18 Hoyleinaw kha ngaethyate,

a laehypaw a rho ccungccaw hae

mih cyiseimenaw kha

a ngaethya hae paw,

nang ae lopaw Pachia hummou a um?

A thawccinaw langsakunaw kyakhe

a lungrythua keiccuze

aning tuh zungzae a thinria khyh.

1 Pou Pachia, atynpaw

na sungsahnaw thyhte thaw yn ccitua;

na thawccinaw alepaw liate

ka cyiseimenaw kha

yn thyaasahpya tua.

2 Ka hoyleinaw kha marya yn singpah lah,

ka seinaw kyate yn thyaasah tua.

6 Pou Bawipaw , langmawpi te

na langsaku vae paw

na thawccinaw te atynpaw

na sungsahnaw kha tuathui tua.

7 Ka di lya-e ka seinaw te

ka cyiseimenaw kha liathui nan vae,

Pou Bawipaw , nang tuh na hoy zah,

atynpaw na sungsahnaw liate

kae kha yn ning nan!

1 Pou Bawipaw , akhunaw kyate

nang kha siaruate kae ko.

2 Bawipaw, ka roi beih yn thaepah!

Kae ngianaw roi hynh

beih yn ngaepya tua!

11 Pou Bawipaw , na thawccinaw kha

yn kang nan;

atynpaw na sungsahnaw te

na lungzinaw nynh

zungzae yn khynsah sah.

6 Ka hiin lungkhu balyn

hoynaw te thawccinaw kha

ka ccou cih zah,

Bawipaw inn kya

ka hiinshe balyn ka um cih.

13 Paaw nynh a ccaaw tungvaw

thawccinaw a hoi hawte,

Bawipaw nynh amaw

rawrih hae paw tungvaw

thawccinaw a hoi vae.

15 Thuasalama alakawte muepaw lasung te seinaw tuh lokuh khyh. Pawccecize ccungccaw lu kheit seinaw keiccuze ccungccaw patae tuh a chi hae ze, Pachia thawccinaw te ccungccaw lu kheit athuapaw Jesu Khri thawccinaw liate alakawte muepaw lasung tuh ccungccaw patae hanlan houh alehua.

15 Tuhteze pawtemou? Aening tuh Kawbya zakaw um leite thawccinaw zakaw kya ah um vae oh keiccuze seinaw ah rae cih oh tou? Tuhte thua khyh!

4 Thuasalama ngaethyaumsahnaw te phe beihpaw Pachia nynh aening kha myarya alepaw a sungsahnaw te oun sungsah keiccuze, 5 ah seinaw kya ah chi lya oh khe, Khri ryte pynkheihlan oun hiinsah vae—thawccinaw liate nanning tuh khum na thua vae oh—

9 thuasalama Bawipaw nynh kae kha, "Ka thawccinaw tuh na hanlan azaw; pawccecize ka thungnaw tuh thawzyanaw kyakhe ccingsah athua," yn cipya. Tukeiccuze Khri thungnaw tuh ka tungvaw atyn nawlan, ka thawzyanaw kyakhe lungtuate houh ka pookuh cih.

13 A cyiseimenaw kha a pheipaw tuh

a laan a sui ua lan khyh,

thuasalama a seinaw kha phykuh zah

a vuapaw tuh thawccinaw a mue cih.

7 ccungccaw hoylei hae paw nynh

mih laanpi kha vua hae sah lah,

a ding lei hae paw nynh

mih tuanaw kha vua hae sah;

minmin nynh Bawipaw kalan

naekuh hae sah, tuhteze nynh

minmin kha thaw a ccih cih hae,

ah Pachia kalan maekuh hae sah,

tuhteze nynh seinaw kha marya

a ngaethya cih hae.

18 Thuasalama Bawipaw nynh nanning kha

thawcci khylan phang ae ngaw oh;

nae tungvaw ngaethyaumsahnaw

langsaku khylan aning tuh yn thokuh cih.

Pawccecize Bawipaw tuh

dingnaw Pachia nynh thua;

amaw a ngaehoikupaw balyn tuh

lungtuapaw nynh thua hae.

