaswi mung'ati mwalilindi lya simba. 8 Gwee mfalumi, vinu gulaviyi lagiru na guyilembi su nayigalambulwa, kulinganira na lagiru za Wamedi na Wajemi, lagiru lyeni nayigalamburwa." 9 Su, mfalumi Dario katula shimaniziwu. 10 Daniyeli pakavimaniti kuwera lilembu lilii litulwa shimaniziwu, kagenditi kunumba kwakuyi mugolofa lya shumba shakuyi yashiweriti na madilisha yagavugukiti kulola Yerusalemu. Ntambu yayiwera mashaka goseri Daniyeli kasundamaliti mala tatu kila lishaka na kuluwa pakalonga mayagashi kwa Mlungu gwakuyi.

11 Wantu walii yawayoweriti na mfalumi wamwoniti Daniyeli pakamluwa Mlungu gwakuyi kamtangi. 12 Su, wakulu walii wagenditi kwa mfalumi na kumsitaki Daniyeli kwa kulola lagiru ayi, pawalonga, gwee Mfalumi Dario, hashi gutulandiri shimaniziwu mulirembu lya lagiru kuwera kwa shaka sha mashaka selasini kwahera muntu yoseri yakajimirwa kuluwa shintu shoseri, kwa mlungu yoseri, ama kwa muntu yoseri ila kukuluwa gwenga, gwee mfalumi na yoseri yakajimirandiri lagiru ali hakasirwi mulilindi lwa simba?

Mfalumi kankula, "Shamtakula shanakaka, kulinganira na lagiru lya Wamedi na Waperesi yeni hapeni igalambulwi."

13 Shakapanu wamgambira mfalumi kuwera, "Daniyeli ulii yakaweriti yumu gwa malopola kulawa isi ya Yuda kapananandiri ligoya lagiru yagutuliti na kulilemba. Yomberi kankuluwa mala tatu kila lishaka."

14 Shaka mfalumi pakapikaniliti visoweru avi, kahinginikiti nentu. Kajeriti kumlopola Daniyeli, yomberi kendeleya kutenda kila ntambu ya kumlopola mpaka mshenji pagwinaliti. 15 "Wantu walii wamgendera kwa pamuhera mfalumi Dario na kumgambira, gwee mfalumi, guvimana kuwera kwahera lagiru ama lagaliru lyoseri lya Wamedi na Wapelesi yayiweza kugalambulwa payitulwa shimaniziwu na mfalumi."

16 Su, mfalumi kalagalira, na womberi wamjega Daniyeli na kumwasira mngati mlilindi lya simba. Mfalumi kamgambira Daniyeli, "Mlungu gwaku yagumtendera mashaka goseri hakulopoli." 17 Libuhi lijegwa na kulitula paligomi lya lipanga lilii. Mfalumi kalitula shimaniziwu shakuyi mweni na shilii sha walonguziya wakuyi, su galii yagatakulitwi kuusu Daniyeli na kamlaviya. 18 Shakapanu mfalumi kawuya muliboma na koyakuliya na katendandiri msambu gwa ntambu yoseri na kapatandiri mpota.

19 Mandawira putiputi, mfalumi Dario kimuka, kagenda kalongola kulipanga lya simba. 20 Pakasokiti pakwegera na lirindi kamshema Daniyeli kwahinginiku pakalonga, "Daniyeli, ntumintumi gwa Mlungu yakawera mkomu! Hashi, Mlungu gwaku yagumtendera mashaka goseri kaweza kuwatenda simba awa nawakuliya?"

21 Daniyeli kamwankula mfalumi, "Gwee mfalumi, gulikali mashaka goseri! 22 Mlungu gwangu kajegiti malayika gwakuyi na kudiwa milomu ya simba awa, na weni wantendandiri shoseri, Mlungu katenditi hangu toziya kamaniti neni nahera lawama yoseri kwakuyi na pota hanenitendi shoseri shidoda kulongolu kwaku."

23 Panu mfalumi kanemelera nentu, kalagalira Daniyeli kalaviwi mulilindi. Su wamlaviya na yomberi kaweriti hakeni tenderwi shoseri na simba awa, toziya Daniyeli kawera kankumtumbira nentu Mlungu gwakuyi. 24 Mfalumi kalagalira wantu walii yawamshongiriti Daniyeli wabatwi na kwaswirwa mulilindi lilii lya simba pamuhera na wadala wawu na wana wawu woseri, pamberi haweni shinkuli pasi, simba wawapapuliti na kubenangabenanga mihonju yawu.

25 Shakapanu mfalumi Dario kawalembera wantu wa makabila goseri, maisi goseri na luga zoseri pasipanu pakalonga.

"Niwafilira ponga ivuwa! 26 Handaviyi lagaliru kwa wantu woseri muufalumi waneni wamjimiri na kumguwira Mlungu gwa Daniyeli.

Yomberi ndo Mlungu yakawera mkomu, yakalikala mashaka goseri,

ufalumi wakuyi wa nakaka uweza ndiri kuwagamiziwa,

ukolamlima wakuyi wahera upeleru.

27 Yomberi kakombola na kulopola,

katenda lagiru na makangashu kumpindi na pasipanu,

mana kamlopola Daniyeli kulawa mukulaguwa na simba."

28 Shakapanu Daniyeli kawera mkulu nentu muukolamlima wa mfalumi Dario na muufalumi wa Koreshi kulawa Wajemi.