1 Lichobha limo, chaa ticha kimuho, Apetulo na Ayohana bhakibhanga bhatendakujaulanga ku Nyuumba ja Annoongo, muda gwa kwaajopa Annoongo. 2 Wakati hogwe bhandu bhakibhanga bhampapitinge mundu jumo nangwabha chibhelekwa. Bhandu habho bhatenditanga kummekanga jono mundu kila lichobha pa nniyango gwa Nyuumba ja Annoongo gukemitwa, "Nniyango gwa Kuhalala" ili ajope choachela kwa bhenibhala bhabhajingilanga pa Nyuumba ja Annoongo. 3 Jono mundu pabhakaabhona Apetulo na Ayohana bhabhikujingilanga pa Nyuumba ja Annoongo, akaajopanga bhapekehe mbiha. 4 Apetulo na Ayohana bhakaalolekea muno, na jono Apetulo akaalobholela, "Ntulole!" 5 Nabhena akaatendebhukila, bhabhikulolela kupata chilebhe kubhoka kwachabhenji. 6 Ngapena Apetulo akaalobholela, "Nanga mbiha, nambo chenichela chibhinacho mbakumpekeha. Kwa lihina lya Ayesu Kilisito bha ku Nazaleti nnyeme nnyaule!" 7 Akaakamula lubhoko lwa kunnelo, akajinula. Popopo makongono na hindindili yabhe hikabhee na machili. 8 Akahomba, akajema na kujemeka kujenda. Penapo akajingila pamo nabho pa Nyuumba ja Annoongo, abhikujenda na kuhombahomba kongo abhikwalumbalila Annoongo. 9 Bhandu bhoha bhakaabhona abhikujenda na kwaalumbalila Annoongo. 10 Pabhakaamanya kubhehe nga jonijola jwatendita kujopajopa kubhandikila na gonigola, "Nnyango gwa Kuhalala" pa Nyuumba ja Annoongo, bhakakangachanga muno hata bhakotokuelewanga gagaapatite.

11 Mundu jono akibha bhalogine na Apetulo na Ayohana. Bhandu bhoha, bhakakakangachanga muno, bhakajemekanga kubhutukilanga mahali papakemitwa, "Lubhanja lwa Aselemani," 12 Bahi, Apetulo pabhakaabhona bhandu habho akaalobholelanga, "Mwabhandu bha Isilaeli, kwa niki ntendangakangachanga ligongo lya chikubho heche? Kwa niki ntendanga kutulolekeanga miho handa henela twenga nga tutendite kwa machili gitu hojo mundu akombole kujenda au twenga nga bhammbone nnoongi ja Annoongo? 13 Annoongo bha akaakolo bhitu Aibulahimu, Aisaka na Ayakobo, bhatekwatukucha antumichi bhake Ayesu. Bhena nga jolajola jumukaakamula na kwakana nnongi ja Apilato hata baada ja Apilato kulobhola kwaalekelekea. 14 Ayesu akibha mundu jwa Annoongo na jwambone, nambo mwangota nkankananga. Nkampalanga mundu joongi jwaakibha akomi bha bhandu ajogolelwe. 15 Bahi, nkankomanga jonijola jwaapekeanga bhandu umomi. Nambo Annoongo akaayoa, na twenga nga tutubhonite na kuchikongolela chikubho hecho. 16 Kwa kuhobhalela mu lihina lya Ayesu nga kutekunpekea machili hojo mundu mummonanga na kummanyanga. Kwahobhalela Ayesu nga kutekwalaamia mundu hojo handa chimummonanga mwabhoha."

17 "Nangocheni mwakaanung'una bhangu, ndendakuimanya kubhehe mwangota na akolo bhinunji nkatendanga genago ligongo lya kwangaimanyanga kwinunji. 18 Nambo nga Annoongo akagatenda genigala gabhaakatangacha lolo kwa ndela ja akaalondoi bhoha, kubhee Akilisito apalikwa alage. 19 Bahi, nkotimange, mwabhujilange Annoongo ili jonojwe annekelelange kulemwa kwinunji. 20 Ntendange henela ili Hangwana ampekeange muda gwa kuhangalala mumitima jinunji na kunnetelanga jonijola Akilisito jwabhahagwile ligongo linunji yakubhe nga Ayesu. 21 Hipalikwa jonojwe ahigalile konokwe kunani kwa Annoongo mpaka chigupakuika wakati gwa kuhalakilwa hilebhe yoha, handa Annoongo chibhalongile kwa ndela ja akalondoi bhabhe bhatakatifu kubhokela lolo. 22 Hela hela Amusa akalobhola, ‘Hangwana Annoongo bhinu apakwatuma alondoi kwachinunji handa chibhandumite nenga kubhoka pakati jinunji. 23 Joajola yakubhee ngannyoanikia alondoi hojwe jwa Annoongo, apakwabheka kutali na bhandu bha Annoongo na kwatinihanga.’ 24 Akaalondoi bha Annoongo bhoha, kujemeka Asamweli na bhenibhala bhabhakagwile, bhakatangachanga ngani ja hikubho heyeye yakubhe gatendakutendeka machobha gangani. 25 Genigala gabhakalongela Annoongo hibhakaibhoa kwa ndela ja akaalondoi bha Annoongo nga ligongo jinunji, na ntendakulondanika na liagano Annoongo libhakalitenda na akahokolo bhinu, handa Annoongo chibhakaalobholela Abulahamu kubhee, ‘Kubhokela mu ubhelei gwinu, bhandu bhoa bha pachilambo apakutendelelwanga gammbone.’ 26 Bahi, Annoongo akaayoha antumichi bhabhe ligongo linunji, akajemeka kwaatuma kwaachinu antendelange gammbone kwa kuntenda jumo jwinunji aleke ubohu gwabhe."