13 La cceih oh lah, ‘Kae tuh silawkunaw ka ry khyh, ngaethyaumsahnaw nynh ka ry,’ acikuhpaw kha na nythya nawlan oh la ccangkuh oh. Pawccecize kae tuh miding hae ko khylan kae thua khyh, misei hae ko khylan nynh kae thua," a cipya hae.✝

21 Peter nynh Jesu kalan yn cceih zah, "Bawipaw, ka uno lukhakheit nynh ka tungvaw a sei ze, vae hohzeihmou ka ngaethya cih? Vae sari cia tou?" cite a khia.✝ 22 Jesu nynh, "Vae sari cia kyalya thua khyh; vae sung sari leit sari cia na ngaethya cih, kae cipya.✝

14 Nanning nynh ccungccaw hae cyiseinaw kha na ngaethya oh ze vaawlang umpaw nae Paaw nynh mah ae ngaethya cih oh.✝

31 Thuasalama nang tuh thawccih thyapaw te ngaethyaumsah thyapaw Pachia na thua keiccuze myarya lepaw na ngaethyaumsahnaw te mih thangnaw kha na thuasah khyh zah na vua khyh hae.

5 Ming hae kha hysahte

koiisakuh hae zah,

hmerarih lante rya a lahpaw tuh

hoynaw a mue cih.

17 Bawipaw kae Pachia kya-e

maehoynaw tuh kae tungvaw

um sah lah,

kae cyipaw ryalaw tuh kaemaw elang

hoynaw um sah,

Kae kuih nynh rya a lawpaw kya

kae laan kae sui ua vae sah.

16 Tukeiccuze ahoboupaw ccyh kya bawmnaw mue nawlan, ngaethyaumsahnaw te thawccinaw kha ah mue nawlan oh, thawccinaw bawitungkhung kalan khe rawhoyte cceih oh sih.

1 Tukeiccuze uteno hae, Pachia kya-e ngaethyaumsahnaw liate kae ngia ry oh paw tuh, nae pyn kha athyaapaw te Pachia kalan douccahpaw ahiinpaw silawkunawpaw lante pyakuh oh; tuh-e tuh na cyi lan oh paw muisaw te asekuhpaw beiknaw nynh thua.

16 "Pawccecize Pachia nynh laephi hynh eih a sungsah keiccuze a Ccapaw lu kheit kyalyapaw kha oun pya; tukeiccuze amaw a zynpaw miakaw tuh chih vae lan khyh zah zungzae hiinnaw a hoi cih.

29 Pawccecize Khri zyn lanpaw kyalya thua leite, Khri hanlan teingbia lanpaw kha mah aning nynh ae pyabia oh,

1 Bawipaw , Israel Pachia hanlan kawtaw poi tua khylan Jerusalem umpaw Bawipaw inn kalan oun ccia ccaw hae cite Hezekiah nynh Israel ram te Judah ram kalan ccungccaw saw hae zah Efraim phin te Manasseh phin hae kalan mah ccaw a ky hae. 2 Pawccecize siapharan te a kuihkaw e bawi hae te Jerusalem kya a pumkuh hae paw balyn nynh kawtaw poi tuh sawpaw sah ningnaw kya tua lante bya a pae vae hae, 3 (pawccecize ranpibawi hae tuh milu phe zaw lan thyaasakuh loh khyh hae zah ccungccaw hae mah Jerusalem kya a pumku loh khyh hae keiccuze tuh-e poi tuh amaw accyh kya tua kho khyh hae).✝ 4 Siapharan te a pumkuh hae paw balyn nynh tuh-e khuakhannaw tuh akyh cite a tua hae. 5 Tukeiccuze Israel ram pynpi, Beersheba kyate Dan kyacia um hae paw ccungccaw hae tuh Bawipaw , Israel Pachia kalan Jerusalem kya thuate kawtaw poi tua khylan thaesah lan kaw a tho hae; pawccecize phungbya kya azeiku thyhte ccungccaw patae te poi tua khyh hae. 6 Tukeiccuze ccaw phutu hae tuh siapharan te a kuihkaw e a bawi hae kya-e ccaw kha phute Israel te Judah ram pynpi kalan khe siapharan nynh kaw a pya hae thyhte a cceih hae, tuh-e ccaw kyatuin, "Pou Israel ccungccaw hae, Abraham, Isak te Israel Pachia, Bawipaw kalan kithui oh lah, Assiria siapharan hae kuih kyate a lue hae paw nanning a laehy hae paw kalan khe aning tuh bua yn maekuh cih. 7 Nae minpaaw hae Bawipaw Pachia tungvaw lungzinaw hoi lei hae paw nae minpaaw hae te nae puizia hae te lokuh nan oh, na muih oh hawte aning nynh minmin kha thawte de a tah hae. 8 Nae minpaaw hae hawte nae lungkhung nan sah, Bawipaw kalan pyakuh oh, zungzae a thyaasahpaw a beikinnthyaa kalan oun cceih oh, te myarya lepaw a thinrianaw tuh nae kyate a maeku nawlan, Bawipaw nae Pachia rya kha lah oh. 9 Pawccecize Bawipaw kalan na kithui oh zetuh nae puizia hae te nae ccaaw hae tuh a kyngtu hae kya ngaethyaumsahnaw a mue cih hae zah, e ram lang oun ki cih hae. Pawccecize Bawipaw nae Pachia tuh ngaethyaumsah thyapaw te thawccih thyapaw thua zah, amaw kalan na kithui oh ze a mae kha ccanglang ae hawitaw lan khyh oh," a ci.

