1 Akolo Ateofilo,

Mu chitabu changu chinakalongolela kujandika, nakajandika hikubho nnani ja Ayesu, gabhatendite na kujigana kubhokela kandahi mwa lihengo lyabhe, 2 mpaka lichobha lyela pabhakatolekwa kujaula kunani kwa Annoongo, paakapekeanga malagilo kwa kupetela Mboomo ja Annoongo bhenibhala akaandundame bhabhakaagula. 3 Pagakapeta machobha makomi ncheche kubhokela kujomoka kwabhe bhakaabhokelanga bhabhachijigana bhabhe mala jijingi na kuchilangia yakubhehe akibha jwamomi. Bhakaabhona, na jonojwe akalongelanabho ngani ja Ukolo gwa Annoongo. 4 Pabhakakongana pamo nabho bhakaakulumikianga kubhee, "Nkotokubhokanga pa Yelusalemu, nambo nnendange jenijela ngwaupa jibhakanhaidi Atati, yakubhehe nkajoanga mikulongela ngani jabhe. 5 Ayohana akabaticha bhandu kwa machi, nambo pagapakupeta machobha kachoko, mwangota mpakubatichwanga kwa Mboomo ja Annoongo."

6 Bahi, akaandundame pabhakakongana pamo na Ayesu, bhakaakonya, "Hangwana, bholi, wakati hogogo nga pampakubhujia gonigola umwenye kwa Bhaisilaeli?"

7 Nambo Ayesu akaalobholelanga, "Atati jika jabhwe nga bhahimanya hikubho heyo hipakupetela machobha ba hipindi hipakupitila lii. Machobha na hipindi ya hikubho heyo hibhi pahi ja ukolo gwa Atati bhangu. 8 Nambo Mboomo ja Annoongo chibhapakuntulukilanga mwaangota, mpakupokelanga machili na mpakubhee bhabhalongela ngani jangu mu Yelusalemu, mu hilambo yoha ya ku Yudea na ku Samalia, na hata kupela kwa chilambo." 9 Pabhakajomola kulongela genago, akatolekwa kujaula kunani kwa Annoongo bhenaangota bhabhi tangu bhatendakulolanga, lihunde likaawekela bhakotokokwabhona kabhele.

10 Pabhakibhanga tangu bhabhikulolekeanga muno kunani kwa Annoongo, Ayesu abhikujaula, kachoko akanalome bhabhele bhawalitinge ngobho hihuhu bhakajemanga kubhandikana nabho, 11 bhakalobholanga, "Mwangota mwabhandu bha ku Galilaya! Mbona ntenda kujemanga mmikulolanga kunani? Ayesu habhabha yakubhehe bhatekutolekwa kubhoka kwachinunji kujenda kunani kwa Annoongo apakuhika hela hela handa chimunnonitinge abhikujaula kunani kwa Annoongo."

12 Ngapena akaandundame bhenibhala bhakabhujanga ku Yelusalemu kubhoka lyanilela litombi libhakemita Litombi lya Mizeituni gugukabhee kilomita jimo kubhoka mu chilambo hecho. 13 Pabhakaikanga kunnyini bhakajingilanga mu chumba kugolopa kubhatendita kutamanga. Bhenaangota bhakibhanga Apetulo, Ayohana, Ayakobo, Aandulea, Afilipo na Atomaso, Abatolomayo na Amatayo, Ayakobo amwana bha Aalufayo, Asimoni jwaapotanila chilambo chabhe na Ayuda amwana bha Ayakobo. 14 Habha bhoha bhakapundanga kondekananga pamo na kujopa, pakati jabhenji akibha Amalia anyongolo bhabhe Ayesu, na anung'una bhabhe Ayesu.

15 Mu machobha genago chibhoga cha bhandu chichahobhalela Ayesu, bhabhakakondekananga bhakibhanga handa bhandu makomi na gabhele. Apetulo ajakema pakati jabhenji na kulobhola, 16 "Akanung'una bhangu, ikapalikwa Majaandiko ga Annoongo gakwele, chehemu yakubhehe Mboomo ja Annoongo, kwa malobhe ga Adaudi, akalondola ngani ja Ayuda yakubhe bhakaatandaanga bhenibhala bhabhakaakamula Ayesu. 17 Ayuda akibha jumo jwa chibhoga chitu, kwakubhee akaagulikwa na Ayesu atende lihengo litu."

18 Ayuda akaemela nng'oonda kwa yeniyela mbiya hiibhakapata kubhoka kwa chikubho chabhe chibou, akagwehe monomwe, akapapuka na lutumbo lwabhe lukapita panja. 19 Kila mundu mu Yelusalemu akajoa ngani ja chikubho hecho na henela, kwa chilongelo chabhenji, bhakemanga gonigola nng'oonda, "Akel Dama," Mana gakwe, "Nng'oonda gwa miyahi."

20 "Bahi, ikajandikwa mu chitabu cha Zabuli,

‘Kwaachabhe kuigalile mahundu,

mundu johajola akotokutama nkati jakwe.’

‘Hela hela hijaandikwe,

Mundu joongi atole lihengo libhatendita kupangana.’"

21 "Bahi, mundu jumo pakati ja bhenibhala jwaatendita kutama pamo na twenga muda gwoha Hangwana Ayesu pabhakibha mu ulendo pamo na twenga bahi ahagulikwe kuchilondanika na twenga mu lihengo, 22 kubhoka Ayohana pabhakaabaticha Ayesu mpaka lichobha lyela Ayesu pabhakapetulikwa kubhoka kwaachitu kujaula kunani kwa Annoongo. Mundu Jonojwe apakubhee pamo na twenga mu lihengo lya kulola kuyoka kwa Ayesu."

23 Pena, bhakahagulanga mahina ga bhandu bhabhele, jwaakejemeka Ayusufu jwakemitwa Abalisaba hela hela akakemwa Ayusito, na jwa bhele Amatia. 24 Ngapena bhakaajoapa Annoongo, "Hangwana, mwenga ntendakujimanya mitima ja bhandu bhoha. Henela, ntulaangie nga jwaapi pakati ja habhabha bhabhele jumuhagwile, 25 kupala apetule lihengo lya alondoi libhalekite Ayuda kujenda mahali pakwe pajikajabhe mwene." 26 Bhakatendanga gudugudu, na gudugudu jikagwela Amatia, na jonojwe akajonjokekwa pakati ja bhenibhala akaandundane bhangi komi na jumo.