1 Mna mbuli iyo haimwelele Yona hata ludodo, niyo ingilisa maya. 2 Ivo alombezaga akagamba, "Zumbe, togola, izo hiyo mbuli ziya nafanyanye kugamba noudamanye umwo nandile nikei kuhalawa kaya? Nivo valekile hanyilikila Talishishi. Nehimanya kugamba weye ywi Mnungu ywedi na mta mbazi, hukusunguza kwiihiwa naho una lukunde holukusila. Wadaha kuhitula zifanyanyi zako usekusengela. 3 Haluse elo, Mnungu uuse ugima wangu, kwaviya, ni vedi nibanike kujink'ha kunda mgima."

4 Mnungu naye niyo amhitula Yona. "Wagamba wadamanya vedi kuihiwa?"

5 Niho Yona ahalawa kuse ulailo wa zuwa wo mzi. Aho niyo akezengela kaheha no kwikala kundani kwa kaheha akagojela kuona idyo nediupate mzi wa Ninawi. 6 Zumbe Mnungu ahotezaga mzabibu niyo wakukula na kumdamanyila mp'heho Yona vileke umhunguile makunt'ho yakwe. Yona niyo nakawelelwa vitendese mzabibu uwo. 7 Mna zuwa dya kaidi, kwize kuche, Mnungu niyo avigamba sondo iubebete mzabibu uwo, niyo wanyala. 8 Zuwa dize dyalike, Mnungu niyo aleta heho dina kizihuye kulawa kwe dijangwa, zuwa niyo dyamoka Yona mwo mtwi niyo anda hagihi na kuzehuka, aonagao ni vedi abanike niyo agamba, "Ni vedi nibanike kujink'ha kunda mgima."

9 Mna Mnungu niyo amgamba Yona, "Togola, wafanyanya wadamanya vedi kuihiwa kwajili ya uwo mzabibu?"

Yona niyo ahitula, "Heiye, naona maya hata nnabanika!"

10 Aho Zumbe Mnungu niyo amgamba Yona, "Mzabibu uwo nouhota na kukula kwa kilo kimwenga, kilo kitimile nounyala. Weye huudamanyile kint'hu chochose, naho huuhandile. Nii wauonela mbazi? 11 Togola, hivo vedi kwangu kuonela mbazi mzi wa Ninawi, udya mzi mkulu una wana magana gana na magana milongo miidi hamwenga na makala?"