1 Kumbiti kwa uwega waneni, mushinja sha kwanja sha mfalumi Dario kulawa Medi, neni ntumintumi gwa kumpindi nililaviyiti kumtanga na kumtula likakala mfalumi. 2 Vinu hanikugambiri unakaka ulii wa mirandu ayi.

Guloli, wafalumi wamonga watatu hawayikolimlima isi ya Uajemi. Womberi hafatwi na mfalumi gwa msheshi mweni hakaweri mlunda kuliku walii yawamlongoleriti. Shakapanu pakawera na makakala na ulunda, hakanji kukomanga ufalumi wa Ugiliki.

3 Shakapanu hakalawili mfalumi mgangamala kulawa Ugiliki, hakakolimlima pahala pakulu na kutenda vyakafira. 4 Pa shaka sha upeleru wa uwezu wakuyi, ufalumi wakuyi hawumegeki na kubagulwa museemu za msheshi kugenda wega msheshi za mpindi. Wiwuka wakuyi hapeni ukolimlima pota ufalumi kuwera mumawoku mwa yakakolamlima, toziya ufalumi wakuyi hawutolwi na wamonga.

5 Mfalumi gwa kusika mweni ndo mfalumi gwa Misri hakaweri kana makakala nentu. Kumbiti yumu gwa mashonta wagangamala wakuyi hawaweri na likakala kuliku yomberi na ukolamlima wakuyi hawuweri mkulu nentu. 6 Pa vinja tunga, hawatendi mapatanu, muhinga gwa mfalumi gwa kusika hakayugwi mukaya ya mfalumi na kugolokera lipatanu lya kushana, kumbiti hapeni kendereyi kuwera na makakala, viraa mfalumi na wiwuka hapeni wahepeleri na mhinga ayu, mwana gwakuyi na wamanda wakuyi wadala yawagenditi nawu, woseri hawalaguwi. 7 Shakapanu, yumu gwawu kulawa lukolu lwa mhinga ayu hakaweri mfalumi. Hakawakomangi wamashonta wa mfalumi gwa kushana na kwingira mumaboma gawu na kukanka. 8 Hakavipapi vinyagu vya beyi nkulu vya wamlungu wawu na vyombu vya feza na zahabu mpaka muisi ya Misri. Kwa shaka sha vinja tunga mfalumi gwa Misri hapeni kamkomangi mfalumi gwa Siliya. 9 Shakapanu, mfalumi ayu gwa Misri hakawukankali ufalumi wa Siliya, mpaka kawuyi muisi yakuyi.

10 Wana wa mfalumi gwa Siliya hawajojoniri washonta wavuwa na kulitanda kwa nkondu. Lishonta ali halisegeleri kulongolu handa malawa gwa mashi, lishonda alii halipiti na kulikomanga nkondu mpaka liboma lya wankondu. 11 Panu, mfalumi gwa Misri, kwa maya gakuyi, hakalikomangi nkondu na mfalumi gwa Siliya, mfalumi ayu gwa Siliya yakaweriti na lishonta likulu na lyeni lisinditi.

12 Pa likankitwi lishonta alii lya Siliya na kulaga maelufu, hakanji kulizyuma, ila hapeni kendereyi kuwera mkanka.

13 Shakapanu mfalumi gwa Siliya hakawajojoniri wamashonta wavuwa kuliku walii wa kwanja. Pa vinja tunga hakawuyi na lishonta likulu lyaliwera na vintu vivuwa. 14 Mushaka ashi wantu wavuwa hawamlemi mfalumi gwa Misri. Wamu wa wantu wankesera wa isi yaku Daniyeli, hawagalambuki su kutenda malola aga, kumbiti hapeni waweri na mpatiru. 15 Mfalumi gwa Siliya hakaguzyengeti mji gweni liboma ligangamala na kugulopola. Wamashonta wa Misri hapeni wahepeleri, ata wamashonta yawamana kulikomanga nentu hapeni waweri na likakala. 16 Mkankala gwa Siliya hakawatendi ntambu yakafira, mana kwahera yakajera kulikomanga nayu. Hakagoloki muisi iherepa na isi yoseri ayi hayiweri ya ukolamlima wakuyi.

