1 Zuwa dimwenga Zumbe Mnungu amgambaga Yona, mwana Amitai kugamba, 2 "Inuka wiite Ninawi, mzi udya mkulu ukawakanye kwaviya u wihi wawe utendesa."

3 Mna Yona akonga kuita nt'hendelo nt'huhu vileke amnyilike Zumbe. Aseelaga mpaka Yafa, niyo aona meli ikwiita Talishishi. Alihaga matundu niyo akwela mwe meli no kutamba nayo kwiita Talashishi vileke amnyilike Zumbe.

4 Mna Zumbe egalaga nk'hung'unt'ho nk'hulu mwe bahali niyo kwanda na mjubwaniso. Niyo meli yanda hagihi na kubogozoko. 5 Watafi wose mwe meli wogohaga, kila yumwenga amwiile mlungu, niyo waduula mapeto yawe mwe bahali vileke meli ihuhe.

Mna Yona engilaga nt'hendelo nt'huhu ya kundani mwe meli, niyo agona nt'hongo fofofo. 6 Mlongoza meli niyo ambasa na kumgamba, "Wagonai? Inuka umlombeze mlungu ywako, hegu naakionele mbazi na kukiyokola ugima wetu."

7 Want'hu wose mwe meli niyo wagambana, "Haluse kitowe simbi kimanye buli idyi dikipata kwa masa yaani." Ivo niyo watoa simbi niyo yamgweela Yona.

8 Aho niyo wamgamba. "Haluse, kigambile! Niani akukigaila makunt'ho aya yose? Ndima yako ni iihi? Isi yako niihi? Weye ywi kabila dyani?"

9 Yona niyo awahitula, "Miye ni Mwibulania, namvika Zumbe, Mnungu Muumbi ywe bahali ne isi."

10 Niyo Yona awagamba nehamnyilika Zumbe. Weze weve ivo want'hu wagohesaga, niyo wamgamba "Kudamanya mbuli iihise!"

11 Ibahali yagendeelaga kunda na mjubwaniso mkulu. Ivo want'hu niyo wamuuza Yona, "Kikutende vivihi vileke bahali itondowale?"

12 Yona niyo awahitula, "Niguheni mniduule mwe bahali, ibahali neitondowale kwaviya naona kugamba ni miye chotoko cho mjubwaniso uno."

13 Walongoza meli hawamduulaga, vituhu vakwe wagezaga kuiyogola imeli ibule mwe isi inyaile, mna wadundugaga kwaviya bahali neindilisa na mjubwaniso kujink'ha hadya nk'hongo. 14 Ivo, niyo wamwiila Zumbe Mnungu wakagamba, "Zumbe Mnungu chakulombeza, usekukikoma kwa kuulava ugima wa mnt'hu uyu, hegu usekulihiza kwa kumkoma mnt'hu heina masa, weye Mnungu udamanye ivo viwagilwe." 15 Ivo wamguhaga Yona no kumduula kuse ye meli, aaho bahali niyo yatondowala. 16 Mbuli iyo yawatendaga wandima we meli wamogohese Zumbe niyo wamlavila malavo na kumwiikila kilapi.

17 Niyo, Zumbe asigiila samaki nk'hulu immele Yona. Yona andaga mwe zinda ze samaki kwa mazuwa matatu kilo na msi.