10 Tukeiccuze ccaw phutu hae tuh Efraim te Manasseh ram po lekuh lan Zebulun ram cia khua kheit koute khua kheit a cceih hae; thuasalama minmin nynh nuinse hae zah a sarya hae. 11 Asher phin, Manasseh phin te Zebulun phin kya-e ccungccaw beihtaraw kyalya nynh zakawsangsakuh hae zah Jerusalem lang a cceih hae. 12 Bawipaw bya thyhte siapharan te a kuihkaw e bawi hae nynh kaw a pya hae paw kha cyi khylan lungngingnaw thinlung pya khylan Judah hae kya Pachia thungnaw a um.

13 Sawpaw sah ningnaw khe ransi phingkuh leipaw sanlou poi kha tua khylan ccungccaw patae tuh Jerusalem kya oun thua hae zah, a pumkuh hae paw tuh myarya alung hae. 14 Minmin nynh rya kha tho hae zah Jerusalem kya a umpaw silawhang hae kha a nue hae, mynkhuhpaw unawpaw silawhang balyn kha lah hae zah Kidron Vaw kalan a vua hae. 15 Sawpaw sah ningnaw nin haw lae pali nin khe kawtaw poi tuutaw kha a chia hae. Ranpibawi hae te Levi phin hae tuh mih maethah zah mimaw toulou kha thyaasakuh hae zah maee-ute silawnaw kha Bawipaw inn lungkhu lang a teekhae hae. 16 Pachia ccungccapaw Moses kawbya thyhte minmin nynh mih ummaenaw hmin kya a um hae; ranpibawi hae nynh Levi phin hae kuih kya-e a lawku hae paw chiise kha a hei hae. 17 Pawccecize a pumkuh hae paw kyakhe a thyaasakuh lei hae paw patae a um hae; tukeiccuze a thyaa leipaw miakaw kha Bawipaw hanlan thyaasah nawlan kawtaw poi tuutaw kha Levi phin hae nynh a chia hae. 18 Pawccecize Efraim phin, Manasseh phin, Issakhar phin te Zebulun phin kya-e ccungccaw patae tuh phungbya kya azeiku thyhte mimaw kha thyaasaku leite kawtaw poi kya a aebua hae. Thuasalama Hezekiah nynh minmin hanlan sawsang zah, 19 "Pachia, Bawipaw mih minpaaw hae Pachia kha mih thinlung ccaccing te ccung lan a paccynkuh hae paw tuh beikinnthyaa kya-e thyaasahkunaw phung thyhte a thyaa khyh hae zemah ahoypaw Bawipaw nynh mih balynte ngaethya vae hae sah," a ci. 20 Bawipaw nynh Hezekiah kha thaepah zah ccungccaw hae kha a dansah hae. 21 Jerusalem kya um hae paw Israel hae nynh ransi phing leipaw sanlou poi kha nin sari lungkhu myarya lungpawte a tua hae; Levi phin hae te ranpibawi hae nynh Bawipaw hanlan khuakupaw accaepaw uccaw hae kha khuakute Bawipaw kha nin takyh the a hoysah hae. 22 Bawipaw ryalawnaw kya mih thyanaw ahoypaw a langsah hae paw Levi phin hae balyn kha Hezekiah nynh thawpyanaw bya a hopya hae. Tuhcite ccungccaw hae nynh poi kya-e looh kha nin sari lungkhu ae hae zah, Bawipaw mih minpaaw hae Pachia kalan khe ccawkunaw silawnaw kha raete the a hoysah hae.

