1 Mushinja sha pili sha ukolamlima wakuyi, mfalumi Nebukadineza kalotiti, Kulota aku kumjegera lyoga mumoyu mwakuyi mpaka kasinda kugonja. 2 Shakapanu, mfalumi kalagalira waganga na wambuyi na wantu yawana luhala na wahawi wa Wakalidayu, wajegwi su wamtambiri kulota kwakuyi. Woseri wiza na kugoloka kulongolu kwakuyi. 3 "Mfalumi Nebukadineza kawagambira, notiti na kulota aku kunjegera lyoga, nfira kuvimana mana yakuyi."

4 "Womberi wamgambira mfalumi kwa luga ya Shiaramu, gulikali, gwee mfalumi! Gututambili kulota kwaku na wantumintumi waku hatukugambiri mana yakuyi."

5 "Mfalumi kawagambira, shisoweru sha ntakula shanakaka. Pamng'ambirandiri kulota kwangu kuweriti kwa ntambu gaa na mana yakuyi, hamuhanjangwi vipandivipandi wungu vyenu na numba zyenu hazibomolwi. 6 Handa pamung'ambira mana ya kulota aku, haniwapanani lifupu na ligoya likulu. Vinu, mung'ambiri mana ya kulota aku!"

7 "Womberi wamwankula kayi, mfalumi, gututambiri kulota aku na twenga wantumintumi waku hatukugambili mana yakuyi."

8 "Shakapanu mfalumi kawankula pakalonga, nivimana kuwera mjera kukawiziya shaka, toziya mvimana kuwera shantalukiti shanakaka, 9 Kumbiti pamung'ambirandiri kulota aku, likomangu lyenu ndo limu. Mpataniti kumpayira na kuzyangazyanga. Agawu shaka shangupita. Su, mung'ambiri kulota aku na neni hanivimani kuwera muweza kung'ambira mana yakuyi."

10 "Wantu yawana luhala walii wamwankula mfalumi, pawalonga. Gwee mfalumi, kwahera muntu yoseri pasipanu yakaweza kutenda shagufira. Kwahera mfalumi yoseri, ata mekaweri mkulu na kana likakala nentu mekawezi kuwakosiya waganga ama wahawi ama wantu yawana luhala mlandu handa agu. 11 Gwee mfalumi, mlandu yagugukosiyiti ndo gukamala nentu. Kwahera muntu yakaweza kukugambira mana yakuyi ila wamlungu gweka yakuyi weni walikalandiri muwamu mwa wantu." 12 Mfalumi Nebukadineza pakapikaniliti aga kakalaliti nentu, kalagalira wamashonta wakuyi wawalagi wanaluhala woseri wa Babeli. 13 Su, lilagaliru lipikanika kuwera wanaluha woseri walaguwi, Daniyeli na wayaguwi vira wasakulwa su walaguwi.

14 Shakapanu, Daniyeli kamgenderiti Arioko kwa kulolalora, Mkulu gwa watenda lihengu wa mfalumi na mweni kapananitwi lihengu lya kuwalaga wana luhala wa Babeli, 15 Daniyeli kamkosiya mgolokela mkulu gwa watenda lihengu wa mfalumi, "Ntambu gaa mfalumi kalagalira kwa ukalipa hangu? Arioko ndo kamgambira Daniyeli mlandu agu."

16 Su Daniyeli kamgenderiti mfalumi na kumluwa kampananani shaka su kawezi kumgambiziya mfalumi mana ya kulota kwakuyi. 17 Shakapanu, Daniyeli kawuya ukaya, kawagambira wayaguyi Hananiya, Mishaeli na Azariya mlandu agu. 18 Kawagambira wamluwi Mlungu gwa Kumpindi kawawoneri lusungu kuusu bada ayi, su womberi nawagamira pamuhera na wantu yawana luhala wamonga wa Babeli. 19 Shakapanu Daniyeli kalanguziwa kulota na mana yakuyi. Su Daniyeli kalonga mayagashi Mlungu gwa kumpindi,

20 kalonga,

Mlungu kakwiswi mashaka goseri pota upeleru.

