1 Palikaika lichobha likolongwa lya Pentekosite, bhabhakahobhalela Ayesu bhakakondekananga pamo. 2 Ng'ang'anu, lilobhe likajohanika kubhoka kunani, lilobhe lilikibha handa chimboonga, chikatwelea mu jenijela nyuumba joha mubhakibhanga bhatamitinge. 3 Ngapena, hikabhonekana hilebhe handa ndetelehi ya mooto, hikametunika na kutola nnani ja kila jumo jwabhenji. 4 Bhoha bhakatandahikwangwa na Mboomo ja Annoongo, bhakajemekanga kulongela hilongelo yangali yabhenji handa Mboomo ja Annoongo chibhakaakomboleanga bhalongelange.

5 Konokwe ku Yelusalemu bhakibhanga Bhayuhudi, bhandu bhabhaobhalela Annoongo, bhabhabhokitinge mu kila chilambo pachilambo. 6 Pabhaakajohanga lilobhe helyo, libhoga likolongwa lya bhandu lilikakondekana pamo. Bhoha bhakang'ang'anukanga muno kwakubhee kila jumo jwaabhenji akaajoanga chilongelo chabhe chibhikulongelwa na bhenibhala bhandu bhabhahobhalela Ayesu. 7 Bhakakangachanga na kuhechukanga, "Bholi, habha bhoha tutendanga kwajohanga bhabhikolongelanga henela, ngabha bhandu bha ku Galilaya? 8 Hibhibholi bahi, yakubhehe kila jumo jwitu atendakujoa bhabhikulongela cha ku kaaja? 9 Pakati jitu bhabhokitinge ku Filisiti, ku Amedi na ku Elamu, bhangi bha ku Mesopatamia, ku Yudea, ku Kapadokia, ku Pontio na ku Asia. 10 Bhangi bhabhokelanga ku Fulugia na ku Pamufulia, ku Misili na chehemu ja ku Libya kubhandikila na ku Kilene, bhangi bhitu nga akaageni kubhokela ku Loma, 11 Bhayahudi na bhandu bhabhajingilinge mu dini ja Chiyahudi, bhangi bhakabhokelanga ku Kilete chilambo chichindilwe na machi na ku Alabia. Twenga twabhoha tutenga kujoha bhabhikulongelanga hikubho hikolongwa hibhatendita Annoongo kwa chilongelo chitu twaabhene." 12 Bhandu bhoha bhakakangachanga na kuhechukanga kongo bhabhikonyananga, "Heje maana jakwe niki?"

13 Nambo bhangi bhakaatendelanga mbenje bhakalobholanga, "Habha bhandu bhatekolwelanga!"

14 Ngapena Apetulo akajema ja bhenibhala akandundame komi na jumo akaajemeka kwajigananga bhandu kwa lilobhe likolongwa, "Mwakaanung'una bhangu Bhayahudi mwangota bhoha bhantamanga pambani pa Yelusalemu, nnyohanikiange maha malobhe gangu. 15 Bhandu habha bhangakolwelanga handa chinng'anikianga, mboni nangocheni nga chaa tatu ja kundabhi? 16 Nambo hele nga lilobhe libhakalobhola Ayoeli alondohi jwa Annoongo,

17 ‘Hangwana alongela, mu machobha genigala ga kupela,

mbakwaletelanga bhandu bhoha Mboomo jwaangu.

Bhana bhinunji akanalome na hakaikege bhapakubhoanga ulondohi.

Na akanangwendu bhinunji bhapakulolanga hagamii,

na hihokolo hinunji bhapakuhagamilanga hagamihi.

18 Kweli, bhatumichi bhangu akanalome na hakaikege,

mbakwaletelanga Mboomo jwangu machobha genigala, nabhena bhapakubhoanga ulondoi.

19 Mbakutenda yakangachika nnani kwa Annoongo,

na hilolelo pahi pachilambo,

kupakubhehe na miyai, mooto na lyohi lyakutopa,

20 lyobha lipakulekelwa lubhendu,

lwehi gupakubhehe nkele handa miyai,

tangu ja kubhokela lyenile lichobha likolongwa na ung'anyimo gwa Hangwana.

21 Penapo, joajola jwapakujopa kupetela lihina lya Hangwana, apakuokolewa.’"

22 "Bhandu bha ku Isilaeli, nnyoanikiange malobhe gangani! Ayesu bha ku Nazaleti akibha mundu yakubhehe mamulaka gabhe ga chinnoongo gakalangikwa kwinunji kwa kutenda yakangachika, hikangachiko na hilolelo Annoongo hibhakatenda pakati jinunji kwa ndela jabhe, handa chimmanyanga. 23 Kulongana na ndela jabhe Annoongo bhene akakulumikia kubhee mwangota mwakamule Ayesu na mwangota nkankoma na kunkamua kwa bhandu bhangali mmbone bhaabhambe panchalaba. 24 Nambo Annoongo akaayoha, akahokoa kubhoka mu hibhini ya malilo kwakubhee hikakombolikehopo malilo gaatabhe. 25 Adaudi akalobhola nnani jabhe kubhee,

‘Nakaabhona Hangwana nnoongi jangu machobha goha,

kubhee jonojwe akabhandikana na nenga hata ngapukunyika.