23 Te a pumkuh hae paw balyn nynh poi kha nin sari bua tuachih lan mih nawccaw; tukeiccuze lungtuanaw te nin sari poi a tua ung hae. 24 Pawccecize Judah siapharan Hezekiah nynh tangnuapaw thong kheit te tuu thong sari kha silawnaw rae nawlan a pya hae, te bawi hae nynh a pumkuh hae paw kha tangnuapaw thong kheit te tuu thong haw a pya hae. Ranpibawi hae patae nynh mimaw te mimaw kha a thyaasaku hae. 25 Ranpibawi hae te Levi phin hae ryte Judah hae a pumkuh hae paw balyn, te Israel ram kyate oun thua hae paw a pumkuh hae paw balyn, Israel ram kyate oun thua hae paw ramccang hae, Judah ram kya um hae paw ramccang hae balyn tuh mih lungpaw. 26 Israel siapharan David ccapaw Solomon she koute Jerusalem kya hynhcihawpaw a um vae khyh keiccuze Jerusalem kya myarya lepaw lungpawnaw a um. 27 Te ranpibawi hae te Levi phin hae nynh thadyn hae zah ccungccaw hae kha hythuanaw pya hae zah mih roi thae athua; mih sawsangnaw tuh vaawlang khua e a umnaw hmin thyaapaw kya a thua.

1 Pisepaw nynh a zu kha a mya keiccuze,

a zu tuh a vawpaw kyate pou zah,

milae zu lang a tang vae ze,

tuh-e pisepaw nynh tuh-e nopinung kha

zu lang bua a umkhae ung cih tou?

Tuhcihawpaw ram tuh

myaryamaw nungsikuh lan khyh tou?

Nang tuh na rykuh oh paw patae te

na ohhuakuh vae;

te ka kalan nae ki ung cih tou?

cite Bawipaw nynh a ci.

2 Ahangnaw hmin hae khuh

dothung tua lah, muihtua!

Na ikhae leipaw hmin a um zawtou?

Ramkaw e Arab hae hawte,

laanpi pe khe

na rykuh oh paw kha na ngaw hae.

Na ohhuakunaw te na hoyleinaw khate

ram kha na thusah vae.

3 Tukeiccuze khuaakan zah,

hawkhuaa mah rah vae khyh;

tuhzemah na terui tuh

ohhuanung terui hawte thua zah,

maethya na nyh khyh.

4 Atu hynhte nang nynh kae kha,

"Apang, nang tuh ka ngawphue lya mawte

ka banpaw nynh na thua—

5 Pachia tuh zungzae a thinria cih zawtou?

Athangnaw cia a thinria cih zawtou?" nae ci.

E hynh na ho vae paw nynh thua,

thuasalama hoyleinaw balyn kha

na rae kho thyhte na rae vae.

6 Josiah Siapharan she lyaze Bawipaw nynh kae yn hopyapaw tuh: A lungzi leipaw Israel nynh pawtemou a cyi cipaw na muih vae tou? Ahangpaw mua miakaw kalan kaethungte ohhuakuh zah, hinlalyhpaw thingku kaw miakaw kya a ohhuaku.✝ 7 "E hae balyn hynh a cyih koute ka kalan yn kithui cih," cite ka la tua; thuasalama ka kalan yn kithui khyh; tuh-e tuh a lungzi leinung a neitawnung Judah nynh phe a muih. 8 A lungzi leipaw Israel nynh milae vawpaw kya a seinaw balyn keiccuze myanawpaw ccaw ryte ka cciasahpaw kha Judah nynh phe a muih; tuhzemah a lungzi leinung a neitawnung Judah tuh ri leite cceih zah a ohhuakuh bua. 9 A ohhuakunaw kha huatawpaw lang a ria keiccuze lung te thing ryte ohhuakute ram kha a thusah. 10 E hae balyn koute mah a lungzi leinung a neitawnung Judah tuh a thinlung balyn te ka kalan ki leite, cyisakunynte nynh yn ki, cite Bawipaw nynh a ci.

