1 Hela hela Asauli akachibhona chikubho hecho cha kwaakoma Asitefano kubhee chammbone.

Lichobha helyo lilubhalo lya bhandu bhabhahobhalile Akilisito bha ku Yelusalemu likajemeka kulaga muno. Bhandu bhabhahobhalela Ayesu bhoha, pangabhe tu bhenibhala akandundame, bhakajenelanga mu chehemu ja mmigonda ya ku Samalia. 2 Bhandu bhabhahobhalela Annoongo bhaakachika Asitefano na kwaapunda kwaagutila muno.

3 Wakati gogogo, Asauli akalenga kulilagiha lilubhalo lya bhandu bhabhahobhalela Akilisito. Akajaula kila nyuumba, bhakaapianga panja bhandu bhabhahobhalile Ayesu, akanalome na akaikege, na kwatabha mu nyuumba ja kutabhila bhandu.

4 Bhenibhala bhandu bhabhakahobhalela Ayesu bhabhakapwilinganika, bhakatangachanga Ngani Jammbone koha kubhakajaulanga. 5 Hela hela Afilipo akajingila mu chilambo cha ku Asamalia na kwatangacha Akilisito kwa bhandu bhabhatamita konokwe. 6 Bhandu pabhakaajoa Afilipo na kuilola hilolelo na yakangachika hibahaitendite bhakachilondanikanga na kujoanikianga kwa kuchitimalika. 7 Mahoka gagakatama nkati ja bhandu gakaabhokanga kongo bhabhikupotanga nyenye muno. Na bhandu bhangi bhajingi bhabhakapolanga yega yabhenji na bhabhalemilinge bhakalamiwanga. 8 Henela bhandu bha chilambo chela bhakahangalala muno.

9 Bahi, kukibha na mundu jumo ahabhi jwaakeemitwa Asimoni yakubhehe akibha atendite uhabhi gwabhe mu chilambo kwa muda hogwe na kwakangachianga bhandu bha ku Chamalia, abhikuchilola kubhee jonojwe nga mundu jwakumanyikana muno. 10 Bhandu bhoha, akaachoko na akaakolongwa bhakalobholanga, "Asimoni nga machili ga Chinnoongo gagakemwa, ‘Machili Majingi.’" 11 Bhakaajoanikia muno kwa henela akibha atekwakangachianga kwa uhabhi gwabhe kwa muda ntandamao. 12 Nambo pabhakagaobhalelanga malobhe ga Afilipo kupetela Ngani Jammbone ja ukolo gwa Annoongo na ngani ja lihina lya Ayesu Kilisito, bhakabatichwanga, akaikege na akanalome. 13 Hata Asimoni hela hela akaobhalela Ngani Jammbone, na pabhakabatichwa akibha atendakulongana na Afilipo, akakangacha hilolelo na yakangachika hihikatendeka.

14 Bhenibhala akandundame bhabhakibhanga konikola ku Yelusalemu pabhakapatanga ngani yakubhehe bhandu bha ku Samalia nabhena bhabhakonditinge Lilobhe lya Annoongo, bhakaatuma Apetulo na Ayohana bhajaulange konokwe. 15 Pabhakaikanga konokwe bhakaajopelanga bhandu bhabhaobhalela Ayesu ili bhajipokelange Mboomo ja Annoongo, 16 kwa kubhee muda hogwe Mboomo ja Annoongo akibha angaatulukila mundu joajola pakati jabhenji, bhakibha bhatekubatichwanga tu kwa lihina lya Hangwana Ayesu. 17 Bahi, Apetulo na Ayohana bhakaabhekelanga mabhoko bhen bhandu bhabhaobhalela Ayesu, nabhena bhakaakonda Mboomo ja Annoongo.

18 Penapo Asimoni akahimanya kubhee kwa kwaabhekela mabhoko ga akandundame na bhabhakaahobhalela Ayesu bhakaapekeanga Mboomo jabhe henela akabhoa mbiha na kupala kwaapekea Apetulo na Ayohana kongo abhikulobhola, 19 "Mmbekeange na nenga hela hela uwecho hogwe kubhee jwaajola jwambakummekela mabhoko apokele Mboomo ja Annoongo."

20 Nambo Apetulo akaajangula, "Mmoke pambani na mbiha hinu kwa henela ng'anikia yakubhe mpakombola kuhemela uwecho gwa Annoongo kwa mbiha! 21 Mwanga choachela mu lihengo helye kwa kubhee ntima gwinu ngakoondekwa mu kwaajopa Annoongo. 22 Henela, nkotime ubohu gwinu na mwajoope Hangwana annekelele kuganikia kwinu kubohu. 23 Nenga ndendakuhuchunika muno ndendakummona ntwelile hibhini hijingi na ntabhwitwe na mabohu!"

