1 Mushaka ashi Mikaeli mkulu gwa wantumintumi wa kumpindi, yakawera mlolera gwa wantu waku, hakalawili. Hakuweri na shaka sha ntabiku nentu kuliku vyaka vimonga vyoseri kwanjira maisi paganjiti kuwera pasipanu. Kumbiti, shaka ashi, kila yumu gwa wantu wa mweni litawu lyakuyi lilembwa mushitabu sha ukomu, hakalopolwi. 2 Wavuwa wa walii weni wahowiti kala, hawazyuki, wamonga hawapati ukomu wa mashaka goseri na wamonga hawapati soni na kubeziwa mashaka goseri. 3 Walii yawana luhala hawalangali gambira lyera yalilangala na walii yawawalongoziya wamonga kutenda yagafiruwa, hawalangali gambira ntondu mashaka goseri.

4 Vinu gwee Daniyeli, gutuli bada mirandu ayi, gushitawi shitabu na kushitula shimaniziwu mpaka shaka sha upeleru pashisoka. Wavuwa hawatugiri aku na aku na umani hawongeleki.

5 Shakapanu, neni Daniyeli nola, mona wantu wawili wantuntumi wa kumpindi wagoloka muunenemu mwa lushemba, yumu uwega awu na yumonga uwega wa pili. 6 "Yumu gwawu katakula na muntu ulii yakavaliti nguwu nfufu, yakaweriti panani pa mashi ga lushemba, hashi, hayiweri shaka gaa pamberi pa mirandu ayi ya kutiliziya hayenitimiyi?"

7 Ntumintumi gwa kumpindi ulii yakagolokiti uwega wa pampindi pamashi ga lushemba, kavala nguwu nvufu, kanyasula mawoku gakuyi goseri kugenda kumpindi. Shakapanu nimpikinira pakalirapa kwa litawu lya ulii yakalikala mashaka goseri pakalonga, haviweri vipindi viwili na nusu shipindi. Makakala ga wantu wan Mlungu pagapera, ndo mirandu yoseri ayi hayisoki.

8 Mpikiniriti shakayoweriti, kumbiti nelewandiri. Su, nimkosiya, Mtuwa gwangu, ashilawili shishi pa goseri aga kupera?

9 Muntu ulii kankula pakalonga, "Daniyeli vinu gugendi zaku, toziya visoweru avi ndo bada na vitatwa kwa kulekera shimaniziwu mpaka shaka sha upeleru." 10 Wantu wavuwa hawalitakasiyi na kuwera kuherepa. "Kumbiti wantu wakontola hawendereyi kutenda makontola. Kwahera ata yumu gwawu gwa wakontola hakavimani, kumbiti yawana luhala hera ndo hawavimani.

11 Kwanjira shaka shilii walekiti kulaviya tambiku za kulunguziwa kila lishaka, kulawa shaka shilii sha ngalaliru ya ihalibiya yaligolosiwitwi, hashiweri shaka sha mashaka elufu yimu miya mbili tisini. 12 Watekelelwa wantu walii yawahepelera mpaka mashaka galii elufu yimu miya tatu selasini na mhanu pagasoka.

13 Kumbiti gwenga, Daniyeli, gwendeleyi kuwera mwanminika kwa Mlungu mpaka shaka shaku sha kuhowa, pagoseri aga kupera haguzyuki na kupata lifupu lyaku kulawa kwa Mlungu."