1 Weye Mnungu unionele mbazi,

kwajili yo lukunde lwako,

uuse wavu wangu.

kwo wingi we zimbazi zako.

2 Nisunt'he maihi yangu yose

naho unitende nikuke, nilawe mwo wavu.

6 Ukumbukile weye Zumbe Mnungu mbazi zako na lukunde lwako,

kwaviya zandaga uuko kukongela aho kale.

7 Usekukumbukila wavu na malema yo ubwanga wangu,

no wavu wangu wo ukwank'walu

unikumbukile kwajili yo lukunde lwako,

kwaviya weye Zumbe Mnungu uywedi.

1 Uko nili hasi vitendese, naiila wambizi wako weye Zumbe Mnungu.

2 Zumbe Mnungu unive indilo yangu,

unive hakwitanga unambize!

11 Weye Zumbe Mnungu usekunikindila uwedi wako,

uwedi wako na uhuwilwa wako, waniamilaga mazuwa yose.

6 Ikindedi, uwedi wako no lukunde lwako nevinde na miye wikazi wangu wose,

naho nenikale mwe nyumba ya Zumbe Mnungu mazuwa yose.

13 enga ivo eli tate akuwaonela mbazi wanawe,

nivo eli Zumbe kwa wose wakumwogoha,

15 Mna digeleko diya hadyandaga ni enga masa ya Adamu, kwaviya kwa masa ya mnt'hu yumwenga wabanika want'hu wengi, uwedi wa Mnungu utendesa ne digeleko dimwe uwedi wo mnt'hu uyu Yesu Kilisito kwajili ya want'hu wengi.

15 Haluse, kigeeze? Kidamanye wavu, kwaviya hakikulongozwa nu mwiko mna kimwo wedi wa Mnungu? Bule!

4 Mna Mnungu ni mta mbazi zitendese kakiunga kwa lukunde lukulise, 5 hata uneva nekinda kibanika kwajili yo wavu, kakitenda wagima hamwenga na Yesu Kilisito. Nyuwe myokolwa kwa uwedi wa Mnungu.

9 Mna uhituzi wakwe wandaga. "Uwedi wangu wakwigusa Kwaviya udahi wangu ukulisa Umwo ukanda kusokela." Naonesa kinyemi kukeduvila kwo usokezi wangu vileke udahi wa Kilisito wikale mwangu.

13 Akufisa wavu wakwe hapate chochose, mna yehe akweiila na kuleka wavu wakwe naaonelwe mbazi.

13 Kehinizeni mwa mawandiko ivo Mnungu ukulonga. Miye naunga mbazi hikuunga malavo. Miye hizile kuwetanga want'hu wedi, mna wata wavu."

21 Petulo niyo amwitila Zumbe, niyo amuuza, "Mnt'hu anitendele wavu kengahi name nimlekele? Anitendele malavo mfungate?"

22 Yesu niyo amhitula kugamba, "Hiyo malavo mfugate du, mna malavo milongo mfugate malavo mfungate.

14 "Mnawausila wadya wakuwatendelani wavu, Tati yenyu ywa kwe mbingu naye naawa usileni nyuwe wavu wenyu.

31 Hata ivo kwa mbazi zako zitendese, hwalekaga wabanike na kuwajala, kwaviya weye ni Zumbe Mnungu mta mbazi na uwedi.

5 Ana kinyemi yudya akwink'hiza matundu yakwe kwa ukise,

mnt'hu akudamanya ndima zakwe kwa uwagilwa.

17 Uwedi wa Zumbe Mnungu ywetu unde mwetu,

ukink'he upati mwe zindima kikudamanya.

16 Kibaseni ukalo wo wedi wa Mnungu kwa ukindedi vileke kihokele mbazi no uwedi wa Mnungu, zichambize.

1 Naivo wandugu zangu, kwa mbazi za Mnungu, nawaungani kwa moyo wose, mkelave kwajili ya ndima ya Mnungu mnde nt'hambiko ina ugima kwakwe, ikukile naho ikumwelela, nuko kumvika Mnungu kwa kindedi.

