Milagres de Jesus

Yesu anguvaponetsa vanu vavili wo vabofwe

27 Yesu hoavaga an’wuka hono hala, vanu vavili wo vabofwe vakamufwataje kuno vankola kuva, "Mwana va Dawudi utuhulumile."

28 Hala Yesu hoavaga kwinjila mu nyumba, fibofu vala vakatsaje kwake, Yesu akavaputsaje, "Mbe, muna litumbilo kuta heni ntsinvetsa kuvaponetsa?" Nawo vakalongaje, "Ena, Mutwa tungitumba."

29 Ihyo Yesu akavabataje miho gawo na kuvalonjela, "Yive hihyo kota fyo mungitumba." 30 Bahobaho miho gawo gakantsaje kulola. Yesu akavalemetsaje kwa kuhahanitsa kuta, "Muleche kumulonjela munu yoyuve lulongwa luno."

31 Lechelelo vene vakawukaje na kwantsa kutagalitsa ndongwa tsa Yesu mu inyi yila yeka.

Yesu anguvaponetsa vanu vavili wo vabofwe.

29 Yesu hamwe na vadahitswa vake hovavaga van’wuka ku muji gwa Yeliko, vanu wolofu wakamufwataje. 30 Fibofu vavili vavaga vichite halubali lwa ng’asi, na hovavaga kuhulika kuta Yesu anlutila hono iho, vakakolaje kuta, "Mutwa Mwana va Dawudi utuwonele lusungu." 31 Lila lilugu lya vanu likavang’anulilaje na kuvalonjela mukatuche, lechelelo vene vakalutitsaje kulonga fikami, "Mutwa Mwana va Dawudi utuwonele lusungu." 32 Yesu akimaje na kuvachema, akavaputsaje, "Mun’gana ntsivaditile chinu chachi?" 33 Vala fibofu vakamujibulaje, "Mutwa tun’gana kulola!" 34 Yesu akavawonelaje lusungu na kuvadometsa miho gawo, na luvala lulo vakalolaje na kumufwata.

Yesu angumuponetsa munu chibofu ku Betisayida

22 Yesu hamwe na vadahitswa vakafikaje ku muji gwa Betisayida. Vanu vakamuletaje munu chibofu na vakamugongoletsaje Yesu amudometse ili amuponetse. 23 Yesu akamubataje liwoko yula munu na kumulongotsa mbaka kivala na muji. Akamufunyilaje mati mumiho na kumuvichila mawoko, na kumuputsa, "Ndawuli unguchiwona chinu chochive?" 24 Yula chibofu akamulonjelaje Yesu kuta, "Ntsinguvawona vanu, lechelelo, ntsinguvawona kota mibichi fyo van’jenda." 25 Ihyo Yesu akawilaje kumuvichila mawoko kumiho, munu yula akafutulaje miho kulava na miho ga munu yula gakavaje mumi, akavetsaje kulava chila chinu finofu. 26 Yesu akamulonjelaje yula munu, "Leche kwinjila ku muji kumulonjela munu yoyuve, lechelelo ubite kukaye kwako."

Yesu angumuponetsa munu chibubwi na mudibafu

31 Yesu akawukaje ku muji gwa Tilo akakolelaje ku Sidoni, akafikaje ku lilamba lya Galilaya na kwinjila hono ho hanchemwa Dekapoli, chinya kutijila miji kumi. 32 Vanu vakamuletelaje Yesu munu chibubwi na kaha avaga mudibafu, vakamugongoletsaje amuvichile mawoko ili kumuponetsa. 33 Nayo Yesu akamutegulaje halubali ha vanu vala wolofu, na akamuvichilaje fyala mu mapulichilo ga munu yula, na kufunya mati, na kudometsa lulimi lwa munu yula. 34 Yesu akalavaje kilanga kwa Mulungu na kwigugumya kwa lusungu, na kumulonjela yula munu, "Efwata," chinya kutijila, "Udinduche!" 35 Luvala lulo mapulichilo na lulimi lwa munu yula fikadindukaje, akantsaje kulonga finofu. 36 Yesu akavalemetsaje vanu vala wolofu valekaje kumulonjela munu yoyuve lulongwa ulo. Lechelelo hila fyoavaga ankangala kuvalemetsa, vene nawo vakangalaga ndalahela kuvavikulila vanu lulongwa ulo. 37 Vanu vavaga kuhulika lulongwa ulo vakapomokaje ndalahela na kulonga, "Chila chinu cho adisile Yesu chavaga chinofu, kwasawuli avadisile vanu vadibafu vahuliche na vabubwi valonje!"

Yesu angumuponetsa Batimayo yoavaga chibofu

46 Yesu hamwe na vadahitswa vake vakinjilaje ku muji gwa Yeliko. Hovavaga van’wuka ku muji ugo hamwe na vanu wolofu, munu yumwe yoavaga abofwe achemwaga Batimayo mwana va Timayo, avaga ichite halubali ha ng’asi asukaga vanu vamupele chinu chochive. 47 Batimayo avaga kuhulika kuta Yesu va ku Natsaleti anlutila hono iho, akakolaje, "Bee Yesu Mwana va mutsajila Dawudi, umbonele lusungu na kunanga!" 48 Vanu wolofu vakamulemetsaje aleche kukola, lechelelo mwene akakalalilaje kukola kuta, "Bee Mwana va muntsajila Dawudi, umbonele lusungu na kunanga!" 49 Yesu akimaje na kulonga, "Mumucheme atse!" Vanu vakamuchemaje yula chibofu, vakamulonjelaje, "Wikangatse numbula! Wime, Yesu angukuchema!" 50 Batimayo akadibulaje mugolole gwake, akadibukaje mwilanga mwilanga kubita kwa Yesu. 51 Yesu akamuputsaje, "Chinu chachi cho un’gana nguditile?" Yula munu yo abofwe akamulonjelaje, "Mudahitsi tsinsuka mbetse kulola." 52 Yesu akamulonjelaje, "Bite, litumbilo lyako likuponitse." Luvala lulo yula munu chibofu akalavaje na kwantsa kumufwata Yesu mung’asi.

Yesu angumuponetsa chibofu

35 Yesu akavaje kufika habehi na ku Yeliko, kwavaga na munu yumwe chibofu ichite mung’asi ansuka kutangwa. 36 Avaga kuhulika lilugu lya vanu linlutila akaputsaje, "Kuna chichi?" 37 Vakamulonjelaje kuta, "Yesu va ku Natsaleti anlutila." 38 Ihyo chibofu yula akakolaje fikami, akatyaje, "Yesu, Mwana va Dawudi, umbonele lusungu!"

39 Vanu vala wovavaga valongwe vakamulonjelaje kwa kumung’anulila ili akatuche, lechelelo mwene akendelelaje kulonga fikami, "Mwana va Dawudi umbonele lusungu!"

40 Yesu akimaje, akavalonjelaje vamulete halutalo hake. Chibofu yula akavaje kufika habehi, Yesu akamuputsaje, 41 "Un’gana nguditile chichi?"

