1 Machobha genago Asauli atekapunda kwajogoanga na hijoo hijingi ya kwaakoma kwa bhenibhala bhabhankagula Hangwana. Akajaula kwa Akung'i Akolo, 2 akajopa bhapekehe bhalua jakumanyikana ja nyuumba ja kongonilanga Bhayahudi konikola ku chilambo cha Damasiko, kubhee handa akoolile konokwe akanalome au akaikege bhenibhala bhabhakagula Ngani Jammbone ja Hangwana, aakamukalange na kwaletanga ku Yelusalemu.

3 Nambo pabhakibhanga nndela kubhandikila kuika ku chilambo cha Damasiko, gunakamo njai kubhoka kunani kwa Annoongo jikaamulikila kohakoha. 4 Akagwee pahi na akajoa lilobhe, "Asauli, Asauli! Kwaniki ntendakunagia?"

5 Asauli akakonya, "Mwe nga aganiki Hangwana?"

Na lyenilela lilobhe likajangula, "Nenga na Ayesu yakubhehe mwenga ntendakunanigia. 6 Nambo nnyeme nangocheni, nnyingile pannyini na konokwe mpakulobholelwa gagapalikwa kutenda."

7 Bhenibhala bhandu bhabhakibhanga ulendo gumo na Asauli bhakajemanga penipala bhakibhanga bhanga chakulongela, bhakajoanga lyenilela lilobhe nambo bhangaammona mundu. 8 Asauli akajimuka, na kuunukula miho gabhe jwangakombola kulola chilebhe choha chela, henela bhenibhala bhandu bhakaatandaa kwa kwakamula lubhoko mpaka ku nnyini ku chilambo cha Damasiko. 9 Asauli akatama machobha gatatu, na muda goha akibha ngalola choachela, muda hogwe jwangalyehe wala kung'wehe chohachela.

10 Bahi, konokwe kuchilambo cha Damasiko kukibha na mundu jumo jwankagula Hangwana lihina lyabhe Aanania. Hangwana akaalobholela mu kuhagamila, "Aanania!"

Aanania akajeketa, "Mile pambani, Hangwana." 11 Hela hel Hangwana akaalobholela, "Nchibheke maha nnyaule ku ndela jijikemwa ndela Jijigolwike, na mu nyuumba ja Ayuda mwatole mundu jumo kubhoka ku Taliso akemwa Asauli, nangocheni abhi kwakotimila Annoongo. 12 mu agamii abhonite mundu jwakemitwa Aanania abhikujingila nkati na kwabhekela mabhoko ili alole kabhele."

13 Nambo Aanania akajangula, "Hangwana, ndekujoa ngani ja mundu hojo kubhoka kwa bhandu bhajingi, ndekujoha ngani ja mabohu gabhatendilinge bhandu bhinu konokwe ku Yelusalemu.

14 Atekuika pambani abhi na mamulaka kubhoka kwa Akakung'i Akolo kwakamulanga kwa machili bhoha bhabhajopanga kwa lihina linu."

15 Nambo Hangwana akaalobholela, "Nnyaule tu, kwa kubhee ndekwaagula abhe antumichi jwangu, atangachache lihina lyangu kwa bhandu bhoha na bhenibhala akaakolo bhabhenji na kwa bhandu bha ku Isilaeli. 16 Nenga namwene mbakunnangiha gajingi gagapakwaatenda alage ligongo lya lihina lyangu."

17 Bahi, Anania akajenda, akajingila mu jenijela nyuumba. Ngapena akaabhekela mabhoko Asauli, akajangula, "Apwanga Asauli, Hangwana yakubhehe nga Ayesu bhene jwakammokela pammile nndela kuika pambani, atekunduma ili nkombole kulola kabhele na kulongolelwa na Mboomo ja Annoongo." 18 Kachoko hilebhe handa magagabhu hikagwehe kubhoka mmiho mwa Asauli, akakombola kulola kabhele, akajema na akabatichwa. 19 Pabhakalyee chakulya, machili gabhe gakaabhujila.

Asauli akatama machobha kachoko pamo na bhandu bhabhahobhalela Akilisito konokwe kuchilambo cha Damasiko. 20 Popopo akajemeka kutangacha Ngani Jammbone mu nyuumba ja konganilanga Bhayahudi yakubhehe Ayesu nga mwana jwa Annoongo.

21 Bhandu bhoha bhabhaakajonikia bhakakangachanga, bhakalobhola, "Bholi, mundu hojo nga jolajola jwabhakaakomanga bhenibhala bhabhatendita kujoopa kwa lihina helye konikola ku Yelusalemu? Kabhele akaika pambani abhi kuganikia kwakamulanga bhena bhandu na kwapelekanga kwa akaakung'i!"

22 Asauli akapunda kupata machili, kwa namuna chibhakaalobholelanga pandaha kubhehe Ayesu nga Akilisito, Bhayahudi bhabhatamanga konokwe kuchilambo cha Damasiko bhakibha bhangali na chakulongela choachela.