16 Kwaviya Mnungu awaungisaga want'hu wa mwe isi niyo amwigala Mwanawe heena miyawe vileke kila akumhuwila asekwaga mna ande no ugima wa ulo na ulo.

29 Nanywe mwink'higwa luneka lwa kumdamanyila ndima Kilisito, naho hiyo kumhuwila du, mna iviya iviya kwa kusulumizwa kwajili yakwe.

1 Seuta Hezekia atumaga ulosi kwa want'hu wose wa Izilaeli na Yuda naho awaandikilaga baluwa Efulaimu na Manase, awalalikaga wose weze mwe nyumba ya Zumbe Mnungu uko Yelusalemu vileke wadamanye zuwa dya kinyemi dya Pasaka kwa Zumbe Mnungu wa Izilaeli. 2 Seuta na vilongozi na want'hu wose waduganyike mwo mzi wa Yelusalemu wazumilanaga kudamanya zuwa dya kinyemi dya Pasaka mwo mwezi wa kaidi, 3 kwaviya walavant'hambiko nawanda wageke wakekukize naho want'hu wandaga hawanati wakeduganye uko Yelusalemu, ivo hawadahaga kudamanya zuwa dya kinyemi dye Pasaka enga ivo vizoelwe. 4 Mbuli ino niyo yaoneka yedi kwa seuta na mdugano wose. 5 Ivo walavaga sigilizi mwe isi yose ya Izilaeli kulawa Beel Sheba mpaka Dani kugamba want'hu weze Yelusalemu wadamanye zuwa dya kinyemi dya Pasaka ya Zumbe Mnungu, Mnungu ywa Izilaeli. Yombokaga lupisi lutali umwo want'hu wandaga wakei kudamanya zuwa dya kinyemi dya pasaka viligane na sigilizi zakwe. 6 Seuta asigiilaga wegala ulosi waite mpaka Izilaeli na Yuda yose wakanda na baluwa kulawa kwa seuta na kulawa kwa wakulu wa wandima wakwe ikagamba:

"Nyuwe want'hu wa Izilaeli muuiyeni Zumbe Mnungu, Mnungu ywa Ibulahimu, na Isaka na Yakobo, vileke naye awauiyeni nyuwe, awayokoleni kulawa mwe mikono ya maseuta wa Asilia. 7 Msekunda enga wakale wenyu na wandugu zenyu awo wandaga hiyo wahuilwa kwa Zumbe Mnungu, Mnungu ywa wakale wawe, enga ivo mkuona nakawasulumizisa. 8 Msekunda wank'hani enga wakale wenyu mna mtegelezeni Zumbe Mnungu. Soni mwe Nyumba yakwe Mnungu iyo aikukize mazuwa yose, mumvike Zumbe Mnungu, Mnungu ywenyu vileke asekuwaihiya. 9 Mnamuuiya Zumbe Mnungu ndugu zenyu na wana wenyu awo watahigwe nawaonelwe mbazi na kulekelwa wauye mwe isi ino. Kwaviya Zumbe Mnungu, Mnungu wenyu ni mta uwedi na mbazi, naye naawahokeleni uneva mnamuuiya." 10 Ivo wegala ulosi waitaga kulawa mzi umwenga mpaka mtuhu kose mwe isi ya Efulaimu na Manase niyo wabula mpaka Zabuloni, mna want'hu wawasekaga na kuwabela. 11 Hata ivo want'hu wageke mwa makabila ya Asheli na Manase na Zabuloni wakeselezaga niyo weza Yelusalemu. 12 Udahi wa Mnungu wandaga ukadamanya ndima mwe Yuda, awagelaga moyo kwa kutimila sigilizi za seuta na wakulu wakwe enga ivo asigiile Zumbe Mnungu.

