1 Lishaka limu mfalumi Belishaza kawasemiti wantu wavuwa wizi kuliya na kulanda divayi pamuhera na yomberi. 2 Shaka Belishaza pakaweriti kankulanda divayi yakuyi, kahimiziyiti wajegi vikombi vya zahabu na feza vyeni Nebukadineza tati gwa Berishaza, kaweriti kavitola kulawa Kunumba Nkulu nanagala ya Mlungu aku Yerusalemu, su mfalumi na walonguziya wakuyi, wadala wakuyi na wadala wa kunja wavilandiri. 3 Hangu wajega vikombi vilii vya zahabu vyeni viweriti vitolwa kulawa Munumba Nkulu nanagala ya Mlungu aku Yerusalemu, na yomberi mfalumi na walonguziya wakuyi na wadala wakuyi wa kunja wavilandira. 4 Pawaweriti wankulanda divayi, wawazuma wamlungu yawanyawitwi kwa mabuhi ga zahabu na feza na shaba na shuma na mitera na mabuwi.

5 Vumu vyala vya shiwoku sha muntu vilawiriti na kulemba pampindi pa shibambaza, pakwegera na shintambi sha koloboyi mngati mnumba ya mfalumi. Mfalumi kalola shiwoku ntambu yashiweriti shankulemba. 6 Sheni sha mfalumi shigalambu langi na yomberi katiriti nentu hangu manung'unu gakuyi galibondangiti na magulu gakuyi galegeya. 7 Mfalumi Belishaza kalagalira washemwi wahawi wa Wakalidayu na wanaluhala na walola ntondu wajegwi. "Pawajegitwi, mfalumi kawagambira wana luhala awa wa Babuloni, yoseri yakabetula malembu aga na kung'ambiziya mana yakuyi, hakavalasiwi nguwu za zambalawu na ukufu wa zahabu msingu mwakuyi na hakaweri gwa tatu mu walongoziwa wakulu." 8 Shakapanu, wanaluhala woseri wa mfalumi wiza, kumbiti wasindiliti kugabetula malembu aga pota kumgambira mfalumi mana yakuyi. 9 Su, mfalumi Belishaza katiliti nentu na rangi yakuyi iyongeriti kugalambuka, na walonguziya wakuyi wawera na lyoga.

10 Mawu gwakuyi mfalumi Belishaza pakapikiniliti liziwu lya walonguziya wakuyi kiziti kingira muligeleri lya kuliya kalonga, "Gwee mfalumi gulikali mashaka goseri. Nagulilimuka! Nagugalambuka langi ntambu ayi. 11 Kwana muntu muufalumi waku mweni kana rohu wa wamlungu wananagala mngati mwakuyi. Shaka sha tati gwaku, muntu ayu kawonikaniti kuwera na umani, mahala na luhala gambira lulii lwa wamlungu. Mfalumi Nebukadineza tati gwaku, kamtumiti kuwera mkulu gwa waganga na wahawi na walola ntondu na watunga. 12 Muntu ayu wamshema Daniyeli, mweni tati gwaku kamshemiti Beliteshaza, kawoneka kuwera na mahala gayewuka, mahala na umani, viraa kana makakala ga kutakulira kulota na kutakulira mairandu ya bada na kuwusiya mirandu ikamala. Mumshemi Daniyeli na yomberi hakakugambiri mana ya malebwa aga."

13 Su Daniyeli kajegwa kulongolu kwa mfalumi, "Na yomberi mfalumi kamkosiya, hashi, gwenga ndo Daniyeli, yumu gwa wantu wa uhamisiwu yawajegitwi na tati gwangu mfalumi kulawa Yuda? 14 Mpikinira kuwera wamlungu wakupanana gwenga umani, mahala na luhala lwa kukangasha. 15 Wana luhala na wahawi pawajegwitwi kwaneni su wasomi na kutakulira mana ya malembu aga, wasinditi. 16 Kumbiti, mpikinira handa gwenga gumana kila shintu na kutakuli mana yakuyi. Handa paguweza kubetula malembu aga na kung'ambira mana yakuyi, haguvasiwi nguwu za zambalawu na kuvalisiwa ukufu wa zahabu msingi mwaku. Haguweri muntu gwa tatu muufalumi awu."

17 "Daniyeli kamwankula, mfalumi Belishaza, mafupu gaku gusigali naga gwee mfalumi ama kumpanana muntu yumonga. Gwee mfalumi, hanikubetuliri malembu aga kukugambira mana yakuyi."

18 Gwee mfalumi, Mlungu Mkulu kampanana tati gwaku Nebukadineza, ufalumi, ukulu na kuzumwa na kupananwa ligoya. 19 Toziya ya ukulu yawampananiti, wantu wa makabila goseri, maisi goseri na luga zoseri yawalendemeriti na kumtira. Nebukadineza kaweziti kumlaga muntu yoseri yakafiriti na kumleka mkomu yoseri yakafiliti. Yakafiriti kumkweniziya muukulu kamkweniziya, yakafiliti kumsulusiya ukulu kamsulusiyiti. 20 Kumbiti pakaweriti na mtiti panu, kawusiyitwi mushiti shakuyi sha ukulu, kapokwa uweru wakuyi. 21 Kawingitwi kutulwa kutali na wantu, mahala gakuyi gawera gambira ga nkanyama, kalikala na punda gwa kuntundu, kawera kankuliya ntundu gambira ng'ombi. Katowerwa mvula munshimba mpaka pakavimaniti kuwera Mlungu Mkulu ndo yakakolamlima falumi za wantu, nayomberi kamtula mfalumi yoseri yakamfira.

22 Kumbiti gwenga Belishaza, mwana gwa Nebukadineza, tembera gugamana goseri aga, gulinanagaziya ndiri! 23 Pa kulinanagaziya mweni, guwera mgalambuku kwa Mtuwa Mlungu gwa kumpindi. Gujega vyombu vya numba ya Mlungu, na guvilandira divayi, gwenga na maafisa waku, wadala waku na wadala waku wa kunja na kuwazyuma wamlungu yawanyawitwi kwa mabuhi ga feza na zahabu na shaba na shuma na mitera na mabuhi gamonga, wamlungu weni wawonandiri, wapikinirandiri pota kuvimana shoseri. Kumbiti gumkwisandiri Mlungu, mweni ukomu waku wa mumawoku mwakuyi, na njira zaku za lupalahera kulongolu kwakuyi gumpanana ndiri ligoya! 24 Su, Mlungu katuma liwoku lilembi malembu aga.

25 Visoweru vyeni ndo. MENI, MENI, TEKELI NA PERESI. 26 Mana ya visoweru avi ndo. MENI Mlungu kagawalanga mashaka ga ufalumi waku na kagumalira. 27 Tekeli. Gwenga gupimwa mumizani na guwoneka gutopandiri. 28 Peresi mana yakuyi ndo, ufalumi waku upokwa na kupananwa Wamedi na Waperisi.

29 Panu, mfalumi Belishaza kahimiziya Daniyeli kavalasiwi nguwu za gweka za zambalawu na ukufu wa zahabu msingu. Kabwerwa kuwera Daniyeli hakawera gwa tatu muufalumi. 30 Pashiru palapalii, Belishaza mfalumi gwa Babeli, kalaguwa, 31 na mfalumi Dario muntu kulawa Medi kawera mkolamlima pakawera na vinja sitini na viwili.