18 Anie Abasi itie nte afo,

a-adakkake anọ ke idiọọkñkpọ anyʌñ afeen ndudue

mme ñyọhọnsʌhọ udeeme amọ?

Afo uyatta esịd ke nsi-nsi,

ado akop inem aditua mbọm.

1 Nie mbọm mbaña miin, O Abasi,

ke ntak ima mfo ake imiikpuuho;

ke ntak ekamba mbọm mfo

kwokko mme ndudue mmi sio.

2 Yet afịd ukwaññkpọ mmi sio

nyʌñ nam ami nsana ñkpọñ idiọọkñkpọ mmi.

6 Toiyo, Abọọñ, ekamba mbọm ye ima mfo,

sia ammọ ebaaha tọọñọ ke esed.

7 Kuutoiyo mme idiọọkñkpọ uyịn mmi

ye nsọñiwuod mmi;

ke ima mfo ntoiyo miin,

sia afo, Abọọñ, amefọn.

1 Abọọñ, ami mmetua unọ fiin ke isọñ esịd mmi;

2 Abọọñ kop uyio mmi.

Kpañ utọñ nnọ miin

ke ini ami ntuaha ñyem mbọm.

11 Kuuben mbọm mfo uñkpọñ miin, Abọọñ;

yak ima ye akpanikọ mfo añkpeme miin afịd ini.

6 Ke akpanikọ mfọn ye ima mfo eyaeñkeene miin

ke afịd ayio uwem mmi,

ndin ami ñyaadʌñ ke ufọk Abọọñ

ke nsi-nsi.

13 Kpa naña ete anie mbọm abaña nditọ ammọ,

kpa ntoro ke Abọọñ anie mbọm anọ mbon se ibaak anye;

15 Ado enọ ami ibaaha nte adinam idiọọkñkpọ. Sia adieke uwak awo ekekpaññake eto ke awo keed adibiat ewʌhọ, adaña die ke mfọn Abasi ye enọ a-akesañake ye mfọn awo keed, a-adooho Yisọs Krais, akpefiọrọ asịm uwak awo!

15 Nsoo ndin ke ñnyịn idiinam? Ana nte ñnyịn inam idiọọkñkpọ sia ñnyịn imiibaaha ke idak mbed ado iba ke idak mfọn? Nwaaña nsa-o!

4 Ado ke ntak ekamba ima a-anye anieghe inọọ ñnyịn, Abasi a-mbọm amọ akponno, 5 amaanam ñnyịn idu uwem ye Krais akpesʌkado ñnyịn imaikikpañña ke mme ukwañ ñkpọ, ado ato ke mfọn ke ndufo ebọọ adinyaaña.

9 Ado anye amaandọkkọ miin ate, "Mfọn mmi ukem fiin udeeme, sia enam adudu mmi afọn ama ke mmemidem." Ke ntoro, ami ñyaaduaak inua ke idadesịd ñkan naña ñkenanam mbaña mmemidem mmi, nọ ato do adudu Krais andodo miin ke idem.

13 Awo akeedodo a-adịppe idiọọkñkpọ amọ iforoke,

ado awo a-ayaarake idiọọkñkpọ anyʌñ adiañña idem akpọñ ammọ ayaakịt mfọn.

7 Yak mbon ibak ekpọñ usʌñ ammọ,

yak ndiọi awo ekpọñ akikere ammọ.

Yak ammọ ekanna ebịne Abọọñ, ndin anye ayaatua ammọ mbọm,

ye Abasi ñnyịn, sia anye ayaafeen ke afịd esịd.

18 Ado Abọọñ anie udọñ aditua ndufo mbọm;

ke ntoro anye ayaadakka ada itua ndufo mbọm.

Sia Abọọñ ado Abasi akpe unen.

Afọfọn anọ afịd mbon se itie ibet anye!

13 Ado ikaa ikikpeep se ami awuọñọ: ‘Ami ñyem mbọm, idooho uwa.’ Sia ami ñkidiighe adikoot ndinen awo, ado ñkedi adikoot mme anam idiọọkñkpọ."

