1 Bhandu bhangi bhatulukanga ku Antiokia kubhoka ku Yudea, nabhena bhatendita kwaajigananga bhenibhala bhandu bhanga Bhayahudi bhanhobhalele Ayesu, "Handa ngahinwanga handa Malagilo ga Amusa chigalobhola, ngokombola kuhokolewanga." 2 Chikubho hecho chikaatendanga Apaulo na Abanaba bhataukanange na bhenaangota. Henela Apaulo na Abanana pakahagulikwa pamo na bhandu bhangi bha ku Antiokia bhabhahobhalela Ayesu bhajaulange ku Yelusalemu bhakalolange akaandundame na akanahota ligongo lya chikubho hecho.

3 Bahi, lilubhalo lya bhandu bhabhahobhalela Akilisito likaatabhukanga pabhatendita kupetanga mu hilambo ya ku Foinike na ku Samalia bhakaatangachianga ngani bhandu bhangahobhalela Akilisito namuna bhandu bhanga Bhayahudi chibhatekwatendebhukila Annoongo. Ngani heyo hikaachuanga muno bhena bhandu. 4 Pabhakaikanga ku Yelusalemu, bhakapokelelwangwa na lilubhalo lya bhandu lilyaahobhalela Akilisito na akandundame pamo na akanahota, ngapena Apaulo na Abanaba bhakalalikanga kila chilebhe Annoongo chibhakibha bhatendite pamo nabho. 5 Ngapena bhenibhala bhandu bhangi bhabhahobhalela Ayesu bhabhakibhanga bha chibhoga cha Mafalisayo bhakajemanga na kulongelanga, "Bhena bhandu bhanga Bhayahudi bhapalikwa bhainwange na kujiganwa kukagula Malagilo ga Amusa."

6 Akaandundame na akaakola bhakakongananga pamo ili bhalongelange chikubho hecho. 7 Pabhakakonyananga muno, Apetulo jwaakemitwa Asimoni akajema na kulongela, "Mwakaanung'una bhangu, ntendakuimanyanga yakubhee pena kandai Annoongo akapala kunhagula nenga pakati jinunji ndangache Ngani Jammbone kwa bhandu bhanga Bhayahudi, bhakombalange kujoa na kuhobhalela. 8 Annoongo bhena jwaamanya mitima ja bhandu, akalangia yakubhee abhakoondite kwa kwaapekeanga Mboomo ja Annoongo handa henela chiitekutupekea twenga. 9 Annoongo ngapendelea, atekwalekea mabou gabhenji ligongo bhakaahobhalela Ayesu. 10 Nangocheni, kwa niki ngakondanga genigala gabhagatendite Annoongo kwa kwaapapianga mihigo bhandu bhabhahobhalela Ayesu yakubhee bhakalepelanga kupetulanga akanahota bhitu na twenga? 11 Ikotokubhee henela tutendakuhobhelela kubhee, tutendakuhokolewa kwa kupetela wema kwa Hangwana Ayesu, na bhenaangota hela hela bhatekuhokolewa kwa wema gonogwe."

12 Bhandu bhoha bhakatama jihii, bhabhikwajoanikia Abanaba na Apaulo pabhatendita kongolelanga henela Annoongo chibhaatuminge kupangana yakangachika na hilolelo kwa bhandu bhanga Bhayahudi. 13 Pabhaakajomola kulongela, Ayakobo akalobhola, "Mwakahanung'una bhangu, nnyoanikiange! 14 Asimoni pabhakakongola, henela Annoongo chibhakaahagula bhandu yakubhee ngabha Bhayahudi bhabheangange bhabhe. 15 Malobhe ga akaalondoi bha Annoongo gatendakondana na chikubho heche, handa chiijandikwe mu Majaandiko ga Annoongo,

16 ‘Pambakujomola hikubho heye mbakubhuja,

nenga mbakuchenga kabhele na nyuumba ja Adaudi jijigwile.

Mbakugahalakia kabhele mahame gabhe na kugachenga kabhele.

17 Penapo bhandu bhangi bhoa,

bhandu bhanga Bhayahudi bhatendakwakema bhabhee bhangu,

bhapakunnolea nenga Hangwana.

18 Henela nga chindendakulongela nenga Hangwana,

jundendite chikubho heche chimanyikane kubhokela lolo.’"

