1 Mu lilubhalo lya bhandu bhabhahobhalela Akilisito bha ku Antiokia bhakibhanga akaalondoi na bhabhajigananga, pakati jabhenji bhakibhanga Abanaba, Asimioni jwaakemitwa Apili, Alukio jwa kubhoka chilambo cha ku Kilene, na Asauli na Amanaeni, jwabhakannela pamo na Ahelode Antipasi na Asauli. 2 Pabhakibhanga bhatendakwaajopa Hangwana na kutabha, Mboomo ja Annoongo akalobhola, "Nhagulilange Asauli na Abanaba kwa lihengo lyela linankemelinge."

3 Pabhakajomolanga kutabha na kwaajoopa Annoongo, bhakaabhekelanga mabhoko Abanaba na Asauli na kwaatumanga bhajendange kupangana lihengo lya kutangacha Ngani Jammbone.

4 Henela, Abanaba na Asauli bhakatumwanga na Mboomo jwa Annoongo, bhakatulukanga kujaulanga ku Seleukia na kubhoka konokwe bhakakwelanga meeli na kujaula pachilumba cha ku kupulo. 5 Pabhakaikanga mu chilambo cha ku Salami, bhakatangachanga Lilobhe lya Annoongo mu nyuumba ja kongonilanga Bhayahudi. Kabhele Ayohana Maluko atenditakwaajangatila mu lihengo lyabhenji.

6 Bhakajendanga kubhoka upande gumo gwa chilumba mpaka mu chilambo cha ku Pafo, bhakakongana nabho na Ayahudi jumo ahabhi akibha alondoi bha unami, lihina lyabhe Abali yesu. 7 Mundu hojo akibha pamo na Asegio Paulo, akolo jwa chenichela chiluumba, yakubhee akibha mundu jwakumanya muno. Asegio Paulo bhakaakema Asauli na Abanaba apalita kujoha lilobhe lya Annoongo. 8 Nambo bhakakanangwa na ahabhi Aelima yakubhee handa lihina lyakwe chilikakemwa kwa Chigiliki jonojwe akalenga kwaakanikia akolo jwa chiluumba cha ku Kupulo akotokwaahobhalela Ayesu. 9 Ngapena Asauli, yakubhee kabhele jwakemitwa Apaulo, abhikutandaikwa na Mboomo jwa Annoongo, akaalolekea miho jono Aelima ahabhi, 10 akaalobholela, "Mwe mwa anami, mwenga nga mwana jwa Lichetani! Mwenga nga apwati bha kila chichibhile chambone! Ntekutwelela kila chilebhe cha unami. Bholi, mwangaleka kwaatembanga bhandu bhakotokagula ndela ya Hangwana hihigolwike? 11 Nangocheni nnyohanikie, ukolo gwa Hangwana gubhile nnongi jinu. Mpakubhee ngalola, wala ngalola lyobha kwa machobha kachoko."

Popopo Aelima akajingilwa na chikopi mmiho gabhe akalepela kulola na abhikulolea mundu jwa kwaakamula lubhoko. 12 Bhenibhala akolo bha chenichela chiluumba chibhaakabhona gagabhokile akaahobhalela Ayesu ligongo akakangacha pabhakajoa majigano ga Hangwana Ayesu.

13 Ngapena Apaulo na ajabhe bhakabhokanga ku Pafo bhakajaulanga mpaka ku Peliga kono ku Pamfilia. Nambo, Ayohana jwakemitwa Amaluko akaalekanga konokwe akabhuja ku Yelusalemu. 14 Kubhoka ku Peliga bhakaendeleanga na ulendo mpaka ku Antiokia ja Pisidia. Lichobha lya Kupomolela bhakajingilanga nkati ja nyuumba jakonganilanga Bhayahudi bhakatamanga.