21 Ndin Pita amaabịne Yisọs akebo, "Abọọñ, akañ ifañ ke ami nnie adifeen nnọọ ayịneka mmi awodeen me ayịneka mmi awonwaan adieke anye andueghe miin? Ana nte ayọhọ akañ itiaba?"

22 Yisọs amaabọọrọ anye ate, "Ami ubo fiin idooho akañ itiaba, ado akañ ata mme duob mme itiaba.*

14 Sia ndufo imaifeen inọ mbon mfen ke ini a-ammọ idueghe ndufo, Ete ndufo ke hefịn ayaanyʌñ afeen inọ ndufo.

31 Ado ke akwa mbọm mfo afo ukusoboke ammọ, ukunyʌññọ ukpọñ ammọ, sia afo ado Abasi mfọn ye mbọm.

5 Eti ñkpọ ayaadi abịne mbon se ido ubọk enọenọ e-enyʌññọ ewuọt ke ntadubọk,

mbon e-enamma ñkpọ ammọ ke unen.

17 Yak mfọn Abọọñ Abasi ñnyịn idodo ñnyịn ke idem;

nam utom se ubọk ñnyịn anam asọọñọ ada inọ ñnyịn,

ii, nam utom se ubọk ñnyịn anam asọọñọ ada.

16 Yak ñnyịn ndin isaña uko-uko ikpere ebekpo mfọn Abasi, nọ ato do ñnyịn ibọ mbọm ye mfọn a-adiinyaaña ñnyịn ke ini nnananyen.

1 Ke ntoro, ami mmikpeiye ndufo, nditọeka ke Krais, ke ntak mbọm Abasi, nte yak enịm idem ndufo nte aduuwem uwa, a-asanake, a-anyʌññọ anem Abasi esịd, anye ami ado nnen-nnen ye eti usʌñ adikpono Abasi.

16 "Sia Abasi akeneenekke ama ederimbod asịn anye akenọ ukweeñe Ayịn keed a-anye anieghe nọ awo akeedodo a-anịmme anye ke akpanikọ akuutak ado anie nsi-nsi uwem.

29 Sia, ke iwuod Krais emainọ ndufo unen, idooho adinịm anye ke akpanikọ ikpọọñ, ado adinyʌñ mbọọ ufen ke ntak amọ,

1 Hesikaiya amaadọñ utom anọ afịd Isrel ye Yuda anyʌñ awet mme ñwedetob anọ Ifrem ye Manase, akoot ammọ edi ke tembịd Abọọñ ke Yeruselem edinam Usọrọ Nsaña Mboiyo enọ Abọọñ, Abasi Isrel. 2 Adidem ye mme adaaha amọ ye afịd esob ke Yeruselem emaenyịmme nọ edia Usọrọ Nsaña Mboiyo ke ayọhọ afiọñ iba. 3 Ammọ ikikanna adikidia usọrọ ami ke ini amọ sia uwak mme aku ikinamma idem ammọ asana ndin mme awo ikisooboke ke Yeruselem. 4 Akikere ado amaatie nte anen anọ adidem ye afịd esob. 5 Ammọ emaenyịmme adinọ etob ke afịd Isrel, tọọñọ ke Beeseba tutu ke Daan, ekoot mme awo nọ edi ke Yeruselem enyʌñ edidia Usọrọ Nsaña Mboiyo enọ Abọọñ, Abasi Isrel. Awo ikisidiaha anye ye uwak awo akeene se ekewet.

6 Ke uyio adidem, mme asuanetob emaesaña ke afịd Isrel ye Yuda ye mme ñwedetob aketooho adidem ye mme adaaha, akewette ntom:

"Mbon Isrel, itịmme ikeene Abọọñ, Abasi Ebraham, Aisik ye Isrel, nọ anye akpetịmme ikeene ndufo e-esʌhọke, e-ekebọkkọke ke ubọk mme ndidem Asiria. 7 Ikiiba nte mme ete ndufo ye emọ-emọ mbon Isrel ndufo, i-imiikinamma akpanikọ ye Abọọñ, Abasi mme eteete ammọ, ke ntoro anye amaanam ammọ edo ñkpọ ndịk, nte ndufo ekịtte. 8 Ikiisọñ aboditọñ, naña mme eteete ndufo ekenam; isuuk idem inọ Abọọñ. Idi ke adisana itie amọ, ake anye amaakenam asana ke nsi-nsi. Inam ñkpọ inọ Abọọñ Abasi ndufo, nọ ato do ikañ-ikañ iyadesịd amọ atịmme ikpọñ ndufo. 9 Adieke ndufo etịmmeke ekeene Abọọñ, mbon e-ekemʌmmọ emọ-emọ mbon Isrel ye nditọ ndufo eyaenie mbọm ebaña ammọ, ndin eyaenyʌñ etịmme enyọñọ edi ke isọñ ami, sia Abọọñ Abasi ndufo a-anie mfọn ye mbọm. Anye idiikannake iso amọ ikpọñ ndufo adieke ndufo etịmmeke ekeene anye."

10 Mme asuanetob emaekaa ke abio ke abio ke Ifrem ye Manase, tutu asịm Sebulọn, ado mme awo emaesak ammọ nsaha enyʌñ enọ ammọ ñyọ. 11 Akpesʌkado akebaaha ntoro, usʌk e-eketooho Asaa, Manase ye Sebulọn emaesuuk idem ammọ enyʌñ ekaa ke Yeruselem. 12 Ñko ubọk Abasi amaatuuk mme awo ke Yuda anyʌñ anọ ammọ esịd keed adinam se adidem ye mme adaaha ammọ ekewuuk, akeene ikọ Abọọñ.

13 Ataa ekamba atu awo emaesoobo ke Yeruselem adinam Usọrọ Uyo ake imiinieghe Yiis ke ayọhọ afiọñ iba. 14 Ammọ emaesịññe mme akpokoro uwa ke Yeruselem enyʌñ ekwọọk mme akpokoro uwa insensi enyʌñ etoomo ammọ edọñ ke Abedeñ Kidrọn.

15 Ammọ emaewot ayịnedọñ uwa Usọrọ Nsaña Mboiyo ke ayọhọ usen duob mme inaañ ke ayọhọ afiọñ iba. Abuud amaamʌm mme aku ye mme Lifai ndin ammọ emaenam idem ammọ asana enyʌñ eben mme ufọfọb uwa edi ke tembịd Abọọñ. 16 Akem ammọ emaedat mme itie se ammọ esidak eda kpa naña ekenịm ke Mbed Moses awo Abasi. Mme aku emaesiime iyiib a-mme Lifai ekeyaaha enọ ammọ ke akpokoro uwa. 17 Sia uwak awo ekebaaha ke atu ikinamma idem ammọ asana, akena nte mme Lifai ewot mme edọñ uwa Usọrọ Nsaña Mboiyo enọ mbon i-imiikisanake inyʌññọ ikan isio edọñ uwa inọ Abọọñ. 18 Akpesʌkado ataa uwak awo e-eketooho Ifrem, Manase, Isaka ye Sebulọn edi ikinamma idem ammọ esana, ado ammọ ekesʌk etata unam Usọrọ Nsaña Mboiyo, a-adooho amaawọññọ akpọñ se ekewet. Ado Hesikaiya amaabọñ akam anọ ammọ, abo, "Yak Abọọñ, a-afọnnọ ido, afeen anọ afịd awo 19 e-enịmme esịd ammọ ke adiyem Abasi, Abọọñ, Abasi mme eteete ammọ; akpesʌkado ake ammọ imiisanake ikikem ke mbed adisana itie." 20 Ndin Abọọñ amaakop anọ Hesikaiya anyʌñ akọk mme awo.

21 Mbon Isrel e-ekebaaha ke Yeruselem emaedia Usọrọ Uyo ake Yiis miisịneke ke usen itiaba ye ekamba idaara, ke ini mme Lifai ye mme aku eketooroke Abọọñ afịd usen ye mme nsọñuyio ñkpọ mbre e-ekeyaaha enọ Abọọñ.

22 Hesikaiya amaatañ ikọ nsọọñọukod anọ anyʌñ akọọm mme Lifai, e-ekewọttọ eti iwuod ke utom Abọọñ. Ke usen itiaba ado ammọ emaedia usọrọ udeeme ndidia ammọ enyʌñ enam uwa ewuana ndidia enyʌñ etooro Abọọñ, Abasi mme eteete ammọ.