26 Henela, ntima gwangu gukahachuka,

kabhele ngapoota hilulu ya kuangalala.

Mmele gwangu gupakutama mu kuhobhalela,

27 kwakubhee mwenga Hangwana Annoongo ngaleka mboomo jangu ku lihembo litandamao lyangapela,

wala ngaleka antumichi bhinu bhakuaminika abhole mu likabuli.

28 Ntekunangia ndela jijindandaa ku umomi,

ndendakuhachuka muno ligongo nibhile kwaachinu!’"

29 Akanung'una bhangu, mbala kunnobholelanga ngani ja hikubho hiiyapatite Adaudi, akolo bhitu. Bhenabho akajomoka, akachikwa, kabhele likabhuli lyabhe libhile panipani paachitu mpaka leleni. 30 Nambo kwakubhee Adaudi akibha halondoi, bhakaimanya kubhehe Annoongo akaalapila chilapo yakubhe apakwajelea jumo jwa ubhelehi gwabhe kubhehe hakolo mahali pakwe. 31 Adaudi akalola tangu hikubho hiipakutendekwa na Annoongo na henela akalobhola ngani ja kuyoka kwa Akilisito pabhalobhola, Ngaaleka mu lihembo litandamao lyangapela, mmele gwabhe gwangabhola. 32 Annoongo nga jwaakaayoa jonojwe Ayesu na twenga twabhoa nga tukachilola chikubho hecho. 33 Ayesu pabhakatolekwa na kubhekwa na Annoongo upande gwabhe gwa kunnelo, akapokela Mboomo ja Annoongo kubhoka kwa Atati jonijola jubhakanhaidi, atekuteletela Mboomo ja Annoongo. Chenjeni nga chimuchibhonanga nangocheni na kujoanga. 34 "Adaudi bhene, jwangatolekwa kunani kwa Annoongo, ila jonojwe akalobhola,

‘Hangwana akaalobholela Hangwana bhangu,

ntame upande gwangu gwa kunnelo,

35 mpaka pambakutenda mwaatandae akaapwati bhinu.’"

36 "Bhandu bhoha bha ku Isilaeli bhamanyange kubhee, kweli hojo nga Ayesu bhantekwabhamba, nga jonojwe yakubhee Annoongo jwatekwatenda kubhehe Hangwana na Akilisito."

37 Bahi, bhandu pabhakajoanga genago, ikaabhinanga mu mitima jabhenji, bhakabhakonyanga Apetulo bhenibhala akandundame ajabhe, "Akaanung'una bhitu nangocheni tutendebholi?"

38 Apetulo akaajangula, "Nnekange kulemwa kwinunji na kila jumo jwinunji na abatichwe kwa lihina lya Ayesu Akilisito ili mpatange kulekelelwa kulemwa kwinunji na mwangota mpakupokelanga ahadi jenijela ja Mboomo ja Annoongo. 39 Kwakubhee, ahadi jenjeni nkabhekewa mwangota, na bhana bhinunji, na bhoha bhabhatamanga kutali na ligongo lya mundu yakubhee Hangwana Annoongo bhitu apakwajinula kwaachabhe."

40 Malobhe gangi gajingi, Apetulo bhakakachimila na kwakulumikianga bhandu kulobhola, "Nchiokoange kubhoka mu chibhelehi heche chibou." 41 Bhandu bhajingi bhakakondanga malobhe gabhe bhakabatichwanga. Bhandu handa elupu tatu bhakajonjokeka mu chenichela chibhoga chichahobhalela Akilisito lichobha helyo. 42 Habha bhoha bhakaendeleanga kuchijigana kubhoka kwa akaandundame, na bhakalyanganga pamo handa akaanung'una, na kwajopa Annoongo.

43 Hilolelo na yakangachika hijingi gakatendeka kwa ndela ja akaandundame hata kila mundu akibha na bhoga. 44 Bhandu bhoa bhabhahobhalela Akilisito bhakaendeleanga kubhee chilebhe chimo na hilebhe yabhenji bhakametunilananga.

45 Bhakibhanga bhatendanga kuhuchanga hilebhe yabhenji na kuchimetulilanga mbiya handa hela kila mundu chaapalite. 46 Bhakaendeleanga kongonanga pamo kila lichobha pa Nyuumba ja Annoongo. Nambo pabhalilaje, bhakonganilanga pa nnyuumba yabhenji na kulyehe pamo kwa kuhangalalanga na ntima chindegele. 47 Bhakaalumbalilanga Annoongo na bhandu bhoa bhakabhajilwa na bhenaangota. Kila lichobha Hangwana akaajonjokeanga bhandu bhabhatenditandanga kuokolewanga.