19 Ayaoko akapunda kulonhela, "Chindendakulagia nga chenjeni, tukotokwaalagianga bhandu bhanga Bhayahudi bhabhaatendebhukila Annoongo. 20 Nambo twaapelekelelange balua kwaalobholelanga bhakotokulyee nga nhilo kulyee yakulya hiitekubhekelwa hidimu na minnoongo, bhalekange kutendanga ngongola na kulyee chinyama choachela jwaatabhalilwe, na bhakotokulyanganga miyai. 21 Kubhokela lolo malobhe ga Amusa gatekubhee gatendakutangachwa mu kila chilambo na kuchomwa mu nyuumba yoha ja konganilanga Bhayahudi kila Lichobha lya Kupomolela."

22 Akaandundame na akanaota pamo na lilubhalo lya bhandu bhabhahobhalela Akilisito, bhakapalanga kwaagulanga bhandu kachoko bhabhenji bhene na kwaatumanga ku Antiokia pamo na Apaulo na Abanaba. Bhakanhagula bhandu bhabhakondekwa na akaajabhenji, bahi bhakaagulikwa Ayuda jwaakemwa Abalasaba, na Asila. 23 Ngapena bhakaapekaanga balua jijijaandikwe, "Twenga twaakandundame na akaakolo, akanung'una bhinu, tutendakunchalimianga mwangota mwakaanung'una mwanga Bhayahudi bha ku Antiokia na chilambo ku Silia na ku Kilikia.

24 Tujoine kubhee bhabhile bhandu bhangi bha kubhoka mu chibhoga chitu bhakanhangalana kwa malobhe gabhenji, bhakaalekelanga bhoga mu mitima jinunji mu bhoga nkolongwa. Nambo bhatenditinge henela pangali twenga kwaatumanga kwaachinunji. 25 Henela tutekondaana bhoha kwaagulanga bhandu bhangi na kwaatumanga kwinunji pamo na akaaganja bhitu Abanaba na Apaulo, 26 bhandu habho bhatekuchijianga mu hijogoo ligongo lya Hangwana bhitu Ayesu Kilisito. 27 Henela tutendakwatumanga Ayuda na Asila kwaachinu, kupala bhanhatambulilange akaachinabhene gangani gatujaandike. 28 Kwa kubhee itekwabhajila Mboomo ja Annoongo na twenga tutekondananga tukotokumpekeanga hikubho hijingi kupunda ja hikubho yeneyo hiintekulobholelwanga kubhee, 29 nga nhilo kulyee hiitekubhekelwa kwa hidimu, nkotokung'wee miyai, nkotokulyee chinyama jwaachitabhile, nkotokutendanga ngoongola. Mpakutendanga yammbone handa ngatendanga hikubho heyo. Tutendakuchukulu!"

30 Henela bhakaatabhukana, bhakatulukanga kujaulanga ku Antiokia na kabhele konokwe bhakakema kabhele chikomoti cha bhandu bhabhatekwaahobhalela Ayesu na kwaapekeanga jene balua. 31 Bhenibhala bhandu pabhakajomolanga kuchoma balua jela, malobhe gabhe gakaalekelanga ntima. 32 Ayuda na Asila, bhakibhanga akalondohi bha Annoongo, bhakakongolokanga na bhena akanung'una kwa muda ntandamao bhabhikwaalekelanga ntima na kwaatongomanianga. 33 Pabhakatama konokwe kwa muda teno, kwaakanung'una bha ku Antiokia bhakaatabhukanga kwaalekelanga kuhengwa, ngapena bhakabhujanga kwa bhenibhala bhabhakaatumanga. 34 Nambo Asila akaigalila kolakola.*

35 Apaulo na Abanaba bhakaigalila konokwe ku Antiokia kwa machobha kachoko, bhakaajigananga na kutangachanga Ngani Jammbone ja Hangwana, pamo na bhandu bhangi bhajingi.

36 Pagakapeta machobha kachoko, Apaulo akalobholela Abanaba, "Tubhuje tukaatyangilange bhenibhala akapwanga mu kila chilambo yoha hiitutekutangacha Ngani Jammbone tulole namuna chibhaendeleanga." 37 Abanaba akapala bhantole Ayohana jwabhankemita Amaliko ajaule pamo nabho. 38 Nambo Apaulo jwangapala kuntola Amaluko, yakubhe kandai akaaleka konikola ku Pamfulia na kukana kupanga mahengo gabhenji. 39 Bahi, kukabhokela kutaukananga pakati jabhenji, henela bhakalekananga. Abanaba akantola Amaluko, bhakakwela meeli kujaula ku Kupulo. 40 Nambo Apaulo akanhagula Asila na bhenibhala bhabhakaahobhalela Ayesu bha penipala bhakaajopa Annoongo abhatendelange gammbone, ngapena akabhoka. 41 Mu ulendo gonogwe akapetela ku Silia na ku Kilikila, akaabhekanga maha bhandu bhabhaahobhalela Akilisito.