1 Bahi, amwenye Aagilipa akaalobholela Apaulo, "Nchitetee." Penapo Apaulo akanyulula lubhoko lwabhe kulangia kujemeka kuchitetea.

2 "Amwenye Agilipa, ndenda kuchilola namwene bahati leleni kuchitetea nnoongi jinu ngani ja mihalo joha yakubhee Bhayahudi bhakatakia nenga. 3 Kwa kubhee mwenga nga ntendakujimanya ndela jijikondekwa na Bhayahudi na hikubho hitupwatanilana, bahi ndendakunnyopa nnyoanikie kwa kutongamanika."

4 "Bhayahudi bhoa bhatendakujimanyanga ngani ja umomi gwangu kubhokela lolo, namuna chindekutama kubhokela kandahi pakati ja chilambo changu konokwe ku Yelusalemu. 5 Bhenaangota batendakumanyanga nenga kwa machobha gajingi, na bhatendakombola kugalobhola genago gandendite handa bhapalitinge, kubhee kubhoka kandai nakibha jumo jwa chibhoga cha bhandu chibhoga Mafalisayo chichikamula malagilo ga dini cha chiyahudi kupunda chibhoga chengi choachela. 6 Nangocheni bhatekundakia pambani ligongo lya kuhobhalela kwa chenichela chibhakalobhola Annoongo kubhee apakwapekea akanahota bhitu. 7 Ahadi hejo nga jenijela makabila komi na gabhele bhatendakuhobhalela kujibhona jibhikubhokela, na bhenaangota bhatendakwatumikila Annoongo kwa ntima goha muhi na kilo. Mwe amwenye, ligongo lya gangani Bhayahudi bhatendakutakia ligongo lya kuhobhalela konokwe! 8 Kwa niki joajola pakati jinunji ngaganikia kubhee nga kulimba Annoongo kwayoanga bhabhawilinge?"

9 "Nenga namwene kabhele ndendakuhobhalela kubhee nga lihengo lyangu kupangana chikubho choachela ili kulikana lihina lya Ayesu bha ku Nazaleti. 10 Yene hikubho nakaiendanga panakibha konokwe ku Yelusalemu. Nenga jika, ngibha mbatite ukolo kubhoka kwa Akakung'i Akolo, ngapata kwaalekelanga munyuumba ja kutabhila bhandu bhajingi bha bhandu bha Annoongo. Nabhonji bhakahukumulikwa komekwanga, nakatenda gudugudu ja kukoonda. 11 Mala jijingi nakajaula mu nyuumba yabhenji ya konganilana Bhayahudi na kwaapotanga na kwakulumikia bhaaponje Annoongo. Lilaka lyangu kwachabhenji likibha likolongwa hata nakaakagulanga mpaka mu hilambo yengi."

12 "Lichobha limo, panakibha mu ulendo kujaula ku Damasiko, nakibha na mamulaka na malagilo kubhoka kwa akaakung'i Akolo. 13 Mwe amwenye, muda panakibha nndela, chaa chita ja muhi, nakabhona nhana nkolongwa kupunda gwa lyobha gubhikumulikila kupitila kunani kwa Annoongo, gukandindila nenga na bhenibhala bhanakalongana nabho. 14 Twenga twaabhoha tukagwehe pahi, nanenga nakajoa lilobhe libhikunobholela kwa chilongelo cha Chiebulania, ‘Asauli, Asauli! Kwaniki ntendakunhulaha? Ntendakuchiulaha mwabhene kutaukana nanenga handa lipoonda jwapota mateke nhimbati gwa hangwana bhabhe.’ 15 Nenga nakaakonya, ‘Nga ganiki mwenga Hangwana?’ Nabhena Hangwana akajangula, ‘Nenga nga Ayesu yakubhee mwenga ntendakunagia. 16 Nnyeme gweema. Ndekummokea kupala nimmeke maha kubhee antumichi bhangu. Mpakwalobholela bhandu bhajingi hikubho himuibhonite leleni na genigala gambakupunda kunnangia. 17 Mbakunhokoa kubhoka kwa Bhayahudi bhajinu na kwa bhandu bhanga Bhayahudi bhangi yakubhee nenga ndendakuntuma kwachabhenji. 18 Mpakwahunukulanga miho gabhenji ili bhakombolange kumanya nenga na bhabhokange mulubhendo na kujingila mu nhana, bhabhoke mu machili ga Lichetani na kujingila mu umwenye gwa Annoongo, kupala kunhobhalela, ili bhakombolange kulekelelwanga ubou na bhabhangange pamo na bhenibhala bhabhatenda kunhobhalela.’"

