1 Ka ccianung, ka hawkunung,

ka khokhu lang ka cceih;

ka mura kha mynkhuhpaw te ka sueluaku,

ka khoibaw te khoitui kha ka aede,

ka misutui te mateitui kha ka niade.

Ka ban hae, ae oh, neih oh lah,

sungsakunaw khate phe byn oh.

2 Ka ih salamah ka thinlung tuh

ngaw kho khyh.

Ngaetua! Ka sungsahpaw nynh

thuakaw khua zah,

"Ka ccianung, ka sungsahnung,

ka vahu, ka kya-e phe a ccingnung,

thuakaw yn hungpah;

pawccecize ka lu tuh dangtui te acia,

ka sangtung tuh khuazi accahpaw

dangtui keiccuze acia," a ci.

3 Ka boeining kha ka khahku;

pawccemou boeining kha

bua ka lawkuh kho ung cih?

Ka ccu phe ka singku vae;

pawccemou bua ka thusakuh ry ung cih?

4 Ka sungsahpaw nynh a kuih kha

thuakaw lungkhu lang

a pu keiccuze ka lungkhu te ka ry.

5 Ka sungsahpaw kha thuakaw

hungpya lan he ka thokuh tuh,

ka kuih kyate mura chitui accaw,

ka kuih kyate muratui tuh

thuakaccong vawlan khe accaw.

6 Ka sungsahpaw kha

thuakaw ka hungpya,

thuasalama ka sungsahpaw tuh

maekuh zah phe la cceih vae.

Aning nynh bya he a ho tuh

ka thawzung phe yn tingsah.

Amaw kha ka ccung zahmah

ka muih vae khyh;

ka ko zahmah yn oi vae khyh.

7 Khuapi lungkhu a khiakuh hae paw

rhawviatu hae nynh yn muih hae;

yn zia hae zah vaemaw yn muesah hae,

khualungrua kya rhawviatu hae nynh

ka mae bongkupaw kha

ccaring yn lawpya hae.

8 Pou Jerusalem ccanung hae,

ka sungsahpaw kha na muih oh ze,

Ka sungsah keiccuze ka thawzya,

a ci cite na la hopya nawlan oh

bya kae taw oh.

9 Pou nopi balyn laeze

a puithya huanung,

na sungsahpaw tuh sungsahpaw

mingccangpaw laeze pawmou alaehua?

Tuhcite kaening byatawsya lan ciate

na sungsahpaw tuh sungsahpaw

mingccangpaw laeze pawmou alaehua?

10 Ka sungsahpaw tuh a pynrua

hoy zah a ngesaw raw,

ccungccaw thong haw laku kya

a langkuh hua.

11 A lu tuh sui ccipaw te nynh aloku;

a sangtung tuh khekuh zah,

va-aw hawte aman.

12 A mit tuh tuidy pe to zah

mateitui te a singkuhpaw

vahu te nynh aloku.

13 A byaki tuh amynkhuh zah

mynkhuhpaw a pousahpaw

khokhu te nynh aloku.

A mung tuh muratui abyasahpaw

lili paw te nynh aloku.

14 A kuih tuh sui te raekuhpaw,

aphutepaw lung te

ccaankuhpaw te nynh aloku;

A pyn tuh nilar lung te ccaankuhpaw

saepanua hawte nynh thua.

15 A ccu tuh sui ccusy vawlan bingkuhpaw

aphutepaw lung te nynh aloku.

A muinsan tuh Lebanon mua te lokuh zah

sidar thing hoypaw te nynh aloku.

16 A byaho tuh myaryamaw e zah

aning tuh abalyn mawte

ry lan umpaw nynh thua.

Jerusalem ccanung hae,

e paw tuh ka sungsahpaw te

ka banpaw nynh thua.