1 Mu shinja sha tatu sha ukolamlima wa Yehoyakimu mfalumi gwa Yuda, Nebukadineza mfalumi gwa Babeli, kagenditi kuguzyengeta mji gwa Yerusalemu kwa lishonta su kugukomanga. 2 Mtuwa Mlungu kamleka Yehoyakini mfalumi gwa Yuda kabatwi nalishonta lya mfalumi Nebukadineza pamuhera na vyombu vimu kulawa Munumba ya Mlungu. Nayomberi kavitola vyombu mpaka kunumba nkulu ya mlungu gwakuyi aku Shinari na yomberi kavitula muluhanja lya mlungu gwakuyi.

3 Shakapanu mfalumi Nebukadineza kamlagalira Ashipenazi, mlonguziya mkulu gwa wantu wakuyi, kamsyaguliri wantemba wamu wa Waisraeli yawaweriti wiwuka wa shifalumi na wantu yawamanika kulawa Yuda. 4 Mfalumi kafiriti wantemba yawahera shilema, waherepa, wazowelera wa kila luhala, wana mahala na umani na yawafaa kutenda lihengu muliboma. Kafiriti viraa wantemba awa wafundwi kusoma na kulemba luga ya Wakalidayu. 5 Mfalumi ayu kalagaliriti wantemba awa wapananwi shiboga shiherepa sheni mweni kaliyiti na divayi yeni kalanditi. Wantemba awa wafiruwitwi wafundwi kwa vinja vitatu, shakapanu wajegwi kwa mfalumi. 6 Wantemba wamu yawasyagulitwi waweriti Daniyeli, Hananiya, Mishaeli na Azaria, woseri wa likabila lya Yuda. 7 Mkulu gwa maafisa ayu kawapanana matawu gamonga, Denieli kamshema Beliteshaza, Hananiya kamshema Shadiraki, Mishaeli kamshema Meshaki na Azaria kamshema Abedinego.

8 Kumbiti Daniyeli kaamuwa nakatenda kalwemwi na Mlungu kwa kuliya shiboga shiherepa sha mfalumi na kulanda divayi yakuyi. Hangu, kamluwiti mlonguziya mkulu kamjimiri nakaliya vintu avi na kulitenda kalemwi na Mlungu. 9 Su Mlungu kamtenda Ashipenazi mlonguziya mkulu gwa watenda lihengu wa mfalumi, kampendeleyi Daniyeli na kuwoneruwa lusungu. 10 "Kumbiti, mlonguziya mkulu gwa watenda lihengu wa mfalumi, kamgambira Daniyeli, nana lyoga kuwera mtuwa gwangu mfalumi mweni kalagalira kuusu shiboga na virandu vyagufiruwa kutendera, hakawoni kuwera nshimba yako iherepa ndiri gambira wantemba wa ukulu wenu. Makaliru gangu hagaweri mkutenduwa."

11 Shakapanu Daniyeli kamgendera ntumintumi yakatulitwi na mlonguziya mkulu watenda lihengu wa mfalumi, su kuwagolokera yomberi Daniyeli na wayaguyi ashina Hananiya, Mishaeli na Azariya, 12 "Shondi, gutujeri twenga wantumintumi waku kwa mashaka lirongu kwakutupanana makolu ga mihamba tuliyi na mashi ga kulanda. 13 Shakapanu, gutulinganiziyi twenga na wantemba wamonga yawaliya shiboga shakaliya mfalumi na gutakuli kulinganira na ntambu yaguwoniti."

14 Shakapanu Daniyeli kamgendera Arioko mgolokera ulii kajimilirana na womberi su kawajera kwa mashaka lirongu. 15 Pa mashaka lilongu, pakawaloliti, kawona kuwera wantemba walii yawaliyiti makolu wawonikiti wana makakala kuliku wamonga walii woseri yawaliyiti shiboga sha shifalumi. 16 Su, mgolokera ulii kawaleka wendereyi kuliya makolu pa shiboga shawapananitwi na mfalumi na divayi.

17 Mlungu kawapanana wantemba awa wamsheshi umani na mahala mu shiraa malembu ga usomi na luhala. Daniyeli viraa kapananitwi uwezo wa kutakulira malola na kulota. 18 Pa vinja vitatu vyavilagaliritwi na mfalumi Nebukadineza kupera, mlonguziya mkulu gwa watenda lihengu gwa mfalumi kawajega wantemba woseri kulongolu kwakuyi. 19 Mfalumi kayoweriti na womberi, kawoniti Daniyeli, Hananiya, Mishaeli na Azaria wawonikiti wafaa nentu. Su, wingirwa mulihengu lya kumtendera wa mfalumi. 20 Mlandu goseri gwa luhala ama umani gweni mfalumi kawakosiyiti kaliwonera mweni handa wantemba awa wamsheshi waweri waherepa mala lilongu kuliku watukuziya, wambuyi na waganga woseri muukolamlima wakuyi. 21 Na yomberi Daniyeli kendeleyiti kutenda lihengu muukolamlima mpaka shinja sha kwanja sha kukolamlima kwakuyi mfalumi Koreshi.