28 Pagakapeta genago, Ayesu pbhakahimanya kubhee ajomwile kupangana mahengo gabhe ili Majandiko ga Annoongo gakweele, akalobhola, "Ndekola nyoota."

29 Penapo pakibha na bakuuli lilitwelile divai jakunjunjulukana. Bahi bhakachubhika lidodoki mu divai jakunjunjulukana, bhakaahibheka mu nkongo gwa hisopo, bhakammekela pakang’wa. 30 Ayesu pabhakajipaa jenejo divai ja kunjunjuluka, Ayesu akalobhola, "Lihengo litekujomoka!"

Ngapena akakotima mutwe gwabhe, akajomoka.

23 Manyemba pabhakajomola kwaabhamba panchalaba Ayesu, bhakahitolanga ngobho yabhenji bhakahibhekanga mu malubhalo ncheche, kila linyemba na lilubhalo lyakwe. Hela hela bhakatolanga ngobho jabhe jangatotwa na ngobho jijikatotwa kubhokela nnani mpaka pahi. 24 Manyemba gakalobholelana, "Tukotokujipapula ila kujitendelele gudugudu jibhee tumanye ganiki jwaapakujipata." Chikubho hecho chikatendeka ili gakweele genigala Majandiko gagaakalobhola,

"Bhakagabhananga hiwalo yangu,

na ngobho yangu bhakaityendelela gudugudu."

Bahi, henela nga chibhakatenda manyemba bhenabho.

25 Muda gonogwe kubhandikila na nchalaba gwa Ayesu bhakibha bhajemitinge, Amalia, anyongo jwabhe, Amalia alombo jwa anyongo bhabhe jwakibha hanu jwa Akilopa na Amalia bha ku Magidala. 26 Ayesu paakaabhona anyongo jwabhe penipala, na jwaajigana jwabhe jwakaapala muno ajemite penipala, akalobholela anyongo jwabhe, "Anyongo, nnole jonojwe nga mwana jwinu."

27 Ngapena, Ayesu akaalobholela jonijola jwaajigana, "Jonojwe nga anyongo bhinu." Na kubhokela penapo jwaachijigana akaatola Amalia, atame nabho mu nyuumba jakwe.

33 Pabhakaikanga papakemitwa, "Lingambwa lya mutwe," penapo nga pabhakaabhamba Ayesu pamo na bhenabho na bhenabho akaabhou, bhangi upande gwa kunnelo na bhangi upande gwa kunchiji. 34 Ayesu bhakalobhola, "Hatati, mwachamee, kwa kubhehe ngamanyanga chibhatendanga." Ngapena bhakabhabhananga ngobho yabhe kwa kuhagula kwa gudugudu. 35 Bhandu bhakibhanga bhajemitinge penipala bhabhi kulolangana. Na bhena akaakolo bha Bhayahudi bhakaatendela mbenje bhabhi kulobhola, "Bhatekwaaokoa bhangi, nangocheni bhachiokoe bhene, handa bhenabho nga Akilisito, bhabhaagulikwe na Annoongo." 36 Na manyemba bhakaatendelanga kabhele mbeenje, bhakaapekeha chiki, 37 bhenaangota bhakaalobholela "Handa kweli mwenga nga Akolo bha Bhayahudi, nchiokoe mwabhene." 38 Nnani ja nchalaba gwabhe pakibha na chibao chichikajandikwa malobhe haga, "Habha bha akolo bha Bhayahudi." Majandiko haga gakibha bhatekujandikwa kwa chilongelo cha Chiyunani, na Chilatini na Chiebulania. 39 Jumo jwa bhenibhala akaabhou bhabhakabhambwa pamichalaba jitatu pamo na Ayesu, bhakaaponja bhakalobhola, "Mwenga nga kweli Akilichito? Nchiokoe mwa bhene na twenga." 40 Nambo bhenibhala abhou jongi bhakaakelebhua ajabhe bhakalobhola, "Bholi, mwenga ngaajogopa hopo Annoongo, na kwa kubhee twenga tutekubhambwa handa bhenabho? 41 Mwe na nenga tupalikwa kupata hukumu jenjeni, kwa kubhee twapokela malepo kubhokana na hikubho yitu, nambo habha amundu bhangatenda choha chela chibhou." 42 Ngapena bhenibhala abhou bhakalobholela Ayesu, "Mwee Ayesu, ngombokele chimpakujingila mu ukolo gwinu." 43 Ayesu bhakaajangula, "Nannnobholela kweli, lele nupe mpakubhee pamo na nenga kunani kulihunde."