15 Pabhakachomanga chitabu cha Malagilo ga Amusa na hitabu ya akaalondoi bha Annoongo, akaakolo bha jenijela nyuumba ja konganilanga Bhayahudi bhatumianga bhakaalobholelanga, "Anung'una handa mmilinge na lilobhe lya kwaajangatilanga bhandu habha, choonde mwalobholelange." 16 Apaulo akajema, kwapungilanga mabhoko bhandu na kulobhola,

"Mwangota bhandu bha ku Isilaeli akaajangu na mwangota mabhoa bhamwajopa Annoongo nnyoanikiange. 17 Annoongo bha bhandu abha bha ku Isilaeli akaagulanga akaakolo bhitu, akabhatenda bhandu bhabhee chilambo chikolongwa pabhakibhanga konikola ku Misili. Annoongo akaabhabhoanga konokwe kwa machili gabhe makolo. 18 Akaapumilianga hikubho yabhenji kwa yaaka makomi ncheche konikola kululemba. 19 Annoongo akaatinianga bhandu bhoa bha hiilongelo saba ya ku Kanaani, akabhapekeanga bhandu bhabhe chenichela chilambo chibhee chabhenji." 20 Haga goha gakatendeka kwa yaaka handa mia ncheche na amusini.

"Pagakapeta gangani, Annoongo bhakapekeanga bhandu bhakutapulana bulwa gwabheji mpaka machobha ga Asamweli alondoi jwa Annoongo. 21 Ngapena bhandu bhakajoopanga bhaapekehe amwenye, nabhena Annoongo bhakaapekeanga Asauli mwana jwa ku Kishi bha chilongelo cha Abenjamini. Na jonojwe akibha atawala kwa yaaka makomi ncheche. 22 Annoongo pabhakaabhoa Asauli mu ukolo, akaagula Adaudi kubhee akolo bhabhenji. Yakubhee akalola akalobhola, ‘Ndekwaabhona Adaudi mwana jwa Ayese, mundu jwaubhajila ntima gwangu, apakwela gaganigapala goha.’ 23 Kubhoka mu ubhelei gwa hojo Adaudi, Annoongo atekwapelekelanga bhandu bha ku Isilaeli Mwokochi yakubhee nga Ayesu, handa chibhakaalobholenga. 24 Tangu Ayesu jwangajemeka lihengo lyabhe, Ayohana akatangachianga bhandu bhoa bha ku Isilaeli ngani ja kuleka mabohu na kubatichwa. 25 Ayohana pabhakajomola kulobhola malobhe gabhe, akaalobholelanga bhandu, ‘Bholi, mwangoota nng'anikianga nenga nga aganiki? Nenga ngabha jonijola Ayesu jumunnendelanga. Jonojwe jwaahika kuyeto jangu nenga ngapalikwa hata kwaahula migoji ja champali yabhe mu makongono gabhe.’"

26 "Akaanung'una bhangu bha ku Isilaeli, bhana bha Aibulahimu, na mwangota bhandu bha hilambo bhabhaobhalelanga Annoongo, ngani heje ya kuokolewa jiikite ligongo litu twenga twabhoa. 27 Ligongo bhandu bha ku Yelusalemu na akaakolo bhabhenji bhangaamanya kubhee jonojwe nga akombohi wala bhangaelewanga malobhe ga akaalondoi gagachomwanga kila Lichobha lya Kupomolela, nambo hata henela bhakagapangana genago gakweele ga kupala kwahukumula Ayesu akomekwe. 28 Chiikaabhee bhangapatanga ligongo lyohalela lya kwaahukumula kujomoka, bhakaajopa Apilato bhaukumule ajomoke. 29 Pabhakajomolanga kupangana galagala goha gagajaandikwe ligongo lyabhe, pabhakaakoma kwa kwaabhamba panchalaba bhakaatuluha na kwaachikwa mu mbaako lilikabhachwa pamwala. 30 Nambo Annoongo akaayoha. 31 Nabhena, kwa machobha gajingi bhakaabhokela bhenibhala bhabhakibhanga pamo kujemekela ku Galilaya mpaka ku Yelusalemu. Nabhenabhao nga nangocheni nga bhabhalobholanga ngani hibhaibhonitinge na kuijoanga kwa bhandu bha ku Isilaeli. 32 Twenga tutendakunnetelanga Ngani Jammbone yakubhee genigala Annoongo gabhakalobholanga akaakolo bhitu kubhee, 33 nagocheni gatekweela kwaachitu twenga bhana bhabhe, kwa kwayoha Ayesu, handa chijaandikwe mu zabuli jabhele,

‘Mwenga nga Mwana jwangu, leleni ndekubhee atati bhinu.’