"Luhala na uwezo ndo vyakuyi.

21 Kavitenda vintu vyoseri vitendeki kwa shaka shakuyi,

kawatula wafalumi na kuwawusiya.

Kawapanana luhala yawana luhala,

wana umani.

22 Kagubutula bada na mirandu yayilififa, kashimana shashiwera kuluwindu,

mweni kalikala mukulangala.

23 Gwee Mlungu gwa Wambuyi wangu,

nonga mayagashii na kukuzyuma,

mana gumpanana luhala na likakala,

gutugambiziya shilii shanikuluwiti, gutugambiziya shitwatira shilii sha mfalumi."

24 Hangu Daniyeli kamgendera Arioko yakaweriti kalagalira kuwagamiziya wanaluhala wa Babeli, kamgambira, "Naguwalaga wantu wa luhala wa Babeli, ila gunjegi neni kulongolu kwa mfalumi na neni hanimgambiziyi mana ya kulota kwakuyi."

25 Shakapanu, Arioko kamjega Daniyeli kulongolu kwa mfalumi kalongola na kumgambira, "Nimpata muntu tunga muwamu mwa wantu yawajegwitwi panu kulawa Yuda, yakaweza kukutakulira mana ya kulota kwaku, gwee mfalumi."

26 Mfalumi kamkosiya Daniyeli, "Daniyeli mweni viraa kashemitwi Beliteshaza, hashi, guweza kung'ambiziya kulota kwanotiti na mana yakuyi?"

27 Daniyeli kamwankula, gwee Mfalumi, "Kwahera muntu yakana luhala ama wahawi ama wambuyi ama waganga wa wakalidayu yawaweza kukugambiziya bada yaku ayi." 28 Kumbiti kwana Mlungu kumpindi mweni kagubutula mirandu ya bada, na yomberi kakugambiziya, gwee mfalumi Nebukadineza, mirandu yayifira kulawira mashaka gagiza. Kulota kwaku na malola yagakwiziliti mumtuwi gwaku paguweriti gwankugonja ndo aga.

29 Gwee mfalumi, paguweriti gugonja pashitanda paku, gakwiziliti maholu kuusu mirandu hayilawiri shakapanu na Mlungu yakagubutula mirandu ya bada, kakulangaziya galii hagalawiri. 30 Kumbiti neni ng'ubutulitwindiri mlandu agu toziya nana luhala kuliku wantu wamonga, su gwenga mfalumi gupati kumaniziwa mana ya kulota kwaku na kukugambira maholu gaku.

31 Gwee mfalumi, mukulota kwaku guwoniti shinyagu shikulu nentu na yashing'eleng'eta nentu, shigoloka kulongolu kwaku. Shinyagu ashi shikulu nentu shiweriti sha kutiriziya nentu. 32 Mtuwi gwa shinyagu ashi shikulu nentu shiweriti sha zahabu iherepa, shifuwa shakuyi na mawoku gakuyi gaweriti ga madini ga feza, mtima gwakuyi na mawondu gakuyi gaweriti ga shaba. 33 Magulu gakuyi gaweriti ga shuma na lwayu zakuyi ziweriti za mhanganiku gwa shuma na litapaka lya ukaka. 34 Paguweriti gwankali gwankulola, Libuwi likulu nentu litupukiti lyeni kulawa kuligongu pota kushinkulwa na muntu, liguma na kugaposholaposhola magulu ga shaba na utapaka wa ukaka wa shinyagu shikulu nentu shilii na kushimeganga vipandivipandi. 35 Shakapanu shuma shilii na utapaka wa ukaka na shaba na feza na zahabu, vyoseri vipandika vipandivipandi na kuwera gambira miwawi ya pahala pa kukomera viboga shaka sha shiyangazi. Liyega vivigulusiya kutali pota kusigala ata shipandi shimu. Kumbiti libuwi lili lyalimegiti shinyagu shilii ligalambuka kuwera lugongu lukulu na kupamemiziya pasipanu poseri.