Nayo akamulonjelaje kuta, "Mutwa ntsin’gana kulola."

42 Yesu akamulonjelaje, "Duve ulole! Litumbilo lyako likuponitse."

43 Luvala lulo chibofu uyo akalolaje, akamufwataje Yesu kuno angumutsumitsa Mulungu. Vanu veka vavaga kuwona ihyo, vakamutsumitsaje Mulungu.

Yesu angumuponentsa munu chibofu.

1 Siku yimwe Yesu hoavaga anlutila akamuwonaje munu yumwe, chibofu kuhuma kuleleka kwake. 2 Ihyo Vadahitswa vake vakamuputsaje, "Mudahitsi! Nani yoadisile ndongwa ntsibi, munu yuno awu valeli vake, mbaka aleleche chibofu?" 3 Yesu akavajibulaje, "Munu yuno na valeli vake sivadisile ndongwa ntsibi, ila lulongwa ulu luhumye ili wuvetso wa Mulungu wuwoneche mugati mwake. 4 Tun’ganika tukole katsi tsake mwene yo anumile kung’acha hamunyi, kwakuva chilo chinkutsa kuduhu munu yoakuvetsa kukola katsi yoyive. 5 Luvala lontsili mu inyi, heni yo mwang’atsa gwa vanu va mu inyi." 6 Avaga kulonga itso, akafunyaje mati hanyi, akafinyangaje lilongo, akamubakaje yula chipofu mumiho, 7 Kaha amulonjelaje, "Bite ukakalave mulikwava lya Siloamu." Chinya kutijila, yo atumilwe. Duve yula chibofu akabitaje kukalava, nayo akawuyaje kuno an’lola.

2 Munu yumwe munya wutamwa wa wububa akamutsilaje Yesu, akafugamaje halutalo ha Yesu na kulonga, "Mutwa manyi ugane ufuluche umonetse ili tsindichilwe mu ntsovelo tsa kumufugamila Mulungu!" 3 Yesu akagololaje liwoko lyake, akamubataje na kumulonjela, "Ntsin’gana upone ili widichilwe mu ntsovelo tsa kumufugamila Mulungu!" Baho baho yula mutamwa munya wububa akaponaje. 4 Kaha Yesu akamulonjelaje, "Walahogola kumulonjela munu yoyuve lulongwa luno, lechelelo ubite ukilajile kwa vatawula nambiko vakuwone kuta uponile na ukatawule sadaka kota fyo alajitse Musa."

2 Kahi vanu vanji vakamuletelaje munu yo apotsile muvili yoavaga avasise mu mulusaga, Yesu hoavaga kuliwona litumbilo lyawo, akamulonjelaje munu yula yo apotsile, "Mwanangu, wikangatse numbula yako! Uhulumilwe ndongwa tsako ntsibi." 3 Vadahitsi vamwe va malajitso ga Musa vakahulikaje cho alontsile Yesu, vakalonganaje kuta, "Munu yuno angumuliga Mulungu!" 4 Yesu hoavaga kutsela chovanhotsa akalongaje, "Kwasawuli yachi munhotsa fibi mu numbula tsenyu? 5 Chinu chachi cho chipefu, kulonga kuta, uhulumilwe ndongwa tsako ntsibi? Awu kulonga kuta winuche ubite? 6 Lechelelo ili mutsele kuta Mwana va Munu anawo wuvetso wa kuvahulumila vanu ndongwa tsawo ntsibi." Kaha Yesu akamulonjelaje munu yula yo apotsile, "Winuche utegule lusaga lwako na ubite kukaye kwako." 7 Munu yula yo apotsile, akinukaje na kubita kukaye kwake.

10 Mumo mwavaga na munu yumwe yo apotsile liwoko, nawo Vafwalisayo vanji vakamuputsaje Yesu, "Mbe, yiganikaga kumuponetsa munu Siku ya Kwesela?" Vamuputsitse ihyo ili vapate chambutso cha kumuhiga. 11 Yesu akavalonjelaje, "Mbe, kuna munu yumwe hagati henyu munya ng’olo yo yinje mu likombo ha Siku ya Kwesela, yoafuluche ayileche kuyibata na kuyihumya kivala Siku ya Kwesela?" 12 Lechelelo ntsinguvalonjelani kuta, munu yo va mana kulutila ng’olo, ihyo tun’ganika kudita ndongwa nofu Siku ya Kwesela 13 Ihyo Yesu akamulonjelaje munu yula kuta,

"Golole liwoko lyako." Nayo akagololaje, nalyo likavaje lyumi nachene kota liyake.

30 Yesu ho avaga kufika vakamulonjelaje, "Yuve va mudala va Simoni ana filungo ndalahela na avasise mu chinanda." 31 Yesu akabitaje iho hoali avasise yuve va mudala va Simoni, na kumubata liwoko na kumwinula. Luvala lulo akaponaje na kwantsa kuvatelechela chilyo.

Yesu angumuponetsa munu munya wububa

40 Munu yumwe yo akodekaga na wutamwa wa wububa akabitaje kwa Yesu, akamufugamilaje na kumusuka, "Manyi ugane ufuluche umonetse ili tsidichilwe mu ntsovelo tsa kumufugamila Mulungu!" 41 Yesu akamuwonelaje lusungu munu yula, na akagololaje liwoko lyake akamudometsaje na kumulonjela, "Ntsin’gana upone ili udichilwe mu ntsovelo tsa kumufugamila Mulungu!" 42 Luvala lulo munu yula akaponaje wutamwa wa wububa wo avaganawo na kidichilwa na Mulungu.

3 Vakatsaje vanu vatayi yovali vamupisile munu mu lusaga, yoali apotsile muvili gweka vakamuletaje kwa Yesu. 4 Vakalemwaje kumulutitsa halwitsi, kwasawuli ya vanu yovali vamemile mu nyumba yila. Ihyo vakakwinaje kuchanya na kuhima hono hala ho ali Yesu, vakakutubulaje na kumwisa mu lusaga. 5 Yesu avaga kuwona fyo vangumutumbila, akamulonjelaje mutamwa yula yoapotsile muvili, "Mwanangu nguhulumye ndongwa tsako tseka ntsibi." 6 Lechelelo vadahitsi vatunga va malajitso ga Musa yovavaga vichite hono iho vakahotsaje mu numbula tsawo kuta, 7 "Chinu chachi choanlonga munu yuno? Hino angumuliga Mulungu! Kwasawuli kuduhu munu yoyuve yo afuluche kumuhulumila munu ndongwa tsibi, lechelelo Mulungu ng’ani." 8 Luvala lulo Yesu akatselaje cho vahotsaga, nayo akavalonjelaje, "Mbe, ndawuli munhotsa ihyo mu numbula tsenyu? 9 Mbe, chichi cho chipefu? Kumulonjela munu yo apotsile muvili gweka kuta, nguhulumye ndongwa tsako ntsibi, awu kulonga, winuche utole lusaga lwako ubite? 10 Lechelelo ntsin’gana mutsele kuta, heni Mwana va Munu fuluche ntsimuhulumile munu ndongwa tsake tsibi mu inyi." Kaha Yesu akamulonjelaje yula munu yo avaga apotsile muvili, 11 "Ntsingukulonjela, wime utegule lusaga lwako ubite kukaye kwako!" 12 Luvala lulo yula munu yo apotsile muvili akimaje kuno vanu veka vangumulava, akitwikaje lusaga lwake na kuwuka mu nyumba yila. Vanu veka vakapomokaje na kumutsumitsa Mulungu, vakalongaje, "Kuhuma iho sitwali tuluwene lulongwa kota luno!"