34 Ngani ja kwaayoha, akotokubhuja kabhele konokwe na kubhola, Annoongo akalobhola henela,

‘Mbakuntendela gammbone ga Annoongo na genigala ganakaahidi Adaudi.’

35 Kweli, na mu majandiko gangi ga Zabuli alobhola,

‘Ngaaleka antumichi jwinu jwammbone abhole.’

36 Nangocheni, Adaudi bhene akatenda handa Annoongo chibhakapala machobha gala, ngapena akajomoka na kuchikwa kubhandikila na akanahota bhabhe na mmele gwabhe gukabhola. 37 Nambo jonijola yakubhehe Annoongo akaayoha jwangabhola. 38 Henela akaanungung'una bhangu, muimanyange kubhee ndela ja hojo mundu kwa ngani ja kulekelelwa kulemwa kwinunji kutendakutangachwa kwaachinu. 39 Mundu joajola jwaahobhalela Ayesu apakulekelelwa kulemwa kwabhenji koha, chikubho changakomboleka kubhokela kwa kugakamula Malagilo ga Amusa. 40 Henela nangocheni, nchibhekange kutali ili gakoto kumpatanga genigala gagalobholikwe na akaalondoi bha Annoongo,

41 ‘Nyoanikiange mwangota bhamwabheluanga akaajinu,

nkangachange nhobhange!

Kwakubhee chilebhe chintendanga ngocheni, mu machobha ginu,

nga chilebhe yakubhee ngahobhelelanga,

hata mundu akinnobholelanga.’"

42 Apaulo na Abanaba pabhabhokitanga mu nyuumba ja konganilanga Bhayahudi, bhenibhala bhandu bhakaalalikanga bhahikange kabhele Lichobha lya Kupomolela lilihika, kubhee bhalongelange muno ngani ja hikubho yeneyo. 43 Chikomiti chenecho pachikajomoka, Bhayahudi bhajingi na bhandu bha hilambo yengi bhabhakakagula dini ja Chiyahudi bhakaakagulanga Apaulo na Abanaba. Bhena akaandundame bhakalongela nabho, bhakaalekelanga mitima bhakapundange kutamanga bhabhikuhobhalela neema ja Annoongo.

44 Lichobha lya Kupomolela lilikahika, kubhandikila kila mundu mu chenichela chilambo akahika kujoanikia Ngani Jammbone ja Ayesu. 45 Nambo Bhayahudi pabhakalibhona lyenilyela libhoga lya bhandu bhakibhanga na bhwihu, na bhakataukanga chibhatendita kulongela Apaulo na kwatukana. 46 Ngapena Apaulo na Abanaba bhakalongelanga nabho pangali bhooga, kulobhola, "Hikapalikwa oti lilobhe lya Annoongo linhikilange mwangota, nambo mwangota ntekananga henela, ntekuchihukumulanga mwaachinabhene kubhee ngapalikwa kupokela umomi gwa machobha goha, bahi tutendakunnekanga na kwaajendelela bhandu bhanga Bhayahudi. 47 Hangwana atekutulagia henela,

‘Ndekuntenda mwenga kubhee nhana gwa bhandu bhanga Bhayahudi,

ili bhandu bha pachilambo choa bhakombolange kuhokolewanga.’"

48 Bhandu bha hilambo yengi pabhakaajoanga chikubho hecho bhakahangalala, bhakagalumbalilanga malobhe ga Annoongo, na bhenibhala bhabhakahagulikwa na Annoongo kupata umomi gwa machobha goa, bhakaahobhalela Hangwana Ayesu.

49 Lilobhe lya Hangwana likajenela mu chenichela chilambo choha. 50 Nambo Bhayahudi bhakaakolekeanga akaikege bhabhakibha bhammbone bha hilambo yengi bhabhatendita kwahobhalela Annoongo, na akanalome bhakumanyikana muno bha chenichela chilambo. Ngapena bhakajemekanga kwalagianga Apaulo na Abanaba, bhakaabhenganga kubhoka mu chilambo chabhenji. 51 Bahi, akaandundame bhakapyatanga lutukunda gagakibha mmakongono kulangia hilolelo ja kwaanyamukanga, ngapena bhakajaulanga ku Ikonio. 52 Nambo bhenibhala bhabhahobhalela Ayesu bha konokwe ku chilambo cha Antiokio bhakalongolelwa na Mboomo jwa Annoongo.