1 Gonigola ukomu gwa Efeso pajikakotoka Apaulo akaakemanga pamo bhenibhala bhandu bhabhahobhalela Ayesu, akaalekelanga ntima na kwaatabhukanga. Ngapena akajaula ku Makedonia. 2 Apaulo akapetela chehemu ja chilambo yela abhikwaalekela ntima bhandu bhabhaahobhalile Ayesu kwa malobhe gajingi. Ngapena akaika ku Ugiliki. 3 Konokwe akatama kwa mihei jitatu. Pabhatendita kuchibheka maha kujaula ku Silia, bhakaimanya yakubhee Bhayahudi bhakibhanga bhaatendela ndela yangali mmbone, henela akatindigana ndela na kubhuja kwa kupetela ku Makedonia. 4 Apaulo akalongana nabho na Asopatulo, mwana jwa Apiliho, kubhoka ku Belea, kabhele akalongana na Aalistaliko na Asekundo bha kubhokela ku Tesalonike na Agayo kubhoka ku Delube, Atimotheo, Tukiko na Atulofimo bha kubhokela nkowa gwa Asia. 5 Bhena bhandu bhakatulongolelanga na kutulendelanga konikola ku Tuloa. 6 Twenga, palikapeta lichobha likolongwa lya mikate jangalekelwa ngedule, tukakwela meeli kubhoka ku Filipi na pagakapeta machobha gatatu tukaikanga konikola ku Toloa. Konokwe tukatama muda gwa lijuma limo.

7 Lichobha lya kujemeka lya lijuma tukakongana pamo kupala kulyee chakula. Kwa kubhee Apaulo akibha apala kujaula malabhi jakwe, akabhalobholelanga bhandu Ngani Jammbone na akajendelea kulongela nabho mpaka pakati ja kilo. 8 Mu chuumba cha nnani cha mutukibha, kukajakilwa himuli hijingi. 9 Apaulo pabhapundita kujigana nangwendu jumo jwaakemitwa Aeutiko akibha atamite palidilicha lya chuumba cha nnani, nangwendu jonojwe akajemeka kugochela, lugono palukaajonjokea akagwee kubhoka mu nyuumba ja tatu nnani patukajaula kwaalokota akibha atekujomoka. 10 Nambo Apaulo akatuluka pahi, akakotima, na kwaanyambatila nangwendu hojwe na kulobhola, "Nkotokubhee na lipamba nga jwamomi." 11 Ngapena Apaulo akakwela kabhele mu chuumba cha nnani, akalyee chakulya. Akajendelea kulongela nabho kwa muda nnyingi mpaka kuhika kundabhi kokoliko, ngapena akajaula. 12 Bhenibhala bhandu bhakampetula jonijola nangwendu mpaka kaaja abhi jwamomi, bhakaangalala muno.

13 Twenga tukakwela meeli tukalongolela kujaula ku Aso yakubhee tukaatolite Apaulo. Nga chibhakapanga, kwa kubhee jonojwe akapala kujaula konokwe kwa makongono. 14 Bahi, akatukolela konikola ku Aso, tukakwela mu meeli, tukajenda ku Mitulene. 15 Kubhoka konokwe tukajaula tukaika ku Kio malabhi jakwe. Lichobha lya bhele, tukahika ku Samo na malabhi jakwe tukaika ku Mileto. 16 Apaulo akibha apalite kujendelea na ulendo kwa meeli panga kupetela Efeso kupala akoto kabha muno hokwe ku Asia. Akibha na chindema cha kuika ku Yelusalemu kwa lichobha likolongwa lya Pentekosite handa ikombolike.