Yesu angumuponetsa munu Siku ya Weselo

1 Siku yinji ya Weselo Yesu akinjilaje kaha mu Nyumba ya kitang’anila Vayawudi, na mumo mwavaga na munu munya liwoko lyo lipotsile. 2 Mafwalisayo vamwinga vavaga hono vansaka chambutso cha kumuhijila Yesu, ihyo vamuhimaga Yesu valole manyi akumuponetsa munu uyo mu Siku ya Weselo. 3 Yesu akamulonjelaje munu yula munya liwoko lyo lipotsile kuta, "Utse iha hagati ha vanu veka." 4 Yesu akavaputsaje vanu vala, "Mbe, Chinu chachi chinofu chochin’ganika kuditwa Siku ya Weselo, kudita ndongwa nofu awu ntsibi? Mbe, tun’ganika kukulusa vanu awu kuvakopola?" Lechelelo vanu vala vakakatukaje myee! 5 Yesu akavalavaje vanu chila lubali kwa lilakali, akavang’ung’utilaje kwasawuli vavaga valihela litumbilo. Kahi akamulonjelaje yula munya liwoko lipotsile, "Golole liwoko lyako." Yula munu akagololaje, nalyo liwoko likavaje lyumi nachene!

Yesu angumuponetsa munu munya wutamwa wa wububa

12 Chimunyi chimwe Yesu hoavaga ku Galilaya, munu yumwe munya wutamwa wa wububa muvili gweka akatsaje. Avaga kumuwona Yesu akamufugamilaje na akamugongolaje kuta, "Mutwa, manyi ugane ufuluche umonetse ili ntsidichilwe mu ntsovelo tsa kumufugamila Mulungu." 13 Yesu akagololaje liwoko lyake, akamudometsaje mutamwa yula na kumulonjela, "Ntsin’gana, upone!" Luvala lulo wububa wake wukaponaje.

18 Vakatsaje vanu vanji wovamupisile munu mulusaga yoali na wutamwa wa kupola muvili. Vakajelaje kumwingitsa mugati ili vamuviche halutalo ha Yesu. 19 Lechelelo kwasawuli ya wolofu wa vanu vakalemwaje kwinjila mula mugati, vakakwinaje na kutubula kano, vakamwisaje mutamwa yula kuno ali mulusaga hono hoavaga Yesu. 20 Yesu hoavaga kuliwona litumbilo lyawo, akamulonjelaje mutamwa yula, "Muyangu, nguhulumye mu ndongwa tsako ntsibi." 21 Vadahitsi va malajitso ga Musa na mafwalisayo vakantsaje kwiputsa, "Munu yuno yo nani anlonga ndongwa tsa kumuliga Mulungu? Kuduhuli yoafuluche avahulumile vanu vanya ndongwa tsibi ila Mulungu ng’ani!" 22 Yesu akatselaje chovahotsaga akavawutsaje, "Kwasawuli ya chichi munhotsa ihyo mu numbula tsenyu? 23 Mbe, chichi cho chipefu kumulonjela kuta, Uhulumilwe ndongwa tsako ntsibi, awu kulonga kuta, Winuche ubite? 24 Lelo ntsin’gana mutsele kuta Mwana va Munu ana wuvina va kuhulumila vanu ndongwa tsawo ntsibi mu inyi." Ihyo akamulonjelaje munu yula yoapotsile muvili, "Winuche, utegule lusaga lwako, ubite ku nyumba yako." 25 Luvala lulo munu uyo akimaje halutalo hawo, akategulaje lusaga lwake lo avasilaga na kubita kukaye kuno angumutsumitsa Mulungu.

Yesu angumuponetsa munu yo apotsile liwoko Siku ya Weselo

6 Siku yinji ya Weselo, Yesu akinjilaje mu nyumba ya kitang’anila Vayawudi na akantsaje kudahitsa. Kuko kwavaga na munu yoapotsile liwoko lililo. 7 Mafwalisayo na vadahitsi va malajitso ga Musa vasakaga hila fyovakumuhiga Yesu, iho vakavaje van’tsindila kuwona manyi akumuponetsa munu Siku ya Kwesela. 8 Lechelelo Yesu akatselaje chovahotsaga, akamulonjelaje munu yula yoapotsile liwoko kuta, "Winuche wime halutalo ha vanu." Ihyo munu yula akimaje. 9 Kahi Yesu akavalonjelaje, "Ntsinguvaputsa, mbe, chinu chachi choching’anika kuditwa Siku ya Kwesela? Kudita ndongwa nofu au ndongwa ntsibi? Kukulusa wumi wa munu au kuwananga?" 10 Yesu akavalolaje vanu wovali chila lubali, kahi akamulonjelaje yula munu yo apotsile liwoko kuta, "Golole liwoko lyako." Nayo akagololaje, na liwoko lyake likaponaje.

Litumbilo lya muvina va lijesi lya Loma.

1 Hala Yesu hoavaga kusinda kulonga ndongwa itso tseka kwa vanu wovamuhulikitsaga, akabitaje ku Kapelinawumu. 2 Mutantsi va muvina yumwe va chikundi cha vatova ligalu va ku Valoma yo aganagwa ndalahela. Mutantsi uyu avaga antamika habehi na kufwa. 3 Muvina yula hoavaga kuhulika ndongwa tso aditaga Yesu, akavatumaje vagogolo va Chiyawudi, vakamufwate Yesu atse amuponetse mutantsi vake. 4 Hovaveye kubita kwa Yesu, vakamugongoletsaje ndalahela kwa kumulonjela kuta, "Munu yuno an’ganika atangwe. 5 Kwasawuli anguvagana vanu vetu, na kaha atutsenje Nyumba ya Kitang’anila." 6 Yesu akabitaje hamwe nawo, lechelelo hoavaga kuva habehi na kufika ha nyumba ya muvina yula, muvina uyo akavatumaje vayage vakamulonjele Yesu, "Mutwa, uleche kigatsa, kwasawuli heni sifuluche ngwingitse mu nyumba yangu. 7 Kwasawuli ntsiwene sifuluche ntsitse kwa heve. Lechelelo ulonje lulongwa hela, nayo mutantsi vangu akuva mumi. 8 Kwasawuli na heni ntsili hasi ha muvina vangu na heni ntsinawo vatova ligalu wo vali hasi hangu wo vanguhulikitsa malajitso go ntsinguvalonjela, manyi ntsimulonjele yuno, ‘Bite,’ abitaga, na yunji manyi ntsimulonjele, ‘Utse,’ atsaga. Kaha manyi ntsimulonjele mupogotsi vangu kuta, ‘Dite hino,’ aditaga." 9 Yesu avaga kuhulika ndongwa itso, akapomokaje ndalahela. Akavapituchilaje vanu vala wovamufwataga, akavalonjelaje, "Ntsing’acha kuwona litumbilo likomi kota lino nambe kwa vanu va Isilaheli." 10 Vanu vala wo vavaga vatumilwe kukaye kwa muvina yula, vakamufikaje mupogotsi yula aponile.

