1 Apaulo akaalolekeha muno bhenibhala akanahota bha Chebule, akajemeka kulongela, "Akaanung'una bhangu, mpaka leleni ndenda kutama kwa ntima chindegele nnoongi ja Annoongo." 2 Ligongo lya chikubho heche Akung'i Akolongwa Anania bhakaakulumikianga bhenibhala bhabhakibha bhabhandikile Apaulo bhampote makopi pakang'wa. 3 Bahi, Apaulo akaalobholela, "Annoongo bhene apakumpota mwenga andendemundu bhaammile handa likukumba gwabhapakihe wakala! Kwakubhee ntamite penapo ili kunhukumula kwa malagilo na kongo mwe mwabhene ntendakuleka malagilo kwa kulumikia mbotekwe?"

4 Bhenibhala bhandu bhabhakajemanga kubhandikila na Apaulo bhakaalobholela, "Bholi, ngajogopa kwatukana Akung'i Akolo bha Annoongo?"

5 Apaulo akajangula, "Mwakanung'una bhangu, nangaimanya yakubhee bhenabho bhakibha Akung'i Akolo. Kwa kubhee jijaandikwe, ‘Nkotokwaalongelela ngangali mmbone akolo bha bhandu bhinu.’"

6 Apaulo pabhakaimanya kubhee bhandu bha jenijela Chebule bhakibhanga Mafalisayo na bhangi bhakibhanga Masadukayo, "Mwakaang'una bhangu, nenga na Amfalisayo, na akaabhelei bhakibhanga Amfalisayo. Pambani bhatekundakia ligongo lya kuhobhalela kubhee bhandu bhabhawilinge bhapakuyokanga."

7 Pabhakajomola kulongela henela, mpwato kukajemeka pakati ja Mafalisayo na Masadukayo na Chebule joha jitekumetunika. 8 Ligongo lya kumetunika kwebhenji kukibha hoko, Masadukayo bhalongelanga kubhee gwakwa uyoho, wala jwakwa ntumichi jwa kunani kwa Annoongo wala mboomo, nambo Mafalisayo bhatendakuhobhalela hagaga goha gatatu. 9 Kukabhee na ukomu nkolongwa, bhabhajigana Malagilo ga Amusa bhangi yakubhee nga chibhoga Mafalisayo, bhakajemanga kutaukana kwa machili bhakalobholanga, "Twangabhona kulemwa kohakola kwa mundu hojo! Komboleka likabhee lihoka au ntumichi jwa Annoongo atendakongoloka nabho." 10 Bulwa gukibha nkolongwa muno hata jonijola akolo bha manyemba akajogopa kubhee Apaulo bhakaahekite hipande hipande. Henela akakulumikianga manyemba gakwe kujingilila nkati ja lyenilyela lilubhalo bhakaabhoe Apaulo na kwabhujia mu ngome.

11 Kilo chela, hangwana akajema kubhandikila na Apaulo, "Nkotokujogopa! Handa chimwalobholilinge bhandu pambani pa Yelusalemu, mpakutenda hela hela kunokwe ku Loma."

12 Papakachee Bhayahudi bhakatenda chikomiti cha ntemela bhakakondenanga kwa kulapila kubhee, "Tulyeehopo wala tung'weehopo choachela mpaka patupakwakoma Apaulo." 13 Bhandu kupunda alobaini nga bhabhakongana na kulapila kutenda chene chikubho. 14 Bhakaendelea akanachilongola bha akaakung'i akolo na akanahota kulobhola, "Tutekutabha pamo kwa kulapila yakubhee tulyeehopo wala tung'weehopo choachela mpaka patupakwaakoma Apaulo. 15 Henela bahi, mwangota pamo na Chebule bhapelekange ngani kwa akolo bha manyemba ili bhaalete Apaulo kwinunji, ntechitendange handa mpalanga kwakonyelekea muno nnani ja ngani jakwe. Natwenga tubhile tayali kwaakoma bhabhi tangu bhangaika pambani."

