1 Ka hiinnaw nynh a sungsahpaw kha

khuazi kya ikhung vawlan khe ka ccung;

amaw kha ka ccung zemah

ka muih khyh; ka ko zemah

yn oi khyh.

2 "Atu ka thokuh cih zah

khuapi lungkhu laanpi hae kya te

laanpi atungkunaw hae kya

ka khiakuh cih;

ka hiinnaw nynh a sungsahpaw kha

ka ccung cih," ka ci zah,

amaw kha ka ccung zemah ka muih khyh.

3 Rhawviatu hae nynh

khuapi lungkhu a khiaku lya hae khe,

kae kha he yn muih hae tuh,

"Ka hiinnaw nynh a sungsahpaw kha

na muih oh tou?" cite ka khia hae.

4 Minmin kha ccapyhtari he ka lawe hae te,

ka hiinnaw nynh a sungsahpaw kha ka muih.

Ka nung nynh kae yn saahnaw khaan,

ka nung inn lungkhu lang

ka teekhae mawlaezung,

amaw kha cciasah leite phang ka kyng.

5 Pou Jerusalem ccanung hae,

ka sungsahnung tuh

amaw tho lan a tho mawlaezung

na tho khyh nawlan oh,

sazuh hae khyhze sazaw hae min phyate

bya kae taw oh!

6 Kungku hae kya-e

mynkhuhpaw pungda hae ryte,

mura te frankinsen zimuin khate

amynkhuh khaekuhpaw,

akhuhthungpaw maeekhuh hawte,

ramkaw kyate yn poupaw tuh

hummou athua?

7 Dotua oh, Solomon a ikhung khuh!

A pepan khe Israel kyaze

athawsaepaw pise,

pise athawsaepaw sung taruh a um hae,

8 tuh-e hae balyn tuh

thaloi ccyngkute,

rhawtuk a thya hae paw nynh thua,

khuazi vae ze thinphang

a um keiccuze, mih phae kyakhe

thaloi ccarou a saekuh hae.

9 Solomon Siapharan nynh

Lebanon thing khate

puihbiakunawpaw ikhung kha a raeku.

10 Tuh-e ikhung atung kha

ngun te rae zah, akawlan kha

sui te a ccaan, haungnawpaw kha

sephaphuhpaw te a rae;

a lungkhu kha sungsakunaw te

a ccaan hae.

Jerusalem ccanung hae,

11 yn pou oh.

Pou Zion ccanung hae,

a zudy poi nin kya,

a lungpaw nin khe,

a nung nynh a khungsahpaw

bawilukhung a khungkuhpaw

Solomon Siapharan khuh dotua oh.