11 Mumo mu nyumba iyo mwavaga na mudala yumwe yo avaga jimubite misoka, jo jamudisile abibindale mugongo kwa myaka kumi na nane mbaka alemwaga kugoloka. 12 Yesu ho avaga kumuwona, akamuchemaje na kumulonjela kuta, "Mudala uponile wubibindafu wako!" 13 Akamuvichilaje mawoko mwilanga mwa yula mudala na kumusuchila, na luvala lulo akimaje na akantsaje kumutsumitsa Mulungu.

Yesu angumuponetsa munu munya wutamwa wa kutuna muvili gweka

1 Siku yimwe ya Kwesela, Yesu ho avaga alibulitswe kulya mu nyumba ya chilongotsi va Mafwalisayo, vanu vakavaje vangumuhima. 2 Halutalo ha Yesu kwavaga na munu yumwe munya namwa ya kutuna muvili gweka. 3 Yesu akavaputsaje Mafwalisayo na vadahitsi va malajitso ga Musa, "Hino ndawuli, finofu awu siyo finofu kumuponetsa munu Siku ya Weselo?" 4 Lechelelo vene vakakatukaje myee. Kahi Yesu akamubataje liwoko mutamwa yula na kumuponetsa na akamulonjelaje abite.

Yesu anguvaponetsa vanu kumi vanya wububa

11 Yesu hoavaga mulujendo kubita ku Yelusalemu, akwete mu mbaka ya Samaliya na Galilaya. 12 Hoavaga ankwinjila mu chijiji chimwe, akitang’anaje na vanu kumi vanya wutamwa wa wububa, nawo vala vanu vavaga vimile kutali. 13 Vakamulonjelaje kwa litsi likomi vakalongaje, "Mutwa Yesu, utuwonele lusungu!" 14 Akavaje kuvawona akavalonjelaje hino, "Mubite mukilajile kwa vatawula nambiko." Duve nawo, hovavaga mung’asi vam’bita, vakaponaje wutamwa wawo na kidichilwa kwa ntsovelo tsa kumufugamila Mulungu. 15 Muyawo yumwe avaga kiwona aponile, akawuyaje kwa Yesu kuno angumutsumitsa Mulungu kwa litsi likomi. 16 Akitotsaje hamagulu ga Yesu na kumulumba. Munu uyo avaga va kabila lya Vasamaliya. 17 Ihyo Yesu akaputsaje, "Mbe, sitsivaponitse vanu kumi nawo vakidichilwaje kwa ntsovelo tsa kumufugamila Mulungu? Vala tisa valikwiya? 18 Kuduhu munu yunji yo awutsile kumupela Mulungu wumelemo, ila yuno mujentsi ng’ani?" 19 Kahi Yesu akamulonjelaje munu yula, "Winuche ubite, litumbilo lyako likukuluse."

Yesu angumuponetsa chiteve Siku ya Kwesela

1 Hotsavaga kulutila ndongwa itso kwavaga na Liwungo lya Vayawudi ku Yelusalemu, nayo Yesu akabitaje. 2 Kuko Yelusalemu habehi na lwitsi lwa ng’olo kwavaga na litsimbwi lya malenga lyo lyachemwaga kwa Chiebulaniya Betitsata, lyo lyavaga lipilimwe na fyumba fihanu. 3 Iho ha fyumba ifyo havaga na vanu wolofu vatamwa, na fibofu, na fiteve, na wovapotsile filungo fyawo, vatsindilaga malenga gatigulwe. 4 Kwasawuli kwavaga na luvala ikaga mutantsi va Kilanga va Mulungu na kutigula malenga, na munu yoyuve yo akulongola kwinjila mu malenga gala hala ho gatiguche, aponaga wutamwa wowuve wo avaga nawo. 5 Kuko kwavaga na munu yumwe yo avaga mutamwa kwa luvala lwa myaka salasini na nane. 6 Yesu avaga kumuwona mutamwa yula avasise hala na kuno atselaga kuta aveye hala kwa luvala lweka ulo, akamuputsaje, "Mbe, un’gana uve mumi?" 7 Yula mutamwa akamupitulaje Yesu kuta, "Muvina, heni ntsilihela munu vakusindika mu malenga hala ho gantigulwa, chila hontsigana kwinjila munu yunji andongola." 8 Yesu akamulonjelaje, "Winuche utole lusaga lwako ujende!" 9 Bahobaho munu uyo akaponaje na kutegula lusaga lwake na kwantsa kujenda. Lulongwa ulo lwadisilwe Siku ya Kwesela.

46 Kaha Yesu akapilukaje ku muji gwa Kana ya ku Galilaya, kula ko adisile malenga gave difwayi. Kwavaga na chilongotsi yumwe yo ali na mwana mutamwa uko ku Kapelinawumu. 47 Chilongotsi uyo avaga kuhulika kuta Yesu ali awusile ku Galilaya kuhuma ku Yudeya, akabitaje na kumusuka abite akamuponetse mwanage yo ali mutamwa tabani. 48 Yesu akalongaje, "Heve manyi uleche kutsiwona ndajilo na mitinuso siukutumba ndaya!" 49 Yula chilongotsi akamulonjelaje, "Muvina dedede tubite mwanangu ho ang’acha ang’ali kutajika" 50 Yesu akamulonjelaje, "Ubite hela, mwanago aponile!" Yula chilongotsi akatsitumbaje ndongwa ntsila ntsa Yesu, akawukaje. 51 Hoavaga ang’ali mungasi, vatantsi vake vakitang’anaje nayo na kumulonjela kuta mwanago aponile. 52 Nayo akavaputsaje luvala lo antsitse kuva mumi, nawo vakamulonjelaje "Higolo saa saba hamunyi iho ho akaponile wutamwa." 53 Yula dada va yula mwana akiwukaje kuta lo luvala lululaga lo amulonje Yesu kuta, "Ubite mwanago akuva mumi!" Kwasawuli ya lulongwa ulo, mwene na vanu veka va mukaye yake vakamutumbilaje Yesu. 54 Iyi yo ndajilo ya kavili yo adisile Yesu hoavaga kuwuya Kugalilaya kuhuma ku Yudeya.

20 Hovavaga vam’bita mudala yumwe yo avaga na wutamwa wa kuhuma danda miyaka kumi na jivili, akamufwataje Yesu kwa kumbele na akibataje lupembo lwa mwenda gwa Yesu.