19 "Henela, Amwenye Aagilipa, nenga ngakombola kubhee na mitahu kwa genigala ganigabhonite kunani kwa Annoongo. 20 Ligongo helyo nakajemeka kutangacha kujemekela kwa bhandu bha ku Damasiko, na panakajomola konokwe nakajaula kwa bhandu bha ku Yelusalemu na chilambo choha cha ku Yudea, na kwa bhandu bhoa bhanga Bhayahudi. Nakaakulumikianga bhaalobholele Annoongo chibhatekulemwanga na kuleka na bhaatendebhukile Annoongo na kulangia kwa hikubho yakubhee bhapendekwike na kuleka ndela yabhenji ya lolo. 21 Ligongo helyo, Bhayahudi bhakangamulanga panakibha mu Nyuumba ja Annoongo, bhakapalanga kungoma. 22 Nambo Annoongo akanyangatila, na henela mpaka lichobha lya leleni ndekujema maha nibhikuendelea kulobholela genigala ganakagalola kwa bhoa, akolongwa na akachokochoko. Nenga ngalongela choachela kupunda ja genigala yakubhee gabhakalobholanga Amusa na akaalondoi bha Annoongo kubhee gapakupitila, 23 Akilisito hikapalikwa alage na kubhee bha kujemeka kuyoka, apakwamulikilanga nhana gwa wokovu kwa bhandu bhoha, kwa Bhayahudi akaajabhe na kabhele kwa bhandu bhanga Bhayahudi."

24 Apaulo pabhakaika pambani kuchitetea kwabhe, Afesito akalongela kwa lilobhe likolongwa, "Apaulo! Ntekola na mpangahi! Kuchoma kwinu muno kutendakunnekela mpangai!"

25 Nambo Apaulo akalongela, "Nenga nanga mpangai mwaakolo Afesito. Chinobhola nga ukweli. 26 Mwenga Amwenye Aagilipa ntendakuimanya hikubho heye, henela ndendakombola kulongela pangali bhoga nnoongi jinu. Nanga bhoga yakubhee hikubho heyoyo hitendakumanyikana kwinu maana chikubho hecheche changatendeka kwa kuchihiya. 27 Amwenye Aagilipa, bholi, mwenga ntendakwahobhalela akaalondoi bha Annoongo? Ndendakuimanya kubhee ntendakwahobhalela."

28 Aagilipa akaajangula Apaulo, "Bholi kwa malobhe ginu kachoko mpakundenda kubhee Akilisito!"

29 Apaulo akaajangula, "Najoopa Annoongo yakubee, kwa muda nyipijipi au ntandamao, ngabha mwenga jika bali bhoha bhabhanyoanga leleni bhapatange kubhee handa chimile nenga, pangali minyololo jenjeni."

30 Pabhakaolobhola genago amwenye Agilipa, na Afesito akolo bha ku Yudea, Abelinike na bhenibhala bhoha bhabhabhilinge pamo nabho, bhakajemanga. 31 Pabhakabhokanga nkati, bhakalobholelananga, "Mundu hojojo jwangatenda choachela chichikaapalikwa kujomoka au kutabhikwa." 32 Na jono Agilipa akaalobholela Afesito, "Mundu hojojo akakombwile kujogolelwa handa akibha alekelilwe kujaula kwa Akaisali, amwenye akolo bha ku Loma."