17 Kubhoka ku Mileto Apaulo akalagia malobhe kwa akanahota bhabhakaahobhalela Akilisito bha Ku Efeso bhakongane nabho. 18 Pabhakaikanga kwachabhe akaalobholela, "Ntendakuimanyanga namuna chindamite namwangota machobha goha kubhokela lichobha lyela lya kujemeka pangaika ku Asia. 19 Muhimanyi namuna chindekwatumikila Hangwana kwa kutongamanika kwoha, kwa mahoi na hindondo niipatite ligongo lya ndela hibohu ya Bhayahudi. 20 Ntendakuimanya yakubhee nangaleka hata kachoko kuntangachianga Ngani Jammbone palugwinjili na mmajumba ginunji na kunnyigananga choachela chakubhee chipakunnyangatilanga. 21 Nakaanyamukanga Bhayahudi bhoa na bhandu bhanga Bhayahudi, bhaatendebhukile Annoongo na kwaobhalela Hangwana bhitu Ayesu. 22 Nangocheni, nnyoanikiange! Nenga, ikibha mbakujijeketela Mboomo, ndendakujaula ku Yelusalemu panga kumanya gagapakumbata konokwe. 23 Chinachimanya jika nga yakubhee Mboomo jwa Annoongo atendakunnobholela mu kila chilambo yakubhee hitabho na hibhini hitendakunendela. 24 Nambo, ngagulola umomi gwangu nga chilebhe chammbone muno ila chinichipala muno kugukweela gonigola utumichi gwangu na lyenile lihengo libhambile Ayesu ndeende, kubhee nijibhone Ngani jammbone ja upalio gwa Annoongo."

25 "Ndekupeta kwa kila jumo jwinu kongo ndendakutangacha Umwenye gwa Annoongo. Nambo nangocheni, niimanyi jwaakwa hata jumo jwinunji, jwaapakumona kabhele. 26 Henela, leleni nupe ndendakunnobholelanga kweli kubhee handa ipakubhokela jumo pakati jinunji ahobhite nenga ngakokolekwa kwa choachela, 27 kwa kubhee nangaleka hata kachoko kunnobholelanga genigala goha gabhagapala Annoongo. 28 Mmangange miho mwachinabhenenji, mulilolekeange lyenileyela lilubhalo lya bhandu bhabhahobhalile Akilisito yakubhee Mboomo jwa Annoongo ammekitinge mwangota mmangange bhakulilokea. Mulilangiange lilubhalo helyo yakubhee Annoongoo jwaatekulihemela kwa mihai ja Mwana Jwabhe. 29 Ndendakuimanya maha muno yakubhee pambakubhoka bhabhajigananga bha unami bhabhabhile handa mamehi gakalipa gapakuhika kwaachinu, na bhenabho ngaolanga kiha na lilubhalo lya bhandu bhabhahobhalela Akilisito. 30 Hata pakati jinunji bhapakupitilanga bhandu bhabhahobhalile Akilisito ili bhanhutange mwangota kwaachabhe bhenabho bhandu bhabhahobhalela Akilisito bhapakulobholanga hikubho ya unami kupala kwaatembanga bhandu na kwaatendanga bhabhakagulange bhenaangota jika." 31 Kwa henela, mmangange miho mmikombokelanga yakubhee kwa muda gwa yaaka hitatu, kilo na muhi, nakaendelea kunnyamukanga kila jumo jwinunji kwa mahohi.

32 "Nangocheni ndendakunkamuanga kwa Annoongo na lilobhe lya neema jabhe, lilikombola kunchenganga na kutendelwa gammbone genigala Annoongo gabhakaalobholelanga bhandu bhabhe bhabhatekwaagula. 33 Nangalokolila mbiha wala bhunyu wala ngobho ya mundu johajola. 34 Mwangota bhene ntendakuimanya yakubhe mabhoko gangani gatumike ligongo lya kuchipatia hilebhe yangu na ya akaajangu. 35 Kwa muda goha nakibha ndekunnangianga kulandanikia kubhee kwa kupangana mahengo handa genago tupalikwa twaajangatile bhandu bhanga chilebhe, kongo tutendakombokela malobhe ga Hangwana Ayesu bheene, ‘Mbaya muno kubhoha kuliko kupokela.’"

36 Apaulo pabhakalongela genago, bhaakatindibhala majugwa pamo nabho bhoha, na kwaajopa Annoongo. 37 Bhoha bhatendita kuguta, na kwaatabhuka kwa kwaanyambatila. 38 Chikubho chichikatendanga kuumalikanga muno nga lyenilyela lilobhe jwabhakalilobhola kubhee bhangakombolike kwaabhona kabhele. Henela bhakaapeleka mpala ku meeli.