21 Adisile ihyo kwasawuli ilonje mu numbula yake kuta, "Manyi ndometse hela lupembo lwa mwenda gwake, ngupona." 22 Ihyo Yesu akapitukaje, nayo hoavaga kumuwona mudala yula akamulonjelaje, "Muhintsa vangu, wikangatsaje! Litumbilo lyako likuponitse." Duve mudala yula akaponaje kuhuma luvalalulo.

25 Kaha hono iho havaga na mudala yumwe yo atamikaga wutamwa wa kuhuma danda tsa siku tsa vamama kwa myaka kumi na jivili. 26 Mudala uyo avaga akodiche ndalahela kwa vaganga wolofu. Hamwe na kuva avaga agutsitse finu fyolofu siapatite chiba chochive, lechelelo wutamwa wake walutilaga nachene. 27 Hoavaga kuhulika ndongwa tsa Yesu, akifyatanitsaje halilugu lya vanu kuhumila kuchigosi kwa Yesu, na kudometsa mwenda go avaga afwite Yesu. 28 Adisile ihyo kwasawuli avaga ilonje mwene mu numbula yake kuta, "Manyi ndometse hela mwenda gwake, ngupona wutamwa wangu!" 29 Hoavaga kugudometsa mwenda gwa Yesu, luvala lulo danda yila yikadugaje. Akitselaje kuta aponile wutamwa wake.

43 Baho havaga na mudala yoakodekaga na kuhuma danda kwa chipindi cha myaka kumi na jivili. Yo asintsile finu fyake fyeka kwa vaganga, lechelelo siaponitswe. 44 Akaifyatanitsaje kuhumila kuchigosi kwa Yesu, akadometsaje mwenda gwa Yesu, luvala lulo danda yila yikadugaje. 45 Yesu akaputsaje, "Nani yo andomitse?" Vanu veka vakamukanilaje, lechelelo Petulo akalongaje, "Mutwa ihano hana vanu wolofu yo vangukutifya chila lubali." 46 Lechelelo Yesu akalongaje, "Hana munu andomitse, kwasawuli mbwene wuvetso wangu lunyumile." 47 Mudala yula avaga kutsela kuta siafuluche afihame, akahumilaje kuno ankakama, akagwaje kwa kipuna ha magulu ga Yesu. Akihalaje ha vanu kuta, kwasawuli yachi mbaka alamwe kumudometsa, na hila fyoaponile wutamwa wake. 48 Yesu akamulonjelaje, "Muhintsa vangu litumbilo lyako likuponitse. Ubite kwa wusichimafu."

Muhintsa va Yayilo na mudala amponetswa

18 Yesu hoavaga anlonga ndongwa itso, akatsaje muvina yumwe va Chiyawudi, akamufugamilaje na kulonga, "Muhintsa vangu afweye sambi, lelo ntsinsuka utse umuvichile mawoko nayo akuva mumi"

19 Ihyo Yesu hamwe na vadahitswa vake vakabitasaje na munu yula.

23 Kaha Yesu akinjilaje mu nyumba ya yula chilongotsi, akavawonaje vanu vampemba fwilimbi na lilugu lya vanu vanlomboketsa, na kuvemba ndalahela, 24 Yesu akavalonjelaje, "Muwuche hono hano kwasawuli muhintsa yuno si afweye ndaya, ila avasise hela." Lechelelo vanu iwo vakamuhekaje ndalahela kwa mbedatsi.

25 Lechelelo vanu hovavaga kuhumitswa kivala, Yesu akinjilaje mu nyumba akamubataje liwoko muhintsa yula, nayo akalamukaje.

22 Akatsaje munu yumwe chilongotsi va hono ha kwitang’anila Vayawudi yo achemwaga Yayilo, akavaje kumuwona Yesu akamufugamilaje, 23 na kumugongola kwa kumulonjela, "Muhintsa vangu antamika ndalahela na alibehi kutajika. Dedede ntsingukugongola tubite ukamusuchile kwa kumuvichila mawoko gako ili ave mumi." 24 Yesu akidichilaje na vakabitasaje hamwe na Yayilo, na vala vanu wolofu vakavafwataje, na vakamupilimaje Yesu na kumutifya.

38 Hovavaga kufika ha nyumba ya vina va nyumba ya kitang’anila Vayawudi yula yo achemwaga Yayilo. Vanu vavaga vanvemba na kulomboketsa. 39 Yesu akinjilaje mu nyumba na kuvaputsa, "Kwasawuli yachi munkola na kulomboketsa? Mwana yuno siafweye ila avasise hela." 40 Vanu vala vakamuhekaje kwa mbedatsi. Lechelelo Yesu akavahumyaje kivala vanu veka, akavategulaje yuve na dade va muhintsa yula yo atajiche, hamwe na vala vadahitswa vake akinjilaje nawo mu chumba chila cho gwavaga muvili gwa muhintsa yula. 41 Yesu akalibataje liwoko lya muhitsa yula yo atajiche, na kumulonjela, "Talita kumi!" Chinya kutijila, "Muhintsa ulamuche!" 42 Luvala lulo muhintsa yula akatsilipukaje, akimaje na kwantsa kujenda. Muhintsa yula avaga na myaka kumi na jivili. Ihyo yuve na dade vakavaje kuluwona lulongwa ulo vakapomokaje ndalahela.

31 Yesu akawilaje kulonga, "Mbe, vanu va chilelo chino nguviganitsa na chinu chachi, mbe vihwana na chichi?" 32 Vanu va chilelo chino vanakota vana wovichite hono hakugutsila finu yovangichema vene kwa vene kutwa, Tuvapembye fwilimbi, lechelelo simulawunga! Tuvimbye ntsimbo tsa chivembo, lechelelo simuvembite! 33 Kwasawuli Yohana mubatitsaji ho atsitse ikalaga bila kulya na kung’wa difwayi, nanye mukalongaje kuta, Ana lisoka. 34 Mwana va munu atsitse, ankulya na kung’wa, nanye munlonga kuta, Mulave yuno muhatufu na mugatsi. Uyu yo muyage na vakongotsa kodi na vadita ndongwa ntsibi. 35 Nayivaje ihyo ntselo ya Mulungu yilajilaga kuta wo wukweli kwa veka wo vanguyidichila.

Yesu am’bakatswa mafuta na mudala munya ndongwa ntsibi

36 Siku yimwe Mufwalisayo yumwe yo achemwaga Simoni akamulibulitsaje Yesu mu nyumba yake valye hamwe chilyo cha hachilo, nayo Yesu akabitaje na kikalisa mulutefu ili alye. 37 Mu muji ugo kwavaga na mudala yo an’dita ndongwa ntsibi. Avaga kuhulika kuta Yesu ali mu nyumba ya Fwalisayo ankulya, akatsaje na supa yinya mafuta gogan’nunyilila finofu.

41 Iho akatsaje munu yumwe litawa lyake Jayilosi, yo avaga chilongotsi va nyumba ya kitang’anila Vayawudi, akafugamaje ha magulu ga Yesu na kumugongoletsa abite kukaye kwake, 42 kwasawuli avaga na muhintsa va wiyeka yo avaga na myaka kumi na jivili, avaga antamika ndalahela na avaga habehi na kutajika. Yesu hoavaga am’bita, lilugu lya vanu lya mutifyaga mbali tseka.