17 Mkankala ayu gwa Siliya hakafiri kwiza na lishonta lyoseri, na yomberi hakatendi mapatanu na kugatenda. Hakamyugiziyi muhinga gwakuyi su kawagamiza ufalumi wa wankondu wakuyi, kumbiti mpangu gwakuyi hapeni guweri na mpatiru, pota kumtanga shoseri. 18 Shakapanu, hakagalambuli mpangu gwakuyi na kuzikomanga isi zimonga za kumpwani na kuzikanka. Kumbiti mashonta wahenga hawamkanki na kugawusiya matumbilu gakuyi mweni mfalumi gwa Siliya,mfalumi gwa Siliya hapeni kalitumbi kayi mweni, kumbiti hakaweri na soni. 19 Panu mfalumi gwa Siliya hakagalambuki kuwuya muliboma la isi yakuyi mweni, kumbiti hakasindi na kulagwa munkondu na awu ndo hawuweri upeleru wakuyi.

20 Shakapanu hakizi mfalumi yumonga kulawa Siliya, mweni hakalagalili mtola ushulu su kugangamaziya ufalumi wakuyi. Mfalumi ayu gwa Siliya hakalaguwi mashaka madidini hera ila kwa nkondundiri toziya wantu wamkalalira.

21 Ntumintumi gwa Mlungu kendeleya kumgambira Daniyeli kuwera, Mfalumi gwa Siliya yakafata hakaweri gwa kubeziwa na mkontola na kafiliwa ndiri kukolamlima ufalumi, nayomberi hakizi pota kutakula na kunyasula ufalumi kwa kulisegasega. 22 Hakawalagi woseri yawamjimirandiri ata kaweri Mtambika gwa Numba ya Mlungu. 23 Kayi hakatendi mapatanu na maisi gamonga kwa uzyanga na hawendereyi kuwera na makakala ata pakakolamlima wantu wadidini. 24 Pota kutakula hakakankali pahala pamkowa gwana ulunda uvuwa na kutenda mirandu yeni itendekandiri, ata na yumu gwa wazewi wakuyi yawalongoleriti. Shakapanu, lunda na vintu vyakalopoliti kunkondu. Hantendi mipangu ya kugakomanga maboma, kumbiti kwa shaka shididini hera.

25 Kwa ugangamala uvuwa, hakanyawi lishonta likulu su kukomanga ufalumi wa Misri, nayomberi mfalumi gwa Misri hakawuziliri makomangu aga kwa lishonta likulu nentu na lyana likakala nentu. Kumbiti, mfalumi gwa Misri hapeni kafaulu toziya makomangu madoda hagatendwi kwa yomberi. 26 Watakuziya wakuyi wa pakwegera ndo hawamwagamiziyi. Lishonta lyakuyi likulu halilaguwi kunkondu. 27 Panu wafalumi wawili awa hawalikali pamuhera pameza su waliyi, kumbiti kila yumu kamuholera myaguyi ukontola na kulipayira. Ila hapeni wafanikiwi, toziya shaka shashitulitwi shiweri shisoka ndiri. 28 Lishonta lya mfalumi gwa Siliya haliwuyi muisi yakuyi pakawera na lunda ivuwa, kumbiti mfalumi hakajeri kuwaagamiziya wantu wa Mlungu. Hakatendi ntambu yakafira kwa wantu awa, shakapanu hakawuyi muisi yakuyi.

29 Mushaka yashipangitwi na Mlungu, hakayikangali isi ya Misri kwa mala imonga, kumbiti mwanjiru agu, mirandu hayiweri ntambu yingi. 30 Meli kulawa Kitimu yeni ndo Urumi hayimkomangi na yomberi hakaweri na lyoga.

