1 Umwo Yona andaga mndani mwe zinda ze samaki amlombezaga Zumbe Mnungu ywakwe. 2 Akagamba,

"Zumbe nakwitangaga kwajili ya makunt'ho yangu,

naho niyo waniva

kulawa kwo mnyongomela wa wabanike

nakuiilaga kuunga wambizi nawe wanivaga.

3 Waniduulaga hasi kundani mwe bahali,

ukwo nazungulukwagwa ni mazi mengi,

mjubwaniso wako una udahi

yombokaga mnanga mwangu.

4 Nafanyanya hiduulwa hale

na weye,

naho henidahe kuiona naho Nyumba yako ikukile.

5 Mazi nayanizunguluka niyo yanisesela,

bahali neinigubika pele

niyo amani ye mwe bahali nayazinganizaga umtwi.

6 Nehiseela mpaka hasi kukongela milima,

kwe isi ina nk'hili zivugalwe ulo na ulo. Nuko kugamba mwe isi ya want'hu wabanike

Mna weye Zumbe Mnungu ywangu

nokunikweza handa mgima kulawa kwe dibome.

7 "Muye wangu umwo wandile ukanifosa

nehikukumbukila weye Zumbe

Niyo wakwiva ukulombeza kwangu

ukwo kwe Nyumba yako Ikukile.

8 Want'hu wakuvika milungu,

wakepagula hale no uwedi wawe.

9 Mna miye hakema wila wa nt'hogola

nohulavile malavo,

na kukint'hiza vilapi changu kwako.

Mnungu niye akuyokola."

10 Ivo Zumbe Mnungu aigambaga idya isamaki ink'hulu imtahike Yona mwe isi inyaile, nayo niyo yamtahika.