49 Yesu hoavaga ang’acha kulonga, akatsaje mutantsi kuhuma kukaye ya Jayilosi yula chilongotsi va nyumba ya kwitang’anila Vayawudi, akamulonjelaje Jayilosi, "Uleche kumukoda Mudahitsi, muhintsa vako mwanga atajiche." 50 Lechelelo Yesu hoavaga kuhulika lulongwa ulo akamulonjelaje Jayilosi, "Witumbile hela, uleche kuwona muloto, muhitsa vako akuvamumi." 51 Yesu ho avaga kufika ha nyumba ya Jayilosi, akavalemetsaje vanu vanji kwinjila hamwe na mwene, lechelelo inje na Petulo, na Yakobo, na Yohana, hamwe na dade na yuve va muhintsa yula. 52 Muda ugo vanu veka vavembaga na kumulomboketsela muhintsa yula. Yesu akavalonjelaje, "Muleche kuvemba! Muhintsa yuno siafweye ndaya ila avasise." 53 Vanu vakamuhekaje Yesu kwasawuli vatselaga kuta yula muhintsa afweye. 54 Lechelelo Yesu akamwibataje liwoko, na akamulonjelaje fikami kuta, "Muhintsa vangu lamuche." 55 Wumi wake yula muhintsa wukamupiluchilaje, nayo akinukaje luvala lulo. Yesu akavalonjelaje valeli vake vamupele chinu cha kulya. 56 Valeli vake vakatinukaje ndalahela, lechelelo Yesu akavalemetsaje valahogola vamulonjele munu yoyuve ndongwa tsila tsiltsotsihumye.

Kutajika kwa Latsalo

1 Kwavaga na munu yumwe yo avaga mutamwa yo achemwaga Latsalo. Munu uyo ikalaga ku muji gwa Betsaniya, vikalasaga hamwe na vahatsave wo vachemwaga Maliyamu na Malita. 2 Uyo Maliyamu yo yuyula yo amubasile Mutwa mafuta go gapuchilila ga galama ngomi, na kugapata magulu kwa fwili tsake. 3 Ihyo Vahatsave iwo vakavatumaje vanu kwa Yesu vamulonjele kuta, "Mutwa, yula muyago antamika." 4 Yesu hoavaga kuhulika ihyo, akalongaje, "Latsalo siakufwa kwa wutamwa wuno, ila uwu wukulajila wumelemo wa Mulungu, na kaha wukudita Mwana va Mulungu atsumitswe." 5 Nayo Yesu viyendaga ndalahela na Malita, na Maliyamu na Latsalo muhatsa vawo. 6 Lechelelo Yesu hoavaga kuhulika kuta Latsalo antamika, akendelelaje kuhava kono kuko nayo ichite siku tsinji tsivili. 7 Hambele hotsavaga kulutila siku itso akavalonjelaje vadahitswa vake, "Lelo tuwuye kaha ku Yudeya." 8 Vadahitswa vake vakamulonjelaje, "Mudahitsi, hitsutsitsutsi hela baha Vayawudi vaganaga kukupola kwa maganga kuko, nave un’gana kaha kuwuya kuko?" 9 Yesu akavapitulaje kuta, "Mbe, sikuna masala kumi na gavili ga hamunyi kwa siku yimwe? Ihyo vanu vala veka wo vajendaga hamunyi sivikuvalaga kwasawuli vanguguwona mwangatsa gwa inyi. 10 Lechelelo vanu wo van’jenda hachilo vikuvalaga kwasawuli valihela mwangatsa gwa kuvatanga kulola." 11 Yesu avaga kulonga ndongwa itso akawilaje kaha kuvalonjela, "Muyetu Latsalo avasise tulo, lechelelo heni ntsim’bita ngamulamuse." 12 Vadahitswa vake vakamulonjelaje, bee Mutwa, manyi avasise tulo hela akulamuka. 13 Lechelelo Yesu avaga anlonga kwajili ya chifo cha Latsalo, ila vala vadahitswa vake sivatselaga, vatyaga anlonga kuta Latsalo avasise tulo hela. 14 Ihyo Yesu akavalonjelaje bila kuvafiha kuta, "Latsalo afweye,

Yesu anguyikatukitsa mavimbi makomi

23 Kaha Yesu akakwinaje mu mutumbwi hamwe na vadahitswa vake. 24 Simusika, kukahumilaje ng’ala ngomi na mavimbi gakantsaje kugukunujitsa mutumbwi, na mutumbwi gula gukantsaje kugubikitswa na malenga, lechelelo Yesu avaga avasise tulo. 25 Vadahitswa vake vakabitaje kumulamusa na kumulonjela kuta, "Mutwa, utukuluse, tunkufwa!" 26 Yesu akavalonjelaje, "Henye vanya litumbilo lidodo munkogopa chinu chachi?" Akinukaje na akayikatukitsaje yila ng’ala na bahali, kukasichimalaje. 27 Vadahitswa va Yesu vakavaje na muloto ndalahela na vakiputsaje, "Mbe, yuno munu vachi mbaka ng’ala ngomi na mavimbi fingumuhulikitsa?"

15 Hoyavaga kufika mumihe vadahitswa vake vakamufwataje na kumulonjela Yesu, "Hono hano hali mbuga ng’ani na litsuva lihele, lelo uvalaje vanu iva vabite vakigulile chilyo ili valye." 16 Yesu akavalonjelaje, "Sivan’ganika kuwuka, lechelelo mun’ganika henye muvapele filyo." 17 Vene vakamulonjelaje, "Hano hogali mabumunda gahanu na somba tsivili hela." 18 Yesu akavalonjelaje, "Mundetele hano." 19 Akavalonjelaje vanu vikale hasi mu misoli, Yesu akategulaje gala mabumunda gahanu na tsila somba tsivili, akagalamaje Kilanga na kumulumba Mulungu. Kaha akamegasaje gala mabumunda na somba tsila na kuvapela vadahitswa vake, nawo vakavapelaje vanu. 20 Vanu veka vakalyaje na kwiguta. Hambele vadahitswa vakaholaje filyo fyo fisije na fikamemaje fitangula kumi na fivili. 21 Vanu veka wovalyeye vavaga vafisile valume elufu tsihanu bila kuvavala vadala na vana.