33 Pajikahika saa sita muhi chilambo choa chikawekelwa na lubhendu kwa muda gwa masaa gatatu. 34 Pajikahika saa tisa Ayesu bhakaguta kwa lilobhe likolongwa, bhakalobhola, "Aeloi, Aeloi, lema sabakatani?" Maana gakwe, "Annoongo bhangu, Annoongo bhangu, mboni ntekunneka?"

51 Penapo lipanjia lya Nyuumba ja Annoongo likapapuka hipande hibhele, kubhoka panani mpaka pahi, chilambo chikalendemela, 52 makabuli gakajogoka na bhandu bhajingi bha Annoongo bhabhakajomokanga bhakayokanga, 53 na bhenaangota bhakabhokanga mumakabuli, na baada ja Ayesu kuyoka bhakajingilanga, mu hilambo ya chwapi na kubhonekana kwa bhandu bhajingi.

54 Bahi, jonijola linyemba akolo na bhenibhala bhabhakibha pamo na bhena kwaalendelea Ayesu akabhona kulendemela na yeniyela hikubho hiikabhokela, bhakajogopanga muno, bhakalobholanga, "Kweli hojo mundu akibha Amwana bha Annoongo."

13 Jwakwa mundu jwaabhile na upaliho nkolongwa kupeta upaliho gwa mundu jwaagubhoa umomi gwabhe ligongo lya akaaganja bhabhe.

16 Ligongo helyo, Annoongo akaapalanga muno bhandu bha chilambo choa henela akammoa Mwana jwabhe jwa jikajabhe, ili kila mundu jwanhobhalela, bhabhee na umomi kwa machobha goa gwangapela.

10 Patukibha tangu akaapwati bha Annoongo, Annoongo akatutenda tukamulane mabhoko na jono kwa malilo ga mwana jwabhe, na patupakujomola kukamulana mabhoko na jono apakutuokoa kwa ndela ja umomi gwabhe.

9 kwa kubhee tuhimanyi kubhee Akilisito atekuyoka na ngajomoka kabhele, malilo ngabhee kabhele na mamulaka nnani jabhe. 10 Akilisito akajomoka gunakamo tu, akagapeta machili ga mabohu, na kutama kwabhe atendakwabhajila Annoongo.

3 Ngahimanyanga kubhee twenga twabhoa tutekubatichwa mu Akilisito Ayesu, tukabatichwanga na kulondanika na kujomoka kwabhe. 4 Patukabatichwa tukalondanika na kujomoka kwabhe, tukachikwa pamo na bhenabho, ili handa henela Akilisito pabhakayokekwa kwa machili ga ukolo gwa Atati, twenga kabhele tukombole kutama mu umomi guyono.

22 "Bhandu bha ku Isilaeli, nnyoanikiange malobhe gangani! Ayesu bha ku Nazaleti akibha mundu yakubhehe mamulaka gabhe ga chinnoongo gakalangikwa kwinunji kwa kutenda yakangachika, hikangachiko na hilolelo Annoongo hibhakatenda pakati jinunji kwa ndela jabhe, handa chimmanyanga. 23 Kulongana na ndela jabhe Annoongo bhene akakulumikia kubhee mwangota mwakamule Ayesu na mwangota nkankoma na kunkamua kwa bhandu bhangali mmbone bhaabhambe panchalaba. 24 Nambo Annoongo akaayoha, akahokoa kubhoka mu hibhini ya malilo kwakubhee hikakombolikehopo malilo gaatabhe.

11 Nenga nianchungaji bhammbone. Anchungaji bhammbone kubhoa umomi gwabhe ligongo lya ngondolo yabhe.

26 Kwa kubhee kila panlyenganga nkate gongoni na kung’wela mu chikombe heche, ntandangakwaalobholelanga bhandu kubhee Akilisito akajomoka ligongo linu, mpaka penipala pabhapakuhika kabhele.