1 Pou siapharan ccanung,

phanah nawkuhpaw na ccu tuh

pawcih baban mou angaeku!

Na phae tuh a kuihhae hoypaw nynh

a raepaw aphutepaw lung te nynh aloku.

2 Na laerui tuh misutui thenawpaw,

tyty abeihpaw pakekhupaw te nynh aloku.

Na vue tuh lili paw hae nynh

a koihlu hae paw

chanvuih apumkuhpaw te nynh aloku.

3 Na matei ccangning tuh a phei hae paw

sazuh taw hae sa ning te nynh aloku hae.

4 Na nging tuh saepanua te

ccaankuhpaw rhawviainn te nynh aloku.

Na mit tuh Heshbon khua e

Bathrabbim koikua pe umpaw

tuili te nynh aloku. Na naduh tuh

Damaskas lang a hawipaw

Lebanon rhawviainn te nynh aloku.

5 Na lu tuh Karmel mua te lokuh zah,

na sangtung tuh

sephaphuhpaw te nynh aloku;

siapharan thinlung tuh akhekuhpaw

sang khate kyng kho athua.

6 Pou ka sungsahnung,

ry lan umpaw liaccanung,

pawcih baban mou na puithya zah

ry lan na um!

7 Na pynrua tuh ungcci ku hawte aly,

na matei hae tuh ungcci ku ange kya-e

athae hae te nynh aloku.

8 Ungcci ku kya ka kae cih zah

a karan hae kha ka kyng cih, ka ci.

Na matei hae tuh misu nge kya-e

athae te lokuh hae zah,

amynkhuhpaw na hysue tuh

epal myn te nynh aloku,

9 nae myng vae ze,

mung te haw vawlan

nawpalya lan aluibungpaw

misutui ahoy huaccepaw te nynh aloku.

10 Kae tuh ka sungsahpaw kya-e ka thua zah,

a lungrynaw tuh ka hanlan nynh thua.

11 Ka sungsahpaw, yn cciatua,

khua taraw lang cceih sih lah,

khua taraw hae kyakhe

umkheih hin sih;

12 misu ku atoih vae tou,

misu paw apaw vae tou cipaw te

ccalee paw apaw vae tou cipaw

muih khylan awkhua takaw te

misu khokhu lang cceih sih.

Tuin kyakhe kae sungsahnaw kha

nang kae pya cih.

13 Mandarek tuh amynkhuh,

Pou ka sungsahpaw, ah thuakaw pe khe

ahoypaw thingthae phuin

aryn athaw balyn kha

na hanlan kae nungpya vae.