1 Mushinja sha kwanja sha kukolamlima kwakuyi Dario yakaweriti mwana gwa Ahasuwelo mwiwuka gwa Umedi, mweni katendwa mkolamlima gwa ufalumi wa Babeli, 2 Mushinja sha kwanja sha kukolamlima kwakuyi mfalumi Dario, neni Daniyeli, nivimaniti mana ya malembu na mana ya visoweru vya Mtuwa Mlungu vyakalembiti mbuyi Yerimiya, kuwera Yerusalemu meguhalibisiwi kwa vinja sabini. 3 Nimluwiti Mtuwa Mlungu kwa moyu goseri pamuhera na koya kuliya na kuvala nguwu za mafafa na kukala mumalivu kulanguziya nankuhinginika. 4 "Nimluwiti Mtuwa Mlungu, Mlungu gwangu na kumgalambukila Mlungu na kuleka vidoda panonga.

Gwee Mtuwa, gwenga ndo Mlungu mkulu na gwa kupananwa ligoya. Gwenga ndo mwaminika kwa lipatanu lyaku na guwatanga yawafira kujimira lagiru zaku.

5 Tutenda vidoda na tutenda makontola, tugalambuka gwenga na tuleka malagalira gaku na lagiru zaku. 6 Tuwapikinirandiri wantumintumi waku wambuyi, weni wayowiliti na wafalumi wetu, wakulu wetu, wazewi wetu na wantu woseri wa isi. 7 Gwee Mtuwa, gwenga gutenda yagawera teratera, kumbiti lishaka lya leru tuwera na soni twenga wapalu wa Yuda wenikaya wa Yerusalemu na Israeli woseri yawawera pakwegera na yawawera kutali muisi, toziya twenga twahera waminika kwa gwenga. 8 Gwee Mtuwa Mlungu twenga na wafalumi wetu na wakulu wetu na watati wetu twanasoni toziya tukutendera vidoda, 9 Gwenga Mtuwa Mlungu gwetu, gwana lusungu na guwalekiziya wantu, tembera twenga tukugalambuka. 10 Gwee Mtuwa Mlungu, Mlungu gwetu, tulemiti kukupikinira na tuzikolandiri lagiru zakuyi zagutupananiti kwa njira ya wantumintumi waku wambuyi. 11 Waisraeli woseri wakuleka na wayigalambuka lagiru yaku kukujimira. Toziya tukutendera vidoda, su tupangirwa kwa lapiru yayilembitwi mulagiru ya Musa ntumintumi waku. 12 Hangu gutenda visoweru vilii vyagulongiti kwa twenga pamuhera na wakolamlima wetu kwa kugukomanga mji gwa Yerusalemu, nentu ya mji gumonga goseri pasipanu. 13 Gutukomanga ntambu yayilembitwi mulagiru ya Musa, gwee Mtuwa Mlungu, Mlungu gwetu, kumbiti ata vinu tukuluwandiri tulekiziwi na gwenga na kuvileka vidoda vyetu na kulihola waminika waku. 14 Gwee Mtuwa Mlungu, Mlungu gwetu, guweriti kala kutukomanga na gutenda hangu, toziya mashaka goseri gutenda yagajimilika kulongolu kwaku, kumbiti twenga tukupikinirandiri.

15 Vinu gwee Mtuwa, Mlungu gwetu, yaguwalaviyiti wantu waku muisi ya misri kwa makakala gaku na kuwatenda wantu wagahola makakala gaku mpaka leru, tulonga tutenda vidoda na tutenda makondola 16 Gwee Mtuwa Mlungu, kwa shiyasi sha matendu gaku gakufiriziya, naguwukalalira wantu waku pota kuwera na maya mumji gwaku Yerusalemu, gweni gugunyawa mulugongu lwaku lunanagala. Wantu woseri wa isi za pakwegera wagubeziya mji gwa Yerusalemu na wantu waku, toziya ya vidoda vyetu na makondola gawatenditi wazewi wetu." 17 Gwee Mlungu gwetu, "Gupikinili kuluwa kwangu na maluwa gangu neni ntumintumi gwaku. Kwa mirandu yaku miheri, guyinyawi kayi numba yaku yayihalibisiwitwi. 18 Gwee Mlungu, gupikinili luwa yaneni, gulori ntabiku ya mji gwaku yaguhalibisiwa, tukuluwa gwenga toziya twenga tutendandiri yagafiruwa ila tutenda vidoda. 19 Gwee Mtuwa gutupikiniri, Gwee Mtuwa gutulekiziyi. Gwee Mtuwa Mlungu, kwa utanga waku gutupikiniri na kututendera, pota kukawalira, toziya ya mji agu na wantu yawawera waku mweni!"

20 Su paweriti nankuluwa na kulonga noya vidoda vyangu na vya wantu wa Israeli, pamuhera na kumluwa Mtuwa Mlungu toziya ya lugongu lwakuyi lunanagala, 21 Gabliyeli ulii, mweni weriti nimwona mumalola galii ga kwanja, kasulukiti kalongola mpaka pahala paweriti. Shiweriti shaka sha kulaviya tambiku ya pashimihi. 22 "Su, kang'ambira hangu, Daniyeli niza kukupanana luhala na uwezu wa kumana malola aga." 23 Pagwanjiti kuluwa, Mlungu kalaviyiti lyankulu, naneni niza kukugambira lyankulu ali toziya Mlungu kakufira nentu. Hangu, gupikinili weri lyankulu ali na kuvimana malola aga.

24 Mumajuma sabini gatulwa toziya ya wantu waku na pampindi pa mji gwaku gunanagala su kulopolwa na kuwusiya vidoda na kulekiziya ukontola, kujega yagafiruwa kwa Mlungu mashaka goseri, kutula shimaniziwu na umbuyi na kuswaga lipaki pahala pananagala nentu. 25 Su, guvimani na gwelewi mlandu agu. Kwanjira shaka palilaviyitwi lagalira lya kunyawa kayi mji gwa Yerusalemu mpaka kwiza kwakuyi yakaswagiti lipaki, ulii yakaweriti mkulu, ndo shaka sha majuma saba. Kwa shaka sha majuma sitini na mawili, mji gwa Yerusalemu hagunyawiwi kayi, wana njira nkulu na malindi, kumbiti shaka ashi hashiweri sha ntabiku. 26 Pa majuma sitini na mawili, ulii yakaswagitwi lipaki hakalaguwi na hapeni kasigalwi na shintu. Wantu pamuhera na mkolamlima hawizi na kuhalibisiya mji na pahala pananagala gambira malawa ga mashi, nkontu hayiyendeleyi ntambu yakatuliti Mlungu. 27 Mkolamlima ayu hakatendi mapatanu magangamala na wantu wavuwa kwa shaka sha vinja saba. Pa nusu ya shaka ashi hakamalili tambiku na sadaka. Pashitalawanda pampindi panumba nkulu ya Mlungu hapagolusiyi nkalaliru halibisiya yeni hayisigali panu mpaka ulii yakaligolosiyiti hakaagamiziwi ntambu yayitulitwi na Mlungu.