25 Hokwavaga kufika hachilo cha kuvika ntsogolo, Yesu akabitaje kwa vadahitswa vake kuno an’jnda mwilanga mwa malenga.

Yesu anguvapela filyo vanu elufu tsitayi

32 Kaha Yesu akavachemaje vadahitswa vake na kuvalonjela, "Ntsinguvawonela lusungu vanu vano kwasawuli vaveye hamwe na heni kwa siku tsidatu, na sambi valihela chilyo chochive cha kulya. Ndema kuvalaga na kuno vana ntsala, vafuluche vatowe na mbupulu mu ng’asi." 33 Vadahitswa vake vakamulonjelaje, "Tukupata kwiya chilyo cha kuvakwila vanu vano veka na hono hano tuli ha mbuga?" 34 Yesu akavaputsaje, "Muna mabumunda galinga?" Nawo vakamulonjelaje, "Mabumunda saba na tusomba tutunga hela." 35 Lelo Yesu akavalonjelaje vanu veka vikalise hasi. 36 Akategulaje mabumunda gala na somba tsila, akamulumbaje Mulungu, hoavaga kusinda, akavapelaje vadahitswa vake nawo vakavagavasilaje vanu. 37 Vanu veka vakalyaje na kiguta, hambele vadahitswa vake vakakong’osaje fyo fisije vakafimemyaje fitangula saba. 38 Veka wovalyeye vavaga valume elfu tsitayi, bila kuvavalila vadala na vana.

Kuhomba kodi mu Nyumba ya Mulungu

24 Hovavaga kufika ku muji gwa Kalipenaumu, vanu yo vavaga vankongotsa kodi ya Nyumba ya Mulungu vakabitaje kwa Petulo na kumuputsa kuta, "Mbe, mudahitsi venyu ahombaga kodi ya Nyumba ya Mulungu?" 25 Petulo akajibulaje, "Ee, ahombaga." Petulo hoavaga kuwuya kukaye, Yesu akatalaje kumuputsa kuta, "Simoni, heve un’wona ndawuli? Vantsajila va inyi vakongotsaga kodi kuhuma kwa nani? Mbe, vakong’asaga kuhuma kwa vanu vawo awu kwa vajentsi?" 26 Petulo akamujibulaje, "Vakong’asaga kuhuma kwa vajentsi!" Nayo Yesu akamulonjelaje, "Ihyo lelo yiganikaga vanu vake valeche kutawula kodi nda! 27 Lechelelo tuleche kuvatifya, bite ku lilamba ukateje ndovano. Somba ndongola yo yikugwila, uyigubule mulomo ukuliwona ligobole, na utegule ligobole ilyo ukahombe kodi yako na ya heni."

Yesu angukotola mubichi gogulihela mibawo

18 Kung’acha hamilawu, Yesu hoavaga mung’asi kuwuya ku Yelusalemu kuhuma ku muji gwa Besaniya, akawonaje tsala. 19 Akaguwonaje mubichi gwa mutsombe go gwavaga halubali ha ng’asi, lechelelo gwavaga gulihela mibawo ila mihamba ng’ani. Akagukotolaje kwakulonga kuta, "Ulekaje kulela mibawo ng’o!" Luvala lulo gula mutsombe gukakalaje. 20 Vadahitswa vake ho vavaga kuluwona lulongwa ulo vakapomokaje na kulonga, "Yiveye ndawuli mubichi guno gunkala luvala lulu hela?" 21 Yesu akavajibulaje, "Ntsinguvalonjela wukweli kuta, Manyi muve na litumbilo na manyi muve mulihela muhwehwe goguve, si mukudita ndongwa itsi ng’ani tso ndisile, lechelelo henye mukuvetsa kuchilonjela chidunda chino, chigumuche na chibite kitotse ku bahali, navho chikudita hihyo. 22 Manyi muve na litumbilo, chinu chochive cho mukumusuka Mulungu mu suko, mukupelwa."

37 Hambele yikawugaje ng’ala ngomi na kugakunugitsa mavimbi. Nago gala mavimbi gakagutovaje mutumbwi gula goavaga akwinile Yesu, na mutumbwi gukantsaje kumema malenga. 38 Yesu avaga avasise kumbele mu tumbwi na kuno asegamitse mutwi gwake mu muhagu. Vadahitswa vake vakamulamusaje na kumulonjela, "Mudahitsi mbe, sinambe ulave kuta hetwe tun’yaga mu malenga?" 39 Yesu akalamukaje akaying’anulilaje ng’ala yila ngomi kwa kugalonjela mavimbi gala, "Katuche, mye!" Bahobaho ng’ala yila yikalekaje, kukasichimalaje. 40 Kahi Yesu akavaputsaje vadahitswa vake, "Munkogopa chichi? Mbe, mung’acha mulihela litumbilo?" 41 Vadahitswa va Yesu vakavaje na muloto ndalahela na vakiputsaje, "Mbe, yuno munu vachi, mbaka ng’ala ngomi na mavimbi fingumuhulikitsa?"

35 Hoyavaga mumihe, vadahitswa vakabitaje kwa Yesu na kumulonjela, "Hono hano ha mbuga, na litsuva lin’nyelejeta. 36 Chiba uvalaje vanu iva, ili vabite ku miji na mu fijiji fya habehi vakagule filyo!" 37 Lechelelo Yesu akavalonjelaje, "Muvapele henye filyo." Nawo vadahitswa vakamulonjelaje Yesu, "Mbe, tutegule dinali miya mbili tubite tukagule mabumunda ili tuvapele vanu iva valye?"* 38 Yesu akavaputsaje, "Muna mabumunda galinga? Mubite mukalole." Hovavaga kulola vakamulonjelaje, "Hogali mabumunda gahanu na somba tsivili." 39 Ihyo Yesu akavalajitsaje vadahitswa vake kuta, "Muvalonjele vanu vikalise mu misoli filundo filundo. 40 Nawo vanu vakikalisaje mu misoli filundo filundo fya vanu miya moja na mu filundo fya vanu hamusini." 41 Kahi Yesu akategulaje gala mabumunda gahanu na somba tsivili, akagalamilaje kilanga na kumulumba Mulungu na kugamegasa hamwe na tsila somba tsivili, akavapelaje vala vadahitswa vake vavagavasile vanu vala veka. 42 Nawo vanu veka vakalyaje na kiguta. 43 Vadahitswa va Yesu vakakong’asaje filyo fyo fisije, vakapataje fitangula fikomi kumi na fivili. 44 Vanu wovalyeye mabumunda na somba tsila valume ng’ani vavaga kota elufu tsihanu.

