1 Zumbe Mnungu alongaga na Yona kaidi naho, 2 niyo amgamba, "Ita Ninawi, udya mzi mkulu, ukawabilikize want'hu ulosi uwo hwink'hile."

3 Ivo, Yona niyo aita Ninawi enga ivo Zumbe Mnungu amsigiile. Mzi wa Ninawi wandaga ukulisa, ukuguha mazuwa matatu kuubinda. 4 Yona akongaga kwingila mwo mzi wa Ninawi, eze agende lugendo lwa zuwa dimwenga akongaga kubilikiza akagamba. "Yonomboka mazuwa milongo mine Ninawi neibanangwe!"

5 Ivo, want'hu wa Ninawi wauhuwilaga ulosi wa Mnungu, niyo watowa lugong'ondo kila yumwenga, mkulu na mdodo wafunge naho wavale magunia kulagisa kugamba wakweiila.

6 Umwo seuta ywa Ninawi eze eve zimbuli izi, enukaga mwe difumbi dyakwe dye kiseuta, nokuhambula valo dyakwe dye kiseuta, niyo avala gunia no kwikala mwa maivu. 7 Seuta awatowela lugong'ondo wekazi wa Ninawi akagamba. "Miye seuta, hamwenga na wakulu wayangu, nalava sigilizi ino. Hasekunda na mnt'hu yeyose, hegu mfugwa wowose akuunga adye kint'hu chochose. Ni mwiko kudya hegu kunywa. 8 Want'hu wose na makala yose wavale magunia. Kila mnt'hu amlombeze na kumwiila Mnungu kwa kindedi. 9 Mafani Zumbe Mnungu adaha kuhitula fanyanyi zakwe, no kuleka kukiihiya, naswe niyo chahona!"

10 Mnungu eze aone ivo wadamanye, na ivo waulekaga uwihi wawe, niyo ahitula zifanyanyi zakwe na kuleka kuwatenda enga ivo nakaunga awatende.