Shakapanu hakawuyi pakawera na maya na hakawajegeri matabisiwu wantu yawaamini lipatanu lya Mlungu. Panu hakafati litakulu lya walii yawagalambukiti lipatanu lya Mlungu. 31 Wamashonta wakuwi hawayituli humba Numba ya Mlungu na maboma gakuyi, hawawatendi wantu waleki kulaviya tambiku za kulunguziwa kila lishaka na kugolosiya aku Numba ya Mlungu likalaliru lya lihalibisiya. 32 Hakawazyangizyangi walii yawawera ndiri waminika kwa Mlungu, kumbiti wantu walii yawawera waminika kwa Mlungu gwawu hawagoloki kwa ugangamala na kutenda matendu makulu. 33 Wantu waku yawana luhala muwamu mwa wantu hawawafundi wavuwa. Hangu, kwa mashaka madidini hawalaguwi kwa ligumba ama motu ama kuwatola lopola ama kupokwa lunda zawu. 34 Shaka wantu wa Mlungu pawaweriti mumatabisiwu, wantu wadidini tembera wamu wawu hawatendi hangu ila kwa uwaminikandiri. 35 Wamu wa wantu wa Mlungu yawana luhala hawalaguwi, su kuwatenda wamonga wapati kuwusiwa vidoda na kutakasiwa mpaka shaka sha upeleru, weni vinu hawenisoki.

36 Nayomberi Mfalumi hakatendi ntambu yakafira. Hakalikwisi na kulitumba handa yomberi ndo mkulu kuliku wamlungu woseri na kumwigira Mlungu mkulu kuliku wamlungu woseri. Hakendereyi kuwera na mpatiru mpaka Mlungu pakamkomanga, ila mpaka galii gakatuliti Mlungu gasoki. 37 Mfalumi ayu hapeni kaweri na ligoya kwa wamlungu wa wazewi wakuyi pota Mlungu yulii yakafirwa na wadala. Hakawabeziyi wamlungu wamonga woseri, toziya hakalituli kuwera mkulu kuliku kila yumu gwawu. 38 Pa wamlungu awa hakampanani mlungu mlolera gwa liboma, mweni wazewi wakuyi nakaka wamguwira ndiri, hakamlaviliri zahabu, feza na vintu vya beyi nkulu, na mafupu ga beyi nkulu. 39 Hakaloleri maboma gakuyi kwa utanga wa mlungu gwa shihenga. Walii yawammana kuwera mfalumi hakawapanani ligoya likulu na hakawapanani ukulu na kuwabagulira litapaka gambira lifupu.

40 Shaka sha upeleru mfalumi gwa Misri hakamkomangi mfalumi ayu gwa Siliya. Kumbiti mfalumi gwa Siliya hakankuli makomangu aga kwa makala handa liyega lya shivyulavyula, pakatendera mbutuka za kukwega na farasi, wakwena farasi na meli zivuwa. Hakazikangali isi zivuwa na kupita muisi azi handa malawa ga mashi. 41 Hakayikangali ata isi ya Israeli su kuwalaga maelufu ga wantu. Kumbiti isi za Edomu na Mowabu na seemu nkulu ya Amoni, haziponi kulawa mumawoku mwakuyi. 42 Shaka pakazikangala isi azi, ata isi ya Misri hapeni iponeki. 43 Hakaweri nazi hanja za zahabu, feza na vintu vya beyi nkulu vya isi ya Misri. Wantu wa Libiya na wantu wa Esiopiya hawaweri wantumintumi wakuyi. 44 Kumbiti visoweru kulawa kwagulawa mshenji na kushana havimtiriziyi. Na yomberi hakagoloki kwa nkalaliru na kwagamiziya wavuwa. 45 Nentu ya aga, hakagolosiyi malingu gakuyi makulu pakati pa bahari na lugongu lwa Mlungu. Kumbiti hakahoweri pala na hapeni paweri na yoseri gwa kumtanga.