48 Yesu akavawonaje vadahitswa vake vankodeka kukwega mutela gwa mutumbwi kwasawuli ya ng’ala ngomi yavasumaga. Kwavaga kufika habehi na kwela, Yesu akabitaje kovali vadahitswa vake kuno an’jenda muchanya mwa malenga na akaganaje kuvalutila. 49 Hovavaga kumuwona an’jenda muchanya mwa malenga, vakakolaje kwasawuli vatijilaga kuta likuva lilayika. 50 Veka vakamuwonaje na vakavaje na muloto ndalahela. Luvala lulo Yesu akavalonjelaje, "Mwikangatse, muleche kutinuka, yo heni!" 51 Kahi Yesu akakwinaje mu mutumbwi mukomi govali vadahitswa vake, na ng’ala yikadugaje. Vadahitswa vakapomokaje ndalahela,

Yesu anguvapela chilyo vanu elufu tsitayi

1 Chipindi icho vanu wolofu vakakong’asikaje kaha. Na kwasawuli vanu vala vavaga valihela filyo, Yesu akavachemaje vadahitswa vake na kuvalonjela, 2 "Ntsinguvawonela lusungu vanu vano, kwasawuli vikalise na heni kwa siku tsidatu na valihela chilyo. 3 Manyi ntsivaleche vabite ku kaye kwawo na ntsala, na vamwe vahumye kutali yifuluche yivatove mbupulu mung’asi." 4 Vadahitswa vake vakamuputsaje, "Hano ha mbuga, tukupata kwiya filyo fyo vafuluche vigute vanu veka vano?" 5 Yesu akavaputsaje, "Munago mabumunda galinga?" Vakamulonjelaje, "Tunago mabumunda saba." 6 Yesu akavalonjelaje vanu vikalise hasi. Akagategulaje gala mabumunda saba, akamulumbaje Mulungu, akagamegasaje na kuvapela vadahitswa vake vavagavasile vanu. Vadahitswa vakavagavasilaje vanu kota fyo alontsile Yesu. 7 Hihila vali na tusomba tudodo. Yesu akafitambichilaje na kuvalajitsa hihila vadahitswa vake vavagavile vanu. 8 Vala vanu vakalyaje na kwiguta. Hambele vadahitswa vakaholangitsaje mabumunda na somba tso tsisije, fikamemaje fitangula saba. 9 Nawo vanu yo valyeye vavaga kota elufu tsitayi. Duve Yesu akavalagaje vanu vabite kukaye kwawo,

Yesu angulikotola libichi lya mutini

12 Hamitondo iyage hamilawu Yesu hamwe na vadahitswa vake hovavaga vanhuma ku Betsaniya kubita ku Yelusalemu, Yesu akavaje na ntsala. 13 Yesu hoavaga kulava kwa kutali, akaguwonaje mubichi gwa mutini gutinive mihamba myolofu. Akahejelelaje ili abave libawo lyolive, avaga kufika akawonaje mihamba ng’ani, kwasawuli sichavaga chipindi cha mibawo. 14 Yesu akagulonjelaje mubichi gula, "Kuhuma sambi na siku tseka, siukulela mibawo jojive!" Nawo vadahitswa vake vakahulikaje hila fyo agukotolaga.

Cho tungidahitsa kuhuma kwa libichi lya mutini go gukatsile

20 Hamilawu iyage hovavaga vanlutila hala ha mubichi gwa mutini, vakaliwonaje lila libichi lyeka likatsile kwantsila mu ndela. 21 Petulo akiwukaje chila cho avaga alontsile Yesu na kumulonjela kuta, "Mudahitsi lave! Gula mubichi gwa mutini go ukagukotwe gukatsile!" 22 Yesu akavalonjelaje vadahitswa vake, "Mumutumbilaje Mulungu." 23 Ntsinguvalonjelani wukweli kuta, manyi munu achilonjele chidunda chino, gumbuche na wikitotse mu bahali, na kuno alihela muhwehwe goguve munumbula yake na kaha angitumbila kuta yikuva hihila kota fyo alontsile, akuditilwa lulongwa ulo. 24 Ihyo ntsinguvalonjela, hala ho munsala na kusuka chinu chochive kwa Mulungu, mwitumbilaje kuta mwanuchye, nanye mukuva mupasile. 25 Nanye chila homukuva munsala, mun’ganika mumuhulumile munu lulongwa loluve lo avakosye, nayo Dada venyu va kilanga avahulumile na henye ndongwa tsenyu ntsibi.

Yesu anguvahagula vadahitswa valongola

1 Chimunyi chimwe Yesu avaga imile ha lilamba lya Jenetsaleti, na vanu wolofu vavaga vamupilime na kuno vangumukunugitsa ili vahulikitse Ndongwa Nofu tsa Mulungu. 2 Akajiwonaje mitumbwi jivili ja valova somba, jojavaga mulubali mwa lilamba, vatsiwuyapaga nyafu tsawo. 3 Yesu hoavaga kwinjila mu mutumbwi go gwali gwa Simoni, akamulagitsaje Simoni aguhegetse luhuma ha mwejego gwa lilamba gubite mbaka ha lulenga lutali. Akikalisaje na akantsaje kuvadahitsa malugu ga vanu. 4 Avaga kusinda kudahitsa, akamulonjelaje Simoni, "Wendese mutumbwi mbaka hono hanya lulenga lutali, mutotse waafu wenyu mulove somba." 5 Simoni akamujibulaje, " Ena! Mutwa, tukodiche kulova somba chilo cheka situlapata. Lechelelo kwasawuli ulontsile heve tukutotsa nyafu mu malenga." 6 Nawo hovaveye kutotsa nyafu vakapataje somba ntsolofu ndalahela, mbaka nyafu tsawo tsikantsaje kudemuka. 7 Vakavachemaje kwa mawoko vayawo wovavaga mu mutumbwi gunji vatse vavatanje. Vakatsaje vakamemyaje somba mu mitumbwi jeka jivili mbaka mitumbwi jikaganaje kuyajilila mululenga. 8 Simoni Petulo aveye kuwona ihyo, akafugamaje hamagulu ga Yesu na kumulonjela, "Mutwa uheje kwa heni. Heni ntsi munu yo ntsin’dita ndongwa ntsibi!" 9 Kwasawuli mwene na vayage vali vatinuche ndalahela kwa kulova somba ntsolofu tsinya ihyo. 10 Hihila Yakobo, na Yohana, na vana va Tsebedayo wovavaga valova somba hamwe na Simoni nawo vakatinukaje. Yesu akamulonjelaje Simoni kuta, "Uleche kuva na muloto, luhuma sambi siukuva mulova somba, lechelelo ukuva unguvaleta vanu kwa Mulungu." 11 Duve hovavaga kupilula mitumbwi jila halubali lwa lilamba, vakalekaje chila chinu, vakabitasaje na Yesu.

Yesu anguying’anulila ng’ala ngomi mu bahali

22 Siku yimwe Yesu akavalonjelaje vadahitswa vake kuta tulowoche lubali lunji lwa lilamba, "Ihyo vakakwinaje mu mutumbwi na kwantsa kulowoka ku mwambu." 23 Hovavaga mu mutumbwi Yesu akavasaje tulo, luvala lulo kukahumilaje ng’ala ngomi na kukunuga mavimbi ga malenga mbaka mutumbwi gukantsaje kumema malenga, vakavaje mu ng’oko ya kuyaga mu malenga. 24 Vadahitswa vake vakabitaje hono hala hoavasise Yesu, vakamulamusaje na kumulonjela, "Mutwa, Mutwa, tun’yaga." Yesu akalamukaje, akaying’anulilaje ng’ala yila ngomi na mavimbi, na yila ng’ala ngomi yikakatukaje. 25 Kahi akavalonjelaje, "Litumbilo lyenyu lilikwiya?" Lechelelo vene vakavaje vapomwiche na kuva na muloto kuno vangilonjela kuta, "Mbe mwene yuno yo nani mbaka anguying’anulila ng’ala ngomi na mavimbi nafyo fingumuhulikitsa?"