16 Nambo mwipwa jwabhe Apaulo pakaajoa nnani ja ngani hejo jibou, akajaula kunikola ku ngome ja manyemba na kwaalobholela Apaulo. 17 Ngapena Apaulo akankema jumo jwa akolo jwa lilubhalo lya manyemba akaalobholela, "Mupeleke hojojo akakombo kwa akolo, atekola chilebhe cha kwaakongolela." 18 Henela jonijola akolo jwa lilubhalo lya manyemba akaapeleka jonijola kakombo kwa akolo bha manyemba akaalobholela, "Apaulo, jonijola ntabhikwa, akangema na kunyoopa ninnete hojojo kakombo kwachiinu, ligongo atekola chilebhe cha kunkongolela."

19 Jonijola akolo akakamula jwajola kakombo lubhoko, akapeleka nnyenje na akaakonya, "Mpala kungongolela chiniki?" 20 Jonijola kakombo akalobhola, "Bhayahudi bhatekondananga bhanyoope mwapeleke Apaulo ku Chebule jikolo, lyabhenji malabhi kwa lujambuo yakubhee bhapalanga kutendanga uchunguchi muno gwa ngani jabhe. 21 Nambo nkotokondana nabho kwa maana bhabhile bhandu makomi ncheche bhabhabhilinge tayali kwajobhalela. Bhatekutabhanilanga kwa kulapila ngalyanganga wala kung'we mpaka bhaakome Apaulo. Nangocheni bhabhilinge tayali, bhalendela mwaajeketele kujopa kwabhenji." 22 Jonijola akolo bha manyemba akaanneka ajaule na akaanyamuka abhikulobhola, "Nkotokunnobholela mundu joha jola yakubhee ntekunobholela ngani heyeye."

23 Ngapena jonijola akolo bha manyemba akakemanga akaakolo bhabhele na kwalobholelanga, "Mwabhekange maha manyemba mia hibhele, bhandu bhabhakwelanga falasi makomi saba, na manyemba bhabhabhilinge na mikoha mia hibhele, mmangange tayali kujaulanga ku Kaisalia chaa tatu ja kilo ja leleni. 24 Kabhele mmekange maha falasi yengi hiipakutumiwa na Apaulo mumpelekange na kwahikia maha, kwa Afelikisi atawala bha ku Yuda." 25 Ngapena akolo akajaandika balua kwa Afelikisi atawala bha ku Yuda henela.

26 "Nenga Akilaudio Lusia, ndendakunnyandikila mwenga akolo Afelikisi, kupala kunchalimia. 27 Bhayahudi bhakaakamula mundu hojo na bhakapalanga kwakoma. Nambo panakapata ngani kubhee nga mundu jwa ku Loma nakatola malubhalo gangu ga manyemba kwahokoa. 28 Nakapala kuimanya alemwite chiniki, henela nakaapeleka nnongi ja Chebule jabhenji. 29 Henela nakahimanya kubhee ngani jene jikibh nnani ja mitau nnani ja malagilo habhenji, henela nangabhona choachela chibhakalemwa na chichipakwatenda akomekwe au kutabhwa mu nyuumba ja kutabhila bhandu. 30 Panakalobholelwa kubhee Bhayahudi bhalolea ndela ja kupala kwakoma, nakabhona mbaya naalete kwachinu na nakaalobholelanga bhenibhala bhandu bhabhate kwatakia bhakongolele nnoongi jinu chibhaatakia."

31 Henela manyemba, kwa kukagula gabhakalobholelwanga, bhakaatola Apaulo kilo kwaapeleka mpaka ku chilambo cha Antipatili. 32 Malabhi jakwe bhenibhala manyemba bhabhajendita kwa makongono bhakabhujanga ku ngome ja manyemba, bhakaalekanga bhenibhala manyemba bhakwalenga falasi bhakaendeleanga na ulendo pamo na Apaulo. 33 Manyemba gala pabhaikanga ku Kaisalia na kwapekea balua jonijola Afelikisi atawala bha ku Yuda na kwabheka Apaulo pahi ja ulendei gwabhe. 34 Atawala Afelikisi pabhajomola kujichoma balua hejo akaakonya Apaulo mmokite koji. Pabhakaimanya kubhee abhoka ku Kilikia, 35 akalobhola, "Mbakujoanikia nhalo gwinu pabhapakuikanga pambani." Ngapena akakulumikia Apaulo bhaabheke pahi ja ujemelei nkati ja chebule ja amwenye Ahelode.