23 Afịd esob emaenyịmme ndin adidia usọrọ ke usen itiaba mfen; ntoro ke usen itiaba mfen ammọ emaedia usọrọ ke idaara. 24 Hesikaiya adidem Yuda amaanọ esob ñyaaraenañ tọsịn keed (1,000) ye edọñ ye ebod tọsịn itiaba (7,000), mme adaaha emaenyʌñ enọ ammọ ñyaaraenañ tọsịn keed (1,000) ye edọñ ye ebod tọsịn duob (10,000). Ata uwak mme aku emaenam idem ammọ esana. 25 Afịd esob mbon Yuda emaedaara, ye mme aku ye mme Lifai ye afịd mbon se ikito Isrel idisoobo, ñkọrọ mme isenawo e-eketooho Isrel edi ye mbon e-ekedʌñọke ke Yuda. 26 Idaara amaakpon ke Yeruselem eti-eti, sia tọọñọ ke mme usen Sọlọmọn ayịn Defid, adidem Isrel ñkpọ ntom ikidatta itie ke Yeruselem. 27 Mme aku ye mme Lifai emaeda ediọñ mme awo, Abasi amaanyʌñ akop anọ ammọ, sia akam ammọ amaasịm anyọñ, adisana itie idʌñ amọ.

1 "Adieke awodeen asịnne anwaan amọ

ndin anye akpọñ ebe ado akedọ awodeen mfen,

me awodeen ado akeme aditịmme mbịne anye aba?

Ado nte isọñ ikpibiarake ataa afịd-afịd?

Ado afo amedʌñ nte akpara ye mme uwak mbon ima;

nte afo ayaanyọñ ambịne miin ndin?"

Abọọñ atañ.

2 "Benne anyen se mme anaan abod nyʌñ kịt.

Aba itie se awo imuusappake fiin?

Afo amaatie ke mben usʌñ abet mbon ima,

a-atie ke akpautatan nte ñyooñ akpeme ufene.

Afo amesappa isọñ

ke efịbe ye ibak mfo.

3 Ke ntak ado edịm ideppe,

edịm mbara iduọkkọke.

Kpayeado afo amenana iso abuud nte akpara;

afo ukoppo abuud ndomokeed.

4 Idooho afo añkoot miin idaha ado:

‘Ete mmi, ufan mmi tọọñọ ke uyịn mmi,

5 nte afo ayaasʌk ayat esịd afịd ini?

Ifiobesịd mfo ayaakaa iso ke nsi-nsi?’

Naña afo asitañ ikọ ado ami,

ado afo anam afịd ndiọiñkpọ se afo akakan."

6 Ke ini ukara Adidem Yosaiya, Abọọñ amambo miin, "Afo amekịt se anana mbuọdidem Isrel anam? Anye a-adọọk anyọñ afịd ñkoñ-ñkoñ abod ye ke idak afịd eto e-etarake anyʌñ asịn efịbe do. 7 Ami ñkekere ke anye amaakenam afịd ami, anye ayaanyọñ ambịne miin, ado anye inyọññọ idi, ndin ndudiọ ayịneka amọ Yuda amaakịt ado. 8 Ami mmaanọ ndudiọ Isrel ñwed uwuọndọ ñnyʌñ nsio anye unyọñ ke ntak afịd efịbe amọ. Kpayeado ami mmaakịt ke ndudiọ ayịneka amọ, Yuda, ikikoppo ndịk ndomokeed; anye ñko amaawuọ anyʌñ akesịn efịbe. 9 Sia abʌd-abʌd ido Isrel ikidooho ñkpọ ndomokeed ke iso amọ, anye amaasappa isọñ anyʌñ asịn efịbe ye itiad ye eto. 10 Kpa ye afịd ado, anana mbuọdidem ayịneka amọ awoanwaan, Yuda, ikinyọññọ imbịne miin ke afịd esịd amọ, ado ke abiaña," Abọọñ atañ.