36 Gwee mfalumi ayi ndo iweriti lota yaku. Su vinu hatukugambili mana yakuyi. 37 Gwee mfalumi, gwenga gwa mkulu kwa wafalumi woseri! Mlungu gwa kumpindi kakupanana ufalumi, uwezu, likakala na uweru. 38 Mlungu kakutenda gukolimlima wantu woseri, vigongolu wa kuntundu na wampongu woseri wa kuliyera, koseri kulii kwawawera. Gwenga ndo mtuyi gulii gwa zahabu. 39 Pa gwenga hawizii ufalumi umonga, Kumbiti ufalumi awu hawuweri wahera makakala. Pa ufalumi awu gwapili kupela hawufatwi ufalumi wa tatu wawulifana na shaba, awu hawukolimlima wantu woseri pasipanu. 40 Pa falumi azi kupera, hawizi ufalumi wa msheshi ugangamala gambira shuma. Handa shuma yashimega na kupondaponda vintu vyoseri, ufalumi awu hawugalambuli yagatulitwi na falumi yazilongoleriti. 41 Ntambu yaguwoniti kuwera seemu za nzayu na vyala vya shinyagu shikulu nentu ashi viweriti nusu utapaka wa ukaka na nusu shuma. Ayi yana mana kuwera ufalumi awu hawubaganiki, kumbiti ufalumi awu hawuweri na makakala ga shuma na makakala madidini ga utapaka wa ukaka. 42 Ntambu yaguwoniti, vyala vyakuyi vya magulu viweriti nusu shuma na nusu litapaka lya ukaka na ayi imaniziya kuwera ufalumi awu hawuweri na makakala madidini na kuperuwa makakala ntambu tunga. 43 Ayi ilanguziya kuwera wakolamlima wa ufalumi awu hawahanganiki kwa kuyuga wantu wa isi zimonga, kumbiti hapeni wawezi kuhanganika handa shuma ntambu yashiwezandiri kuhanganywa na litapaka lya ukaka. 44 Shaka sha wafalumi awa, Mlungu gwa kumpindi hakawutuli ufalumi ugangamala. Wantu wamonga hapeni wawukanki na kuukolamlima ufalumi awu, su ufalumi awu hawuwupondi na kunyamaziya falumi yazilongoleriti na weni hawulikali mashaka goseri. 45 Guliwoniti libuwi lyalitupukiti lyeni kulawa kulugongu, pota kushinkurwa, ntambu yayishipanditi shinyagu vipandivipandi shinyagu shikulu nentu shilii shashinyawitwi kwa shuma na shaba, litapaka lya ukaka, feza na zahabu. Gwee mfalumi, Mlungu Mkulu kakugubutulira mirandu yanayilawiri shakapanu. Neni nikutambira, kulota kwaku ndo kwa nakaka na mana yakuyi ndo yeni.

46 Shakapanu mfalumi Nebukadineza pakaguwiti makukama na kumsundamalira Daniyeli na kulonga wamlavilira Daniyeli tambiku na ubani. 47 Mfalumi Nebukadineza kamgambira Daniyeli, "Nakaka Mlungu gwaku ndo Mkulu kuliku wamlungu woseri na Mtuwa yakakolamlima wafalumi woseri na ndo yakagubutulwa bada zoseri zazilififiti na yomberi ndo yakakutenda kutakuli bada ayi." 48 Shakapanu mfalumi Nebukadineza kampanana Daniyeli ukulu. Nakampanana lifupu livuwa na kumtenda mkolamlima gwa mkowa goseri gwa Babeli na mkulu gwa wana luhala woseri wa Babeli. 49 Daniyeli kamluwa mfalumi kawatula Shadilaki, Meshaki na Abedinego kuwera wagolokera wa mirandu ya ukolamlima wa mkowa gwa Babuloni. Kumbiti Daniyeli kasigala muliboma lya mfalumi.