24 Asimoni akajaangula, "Choonde, nnyoopelange kwa Hangwana likotokumbata lyoha lyela pakati ja genago gannongilinge."

25 Apetulo na Ayohana pabhakajomolanga kulongela genago na kutangachanga Ngani Jammbone ja Annoongo, bhakabhujanga ku Yelusalemu. Pabhakibhanga bhatenditanga kubhujanga bhakatangachanga Ngani Jammbone mu hijiji hijingi ya ku Samalia.

26 Akaatumichi bha kunani kwa Annoongo akaalobholela Afilipo, "Nchibheke maha nyaule kusini kupetela ndela jijibhokela ku Yelusalemu kujaula ku Gaza." Ndela jenejo jipetela kululemba. 27 Bahi, Afilipo akachibheka maha, akajemeka ulendo. Pabhakibha nndela akakongana na anachilongola jumo jwa ku Ethiopia, anachilongola jonojwe akibha, jwakatimbilila lupenu, yakubhee akibha ulendo kujaula kwaachabhe. Jono mundu akibha ajemelei jwa hilebhe ya amalikia Kandake jwa ku Ethiopia. Akibha atendakubhuja kubhoka ku Yelusalemu kwaajopa Annoongo. 28 Pabhakibha mu ulendo kubhuja kaaja akibha akwelite mutuka jijihutwa na mnyama nkolongwa jwakemitwa falasi, akibha atenda kuchoma chitabu cha Aisaya, alondohi jwa Annoongo. 29 Bahi, Mboomo ja Annoongo jikaalobholela Afilipo, "Nhegelele mmandikile na mutuka hejo nnongane nalyo." 30 Afilipo akabhutukila kujibhandikila na mutuka, akaajoa mundu hojwe abhikuchoma mu chitabu cha Aisaya. Penapo Afilipo akaakonya jonijola akolo, "Bholi, ntendakugamanya maha genago ganchoma."

31 Jono nkolo akaajangula, "Ngombolabholi kuimanya panga mundu jwa kunyigana?" Penapo akaalobholela Afilipo, "Nkwele mmutuka ninnyigane." Ngapena akakwela na kutama pamo nabho. 32 Bahi, chehemu ja Majaandiko ga Annoongo, gabhachomitaje gakajandikwa henela,

"Akibha handa mwana ngondolo jwapelekwa kuchinjwa,

akatama jii handa mwanangondolo paheketwa manjoja,

jonojwe jwangabhoa lilobhe hata kachoko.

33 Bhakaabheluha na kwaabhonela,

Jwaakwa jwapakombola kulongela nnani ja chibhelehi chabhe,

kwa kubhee umomi gwake gatekubhokekwa pachilambo."

34 Jonojwe mundu jwa ku Ethiopia akaakonya Afilipo, "Nngongolele, habha alondohi alongela ngani ja ganiki? Alongela hikubho heye ngani jabhe bhene au ngani ja mundu joongi? 35 Bahi, Afilipo akajemekela chehemu hejojo ja Majaandiko ga Annoongo, akaalobholela Ngani ja Mmbone ja Ayesu. 36 Pabhakibhanga tangu mu ulendo, bhakaikanga pagabhile na machi, na bhena Akolo bhakalobhola, pamba pabhile na machi, bholi, chaakwa chohachela cha kunhibhila ngotokubatichwa?"

37 Afilipo akalobhola, "Handa ntendakuobhalela kwa ntima gwinu goha ntenda kubhatichwa?" Nabhena akajangula, "Kweli, ndendakuobhalela kubhee Ayesu Kilisito nga Amwana bha Annoongo."

38 Bahi, jono akolo akakulumikia jenijela mutuka jijeme, na bhoha bhabhele, Afilipo na jonijola akolo bhakatulukanga, na kujingila mmachi, ngapena Afilipo akaabaticha. 39 Pabhakabhoka mmachi Mboomo ja Hangwana akaatenda Afilipo abhoke. Na jono jwaatindile lupenu jwangammona kabhele, nambo akaendelea na ulendo gwabhe abhikuhangalala. 40 Afilipo akachikolela abhi ku Azoto, akapeta hilambo yoha kongo abhikutangacha Ngani ja mmbone mpaka pabhakaika ku Kaisalia.