11 Abọọñ amambo miin, "Isrel anana mbuọdidem afọn akan Yuda ndudiọ. 12 Kaa, ke suan etob ami ke adoro:

" ‘Tịmme nyọñ di, Isrel anana mbuọdidem,’ Abọọñ atañ,

‘Ami ndiibọppọ iso aba ye afo,

sia ami ndo anam akpanikọ,’ Abọọñ atañ,

‘Ami ndiiyatta esịd ke nsi-nsi.

13 Kap nyịmme ndudue mfo;

afo amesọñ iwuod ye Abọọñ Abasi mfo,

afo amesuan mme enọ mfo anọ mme isen abasi

ke idak afịd eto e-etuaññake,

unyʌññọ ukop uyio mmi,’ "

Abọọñ atañ.

14 Abọọñ abo, "Nyọñ di, mbon unana mbuọdidem, sia ami ndo ebe ndufo. Ami ñyaimek ndufo, keed ke abio ye iba ke aduuk, ndin iben ndufo ndi Saiyọn. 15 Ndin ami ñyainọ ndufo mme akpemeedọñ a-ami mmekke, se idiidat ndufo usʌñ ke ifiọk ye ikike. 16 Ke mme usen ado, ke ibad ndufo amaanekke awak ke isọñ," Abọọñ atañ, "mbon awo idiibooho aba, ‘Akebe edioomo Abọọñ.’ Anye idiidʌkkọ esịd ammọ aba, ammọ idiinyʌññọ itoiyo; awo idiiyemme anye, awo idiinyʌññọ inam mfen. 17 Ke ini ado ammọ eyaekoot Yeruselem Ebekpo Abọọñ, ndin afịd mme idịd eyaeboho ke Yeruselem adikpono anyịñ Abọọñ. Ammọ idiikeeneke nsọñiwuod esịd ibak ammọ aba. 18 Ke mme usen ado mbon Yuda eyaediana ye mbon Isrel, ndin ke esịd keed ammọ eyaeto isọñ adoro edi isọñ a-ami ñkenọọhọ mme eteete ndufo nte udeeme.

19 "Ami ke idem mmi mmaabo,

" ‘Ami ñyaakop inemesịd adinam ñkpọ ye ndufo nte nditọ mmi

ñnyʌñ inọ ndufo eti isọñ inemesịd,

udeeme se iyaiya ikan ke afịd idịd.’

Ami ñkekere ke ndufo eyaeñkoot miin ‘Ete’

inyʌññọ itre adiñkeene miin.

20 Ado nte awonwaan ammiinamma akpanikọ ye ebe amọ,

kpa ntoro ke afo, Isrel, ambiaña miin,"

Abọọñ abo.

21 Ekop ayịd ke anyọñ mme anaan abod,

ntuaña ye ñkpeubọk mbon Isrel,

sia ammọ enam abʌd-abʌd ido ke usʌñ ammọ

enyʌñ efre Abọọñ Abasi ammọ.

22 "Inyọñ idi, mbon unana mbuọdidem;

ami ñyaakọk mfiakedem ndufo."

"Ii, ñnyịn iyaidi ubịne fiin,

sia afo ado Abọọñ Abasi ñnyịn.

23 Ke akpanikọ mme ndutịme ye uyom

mme akpono ndem ke mme anyọñ ntək abod

ye ke mme ikpọabod edo abiaña;

ke akpanikọ, adinyaaña Isrel

aba ke ubọk Abọọñ Abasi ñnyịn.

24 Tọọñọ ke uyịn ñnyịn mme abasi ndọk e-edia

mbunwịm ubọkutom mme ete ñnyịn,

udịmedọñ ye udịmenañ ammọ,

nditọ ideen ye nditọ ibaan ammọ.

25 Yak ñnyịn isuuk inaa ke abuud ñnyịn,

ndin yak ndọk ñnyịn ifʌk ñnyịn.

Ñnyịn iminam idiọọkñkpọ ye Abọọñ Abasi ñnyịn,

ñnyịn ye mme eteete ñnyịn;

tọọñọ ke uyịn ñnyịn tutu idahami

ñnyịn ikoppo ikọ inọ Abọọñ Abasi ñnyịn."