13 Want'hu wengi wakeduganyaga mwo mzi wa Yelusalemu mwo mwezi wa kaidi kudamanya zuwa dya kinyemi dya mikate heigeligwe hamila. 14 Wakongaga ndima ya kuhausa vilingo vose ivo vandaga Yelusalemu naho wavihausaga vilingo va kufukizila ubani, wazinulaga na kuviduula mwe Dikolongo dya Kidiloni. 15 Zuwa dya mlongo na kane dyo mwezi wa kaidi wachinjaga mwanangoto ywa Pasaka. Walavant'hambiko na Walawi waonaga soni, wakekukizaga na kwigala malavo yo kokwa mwe Nyumba ya Mnungu. 16 Waguhaga hant'hu hawe mwe Nyumba ya Mnungu viligane na malagizo ye Miko ya Musa mnt'hu wa Mnungu. Walawi wawenk'haga walavant'hambiko isakame ya nt'hambiko nawo niyo waiimyagila mwe kilingo. 17 Kwaviya want'hu wengi awo wendile mwo mdugano uwo wandaga hawakekukize, hawadahaga kuchinja wana ngoto we Pasaka, ivo vaungwagwa Walawi wawachinjile hant'hu hawe na kuwegala wana ngoto kwa Zumbe Mnungu. 18 Mwa awo want'hu wengi wadugane wadya walaile mwe dikabila dya Efulaimu na Manase na Isakali na Zabuloni wandaga hawakekukize hamwenga na ayo wadamanyaga zuwa dya kinyemi heviligane ne sigilizi ya Zumbe Mnungu. Seuta Hezekia awalombezelaga akagamba, "Zumbe Mnungu ywedi amuhausile kila yumwenga masa yakwe, 19 akukulombeza kwa moyo wakwe wose, weye Zumbe Mnungu, Mnungu ywa watati zakwe, hata uneva yehe hiyo ywedi viligane ne imiko ye Nyumba ya Mnungu." 20 Naye Zumbe Mnungu amwivaga Hezekia niyo awausila want'hu wavu wawe. 21 Waizilaeli wose awo wandaga wakeduganya mwo mzi wa Yelusalemu wadamanyaga zuwa dya kinyemi dya mikate heigeligwe hamilakwa lupisi lwa mazuwa mfungate wakanda na kinyemi kikulu. Kila zuwa Walawi na walavant'hambiko wamtogolaga Zumbe Mnungu, wakemaga wila wakanda na mazeze. 22 Hezekia niyo awatogola na kuwagela moyo Walawi kwaviya walagisaga yadya wakuyamanya mwo kumdamanyila ndima Zumbe Mnungu.

Ivo want'hu niyo wadya nk'hande mwe dizuwa dya kinyemi kwa mazuwa mfungate, walavaga nt'hambiko za utondowazi na kumtunya Zumbe Mnungu, Mnungu ywa watati zawe. 23 Mdugano wose wazumilaga kugendeela mwe dizuwa dya kinyemi kwa mazuwa matuhu mfungate, ivo wandaga na mazuwa matuhu ye kinyemi mfungate. 24 Seuta Hezekia wa Yuda alavaga majeku alufu imwenga na ngoto alufu mfungate kwaajili yo ludyo lwe dizua dye kinyemi. Nawo wakulu walavaga majeku alufu imwenga na ngoto alufu mlongo. Walavant'hambiko wengi wakekukizaga. 25 Mdugano wose wa Yuda hamwenga na walavant'hambiko na Walawi na udya mdugano wose ulaile Izilaeli hamwenga na wadya watakwiza walaile Izilaeli na wadya nawakekala Yuda wandaga na kinyemi. 26 Kwandaga na kinyemi kikulu mwe Yelusalemu, kwaviya kukongela mwe mazuwa seuta Selemani mwana Daudi seuta ywa Izilaeli, mbuli enga iyo yandaga ikei kulaila mwe Yelusalemu. 27 Niho walavant'hambiko na Walawi wakimalaga nakuwavikila want'hu, naye Mnungu awevaga kwaviya malombezo yawe yabulaga kwe mbingu.