11 Te Bawipaw nynh kae yn hopyapaw tuh: A lungzi leipaw Israel nynh a seinung Judah laeze a seinaw azya huanaw kha a langsaku. 12 Cceih lah, e bya hynh thahlang khe la siakhae:

Pou a lungzi leipaw Israel, yn kithui,

cite Bawipaw nynh a ci.

Nang kha thinriate kae do vae lan khyh,

pawccecize kae tuh

thawccinaw a hoipaw nynh ka thua;

zungzae ka thinria lan khyh,

cite Bawipaw nynh a ci.

13 Bawipaw na Pachia kha na doupaw

na seinaw kha thuasah,

hinlalyhpaw thingku kaw miakaw khe

ramccang pachia hae kha

na sungsah hae zah,

ka bya na zui leinaw kyalya kha

thuasah phyku tua,

cite Bawipaw nynh a ci.

14 Pou mih lungzi leipaw ccaaw hae,

oun kithui oh,

cite Bawipaw nynh a ci,

pawccecize kae tuh

nae bawi nynh ka thua;

khua khuakheit kyate lu kheit,

innbyn byn kheit kyate

lu ning kae ko cih oh zah,

Zion lang kae cciakhae cih oh.

15 Ka lungry yn tungpaw tuurin hae kha kae nungpah cih oh zah, minmin nynh hawnaw te nythyanaw khate ae ccangpah cih oh. 16 Te ram lungkhu kya na pungzae oh zah he na lungthung oh tetuh, minmin nynh Bawipaw kya-e byakin thingkua kong kha ho vae lan khyh hae. Tuh-e thingkua kha mih thinlung kya um vae lan khyh, liathui leite a ning vae cih hae; ccangpaw kha mah rae vae lan khyh hae, cite Bawipaw nynh a ci. 17 Tuin ccyh vae tuh Jerusalem kha Bawipaw bawitungkhung cite a ko cih hae, minphuin balyn tuh Jerusalem kya Bawipaw malang khe a sueluakuh cih hae zah, ahoy leipaw mimaw rynaw kha lungkhungte zui vae lan khyh hae. 18 Tuin nin vae tuh Judah phin hae te Israel phin hae tuh a pykuh cih hae zah, thahlang ram kyate nae minpaaw hae kalan rho lang ka pya hae paw ram langkhe a cceihkheih cih hae.

19 Nang kha ka ccaaw hae laku kya

pawtemou kae nung cih cipaw te

ram hoypaw, ram balyn kyaze

apuithya huaccepaw rho kha

pawtemou kae pya cih cipaw kha ka tua.

Te nang nynh kae kha,

Apang cite nae ko cih zah,

kae nae zuinaw kyate ccanglang

na cceihsei lan khyh cite ka tua.

20 Thuasalama, pou Israel phin hae,

a lungzi leipaw zu nynh

a vawpaw kha a cciataw hawte,

nanning tuh ka tungvaw nae lungzi vae khyh,

cite Bawipaw nynh a ci.

21 Israel ccaaw hae nynh

ahangnaw hmin vawlan

ngaethyate a raw hae paw

roi kha thae athua vae,

pawccecize mih laanpi kha

zuisei hae zah,

Bawipaw mih Pachia kha

a ning vae hae:

22 Pou mih lungzi leipaw ccaaw hae,

oun kithui oh,

nae lungzi leinaw kha

kae dansah cih oh.

"Kaening nynh na kalan

kae cceih vae;

pawccecize nang tuh

Bawipaw kae Pachia nynh na thua.

23 Thanccingte sangpyng hae te

mua hae vawlan khe

hoysah huatawte siarisiarae um tuh

accakaepaw nynh thua.

Thanccingte Israel khumnaw tuh

Bawipaw ah Pachia kya nynh a um.

24 "Ah minpaaw hae nynh a la bangnuathe hae paw mih tuuphu hae te mih vaetua phu hae, mih ccapaw hae te mih ccanung hae kha maethya lan umpaw uccaw nynh aening ah ngawphue lya oh mawte phe a ae kou vae hae. 25 Maethyate ih oh sih lah, ah thethyanaw nynh aening kha oun bong sah; pawccecize aening te ah minpaaw hae nynh aening ah ngawphue lya oh te atunin cia Bawipaw ah Pachia tungvaw ah sei vae oh; Bawipaw ah Pachia bya kha ah zui khyh oh," na ci oh.