23 Pagakapeta machobha gajingi, Bhayahudi bhakakondekananga na kulolea ndela ja kwakoma Asauli. 24 Kilo na muhi bhakajindelanga milyango ja kujingila pannyini ili bhapatange kwakoma. Nambo Asauli akajoa chikubho hecho. 25 Nambo muda gwa kilo bhabhachijigana bhabhe bhakaatola, bhakaatulua pahi abhi nkati ja chikapu chikolongwa kwa kupetela mahali papatekupobholwa palikukumba lya pachilambo.

26 Asauli pabhakaika ku Yelusalemu akapala kuchilondanika na bhenibhala bhabhachijigana bhoa bha Ayesu, nambo bhoha bhakaajogopa bhangakombolanga kwahobhalela yakubhehe jonojwe atekubhee ajabhenji jwaankagula Ayesu. 27 Popopo, Abanaba bhakaika kwaatola Asauli, akaapeleka kwa akaandundame na kwakongolela namuna Asauli chibhakaabhona Hangwana nndela na namuna Hangwana chibhaalongile nabho. Akaakongolelanga namuna Asauli pabhakibha ajemite kwatangacha Akilisito pangali bhoga kwakola kuchilambo cha Damasiko. 28 Bahi, Asauli akatama pamo nabho, akatyangila ku Yelusalemu joha kutangachanga lilobhe lya Hangwana panga bhoga. 29 Kabhele bhakalongela na kutaukananga na Bhayahudi bhabhalongelanga Chigiliki, nambo bhabhenji bhakajiganga kwaakoma. 30 Bhenibhala bhabhankagula Ayesu pabhakachimanyanga chikubho hecheche, bhakaapetula Asauli, bhakaapeleka ku Kasilia, bhakaaleka bhajabhule ku Taliso.

31 Machobha genago lilubhalo lya bhandu bhabhakahobhalela Ayesu bhakatamanga kwa kuhengwa pohapala mu Yudea, Galilaya, na Samalia, Lilichengwite na kukola mu kwakotimia Hangwana, na likajonjokeka likalekelwa ntima na Mboomo ja Annoongo.

32 Apetulo pabhakibha mu ulendo kila mahali akaika kwa bhandu bha Annoongo bhabhatamanga kuchilambo cha Lida. 33 Konokwe akaakolela mundu jumo jwakemitwa Aainea, yakubhee kwa yaaka jinane akibha agolwike pa chindanda ligongo akibha apolite. 34 Bahi, Apetulo akaalobholela, "Aainea Ayesu Kilisito atendakunnamia. Nnyinuke ntandike chindanda chinu." Aainea akajimuka gunakamo. 35 Bhandu bhoha bha kuchilambo cha Lida na likote lya ku Saloni bhakaabhona Aainea, na bhoha bhakaakagula Hangwana.

36 Konokwe ku Yopa kukibha na mwikege jumo jwaahobhalela Ayesu jwakemitwa Atabitha, kwa Chigiliki nga Adoka maana gakwe, "Uloko." Mwikege jonojwe akibha atenda gammbone na kwaajangatilanga akaahocho yaaka yoa. 37 Muda gonogwe akibha atamwa, akajomoka. Bhandu bhakagujoanga mmele gwabhe, na kugugoneka mu chumba ku golofa. 38 Chilambo cha ku Yopa chikibha changatalika muno na chilambo Lida, henela bhenibhala bhabhankagula Annoongo pabhakajoanga yakubhe Apetulo akibha ku Lida, bhakaatumanga bhandu bhabhele kwachabhe na chalaamu, "Nhikange kwaachitu chindema nkotokabha." 39 Bahi, Apetulo akabhoka na akajaula pamo nabho. Pabhakaika akaapelekwa ku golofa mu chenichela chuumba. Konokwe akaahelwa bhajingi bhakaatindila Apetulo bhabhikugutanga na kwaalangiha makoti na ngobho hibhatendita kuhalakia Adoka pabhakibha bhamomi. 40 Apetulo akaapianga panja bhoha, akatindibhalanga, na kwajopa Annoongo. Ngapena bhakatendebhukila mahiti jela na kulobhola, "Atabita, nnyimuke." Nabhena akaunukula miho gabhe, na pabhakaabhona Apetulo, akajimuka akatama. 41 Apetulo akaajangatila kujema, akaakema bhenibhala bhandu bha Annoongo na bhenibhala akaawelwa, na kwakamuanga kwachabhenji abhi jwamomi. 42 Ngani ja chikubho hecheche chikajenela kohakoha ku Yopa, bhandu bhajingi bhakaobhalela Hangwana. 43 Apetulo akatama kwa machobha kachoko ku Yopa, akatama kwa mundu jwaabhamba mambendela jwakemitwa Asimoni.