1 Mfalumi Nebukadineza kalagaliliti wantu wakuyi wanyawi shinyagu sha zahabu, shana utali wa mita ishilini na nani na upana mita ntatu. Kayigolosiyiti pahala palulanda lwa Dura mumkowa gwa Babeli. 2 Shakapanu mfalumi kawagambira walongoziya wakulu, wagolokera, wakulu wa mikowa, watakula, walolera luhanja, watoza, mahakimu na maafisa woseri wa mikowa wizi mumsambu gwa kwanja kushiguwira shinyagu shakashigolosiyiti. 3 Shakapanu, wakulu woseri wajojonika, kulongolu kwa shinyagu ashi. 4 Shakapanu mbwera kabwera kwa kubota pakalonga, "Mwenga wantu wa makabila goseri na wantu wa maisi goseri na wantu wa luga zoseri, mlagalirwa kuwera, 5 pampikanira liziwu lya lipenka, mluli na lingutinguti na lugombugombu na zezi na zumari na maziwu gamonga ga vyombu vya kwimbira, mfiruwa mng'ong'onali pasi na kushiguwira shinyagu sha zahabu yakashigolosiyiti mfalumi Nebukadineza. 6 Na yoseri yakang'ong'onalandiri pasi na kushiguwira, hakasirwi mulitanuli lya motu gukalipa." 7 Su, wantu woseri, katepu pawapikiniriti maziwu ga mapenka na mluli na lingutinguti na lugombugombu na zezi na zumari na maziwu gamonga ga vyombu vya kwimbira, waguwiti makukama na kushiguwira shinyagu shilii sha zahabu sheni mfalumi Nebukadineza kashigolosiyiti.

8 Shaka ashi, wamu wa Wakalidayu wiziti na kuwashongera Wayahudi. 9 Wamgambira Mfalumi Nebokadineza! "Gwee mfalumi gulikali mashaka goseri. 10 Gwee mfalumi, gulagaliriti kuwera kila muntu pakapikinira liziwu lya lipenka na mluli na lingutinguti na ligombugombu na zezi na kila ntambu yimonga ya vyombu vya kwimbira, kang'ong'onali pasi na kushiguwira shinyagu shirii sha zahabu. 11 Na muntu yoseri yakang'ong'onalandiri pasi na kushiguwira shinyagu ashi, hakaswiri mulitanuli lya motu gukalipa. 12 Vinu, kwana Wayahudi tunga yaguwasyaguliti kugolokera mirandu ya ukolamlima wa mkowa gwa Babeli, weni ndo Shadilaki, Meshaki na Abedinego, gwee mfalumi wantu awa wajimirandiri amuli yaku. Walema kuwatendera wamlungu waku na kushiguwira shinyagu shilii sha zahabu shagushigolosiyiti."

13 Panu mfalumi Nebukadineza, agawu pakawera na maya, kahimiziya Shadilaki na Meshaki na Abedinego wajengwi kulongolu kwaku. Na womberi wajengwa kwa mfalumi. 14 Mfalumi Nebukadineza kawakosiya hangu, "Gwenga Shadilaki, Meshaki na Abedinego, vinu nakaka mulema kuwatendera wamlungu wangu pota kushiguwira shinyagu shilii sha zahabu yanishigolosiyi. 15 Vinu, pampikinira kayi liziwu lya lipenga na mluli na lingutinguti na lugombugombu na filimbi ntali na maziwu ga ngoma zimonga, Hashi kung'ong'onala pasi na kushiguwira shinyagu shanishinyawiti? Handa pamlema, hamwaswi ula vinu mutanuli lya motu gukalipa. Hashi, ndo mlungu gaa yakaweza kuwalopola muwuwezu waneni?"

16 Shakapanu Shadilaki na Meshaki na Abedinego wamwankula mfalumi, "Gwee Nebukadineza, twenga tufirandiri kukwankula toziya ya mlandu agu. 17 Payiwera hangu, Mlungu gwetu mweni yatumtendera kaweza kutulopola mulitanuli lya motu gukalipa na yomberi hakatulopoli mumakakala gaku, gwee mfalumi. 18 Gwee mfalumi payitendekandiri ntambu ayi, guvimani pota kufifa, handa twenga hapeni tuwatenderi wamlungu waku pota kuguwira shinyagu sha zahabu shagushigolosiyiti."

19 Shakapanu mfalumi Nebukadineza kakalala nentu na sheni shakuyi shigalambuka kwa nkalaliru toziya ya Shadilaki, Meshaki na Abedinego. Kalagalira motu gwa tanuli gongereki mara saba kuliku ntambu yakuyi. 20 Kawagambira wantu tunga wana makakala nakamu mulishonta lyakuyi wawatawi Shadilaki na Meshaki na Abedinego na kuwasira mulitanuli lilii lya motu gukalipa. 21 Su, wantemba awa watawalilwa pawera wavala makoti gawu na mahabiti gawu na vilemba na nguwu zawu zimonga, waswa pakatikati pa tanuli lya motu gukalipa. 22 Mana lagiru lya mfalumi liweriti likalipa nentu na motu gulii gwawawashiti guweriti gukalipa nentu, ata mbamba za motu ziwalagiti wantu walii yawawajegiti Shadilaki, Meshaki na Abedinego. 23 Shakapanu Shadilaki na Meshaki na Abedinego, pawawera watawalirwa, wasirwa mulitanuli lya motu gukalipa.

24 Su, mfalumi Nebukadineza kalikangasha, kagoloka kalongola na kuwakosiya wagambiziya wakuyi, "Hashi, tuwasandiri wantu watatu pamotu?"

Na weni wamwankula mfalumi, "Yina, mfalumi! Ntambu yayiwera."

25 "Shakapanu kakosiya, hashi vinu mona wantu wamsheshi pawatyangatyanga mumotu, pota kutawalirwa na kulungula na muntu gwa msheshi kawoneka gambira mwana gwa wamlungu."

26 Su, mfalumi Nebukadineza kalisegelera ligomi lya tanuli lya motu gukalipa, kashema, "Shadilaki na Meshaki na Abedinego, wantumintumi wa Mlungu mkulu, mlawi kunja mwizi agawu! Su Shadilaki na Meshaki na Abedinego walawa kumotu." 27 Su walongoziya wakulu na wagolokera, wakulu wa mikowa na watakuziya wa mfalumi, woseri wajojonika na kuwazyengeta, wawona kuwera motu gulii gusinda kuwalunguziya watatu awa. Mviri zawu zilungulandiri, ata nguwu zawu zilungulandiri, pota wanunkandiri motu.

28 Hangu, mfalumi Nebukadineza kalonga, "Kazumwi Mlungu gwa Shadilaki na Meshaki na Abedinego toziya kawatuma wantumintumi wakuyi wa kumpindi na kuwalopola wantumintumi wakuyi weni wamtumbira. Womberi wajimiritindiri lagiru ya neni ya shifalumi, wawoniti mbaka kuhowa kuliku nawaguwira wamlungu wamonga," Ila Mlungu gwawu gweka yakuyi.

29 "Hangu, ndagalira handa wantu wa likabila lyoseri, isi yoseri ama luga yoseri, yawafirakumtakula vidoda Mlungu gwa Shadilaki na Meshaki na Abedinego, walikitulwi viwungu vyawu shimushimu na numba zawu hazibomoluwi. Mana kwahera Mlungu yumonga yakaweza kulopola ntambu ayi."

30 Su, mfalumi Nebukadineza kawatenda waweri wakulu kwa kuwakweniziya muvyewu Shadilaki na Meshaki na Abedinego mkowa gwa Babeli.